عارف يا حبيب..لمن حصل الإنقسام ، او ما نسميه باستقلال الجنوب..كان بالخاطر..خلق كتيرة.. الخلق التي نبحث عن موقعها من الإعراب (كما حدثنا احد ابطال رواية الطريق الى المدن المستحيلة) فاقتبس عبارته صديقنا المرحوم ، الشيوعي النبيل ، نزار جلاب عليه السلام ، فاخذ يردد العبارة ويرددها الى ان فهمنا مؤخرا ما يقصد.. وربما قصد الكاتب في ذات نفسه..!
لحظة الإنفصال/الإستقلال..كان بالخاطر خلق..امثال كوماندر أيي ، كوماندر اكيج ، ميري نون ، شقيقتها الفنانة لوشيا ،الفنانة سميرة ،شقيقتها ، الفنانة نازك ، ريجينا ، روز ، بابوو ، فلورا..نفيسة ..خلق كتيرة يا صاحب.. اهمهم جميعا ، صديقنا الخلوق عبد الكريم سعيد رجب..!
هل تعلم يا ابكر..ان عبد الكريم هو اخر ملامح السوداني الحق؟..السوداني الذي يتحدث لغة الدينكا بكل تفريعاتها (قوقريال ، جورشول ، بور ، نقوك..زاندي ، كريش ، باريا ..مابان..الخ) ، وفي نفس الوكت يتحدث لغة المحس/الدناقلة ، وتحت تحت الكاركو والكدر والكدرو..!!ثم عربي امسودان بتاع ناس بحري ، حلة حمد ، حلة خوجلي..وبقية عربي امسودان الواحد ده..!!
ياخي زول كلما تشتط وتتطرف في الدنيا دي ، يرجعك بالبسمة اليقين..!
يضحك و يقول لي : ول ابا ، كن طرت وكن ركيت ياكا جنقاي (دينكاوي)..!
اتنرفز واقول ليهو: يا كريم يا عمك ، الروووب يااخ..حبوبتي دينكاوية..! يقول : مش مهم ، المهم ابقى سوداني ياعمك ، وعشان ما تتعقد ياخي انا حبوبتي جلابية عدييييييييييييييييييييييييل..من حلة حمد ود ام مريوم..!!
يخرب مطنك يا كريم ، انتا قاعد تتكلم عن ياتو بلد يا اخينا؟
يقول ليك: البلد الجيت منها انت وانا وغيرنا..!! التحية لأخونا الفنان الجميل عبد الكريم رجب.. ولأسرتها ، مدام محاسن ، واطفاله بنين وبنات..!!
العنوان
الكاتب
Date
كالقري يا ابكر ادم: عن سوداني اسمو عبد الكريم رجب..!!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة