|
Re: اجي يا الخروف الما عندو صوف (Re: ادريس خليفة علم الهدي)
|
عندنا زميل لينا بحب ميزات العساكر اصلو العسكر منفكين شويه في حكاية البلوم وزميلنا دا عندو مثل بقولو طوالي ((ونسة الضكير للضكير النوم منها اخير)) . أها الراجل سمع خبر مولانا وجانا جري والشماته ماليه عيونو والخباثه ما وراء الخبر شايلها في شلاليفو . قال لي ... شنو يا زول قالو قرضه مولانا رشيتو بحبوب والناس ختفتو جرت بيهو المستشفي جنازة خربت للناس خميس الخروف اها عندي ليك الكلام المنو الفايده زمان قدر ما نقول نعمل صحبه مع العساكر يومين وتخربا لينا بشكله ما دام خميسنا هنا طرشق يلا نمشي ميز ناس السجون اصالحك بيهم ونخمس معاهم الظروف ما معروفة لي قدام عشان اكون عندك ركازه معاهم. الخبر كان موتر وبما انو في اللحظات دي بتلقي ليك ناس شماته برضو في ناس حلالين مشاكل الصيدلي صاحبي جري المستشفي والنبطشيه كان فيها دكتور منتظرها بفارق الصبر تنتهي عشان الحق الخميس وصل ليهو كل المعلومات واشتغلو علي اسعاف الراجل. نسيت الخميس واصبحت ما فارقه معاي اتوكلت علي الله ومشيت السينما لقيت لي فلم هندي بطولة ابوطويله ((اميتاب بتشن)) اشتريت لي كوم تسالي وخشيت اربعة ساعات كافيه توريك نتيجة العملة بتاعتك شنو قومي يا الكهرباء اقطعي في نص الفلم وتعالي يا الصفافير والكوراك بعد شويه الكهرباء جات قوم يا البتشغل الفلم من الاوضه فوق ابدأ لينا موضة التقطع مرة الفلم اشتغل مرة اقطع والزول البشغل ماكينة السينما ما خلينا ليهو جنبه ...يا ود ال... يا ..... الفلم انتهي. مشيت حي الموظفين علي الميز لقيت الحي هااااااااااديء والناس نايمه لا كواريك لا سكاليب براحة طلعت الميز لقيت زولي واقف لمبة بتاع الشماته قال لي طلعت منها مولانا قالو كويس بعد الاسعافات ممكن انوم ليهو قريب اليوم كامل ودوهو البيت يلا لي صاحبك العربي ما اكون ضرب الخروف براهو. صاحبي العربي مشكلة بيتو بتاعت المفتشين الفيها جنينه وسور بسلك شايك عندو كلبـــــ ين كبار كان ما جاك بره ما بتقدر تخش ليهو قلت ليهو شوف انت عارف انا جني وجن الكـــــــ لاب لو بتخش بمشي معاك الراجل حسب الفي راسو وجيعان وافق مشينا علي صاحبي. انا وقفت بعيد قلت ليهو يلا ادقش بيت الزول قال لي انت يعني تخصصك كتل ناس وبتخاف من الكــــــ لاب ومشي علي البيت عدل كراع قدام والتانية وراء واقابض في الشجر وصل الباب دقشو بكرعين زي باب بار افلام الكاوبوي والكـــــــــ لاب قامت فيهو جووووووووووووو ما جاب خبرها بعد شويه اشوفو طابق المفتش صاحبي وجايين علي. خشو في نقاش الخروف وين وديتو؟؟؟ قال الخروف قاعد جوه وقامت عباطة الطشامه الاثنين واقفين لمبه واحد اقول نضبحو حسي والثاني اقول الوقت اتاخر نخلي الخميس الجاي زميلنا قال خلاس ما عايز خروف قروشو اجيبو ليهو بيها عشاء بالليل دا وقامت شكله عبيطه ما تفهم اولها من اخرها. المفتش قال ليهو قروشك ما عندي امشي للزول داك اسألو من القروش كمان زميلنا حاكمه معاهو في الخروف اقول ليهو أنا قروشي في الخروف انشاءالله تصحي مرتك تسوي لي عشاء بالليل دا اها لما قال الجملة الاخيره قلت الراجل ممكن اجيب لينا مصيبه مما جاب سيرة المراة كريتو من يدو وقلت ليهو انا بجيب ليك العشا اتفقنا الخميس الجاي مع المفتش. وصلنا الميز الراجل حاكمه معاهو في العشأ كرهني الميز قلت ليهو والله قسما عظما تجي علي غرفتي الحقك مولانا بكورس كامل بتاع حبوب يا نمتا اسبوع ولا لحقت امات طه عشا شايف عندي كشكش في السوق الشعبي امشي اندمل نوم. الخميس البعدو حاولنا نخلي الامن مستتب والجماعه شغالين وصاية من يوم السبت لي الاربعاء ما دايرين شوشره اتجمعنا ومشينا للمفتش الراجل قابلنا في الباب عشان الكــــــــ لاب ولقيناهو مجهز الكراسي والنجيله مرشوشه ما باقي لينا كان الملايات وفلييل دمور. والجبنه المضفره والبصل الابيض قدر ما اتلفتنا ما شفنا خروف ولا سمعنا صوت باع باع قلنا امكن ضبحو العصر بنطمن في روحنا واحنا قاعدين جات مرتو السمحه خاشه تتقدل كانت مع الجيران سلمت علينا من بعيد وطوالي بباب النملي خشت جوه. زميلي بتاع ميز العساكر الجن ركبو دنقر جمب اضاني قال لي الزول دا مرتو ما احترمتنا ما سلمت علينا في يدينا ..... اها قلت الزول دا عايز إلخبت نشوف موضوع العشاء. يا حبيبنا الكلام للمفتش شوف لينا موضوع العشاء الخروف ضبحتو ولا لسع وينا المراره؟؟؟ الراجل قال الخروف شرد !!!!! الجماعه زي الصبت فيهم مطره ... كيف شرد !!! مولانا البخاف من ريسو البلعناهو الحبوب بسخريه قال ليهو دا خروف ولا مضمون ((مضامين السجون البشتغلو في الميزات))!!! زميلي بتاع ميزات العساكر جنو وجن العشأ بعد الطشه شبكه لينا جملة واحده.... اجي يا الخروف الما عندو صوف دا علينا احنا... اجي يا الخروف الما عندو صوف دا علينا احنا.. اجي يا الخروف الما عندو صوف دا علينا احنا.. والله الليلة ما احلك مننا بله ذاتو بتاع الموضوع. المفتش قال ليهم يا جماعه انا بلتزم ليكم لي الخميس الجاي مع العزابه بخروف بس المدام ما قصرت عملت لينا عشأ الليلة كويس. صاحبي بتاع ميز العساكر بعد ما كان شابك في الخروف فكاهو مسك في حتة المدام ما قصرت. معقول دي تقصر الخروف عفينا...... معقول دي تقصر الخروف عفينا...... معقول دي تقصر الخروف عفينا...... جابو العشاء المدام طلعت مقصره مليون في الميه والظاهر هي ذاتا كرهانا الشلة دي ردمت ليك الفول شطه بدون زيت وكبت الكوارع في صحن كبير وزادتا مويه وختت دمعه مافيها لحمه شحم بس بعد الاكل تقوم يديك زي المكنيكي البعمر في عربية. أها اكلنا وانتهينا وبعد كدا نغسل ونمشي. الجنينه فيها ماسوره ارضيه اول زول مشي اغسل فيها وقع في الطين براسو لانو عايزه تركيز الماسوره بخرطوش اسود وجمبها طوب رفعنا الوقع الراجل نادي ولدو يا ولد تعال غسل لي اعمامك. الناس كلها غسلت زولي بتاع ميز العساكر قعد اخر زول الولد جاء اغسل ليهو واحنا وقفنا ماشين. اول جملة والولد بغسل قال ليهو ماشاءالله يا ولدي والله الخالق الناطق تشبه امك احمد الله الما جيت تشبه ابوك. الاداني الحبوب قال لي يا زول الراجل دا بجيب ليك مصيبه ارفعو من الكرسي خلينا نتخارج. مشيت عليهو وهو عامل فيها بنشف في يدينو بتكلم مع الولد قال ليهو اها خلاس احنا ماشين قل لي امك مع السلامة. المفتش عاين ليهو بسخريه وقال ليهو عليك الله يا فلان بعد دا اخد ليك قدله جوه البيت لامو امشي اقطع فيها قدوم عشان تختانا.
انتـــــــــــــــــــــــــــــــــــــهت
|
|
|
|
|
|
|
العنوان |
الكاتب |
Date |
اجي يا الخروف الما عندو صوف | عباس الدسيس | 09-20-16, 09:23 AM |
Re: اجي يا الخروف الما عندو صوف | ادريس خليفة علم الهدي | 09-20-16, 09:27 AM |
Re: اجي يا الخروف الما عندو صوف | عبدالله ود البوش | 09-20-16, 09:42 AM |
Re: اجي يا الخروف الما عندو صوف | Haytham Ghaly | 09-20-16, 10:01 AM |
Re: اجي يا الخروف الما عندو صوف | ANWAR SAYED IBRAHIM | 09-20-16, 10:12 AM |
Re: اجي يا الخروف الما عندو صوف | عباس الدسيس | 09-20-16, 12:50 PM |
Re: اجي يا الخروف الما عندو صوف | عباس الدسيس | 09-20-16, 01:20 PM |
Re: اجي يا الخروف الما عندو صوف | عباس الدسيس | 09-20-16, 01:25 PM |
Re: اجي يا الخروف الما عندو صوف | عباس الدسيس | 09-20-16, 01:27 PM |
Re: اجي يا الخروف الما عندو صوف | عباس الدسيس | 09-20-16, 01:31 PM |
Re: اجي يا الخروف الما عندو صوف | حامد بدري | 09-20-16, 05:15 PM |
Re: اجي يا الخروف الما عندو صوف | عمر التاج | 09-20-16, 06:41 PM |
Re: اجي يا الخروف الما عندو صوف | سيف النصر محي الدين | 09-21-16, 02:01 AM |
Re: اجي يا الخروف الما عندو صوف | Hatim Alhwary | 09-21-16, 06:07 AM |
Re: اجي يا الخروف الما عندو صوف | ادريس خليفة علم الهدي | 09-21-16, 12:30 PM |
Re: اجي يا الخروف الما عندو صوف | عباس الدسيس | 09-21-16, 02:43 PM |
Re: اجي يا الخروف الما عندو صوف | عباس الدسيس | 09-22-16, 06:12 AM |
Re: اجي يا الخروف الما عندو صوف | عباس الدسيس | 09-22-16, 06:51 AM |
Re: اجي يا الخروف الما عندو صوف | عباس الدسيس | 09-22-16, 07:31 AM |
Re: اجي يا الخروف الما عندو صوف | عباس الدسيس | 09-22-16, 07:33 AM |
Re: اجي يا الخروف الما عندو صوف | عباس الدسيس | 09-22-16, 07:34 AM |
Re: اجي يا الخروف الما عندو صوف | مازن فيصل هلال | 09-22-16, 08:20 AM |
Re: اجي يا الخروف الما عندو صوف | عباس الدسيس | 09-22-16, 08:55 AM |
Re: اجي يا الخروف الما عندو صوف | عبدالرحيم أبراهيم العبيد | 09-22-16, 12:39 PM |
Re: اجي يا الخروف الما عندو صوف | عباس الدسيس | 09-22-16, 02:41 PM |
Re: اجي يا الخروف الما عندو صوف | ادريس خليفة علم الهدي | 09-24-16, 07:38 AM |
Re: اجي يا الخروف الما عندو صوف | ادريس خليفة علم الهدي | 09-25-16, 06:48 AM |
Re: اجي يا الخروف الما عندو صوف | عباس الدسيس | 09-25-16, 07:00 AM |
|
|
|