00:00 AM January, 05 2017 سودانيز اون لاين زهير عثمان حمد-السودان الخرطوم مكتبتى رابط مختصر
بعد راس السنة كنت قيل أنو السنة الجديدة ما ح تبدأ من يوم الاجازة الصباح لكين تاني ياخي يوم واحد واحد دا تقيل من صاحبو كلو وجع راس وحيرقان وأبو شقاق العجيب داك لا بنفعك سكر و لا حبوب صيدلي بعد دا بتكون بايته معك سهرة رأس السنة دي المرة دي كانت في جوهانسبرج والله المحتفلين في صالة الديسكو زي جماعنتا في ذكر حمدالنيل ألوان وأشكال ومكتظة بالجميلات شيء زرق وصفر وكمان يا ناس هنود زولكم راس لف ما عرف يختار زولة السهرة ما المزاج مزاج أفارقة وفي الافارقة ديامة كمان أطفح وأتوحوح وألعن في ضلام زقات أمدرمان وأقول لنفسي أنت ما محروم يا مسكين الليله أغرق لحدي ما تحبي في المريسه حقت أولاد جون دي حتي الثمله الثملة أظنها سكرة ينيي اللي بقولوها ديك ما الليله عيد وبكرة أجازة وذاتو ناس المنظمة بكرة أجازة وبعدا حكاية زي تلاته يوم أخوكم قاعد في وسط الديسكو ومعهو كتير من أبو صلع الامريكي دسيتو عشان الاحتفال بنفسي في الليله البهيجة دي وكمان اليورو العجيب غير كبونات الصالة ياخي من كتر ما شربت بقت بس ديك القيامة اتلولح زي الهمبول مت عديل من كثرت الشرب وطرشت مرتين عشان التايلكه المكسكية مابعرف الطريقة اللي بشربوا بيها المصبية دي كيف والعيون حمر دم بس يحومن منو سعيدة الحظ اللي ح تقضي معي السهرة ونستقبل العام الجديد مع بعض كأني عارف اللي حولي و أخير كدا صلبت طولي ومشيت لهندية كدا هي ذاتو أنا أخير منها ترطن ساي وتغني قلت يا ولد يا أبو الزهراء دي نصيبك من الليله دي ياله أتقدم بقرعة عالمية غير قابلة للكسر والصد أخوك طولي وبلا مقدمات بدأ القصة ببوسه علي الطاير كدا وأستجابة البت البنيان له ودي هي لحظة الحظ ضرب معي فيها بداينا نرقص مارقيص غجر في حالة أنعدم وزن وتوازن كمان ياخي كنت في غاية من الفرح العجيب يا خي ناس هارون الرشيد ديل بالحق كانوا عايشين وبالجد ملوك ياخي فعلا أنا ما مظلوم ظلم الحسن والحسين اللي ما عشت في الزمن داك ألعن أبو كدا ياخ دا اليوم العالمي للرقيص الهمجي و الخُمرا والتعطن فيها والله لما جات الساعة أتناشركنت بتعامل بالاشارة وبتحرك زي شارلي شارن ولا شاربن ما عارف في زمنو المهم سمعت الجماعة صرخوا سنة جديدة وعام سيعد والورق اللي بيقع من السقف الملون داك ملا شعر راسي وهدومي وأنا وقع في الهندية حضن والزوله تقول مبنجه راقدة سلطة المهم قلت يا عب خلاص نمشي اللكواندة نقضي بقي السهرة هنالك تعرفوا نحن من جو الديسكو للمدخل عشان التاكسي مخدين زي ساعة غيتو ما أقل من كدا نسال المدخل بي وين كل واحد يداك مسار أخير شفت النجوم والقمرة ما أظن كانت في قمرة المهم وصلت محطة التاكسي فتشت كرت الفندق ماراح مني سالني سواق التاكسي سير ويرز يور هتل لكيشن ؟ وانا أسوي بالاشارة زي دايرة كدا واشار للسماء وانا اقصد وسط البلد المهم زولك أظنو عرف لانو سألني انت من وين قلت لي سودانيايز المهم جري بينا لمنقطة الفنادق الحقيرة جنب السوق كل ما يمر بفندق يسالني هيي سير أقول بطول حسي نو نو نو لحدي ما شفت الفندق من النافورة البرا بس صرخت هنا يازول زولتي نامت بس ميتة صيحت الهندية لكين الريحة ماريحة ميت بس زي دي حسي تنوم معك في سرير واحد كيف نزلت جري والهندية تجري وراءي المهم دخلنا الاستقبال كل العيون تعيين ديل شنو طوالي قلت للموظف زيرو88 وهي 8زيرو 8 الراس ما بقي زي طار المادح المهم أدني المفتاح وقام مشي معي لحدي المصعد وانا أسوي للهندية قود باي وهي تقولي أيم كمنق كمنق وين يا ست الناس بالريحة دي عليك أتخارجي دي ثقيلة ثقالة ماعادية المهم صحيت الصباح لقيت بت الهنود مافي وعندي مبلغ كنت طلعتو للسهرة سرقتو ومشت قلت يا زول أصلوا دا مال منظمات أخير سرقوا !!# لكين والله أتواصل مفعول السم دا لاكثر من 24 ساعة، وكلما طوال معي أحس أني لسه في السنه اللي فاتت وما أنتهت لسع لو السنة الفاتت دي2016 ايي ما راحت لسه قاعد فييني بس انا دا ماشوية ياناس حقيقة شفت الموت عديل وحسيت بمفارقة الاحياء والله يا ناس العمر الكبير مشكلة و بقدر علي الفوضي وانت مستمر في جنونك وبعدين أنا مودع وكمان دا عشان شنو دا كلو لا أنا مودع لي زول ولا الغايب دا حاجة ليها قيمة ولا جات السنة الجديدة ولا أختفت القيمة وهي زي استمرار الجري حقي من بلد لبلد وكاني ما عارف النهاية شنو والخوف كل الخوف من مفارقة الدنيا او مفارقة الروح للجسد تعرفوا مهما كنت فارس الموت بيخوف جد وكان جاتك وهمه باعراضو البدنية المحددةوهي ممكن تكون رقيك ناشف والرجفة وضربات القلب وتبقي زي المخشب ما تقدر تقول كلمة والكلام فعلاً متعب لدرحة تمرق الشفتين اليابستين ديل زي كأنك تجرحهم ، وبسرعة نبضك يضعف وينقضي كل شيء في لحظات المفارقة، تفقد الكلام ويبقي ماياهو ولا عادي وبالكاد سامعو الليله نكير ما جاتك يا مقطوع الطاري !# كيف تودع الدنيا وانت من جهة جسمك مخمور وهو ذاتو ماجسم الوداع والمهاجرة للعوالم البعيد ابكي روحك ساي أنت غريب وهنا مافي عربي عشان تشرح ليهو حالتك الانسانية موت موتك وبطل جقلبه ومن ما أنا في الشدة دي مخمور في حالة ما قادرأتحملا رسلت عمتي للمغسلة قلت ممكن تكون كفن محترم لجمسي الكبير دا يا ناس أنشالله ماعملت ليكم أزعاج هنا لا حولا ولا قوة الا بالله أن الموت حق والحياة دار عبور والقرار هناك بس تاني راس السنة في حفر أمدر مرقه مافي نموت هناك مع الغبش علي الاقل يصلوا علينا صلاة الجنازة جمع غفير!#
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
زهير عثمان حمد
فيس بوك
تويتر
انستقرام
يوتيوب
بنتيريست