تخيلو لو كنا نحن محل الخرفان نحن والحمد لله انه ربنا اكرمنا وجعلنا خلفائه في الارض وسخر لنا مخلوقاته من انعام ورياح ومياه وجبال .. وانزل لنا الحديد ( اكتشف العلماء بان الحديد فعلا ليس من معادن الارض ) وتعلمنا كيف نصنعه ونطوعه ونوظفه ونصنع منه ادواتنا ونهضتنا وسياراتنا واسلحتنا ..
ولكن اهم قطعة حديد سيكون عليها التركيز في هذين اليومين هي السكين .. تلك القطعة التي لا تتجاوز الشبر طولا وبمقبضها الخشبي .. ستكون هي نجمة الغد والايام القادمات .. لانها هي الموكل اليها تحويل الخروف من كائن حي مكسي بالصوف الى كوم لحم في الاولى حمراء تسر الناظرين وتسيل لعاب الضواري اولا ومن ثم الى قطع شية على الجمر او على الصاج كاشهى ما تكون اللحوم والراوائح الزاكيات ..
لكن تخيلوا لو ان الوضع كان العكس ... بمعنى لو كانت الخرفان هي خليفة الله في الارض وكنا نحن الضحايا بمعنى مطلوب من أكل أسرة خروفية أنها تضحي بواحد بشر مننا.. تعوذ واتفل عن يسارك .. لكن الخيال لن يضيرك .. هذه الحكاية حا تخليك تحس بنعمة أنك بشر ومسلم وكمان سوداني شوفتوا كيف .. متكئ انت في زريبة البشر تتدارى خلف اخوانك الناس تخاف ان يتم اختيارك من قبل السيد الخروف وعائلته الكريمة واطفاله الحملان يتصايحون في ابيهم .. ( بابا اشتري لينا داك ابو نضارات ) امهم ( بري داك مشيب وبيكون لحمه قوي (الحمد لله انا طلعت منها بسبب الام الفاضلة ) .. عايزين لينا بني ادم كدا يكون دهنو كثير وعمره صغير عشان عاوزه اعمل منه دهن كركار لفروتي .. شوف لي داك القصير السمين داك ابو بنطلون جنزي ) بائع الناس في هذه الحالة والذي هو خروف وابن ستين خروف يتصدى لاسرة السيد الخروف الكريمة ليساعدهم في اختيار الانسان الذي سيضحون به .. خرفان افندي : قول لي يا سيد باع الدولة انتو الخروف عفوا ( الانسان ) عايزنه صيني ولا امريكي ولا سوداني ولا سعودي ؟؟؟ باع الدولة: في الحقيقة يا خرفان افندي ما في فكرة معينة لانه عادة انا ما متعود على اكل لحم الناس كثيير لانه انا في الغالب نباتي .. ولكن المدام هي المصرة . وبالمناسبة بتحب ام فتفت الانساني جدا جدا .. خرفان : وفي حد ما بيحب كبدة الانسان بالدكوة والبصل والشطة الحارة والليمون . السيد باع الدولة : ياخي انت دخلتها لينا في نفسنا ورجعتني لحمنجي من جديد خلاص انت تنصح بياتو نوع .. خرفان افندي : انا يتخيل لي السودانيين كويسين اولا لانه اكلهم ما فيه بهارات كثير وبيرعو رعي طبيعي ومعظم اكلهم عصيدة زره مع ويكة عشان كدا ما فيهم دهن كثير وكلسترول وكدا .. ( طبعا كل السودانيون في الزريبة اتغاظوا من البائع وبدا يستخبوا خلف الجنسيات الاخرى ). السيدة ام الخراف : بري يا اخوي ما بشتري زول سوداني انا يا تجيبه لي امريكي أصلي ولا ما عايزين .. خرفان : ولا يهمك يا مدام وطلبك موجود .. يتم رفع اثنين من الامريكان المربربين في سيارة السيد الخروف وحرمه النعجة المحترمة ,
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة