|
|
|
 Re: إلحاد المستنير المدغمس (Re: معاوية الزبير)
|
في روايته الكبيرة: (الخلـود) يدير ميلان كونديرا حواراً فلسفياً بين أب و ابنته
هذا هو:
(في طفولة آنييس وأثناء إحدى النزهات التي كانت تقوم بها بصحبة والدها
سألته هل يؤمن بالله، أجاب "أؤمن بالكمبيوتر الخالق"
كان الجواب غريبا لدرجة أن الطفلة حفظته
لم تكن كمبيوتر هي الجملة الوحيدة الغريبة، بل كلمة الخالق كانت بالقدر نفسه من الغرابة
لم يكن الأب يتكلم عن الله أبداً، بل دوماً عن الخالق كأنه يريد أن يجعل مهمة الله مقتصرة على إنجازه كمهندس فقط.
كمبيوتر الخالق! ولكن كيف يمكن لإنسان أن يتواصل مع جهاز؟
عندها سألت والدها إن حدث له أن صلى. قال: "بقدر ما أصلي لأديسون عندما يُضيء مصباح".
فكرت آنييس: لقد وضع الخالق في الكمبيوتر قرصاً ليّناً (soft) عليه برنامج مفصّل ثم ذهب.
بعد أن خلق الله العالم تركه تحت رحمة البشر المهجورين الذين يسقطون في فراغ بلا صدى حين يتوجهون إليه.
هذه الفكرة ليست جديدة..
لكن أن نجد أنفسنا وقد تخلى عنّا إله أجدادنا شيء، وأن يكون من تخلى عنّا هو خالق الكمبيوتر الكوني شيء آخر.
بدلا منه يبقى برنامجٌ يتحققُ في غيابه بشراسة دون إمكانية تغيير أي شيء فيه.
برمجة الكمبيوتر لا تعني أن المستقبل مرسوم بالتفصيل، ولا أن كل شيء مكتوب "في الأعلى".
مثلا لا ينُصُّ البرنامج أنه في عام 1815 ستقوم معركة واترلو، ولا أن الفرنسيين سيخسرونها
بل ينص فقط على أن الإنسان عدواني بطبعه، وأن الحرب أساسية لوجوده، وأن التقدم التقني سيزيدها (أي العدوانية) فظاعة أكثر وأكثر.
كل ما تبقى لا أهمية له من وجهة نظر الخالق، وهو (أي ما تبقى) مجرد لعبة تنويعات وتبادل مواقع في برنامج عام لا علاقة له بالتنبؤات المستقبلية
لكنه فقط يرسم حدود الإمكانات، وبين هذه الحدود يدع السلطة كلها للمصادفة لكي تلعب دورها).
انتهى
| |
 
|
|
|
|
|
|
|
|
Re: إلحاد المستنير المدغمس (Re: معاوية الزبير)
|
معاوية يا صديق ...
شكراً على سؤالك يا ملك ...
العلاقة بين البشر و الخالق يجب ان لا تدخل فيها المؤسسة الدينية التي صنعها البشر لاستخدامها حين الضرورة ...
الخالق اصطفى البشر بالعقل ليفكروا به ... و انزل اليهم الكتب السماوية ووضعها بين يديهم ... ليستوعبوا الثواب و العقاب ...
لا حوجه لوسيط ...
تحياتي يا حبيب ...
| |
|
|
|
|
|
|
|
|
Re: إلحاد المستنير المدغمس (Re: يحي قباني)
|
يا معاوية،
إلحاد وما إلحاد والدغاميس البقولوا فوقها دي لسع ما جيتها؟!
هسع مشكلتي الاجتماعية يا دوب في المربع الأول:
الزول دا (أقصد الله) لو في؛ لم أجد له في إيمان من حولي ما يقنعني أنه تواصل مع البشر؟؟
هذه النقطة أنا ساكيها لي اكتر من اتنين وعشرين سنة
صحي في مسيرة* مناقشاتي للناس لاقيت بعض المتميزيين، لكن الغالبية عوام ورجرجة خائفين
----
* يا كيشة، الأولى كان تقول:
وجهك بين مسايرك زي بدر اكتمل
| |
|
|
|
|
|
|
|
|
|
Re: إلحاد المستنير المدغمس (Re: أبوبكر عباس)
|
مداخلاتي ليك ديل يا مُعاوية، مواجبة ساكت!
أصلا أنا قررت التوقف عن الكتابة في هذا المنبر الذي يعجُ بالعوام والرجرجة.
يا أخي ديل أعدموا عبد الخالق ومحمود (تقديم الاسماء ليس زمني)
يا أخي، الدين دا دامغ الناس ديل دمغ، صعب الفكاك منو أو مجرد التفكير في حقيقتو
ح امشي منكم لمنتدى صديقتي نجاة وأخليكم زي ما قال م خ تستمتعوا بجهلكم
| |
|
|
|
|
|
|
|
|
|
Re: إلحاد المستنير المدغمس (Re: أبوبكر عباس)
|
فى شان الابل
قالو خلقت من الشياطين
و صلوات الله عليه و سلامه قال
كان اكلتو لحما يلزمكم وضو
و لو خير الانسان انو يصلّى بين اتنين بس
مرابط الغنم او الابل الصحيح يصلى فى مرابط الغنم
و ليس الابل لآن اعطانها بها شبهة من عطن شيطان
الجمل شيطان و سيدنا عمر لما ركب على ناقة فنجطت به
فقال اركبونى شيطانا
ده البركبا عارف حقيقتا
فما بالك بالطبيب الذى يرعاها و يعالجها
و كمان شغال فيها تهجين
اكيد راكبو شيطان استنارتو قوية
| |
|
|
|
|
|
|
|
|
|
Re: إلحاد المستنير المدغمس (Re: جلالدونا)
|
ما دام الموضوع بقى دغمسة ..
العقائد كل العقائد حلقة ضمن حلقات تطور المجتمع البشري ..
الإنسان نقسة حلقة ضمن حلقات تطور الوجود..
بدأ مفردا ثم أمة ثم أمم تتبادل تجاربها ومعارفها الكونية..
الإنسان الاممي هل هو آخر مراحل التطور؟
مودتي معاوية وصحبه .
| |
|
|
|
|
|
|
|
|
|
Re: إلحاد المستنير المدغمس (Re: Hani Arabi Mohamed)
|
يا معاوية القصة ما دايرة ليها كودندارة ليس صاحبك بملحد ولا مؤمن ده كسل منو ساكت ما داير يبذل اي مجهود في الإلحاد اذا قارنته بهشام آدم والمجهود الذي يبذله بكة ده ملحد عاصي ساكت بحب الغلغلة وتدوير الناس ساكت
| |
|
|
|
|
|
|
|
|
|
Re: إلحاد المستنير المدغمس (Re: muntasir)
|
مرحب معاوية
وضيوفه
ما قادر افهم شنو إلحاد ولا ضرورته . انا غايتو غير معنيا بإلحاده . بل بموقفه من الحياة
ضد المسلمات والبديهيات
اي شي قابل للنقاش وفق تقاطعه مع موقفي من الحياة
| |
|
|
|
|
|
|
|
|
|
Re: إلحاد المستنير المدغمس (Re: muntasir)
|
Quote: العلاقة بين البشر و الخالق يجب ان لا تدخل فيها المؤسسة الدينية التي صنعها البشر لاستخدامها حين الضرورة ...
الخالق اصطفى البشر بالعقل ليفكروا به ... و انزل اليهم الكتب السماوية ووضعها بين يديهم ... ليستوعبوا الثواب و العقاب ...
لا حوجه لوسيط ...
تحياتي يا حبيب ... |
أهلا قباني
لا حوجة لوسيط فعلا، الوسطاء يحتكرون المعرفة بالله الخالق -بسوء نية أو حسن نية- ويحجبون عقل الناس عن المعرفة فلا يعودوا "يتفكرون" "يعقلون" "ينظرون"..
المشكلة الأكبر هي أن الناس (إلا من رحم ربي) كفّوا منذ قرون طويلة عن عبادة الله وأصبحوا يتبارون في عبادة وسطاء الله
الحكاية وصلت إلى أن يذبح الإنسان أخيه الإنسان نصرة لهؤلاء الوسطاء
والحديث ذو شجون
| |
|
|
|
|
|
|
|
|
|
Re: إلحاد المستنير المدغمس (Re: معاوية الزبير)
|
| Quote: الإنسان الاممي هل هو آخر مراحل التطور؟ |
يا أخي، الكلام دا واضح لدرجة الدغمسة!
الأديان تجربة إنسانية صرفة لم يتدخل فيها الله.
كدي فكروا في قصّة المعراج وكيف الرسول صعد للسماء ولاقى ربه،
مسرح اللقاء سبعة سموات، ولاقى الأنبياء هناك، وصلى بيهم!
فرض عليهو خمسين صلاة في اليوم
الجماعة كل مرّة يقولوا ليهو أرجع ليهو خليهو ينقص ليك شويّة
لحدي ما آخر حاجة وصلوا لخمس.
هذه القصة للإنسان قبل 1500 سنة مقبولة وتخلوا من الثغرات
حاليا لا أستطيع أن أروي هذه القصة لأبنائي.
الإنسان بدأ يقتنع انو الدين إنتاج بشري، القصة دي تهدد مستقبل الدين، وفي الغالب الدين ح يتحول لمنتوج تراثي
لو ما تحول لك، سوف يتحول بالنسبة لأبنائك، بالنسبة لناس جلادونا ديل، بتأخر لحدي اولاد أولادو، لكنهم يأتون.
سرعة التحول تعتمد عاى درجة كفر أهلك وإحتكاكك "الأممي"
يا منتصر، هشام آدم باحث اكاديمي يتعالى على الرجرجة الزيك ديل،
أنا مشكلتي إحساسي بضرورة إيجاد مخرج جماعي، لا أستطيع أن أجد مجتمع ثاني
أنتم أصدقائي، أهلي، أخواني، وربعي بالإضافة لأهلي البايولوجيين والإجتماعيين
ردود الأفعال البلاقاها هنا أخف من الردود الممكن ألقاها لو طرحت تساؤلاتي دي وسط أخواني وأهلي ومجتمعي.
في النهاية صحي إتوا رجرجة، لكن رجرجة شوية متقدمين.
لا هطلت علي ولا بأرضي....
| |
|
|
|
|
|
|
|
|
|
Re: إلحاد المستنير المدغمس (Re: أبوبكر عباس)
|
مستنير دى انا زاتى عندى فيها رأى. يطلق الواحد على نفسه بأنه مستنير (على سبيل الدعابة) ويظل يكرر بأنه مستنير حتى يصدق نفسة بأنه مستنير.
ثم يبدأ بعض الرجرجة والدهماء يطلقون عليه كلمة مستنير فتنتفخ الاوداج وتزغلل العيون وتطبع كلمة مستنير فى قلبه وعقله ويؤمن ايمان مطلق بأنه مستنير وتصعب عليه
حتى العودة للتفكير السليم.
يا جماعة ما توهموا الناس الما عندهم قدرة على معرفة الله بأنهم مستنيرين. الاستنارة فى الشرق وهم فى الغرب.
| |
|
|
|
|
|
|
|
|
|
Re: إلحاد المستنير المدغمس (Re: عبدالحفيظ ابوسن)
|
| Quote: الزول دا (أقصد الله) لو في؛ لم أجد له في إيمان من حولي ما يقنعني أنه تواصل مع البشر؟ |
إستغفر الله ..
ده كلام ملحد متطرف جداً وفي المقابل يأتي متطرف من الجانب الآخر ويكون الدمار
أحسب أن الدواعش والقاعدة وغيرهم أتوا من رحم مثل هذه العبارات
مودتي ..
| |
|
|
|
|
|
|
|
|
|
Re: إلحاد المستنير المدغمس (Re: عبدالحفيظ ابوسن)
|
Quote: مستنير دى انا زاتى عندى فيها رأى. يطلق الواحد على نفسه بأنه مستنير (على سبيل الدعابة) ويظل يكرر بأنه مستنير حتى يصدق نفسة بأنه مستنير.
ثم يبدأ بعض الرجرجة والدهماء يطلقون عليه كلمة مستنير فتنتفخ الاوداج وتزغلل العيون وتطبع كلمة مستنير فى قلبه وعقله ويؤمن ايمان مطلق بأنه مستنير وتصعب عليه
حتى العودة للتفكير السليم.
يا جماعة ما توهموا الناس الما عندهم قدرة على معرفة الله بأنهم مستنيرين. الاستنارة فى الشرق وهم فى الغرب. |
صباحكو زين عافية درت
ياحبيبنا كبار فطاحلة الالحاد والمنظراتية الفلاسفة العظام لحظة الاحتضار وعشرقة خروج الروح قالوا كلام يبكي بس طبعا ده مابجيبوا في الاعلام
لدرجة في واحد قالا صراحة ان اموت وانا اؤمن بوجود الله والعقاب والحساب حتى لو لم يكن الله موجودا افضل من العكس
الحرية هي الاصل في الاشياء وشخصيا لو واحد بعبد بقرة هذا شانه لن اتعرض له وبالمقابل يحترم معتقدي التطرف والغلو هو اكبر كارثة اصابت الاديان
المستنير كواحد من الرجرجة اكتب لينا اكتر عن رؤاك واعتقاداتك امكن نمشى معاك ياااخوي ونقتنع
| |
|
|
|
|
|
|
|
|
|
Re: إلحاد المستنير المدغمس (Re: حامد بدري)
|
| Quote: الأديان تجربة إنسانية صرفة لم يتدخل فيها الله. |
أعوذ بالله
من غضب الله
الدنيا خريف
وفيضان
وسيول
والمستنير ظلاما يقول
الله لم يتدخل في الدين
طيب من اوجد الدين
| |
|
|
|
|
|
|
|
|
|
Re: إلحاد المستنير المدغمس (Re: عبدالحفيظ ابوسن)
|
| Quote: الزول دا (أقصد الله) لو في؛ لم أجد له في إيمان من حولي ما يقنعني أنه تواصل مع البشر؟ |
إستغفر الله ..
ده كلام ملحد متطرف جداً وفي المقابل يأتي متطرف من الجانب الآخر ويكون الدمار
أحسب أن الدواعش والقاعدة وغيرهم أتوا من رحم مثل هذه العبارات
مودتي ..
| |
|
|
|
|
|
|
|
|
|
Re: إلحاد المستنير المدغمس (Re: احمد الشيخ)
|
Quote: اخير الحاد هشام "الحرامي سراق النصوص" من الحاده دا
|
==================
حبيبنا أحمد .. مودتي ..
صدقت يا أحمد .. هشام لا يستفز .. بعدين ملحد عميق في فكره ..
الحبيب أحمد .. أذكر قبل أكثر من نصف قرن من الزمان ..
ونحن في قرى نائية في أقصى الشمال .. كنا نعتبر من يسب الدين كافر وكذلك الذي يتبول واقفاً ..
في واحد إسمه عامر ما من المنطقة يحضر مع اللواري .. عامل تسريحة ابراهيم عوض.. وعلى طول يسب الدين
لأتفه سبب ما تسع غير ( دينك ) .. تعرف يا أحمد كنا ننتظر ايام حتى حضور عامر عشان نسمع سب الدين ..
ووجد عامر نفسه مميز ومشهور أكثر من الفنان ابراهيم عوض في ذلك الزمان .. وجعل نفسه في مرتبة فوق
الباقين بسب الدين ( خالف تذكر ) .. رحم الله عامر حياً وميتاً ..
شكراً حبيبنا معاوية على هذا البوست .. لقد ذهبت بنا أكثر من نصف قرن من الزمان .. إلى ضواحي الدنيا ..
مودتي للجميع ..
| |
|
|
|
|
|
|
|
|
|
Re: إلحاد المستنير المدغمس (Re: Osama Siddig)
|
يا أخوانا، طبعا أنا مهووس بموضوع الدين دا لدرجة المرض.
أي زول أكون قاعد معاهو وإتونست معاها لزمن طويل، بجدع ليهو حاجة للإختبار، لو لقيت عندو حاجة ممكن يروي غليلي؛ ما بخليهو وممكن على سبيل المثال هنا أسافر لمحمد آدم دا.
قطرةٌ مِن نَدَاكَ تَروي غَليلي أنا راضٍ مِنَ النَّدى بالقليلِ = لمحةٌ من سَنَاكَ تبعثُ نَفسِي وتُذيبُ الضّنا بقلبي العَليلِ
مرّة عرفت لي زول عشريني كان بكتب مهانا في سودانيات، عرفت انو تارك موضوع الدين دا
سطيت تلفونو سك شديد
كنت داير أعرف الزول دا كيف في السن دي وصل؟؟
أنا عارف مشكلتي معاكم شنو؟
دايرني أفكر بعقليتين زيكم
ببساطة؛ ما بقدر
قد أصل لمرحلة أترك فيها المكان؛ لو مليت من مشاركات الرجرجة (كلكم بالنسبة لي في موضوع الدين رجرجة) وتأكد لي خلو العقول من الإضافة
ي نفس الوقت أنا زول إشكالي ولا توجد عندي حلول، قد أكون مضر للكثيرين.
| |
|
|
|
|
|
|
|
|
|
Re: إلحاد المستنير المدغمس (Re: احمد الشيخ)
|
النصيحة كدا يا محمّد الشيخ، الرجرجة هنا أنا مقسمهم لكاتوقوريس حسب مشاركاتهم بما يخص الدين
أنت حتى الأن غير مصنف عندي
حتى الآن لم أدع لإلحاد
كل الكنت بحاول أعرفو خلال السنتين الفاتن ديل من الزملاء، الاحباب، الأخوان الهنا:
لماذا إخترتم هذا الدين كمنهج للحياة دون غيره؟؟
ما لقيت عندكم غير جملة أبوبكر الصديق:
إن كان قد قال فقد صدق
| |
|
|
|
|
|
|
|
|
|
Re: إلحاد المستنير المدغمس (Re: أبوبكر عباس)
|
و بعدين الإستنارة بتحتاج "تمتين" للغة ، يعنى المفروض تكون كاتيقوريس مش "كاتوقوريس" ،عشــان تتكتب زى ما بتنطق.
كسرة:
قلنا نجارى فى المساخة زى ما قال أخينا أحمد محمد الشيخ...
| |
|
|
|
|
|
|
|
|
|
Re: إلحاد المستنير المدغمس (Re: Osama Siddig)
|
| Quote: لماذا إخترتم هذا الدين كمنهج للحياة دون غيره؟؟ |
لن تجد إجابة
لان من توجه لهم السؤال ...لم "يختار" أحد منهم هذا الدين ولكنه ورثه كما يرث الشخص جنسيته من امه وابيه
| |
|
|
|
|
|
|
|
|
|
Re: إلحاد المستنير المدغمس (Re: Hatim Alhwary)
|
| Quote: الأديان تجربة إنسانية صرفة لم يتدخل فيها الله. |
لا دي دغمسة أصلية ..
فرق بين الأديان والرسل ..
الرسالات السموية فعلا تجربة بشرية مرحلية يا بكور مقيدة بزمان تاريخي ..
وبعضها كان مقيد بأقوام بعينهم دون سواهم ..
غير أنها تجربة موجهة من قوة عليا سمها ما تشاء ( الله ، الطبيعة ، بوذا الخ)..
هي لا تختلف كثيرا عن تجارب المخترعين الماديين ..
تفتكر تجربة ادسون البسيطة الأولية حول الإضاءة كانت خالية من إلهام ، مدفوعة من قوة عليا ( وحي ) ..
ثم هل توقفت التجربة عند تلك النقطة الأولية ؟ أم كانت فتحا أبتدائيا لما سوف يليها من فتوحات ؟..
الآن لم يتبقى من تجربة أدسون غير حقوق الريادة ..
لأن الفتوحات التي تلت لا رابط يربطها بأدسون ذاك سوى الحبل السري ..
نعم ختمت الرسالات ولكن لم يختم الدين اي لم ينقطع الحبل السري ..
اقرا أول آيات نزلت في (سورة العلق) في خاتمة الرسالات ..
قبل ذلك ـ تدبر معنى كلمة العلق نفسها لغويا وقارن على ضوءها مفردة الحبل السري ..
ؤ ليه دي كانت فاتحة آخر الرسالات ؟
قْرَأْ بِاسْمِ رَبِّكَ الَّذِي خَلَقَ ، خَلَقَ الإِنسَانَ مِنْ عَلَقٍ ، اقْرَأْ وَرَبُّكَ الأَكْرَمُ ، الَّذِي عَلَّمَ بِالْقَلَمِ ، عَلَّمَ الإِنسَانَ مَا لَمْ يَعْلَمْ
هذا الخطاب وجه لبشر عاشوا قبل 1400 سنة ..
اليوم يجنى ابناءهم ثمار وعد الله لآبائهم ..
فقد قرؤا وتعلموا بالقلم وعلمهم الله ما لم يعلم به الآباء الأول..
إنتبه : أنا هنا أعنى البشرية جمعاء ولا أعني أمة محمد لأن الرسالة ليست قاصرة عليها..
سيمضي العلم بالقلم بين الأجيال حتى يبلغ مرحلة السمو دون رسل ورسالات جديدة ..
وهي مرحلة الإنسان الأممي ..
الإنسان الأممي ليس هو الإنسان الكامل ..
فلا كمال لموقوت ..
بل هو الإنسان الذي بلغ يقينا أنه مخلوق بمهمام موقوتة طبقا لمشيئة عليا ..
فلا خوف ولا غيرة ..
لا يكذب لأنه لا يخاف ..
ولا يخادع أو ينافق لأنه لا يكذب ..
لا يغدر لأنه لا يعرف الخداع ..
متسامح لأنه تخلص من الغيرة ..
لا يعرف العنصرية أو الكبر لأنه متسامح ..
يعمل وينتج ويبدع دون إخلال بسنن الوجود..
بعبارة موجزة ..
ريشة في حلقة مهولة يدوران معا بطريقة منضبطة بأزمنة متجددة خاضعة لقانون ( الوجود والفناء ) محكومة بطاقة عليا ..
قول معاي ..
الدايم هو.
| |
|
|
|
|
|
|
|
|
|
Re: إلحاد المستنير المدغمس (Re: محمد على طه الملك)
|
| Quote: دي فكروا في قصّة المعراج |
مشكلتك هنا مع منهج العقل البشري ووسائلة في إقناع الآخرين ..
مافي منهج إقناع ممكن يكون مجدي ما لم يتوافق مع ما هو راسخ في قناعات من هم حوله في زمانه..
براك بتقول ؤ تكرر الإمام المهدي كان بقول لأنصاره وهو يبكي بعين واحدة ( قال لي سيد الوجود ...) ..
لو لم يتبع الإمام المهدي المنهج والوسيلة المفهومة بين الناس وقتها لما نجح في خلق أتباع ..
ما صاح بل لا يجوز محاسبة منهج ماضوي بمعاير منهج في الحاضر ..
تفرق يا صحبي .
| |
|
|
|
|
|
|
|
|
|
Re: إلحاد المستنير المدغمس (Re: أبوبكر عباس)
|
| Quote: الافتراض بقصد الوصول لفهم معد اصلا سيقود فعلا للفهم المسبق |
إفتراضتي يا أبسن، قاعد أقصد منها رفع درجة الإستفزاز والتحدي؛ عشان أطلّع آخر الناس.
الإستفزاز ليس بالفهم الذي يذهب إليه أحمد الشيخ وصديقه صديق الما بعرف يكتب كلمة نجاري،
الإستفزاز بمعنى التحفيز*
* التحفيز في عالم مراكيض الإبل هو
| |
|
|
|
|
|
|
|
|
|
Re: إلحاد المستنير المدغمس (Re: أبوبكر عباس)
|
بصراحة المستنير ما ملحد بس داير يمنطق الدين ...و جلبو لواقعة الاسراء والمعراج والسبعة سماوات ومفاوضات الرديوس بتاع ال50 وقت لي 5 اوقات ..الواقعة دي يا تؤمن بيها صم لم يا كمان كان تخضعتها للمنطق والديب ثنكنج قطع الشك حا تغادر المجموعة... وشكلو المستنير حاول مغادرة المجموعة بس الادمن قال ليه لو غادرت برجعك ..عمليا هو في المرحلة دي ...
--؛---
تحياتي معاوية الزبير والملك وابسن وبقية المتداخلين
| |
|
|
|
|
|
|
|
|
|
Re: إلحاد المستنير المدغمس (Re: أبوبكر عباس)
|
Quote: مشكلتك هنا مع منهج العقل البشري ووسائلة في إقناع الآخرين ..
مافي منهج إقناع ممكن يكون مجدي ما لم يتوافق مع ما هو راسخ في قناعات من هم حوله في زمانه.. |
حبيبنا الملك كلام عميق .. ومفيد .. شكراً الملك
حبيبنا أبوبكر .. مودتي ..
هذا الموضوع معقد ويحتاج إلى أشخاص لديهم دراية وموهبة الكتابة الجادة ..
وعمق في اللغة والمصطلحات .. ( الديانات .. الملل .. النحل .. إلخ ) عالم عميق ..
لكني أراك تأخذ الموضوع بجانب كوميدي وفض مجالس ..
أجمل القراءات وأعمقها عندما تقرأ للملحدين ( إتفقت أو إختلفت معهم ) تجد لديهم إجادة في فنون اللغة
والكثيرون يتابعون مقالاتهم وكتاباتهم .. لأن هذا النوع من المواضيع فيه جدال وإختلاف ونزاع فكري
يقود القراء إلى المتعة ( أكرر أتفقنا أو إختلفنا ) لأنهم بصراحة يجادلون القرآن كتاب الله ففيه اللغة والقواعد
وتصاريفها وإعجاز .. وتصاريف ... إلخ
مع التحية لصاحب البوست
| |
|
|
|
|
|
|
|
|
|
Re: إلحاد المستنير المدغمس (Re: علي عبدالوهاب عثمان)
|
Quote: مشكلتك هنا مع منهج العقل البشري ووسائلة في إقناع الآخرين ..
مافي منهج إقناع ممكن يكون مجدي ما لم يتوافق مع ما هو راسخ في قناعات من هم حوله في زمانه.. |
يا علي، هل لديك عمق لجملة الملك أكثر من أنها تعني:
على سبيل المثال:
إقتناع أبوبكر الصديق وأتباع المهدي في الأصل سببه تَرَقَّبَ المجتمعين بظهور نبي ومهدي، على التوالي.
| |
|
|
|
|
|
|
|
|
|
Re: إلحاد المستنير المدغمس (Re: أبوبكر عباس)
|
اظنو يا بكري في ذلك الوقت لايمكن ان تقوم ثورة الا من خلال الدين .. فالثورة تقوم بها الجماهير .. ولابد ليهم من محفز يعرفونه .. ايدولوجيا يمكن بها توحيدهم واستنفارهم
اي الاستفزاز واقع لي كتكنيك لاستخراج اقصي ما يمكن من الاخر بتحفيز عقلة .
| |
|
|
|
|
|
|
|
|
|
Re: إلحاد المستنير المدغمس (Re: عبدالحفيظ ابوسن)
|
شكرا للجميع، ولا تنتظروا مني الرد على كل متداخل فالبوست أصبح ساحة نقاش للجميع
.. و ربنا يدنا خيرو، أقصد البوست، فأبي بكر خيرو سابق
وإن كان ثمة عزاء لصديقي "المستنير" في محنته هنا، فله ما قاله درويش في مديح الظل العالي
وحدي.. وحدي أدافع عن جدار ليس لي
وحدي أدافع عن هواء ليس لي
وحدي على سطح المدينة واقف
أَيوب مات وماتت العنقاء وانصرف الصحابة
وحدي أراود نفسيَ الثكلى فتأبي أن تساعدني على نفسي
ووحدي.. كنت وحدي عندما قاومت وحدي
وحدة الروح الأخيرة
| |
|
|
|
|
|
|
|
|
|
Re: إلحاد المستنير المدغمس (Re: معاوية الزبير)
|
كنا بالقوز الثانوية اصحاب
مرة جايين من الفطور عند عم الطيب . وكان مشوار .. بدينا النقاش لا اذكر سببه . ومن ونحن مارقين . بنتناقش في السحر . كلنا اتفقنا علي انو خرافات ودجل
ونحن راجعين شاءت الاقدار نلقي لينا ورقة حجاب مطبقة
قلت ليهم
دة عمل والبعفصو العمل بمشي فيهو . ودة اختبار عملي لقناعتو
مافي زول عفصو
ولا انا
| |
|
|
|
|
|
|
|
|
|
Re: إلحاد المستنير المدغمس (Re: عبدالحفيظ ابوسن)
|
Quote: Aiman Awad
عزيزي معاوية الزبير الايمان بالله من عدمه امر فى منتهى الخصوصية . امر لا يهم احدا اخر سواك .
والايمان بخالق لهذا الكون لا يستطيع العلم او المنطق او كل انواع المعرفة النظرية او الابستمولوجي ان تثبته او ان تنفيه لأسباب تخص طرائق التعامل مع هذه المسالة
فالايمان بالله لا يستوجب او يستدعى سوى الايمان به وحسب او عدم الايمان به |
شكرا Aiman للمشاركة ومعذرة للتأخر في الرد عليك كونك خصصتني بالاسم.
تعليقات الفيسبوك لا تظهر عندي في بعض أجهزة الكمبيوتر
| |
|
|
|
|
|
|
|
|
|
Re: إلحاد المستنير المدغمس (Re: معاوية الزبير)
|
| Quote: حتى الآن لم أدع لإلحاد |
المعذرة يابكور لو رميتك بما ليس فيك
وحتى لو كنت كذلك.. هذا شانك وخيارك وليس علي إلا ان احترمه.
-
ابن عمي حكى لي عن محنة طالب ثانوي زميله بالفصل اول سنوات حكم السفلة ديل
الطالب سأل استاذ التربية الاسلامية " ليه انا مسلم بالفطرة .. وليه الدين مايترك فرصة للواحد حتى يكبر ويبلغ سن الرشد ليختار الدين الذي يناسب تفكيره وعقله"
الأستاذ قال للطالب ماعندي ليك رد حاليا لكن انتظرني بكرة اجيك بالرد..
الرد كان عربة أمن إقتادت الطالب من المدرسة إلى مكاتب الأمن ليحاسب أمام أمنجي فاقد تربوي وربما فقد فرصة الدراسة بالمدرسة للابد
| |
|
|
|
|
|
|
|
|
|
Re: إلحاد المستنير المدغمس (Re: حيدر حسن ميرغني)
|
أنا يا "مســتنير" ثقافتى غربية عشان كدة غلطت فى "نجارى" ، شــايفك و انت عايش فى الغرب جليت "كاتوقريس" ، قلنا ليك اســمها "كاتيقوريس" لأنها الكلمة Categories شايفك عملت منها غمران
لو دا الإنجليزى العايش بيهو فى بلاد الفرنجة و الله ما بيأكلك عيش.....
| |
|
|
|
|
|
|
|
|
|
Re: إلحاد المستنير المدغمس (Re: Osama Siddig)
|
تحياتي يا معاوية والاخوة الكرام ..
الســــــــــــــــــــــــــؤال :
لماذا ترى "الملحد" غير المعترف بوجود الله في قلق دائم وغير مرتاح البال .. فيما ترى "المؤمن " مرتاح البال ومطمئن الفؤاد؟
بمعنى :
اي مؤمن باي دين .. اي مؤمن باي رب خالق تجده مستقر نفسيا .. الملاحدة في كل الاديان تراهم في حالة فراغ روحي كبيرة ..
ما قصدته هو تلك العلاقة الروحية الخاصة بين العبد وربه فقط..
اللهم ادم علينا نعمة الايمان بالله الخالق الواحد ..
تحياتي للجميع ملاحدة ومؤمنين
| |
|
|
|
|
|
|
|
|
|
Re: إلحاد المستنير المدغمس (Re: عادل ابراهيم احمد)
|
والله يا بكور انا ما عندي
مشكلة معاك تكون ملحد ولا تعبد
صحن طلس ولا واحدة. من بقراتك
ديل
لكين بتمنی لو کنت. معاي في الحادث
امس مش عشان داير ليك اذی
لکین عشان تشوف. القبر. الانا. شفتو بي
عيوني والعربية طايرة علی ارتفاع تلاتة
امتار من الواطة
...
والله انا علی قناعة تامة انو غير الله
سبحانه مافي قوة في. الأرض ولا في
السماء كانت. مدبرة لما حدث خيراً
كان. ام. شرا
| |
|
|
|
|
|
|
|
|
|
Re: إلحاد المستنير المدغمس (Re: أبوبكر عباس)
|
Quote: والله انا علی قناعة تامة انو غير الله
سبحانه مافي قوة في. الأرض ولا في
السماء كانت. مدبرة لما حدث خيراً
كان. ام. شرا |
سلامتك
إحتمال كبير تكون ثقافتك العرباتية لا تهم بمعايير السلامة الأبجدية،
زايد معايير الدولة في طرقها
معظم الحوادث تقع نتيجة الإخلال بمعايير السلامة المحسوبة
قليل من الحوادث يقع نتيجة أشياء خارج الحساب البشري.
لماذا أنت مقتنع بأنو الخير والشر مدبر من الله؟
| |
|
|
|
|
|
|
|
|
|
Re: إلحاد المستنير المدغمس (Re: أبوبكر عباس)
|
| Quote: اي مؤمن باي دين .. اي مؤمن باي رب خالق تجده مستقر نفسيا .. الملاحدة في كل الاديان تراهم في حالة فراغ روحي كبيرة .. |
يعني نفهم من كدا كل الأديان صحيحة؟
ممكن برضو يكون الناس المؤمنة بالأديان ديل يكونو هم الناس المتبلدين
والتانين هم الطبيعيين
يعني الإستقرار النفسي قد يكون شتيمة
فراغ روحي قال؟!
كمان نحن جرادل الروحانيات بتاعتكم ما بنعرفها؟!
الكلام دا قولوا لزول ما بعرفكم
| |
|
|
|
|
|
|
|
|
|
Re: إلحاد المستنير المدغمس (Re: أبوبكر عباس)
|
استاذي ابو بكر
يا دكتور انا. مقتنع. لاني مؤمن
بالله
وان الله يدبر الشر والخير وكل شيء
بيده
وهناك من يؤمن بغير ذلك
وهو حر as far as am concerned
لكن. بعدين. كل زول يتحمل. نتيجة. قرارو
| |
|
|
|
|
|
|
|
|
|
Re: إلحاد المستنير المدغمس (Re: Osama Siddig)
|
ياخ هو عاطف خيري نكر سيناريو اليابسة كرجس من الجاهلية بك ده يمسك بينا زمن سنتين تلاتة ويجينا بي مذراته ويقول بقى سلفى اصلوا ما بقعوا الوسطية والبشلت فيه هسع يبوس والببوس دلوقت يفلع ونحن بقينا ما نحن
| |
|
|
|
|
|
|
|
|
|
Re: إلحاد المستنير المدغمس (Re: muntasir)
|
الفكرة ليست في الإلحاد في رقبته, فبكّور لم يأت بشيئ جديد او خارق للعادة, كثيرين الملحدين و الأسئلة المثارة ليست جديدة ولا من بنات أفكاره, بل ماليه النت هي و الردود عليها قوقلة في كسر من الثانية بتجيب آلاف الروابط
في البورد دا الملحدين ما شوية, لكن ما عاملنها شغلة الشو بإلحادهم دا ونازلين تشكيك في الإسلام- نعم الإسلام تحديدا وليس حتى باقي الديانات لأنه هو البجيب الدخل باعتبار الأغلبية وكدا - و مكتفين بقناعاتهم و محترمين قناعة الآخرين
فا شنو...القصّة هي في القشرة, وأنا حر و مفكّر و أشك وما بقدر أفكّر بعقليتين, شو ما اكتر و أتنشن سيكينغ :) عشان كدا بتلقى الإشارات دي أحيانا بتترمي في مواضيع لا علاقة لها أبدا بالدين و الإيمان وكدا وبشكل استفزازي يرفع الكثافة - يا قوله
البوست دا بالمفهوم الكتبه بيه ود الزبير كدامج كنترول و والصديق عند الضيق بودّي لحتة نفي الإلحاد بشكل أو بآخر, فكان لابد من حركة (الزول دا) المتابع بلقى إنها المرة الأولى التي يكتب فيها بكّور عبارة استهزائية صادمة بالجرأة دي
و القصد منّها اعادة الجلوس في الحتّة الكاد يزحلقوا منّها معاوية بحسن نيّة, فالمهم الصيت ولا الغنى.
يتساءل حافظ عن عدم زعله من رميه بالإلحاد, اقول ليه يزعل كيف ودا عز المراد, لكن كدي الله يقدّرها عليك وأرميه بالقشرة بالإلحاد و الفرق واضح
ح يرشّك بقسوة ويعتذر عنّها بعد الزعلة تروق 
هوي يا مستنير, دا راي الشخصي في القضية ما تزرزرني هههه
| |
|
|
|
|
|
|
|
|
|
Re: إلحاد المستنير المدغمس (Re: سيف النصر محي الدين)
|
يا ود البشرى أنا قلت افتح البوست دا عشان المستنير يجمع فيهو درره المتناثرة في ثنايا البوستات المتفرقة
وبالمرة تكون صحيفتو جاهزة يومئذ.
اختلف معاك تماما في رأيك بإنو صاحبي ابوبكر بقشر بآرائه في الأديان (إذا كنت جادي في رايك دا)
ياخي الزول دا أكبر من كدا، ولو عايز يقشر عندو كم حاجات ممكن يقشر بيها
أقلاها تفرده في السرد القصصي كناطق بـ اسم قراء الهامش و رواتِه
مرورا بترشحه لنيل الجواز الإمبريالي وليس انتهاءً بوضعه كإحتياطي في كنبة البدائل في فور اول
الناس بس لو تروق شوية وتعتبر طرح بكور دا نوع من الحوار أبو دَق
انت قاليك الاتهامات البكيلوها الناس ليهو دي هو ما عارفها يعني؟!
تلقاهو زمان لمّا كان في مدرسة الأساس كالها لي واحد زميل (دراسة) مستنور
| |
|
|
|
|
|
|
|
|
|
Re: إلحاد المستنير المدغمس (Re: معاوية الزبير)
|
يابكور خلينا في حكيك الطاعم ياخ
مافي زول هنا مطالب بإظهار تدينه أو إلحاده
الكل حر في ما يعتقد
اكتب واكتب
جد ماعاوز نوع النقار ده يبعدك من المنبر
ياخي انت احسن من مدعي التدين الفاسدين
| |
|
|
|
|
|
|
|
|
 Re: إلحاد المستنير المدغمس (Re: حيدر حسن ميرغني)
|
Quote: من جهة أخرى، وقريبا من مسألة التقديس، يتناول المفكر اللبناني حسن حمدان المعروف بالاسم الحركي: مهدي عامل
موضوعا مدغمساً أسماه ( أنسنة الله)
يقول فيه إن المتدينين (في كل الأديان الإلهية) وإلى حدٍ ما غير المتدينين العايشين معاهم في بيئتهم الاجتماعية وبالتالي متأثرين بتربيتها
يتعاملون مع الله وكأنه إنسان .. يزعل ويغضب ويفرح ويتعامل بردود الفعل ولو عملت كدا ح يعمل ليك كدا
من نحن صغار يقولوا لينا: ربنا بزعل منك، أو الله بكون مبسوط منك لو عملت كدا
مفهوم أنسنة الله هذا المتوارث عبر الأجيال وربما أصبح يجري عبر الجينات من الصعب التخلص منه بأخوي وأخوك..
وبمقابل أنسنة الله -ويا للعجب- يتم تأليه بشر |
تحياتي معاوية المدير
مهدي عامل زولا ماساهل ، خصوصا عندما يتحدث عن البنيوية وشروط نضج العمل الثوري
اول مرة اعرف انو دا اسمه الحركي !!
بعدين كلامه عن انسنة الله هو الذي استدعي في ذاكرة المستنير جملة الزول دا ، اي عندما قال (اقصد الله)
وليه الناس زعلت ماعارف ، الحقيقة الناس دي كلها بتتخيل انو الله زول كبير ، يغضب ويحفز ويغري وكل مايفعله الانسان
والناس معذورة في فهمهما لاله الكون ان يكون مشابها لهم في صفاتهم ، حتي غنم بكور لو كان لها اله خاص بها ، لكان له ضنب .....
لايستطيع الانسان مثلا ، رغم خيال برامج الاطفال ، ان ياتي بملامح لكائن (حتي لو كان فضائي ) ليس له ملامح الانسان او الكائنات
التي يراها الانسان ، الشخص الوحيد القادر علي الخروج عن هذا التصور ، هو الفنان التشكيلي ، يستطيع ان يرسم لوحة لاتتضمن اي
كائن معروف لدي البشر ، ونعتبرها نحن شخبتة ساي .....لكنه ينتظر الاخرين ليضيفوا لها من عندهم ابعادا لاتتفق معه ولاينتظر اتفاقا منهم
فاللغة اداة للتعبير عن مفاهيم ، لايمكن التعبير عن المفاهيم الا بواسطة وسيط دلالي ، قد يكون اللغة المنطوقة او اللغة الشعرية التي تغوص
ابعد قليلا ، او الرسم بكل مدارسه ، او الموسيقي الخ وكلها ادوات للتعبير عن هوية الشئ المقصود توضيحه واحيانا ابهامه كمتعة انسانية
هل هناك فكر لايعبر عن هوية الشئ ؟! هل هناك فكر لاهوية ........
هل المفردات التي نستخدمها تكفي لوصف شيئا ما ....
الدين يستخدم اللغة ، واللغة اداة واحدة من ادوات التعبير وعاجزة عن تفسير الاشياء ، فعندما اقول شجرة ، فهذا ليس الشجرة في ارض
الواقع وانما فكرتها في ذهني كشئ مجمل ، غير مفصل ، لكن الشجرة تحتوي مليارات الحقائق غير الملحقة بمفهومها التجريدي في ذهني
فهناك الكلوروفيل وهو مركب كيميائي معقد وهناك عمليات حيوية تجري من الجو الي داخل الشجرة وبالعكس الخ كل هذه المضامين
غير واردة في الصورة الذهنية لكلمة شجرة في عقلي كمضمون ( هوية) الشجرة ، والمشكلة الكبيرة تكمن في اننا ارتضينا هذه اللغة
كمعبر وحيد في التفكير ونعتمد عليها في تكوين المفاهيم ، لذلك كان صراع الاضداد في المادية الجدلية هو صراع داخل فكر الهوية
وسقطت هذه النظرية لانها لم تري الي النقص في مكونات اللغة وانها لاتصلح لصياغة مفاهيم ، نسبة لانها تجتزئ من الاشياء مجرداتها
وتتعامل مع الطبيعة تعامل اداتي ....
الاديان سلسلة تطور طويل لتاريخ الانسان في استخدام طريقته منذ الصرخات الحيوانية الاولي كوسيلة لغوية مرورا بابتكار الرسوم
كوسيلة تواصلية حتي انتهي به المطاف في حدود اللغة كاسهل وسيلة للتواصل....لكن هذه اللغة غير مؤرخة بشكل جيد ولادقيق
ولازال الباحثون يتعرفون علي طرق منهجية لمعرفة اصل اللغة ، واصل الاديان نفسها كنتاج لاديان سابقة حتي بدايات الاديان الوثنية
والاساس في كل ذلك ضعف الانسان البدائي وحوجته لقوة عليا تحميه من كوارث الطبيعة ، فكل قوي الطبيعة كانت الهة يوما من الايام
فالريح كانت اله ، والشمس كانت اله ، والخصوبة كانت اله وهكذا مع التطور اندمجت في اله واحد بفعل تراكم خبرات الانسان وقدرته
علي التحكم في بعض الهته القديمة وخلق بدائل لها ، اليوم يوجد خالق المجرات العملاقة التي توصل لها العلم الحديث والذي تضيق
معه فكرة اله الاديان ، بتفاصيله الحالية المتاتنسنة ، يتدخل في الزواج والطلاق وعدد ونوع النساء وادق التفاصيل التي اصبحت تافهة
لانسان القرن الحالي الذي يعيش في بقعة منسية من كون لانهائي ......فلماذا نؤنسن الله بعد كل ذلك ، الواضح ان الله غير معني بتفاهة عقولنا
التي تؤنسنه ، اعتقد المستنير قصد ذلك ، والله خالق المجرات اعلم !
| |
|
|
|
|
|
|
|
|
|
Re: إلحاد المستنير المدغمس (Re: muntasir)
|
يعني هو عايز الله يجيهو مباشرةً و يخاطبو عشان يقتنع بي إنو الدين دا منو ....؟؟؟؟
و بالتالي الله يلف على كل خلقو .....؟؟؟؟
عايز يعزمهم لي سماية .....؟؟؟؟؟؟
| |
|
|
|
|
|
|
|
|
|
Re: إلحاد المستنير المدغمس (Re: muntasir)
|
حبيبنا ود البشرى
تحياتي
Quote: يتساءل حافظ عن عدم زعله من رميه بالإلحاد, اقول ليه يزعل كيف ودا عز المراد, لكن كدي الله يقدّرها عليك وأرميه بالقشرة بالإلحاد و الفرق واضح
ح يرشّك بقسوة ويعتذر عنّها بعد الزعلة تروق |
ما متفق معاك نهائي في نظرية القشرة دي
المستنير في كل حواراتو دي ما قال حاجة تدل على إنه ملحد (بإعتبار أن الإلحاد (atheisim) هو عدم الإعتقاد بوجود آلهة)
و لم يقل أيضاً أن الرسل لم يتلقوا وحي من الله، و لكنه يعتبر أن الوحي تجارب شخصية للأنبياء لا ينصرف و لا يلزم الإيمان بها غيرهم
المستنير طرحه مركز حول عدم كفاية الأدلة التي تجعل الإنسان العادي يقتنع بأن الأديان منزلة من الله الخالق.
طرح المستنير يمكن تصنيفه بأنه لا ديني (irreligious) و لا أدري (agnostic) و لكن وصفه بالإلحاد دي أفتكر ما دقيقة
أنا لما علقت على عدم زعل المستنير كنت مستصحب معاي جملة قالها هو في قصة التومة بت إبليس
Quote: زعل سهام دا ذكرني اللا دينيين بتاعين المنبر، أقدر أهبش ليك واحد قول ليهو إتّا ملحد
تعال شوف الورجغة والزعل وفقدان المنطق!! |
الأسئلة الطرحها المستنير دي صحيح هي قديمة جداً و متكررة و حتظل تتكرر لأنه الإجابات عليها غير مقنعة لبعض الناس بالرغم من أنها قد تكون لبعض آخر مقنعة تماماً
الإختلاف في حكم الناس على الإجابات دي بإنها مقنعة او غير مقنعة بترجع لمقدرات عقلية و لنمط تفكير الشخص و دوافعه النفسية للقبول بها من عدمه
| |
|
|
|
|
|
|
|
|
 Re: إلحاد المستنير المدغمس (Re: Hafiz Bashir)
|
دي شِنو دي ؟.
المكيفني في الموضوع دا إنّو الملك ؤ منتصر طلعوا من
إندِينا رِجرِجة ؤ دهماء، فهنيئاً لنا .
الزول دا لِزو لي، كُباية وآحدة من إستار بكس تخلي يسكن
جوّة الجامع .
قوم لِف بلآ مُ س ت ن ي ر بلآ لخمة ...
| |
|
|
|
|
|
|
|
|
|
Re: إلحاد المستنير المدغمس (Re: معاوية المدير)
|
"يا لطيف" زولنة الله في قصّة المعراج واضحة، اجعص بتاع سناريو ما ممكن يخلق لله صورة غير مادية زولية لله من القصّة الموروثة دي؟!!
شوف بعد لاقاهو جا راجع السماء السادسة لاقاهو موسى قال ليهو أرجع ليهو خليهو ينقصن ليك شوية، وشغال كدا مفاوضات معاهو لحدي في الأخير خجل منو و ما قدر ينقص ال خمسة!!!
الغريبة لو خلاهن تلاتة كان ظبطن مع القرآن والشغل.
الضهر والعصر ديل اصلا ما في ليهن داعي؟!
| |
|
|
|
|
|
|
|
|
|
Re: إلحاد المستنير المدغمس (Re: أبوبكر عباس)
|
يا حافظ، اصرار ود البشرى على موضوع قشرتي بالالحاد قدام الرجرجة ديل، بقراهو كنوع من الحماية الشخصية.
لو عاينت لمسيرة ود البشرى بتلقى حدث فيها تطور مهول!!
الرجل في يوم من الأيام كان مقتنع انو سيدي المهدي عليه السلام كلم الله تكليما!
عبر زمن طويل ومكابدة احتكاك وتعليم تخلى عن ذلك
لا أعتقد انو الزمن الباقي كافي له لتقبل اسئلتي دون دفاع.
لكن البركة في حتوت سوف يحمل راية أخرى بيضاء من غير سوء
الما بتنو في التطور بتمو ليك ولدك
| |
|
|
|
|
|
|
|
|
|
Re: إلحاد المستنير المدغمس (Re: أبوبكر عباس)
|
يا ود المدير، كنت أنوي أن أكتب: المجتمعات كانت تترغب بمعنى كلها رغبة، ثم ذهبت لقاموس المعاني فوجدت هذا التصريف يدخلني في مماحكة مع مترصدي الأخطاء ناس اسامة صديق، ويكسبوا معاي مشاركة لا يستخقونها، أها القاموس قال لي ما عندك إلى الترقب، وبالفعل وجدتها اقوى، فعجبني رسمها بالشدّة المفتوحة، فكوبتها ومن ثمّ بسبستها، فصارت خضابا في المداخلة كما ترى
| |
|
|
|
|
|
|
|
|
 Re: إلحاد المستنير المدغمس (Re: ABUHUSSEIN)
|
| Quote: ناس اسامة صديق، ويكسبوا معاي مشاركة لا يستخقونها |
غتاتتك عينة ، هو انت دافع حاجة من عندك هههههه
زي الجعلي مشاكل زول قام قال ليهو انعل امك وام الجنبك دا ذاتو هههههه
طيب ماكان تجيب سيرة الباقين كنوع من ديمقراطية الاستنارة هههههه
| |
|
|
|
|
|
|
|
|
|
Re: إلحاد المستنير المدغمس (Re: عثمان عووضة)
|
Quote: الغريبة لو خلاهن تلاتة كان ظبطن مع القرآن والشغل.
المستنير
دا حق ناس هناي داك ......!!!!!!!!!!!!
أبوحسين
|
أمير المؤمنين خالي علي محمد الحسن يصلي من أربعين سنة تلاتة صلوات (صبح مغرب عشاء)
"وَأَقِمِ الصَّلاةَ طَرَفَيِ النَّهَارِ وَزُلَفًا مِنَ اللَّيْلِ"
"أَقِمِ الصَّلَاةَ لِدُلُوكِ الشَّمْسِ إِلَى غَسَقِ اللَّيْلِ وَقُرْآَنَ الْفَجْرِ إِنَّ قُرْآَنَ الْفَجْرِ كَانَ مَشْهُوداً"
قال لي: تصادفت مع شيخ حسن الترابي في بيت عزاء، واحد من الجمجارة قال لشيخ حسن:
أخونا علي دا ليهو أكتر من تلاتين سنة بصلي تلاتة صلوات؟؟
ردّ شيخ حسن: العندو أكتر منهن اليجيبن
| |
|
|
|
|
|
|
|
|
|
Re: إلحاد المستنير المدغمس (Re: أبوبكر عباس)
|
ســــلام يا أبا بكر (المرة دى ســلام صادق و الله).
تتبعت رددودك بعناية وو جدتك ليس من الذين يغوون الإنتصار للنفس (دى ممكن تعتبرها كســير تلج) ، بصراحة كنت زعلان فى أول مشاركاتى لكنى الآن أجد شيئا من متعة (ولا أخفيك ســرا شىء من معلومات مفيدة)
لكن كشىء من الدعابة "قفشــت" ليك خطأ برضو فى مشــاركتك الأخيرة:
قلت:"أها القاموس قال لى ما عندك إلى الترقب"
الصحيح:
"أها القاموس قال لى ما عندك إلا الترقب"
يا أخى دم بخير(ودى كمان والله صادقة)
ثبتنا الله جميعا على الحق و السلام الداخلى أيا و كيف ما كانت قناعاتنا....
| |
|
|
|
|
|
|
|
|
|
Re: إلحاد المستنير المدغمس (Re: Osama Siddig)
|
Quote: والله يا بكور انا ما عندي
مشكلة معاك تكون ملحد ولا تعبد
صحن طلس ولا واحدة. من بقراتك
ديل
لكين بتمنی لو کنت. معاي في الحادث
امس مش عشان داير ليك اذی
لکین عشان تشوف. القبر. الانا. شفتو بي
عيوني والعربية طايرة علی ارتفاع تلاتة
امتار من الواطة
...
والله انا علی قناعة تامة انو غير الله
سبحانه مافي قوة في. الأرض ولا في
السماء كانت. مدبرة لما حدث خيراً
كان. ام. شرا |
عوووضة صباح الخير
لامن قلنا كل الفطاحلة الملاحدة اتراجعوا لحظة خروج الروح
احد حوادث المرور الحيرت رجال المرور في الارجنتين
Quote:
حدثت هذه القصة في الأرجنتين سنة 2004 مجموعة اصدقاء سكارى ذهبوا الى صديقاتهم ، امها كانت قلقة عليها من اصدقائها السكارى وقالت لها وهي ممسكة بيديها اذهبي والهي سيكون معك ليحميك ، ردت البنت فقط اذا اراد الله ان يسافر معنا لا يوجد مكان له الى في صندوق السيارة ( شنطة السيارة) لان هنا بالداخل ممتلئ وفي صندوق السيارة لا يوجد شيء إلاّ كرتون البيض فضحك جميع من كان في السيارة على رد البنت لأمها فضحكوا جميع الاصدقاء بصوت عالي ، بعد عدة ساعات وصل خبر بأنهم تعرضوا الى حادث مُريع جداً سقطوا من على قمة الجبل لدرجة ان الشرطة لم تتعرف على نوع السيارة ، وكل من كانوا في السيارة قد ماتوا ، المذهل ان صندوق السيارة لم يتأذى ، حتى ان الشرطة مذهولين مِن هذا وقالوا مستحيل ان الصندوق السيارة لم يتأذى وما زاد ذهولهم اكثر ان كان بالصندوق كرتون بيض ولم يتكسر ، سبحان الله
|
| |
|
|
|
|
|
|
|
|
|
Re: إلحاد المستنير المدغمس (Re: حامد بدري)
|
( ولو أن للذين ظلموا ما في الأرض جميعا ومثله معه لافتدوا به من سوء العذاب يوم القيامة وبدا لهم من الله ما لم يكونوا يحتسبون
( 47 ) وبدا لهم سيئات ما كسبوا وحاق بهم ما كانوا به يستهزئون ( 48 )
يالله حسن الخاتمة ...
| |
|
|
|
|
|
|
|
|
|
Re: إلحاد المستنير المدغمس (Re: محمد عبد الله الامين)
|
| Quote: سوء العذاب يوم القيامة |
معقول جد جد إتّوا مصدقين قصص عذاب القبر والعذاب بالنار؟!
الكلام دا لا يدخل العقل السليم
كيف للخالق أن يحرق عباده بالنار وهم أحياء؟!
شافع صغير ما برضى الكلام دا
تحرق ليك زول حي بالنار؟
هسع لو حرقوا زول قدامي بالنار لحدي ما تفحم
وقالوا لي أمشي الجنة/،بمشي؟
نحن نصلح الدين دا، نقول لأولادنا :
الأرواح الشريرة تفنى والأرواح الخيّرة تستمر في الحياة بعد الممات.
ما ظنيت الإنسان "الأممي" في العشرية الجاية ممكن يقبل ليكم الكلام بتاع عذاب النار دا؟؟
أحسن ليكم تطوروا الدين دا
| |
|
|
|
|
|
|
|
|
|
Re: إلحاد المستنير المدغمس (Re: أبوبكر عباس)
|
Quote: أمير المؤمنين خالي علي محمد الحسن يصلي من أربعين سنة تلاتة صلوات (صبح مغرب عشاء)
"وَأَقِمِ الصَّلاةَ طَرَفَيِ النَّهَارِ وَزُلَفًا مِنَ اللَّيْلِ"
"أَقِمِ الصَّلَاةَ لِدُلُوكِ الشَّمْسِ إِلَى غَسَقِ اللَّيْلِ وَقُرْآَنَ الْفَجْرِ إِنَّ قُرْآَنَ الْفَجْرِ كَانَ مَشْهُوداً"
قال لي: تصادفت مع شيخ حسن الترابي في بيت عزاء، واحد من الجمجارة قال لشيخ حسن:
أخونا علي دا ليهو أكتر من تلاتين سنة بصلي تلاتة صلوات؟؟
ردّ شيخ حسن: العندو أكتر منهن اليجيبن |
أمير المؤمنين دا بعرفوا بالحيل و بعرف بقية شلتو .....
و لو عزمونا فطور في رمضان بنزوغ منهم ... لأنهم بفطروا بعد ما تضلم ....
| |
|
|
|
|
|
|
|
|
|
Re: إلحاد المستنير المدغمس (Re: أبوبكر عباس)
|
| Quote: ســــلام يا أبا بكر (المرة دى ســلام صادق و الله). |
خالي أمير المؤمنين علي محمد الحسن الملقب بعلي الكافر، ما شفت لي زول علي الإطلاق بكرهو!
فشنو؟ أنا شلت منو عرق المحبة دا
أسأل منتصر، هل بالمنبر دا قبل دا إجتمع الشيوعيين والسلفيين على حب زول مشترك؟
أهم حاجة ورثتها من أمي - أخت دكتور الرازي البكتب معانا هنا من الفيس بوك- هي عرق المحبّة.
الشيء المتأكد منو لو يوم القيامة طلع كلامكم صاح (ودا بعيد) وفي جنّة ونار،
من بعيد بأشر لي أطلع من الصف عشان أمشي الجنة.
هو داير الناس تكون كويسة
أها أنا كويس من غير ما أخاف من النار
في داعي لعطش رمضان وصبح شهر واحد؟!
| |
|
|
|
|
|
|
|
|
|
Re: إلحاد المستنير المدغمس (Re: أبوبكر عباس)
|
Quote: الأرواح الشريرة تفنى والأرواح الخيّرة تستمر في الحياة بعد الممات.
|
خليك مع خالك ؤ بدل تقول تستمر في الحياة قول ..
(( يَا أَيَّتُهَا النَّفْسُ الْمُطْمَئِنَّةُ ارْجِعِي إِلَى رَبِّكِ رَاضِيَةً مَرْضِيَّةً فَادْخُلِي فِي عِبَادِي وَادْخُلِي جَنَّتِي ))
أوع تقولي الجنة معناها حور عين وخمر وعسل بعقلية أعراب الجزيرة ..
لأنها ببساطة ما لاعين رأت ولا اذن سمعت ولا خطر بعقل بشر . أنتهى.
.يا احباب براحة على المستنير ..
بكور دا ما يخمكم بأسلوبو المهاتر دا ..
الزول دا مافي ورقة مكتوب عليها اسم الله وقعت في يدو ما قراها ..
ؤ مافي عالم قال برأي كان بقدر يحصلو ما حصلو وناقشو ..
الزول دا ما ببحث عن ربه هو عارفو حتى من خصائص الإبل الدرسا ومعايشها..
انا شخصيا لما أقراه بكتب أو بعلق حول أنبياء أو مهديين ..
بديني إحساس إنو هو ما ببحث عن الموجب والثالب فيما أنجزوه للبشرية ..
بل ببحث عن الكيفية التي تلطفت بها أرواحهم لكي تتلقى من خالقها وهي رهن قيدها الدنيوي .
| |
|
|
|
|
|
|
|
|
|
Re: إلحاد المستنير المدغمس (Re: معاوية الزبير)
|
| Quote: نصيحتي للمستنير يتلب من نافذة الملك دي |
ههههه ..
عشان بتلب إنت ما عارف تأثير الإبل على الرعاة ؟
تصدق يا معاوية الزبير الزول دا لو ما عايز يتونس بالناس ساكت ..
قبيييل ود أب سن دخل عليهو من الحتة الهو (مفوكس ) ليها ..
ؤ رمي ليهو مراقة الحافز الأيديولوجي..
مدخل أب سن تاريخيا صحيح ..
تاريخيا الخلط بين الأيديولوجيا وشؤون المجتمع بدأ بعقيدة الحياة بعد الموت .
ثم تولدت عن فكرة الحياة بعد الموت عقيدة تاليه البشر أو السيد ..
وما تبعها من طقوس التضحية religious sacrifice بمعية السيد ..
ثم تطورت لعقيدة المجسمات ( أوثان ) ك Mediator بين الفرد والمعبود..
واستبدلت مفاهيم التضحية البشرية بمفهوم الأضحية الحيوانية ..
وأخير تم الانتقال لعقيدة الإله الغيبي التوحيدية مع استمرار مفهوم الاضحية الحيوانية..
دي ذاتا بدأت بنبوات فردية ثم لاحقا رسل خاصين لقوميات بعينها..
أخيرا توسعت لتصبح شاملة للبشرية في خاتمة الرسالات..
طيب اللفه دي كووولها سببا شنو وهدفها شنو؟
سببا : انتقال الإنسان من العيش بمفرده إلى العيش في جماعة ودا هو التطور الإجتماعي المعني ..
هدفها : إشباع حاجة الروح من جهة وضبط العلاقات الاجتماعية وتنظيمها من جهة أخرى ..
لتمضي حياة الجماعية بسلاسة ونظام حتى لا تفقد الجماعة ترابطها..
لتنفيذ الهدف لابد من اللجوء لآلية القوة ..
والقوة مصدرها إما مادي أو روحي ..
الإنسان المعاصر بدأ في علاج فكرة الضبط الاجتماعي بالتفريق بين القوة المادية والروحية ..
حيث وضع كل قوة في مسارها ..
المادي مع الجسد والغيبي مع الروح ..
اعتمد الأعراف كآلية إجتماعية للضبط ..
تطورت لقوانيين وضعية ومبادئ أخلاقية ..
فبدأت فكرة الضبط عن طريق أيدلوجيا العقائد( القوة الروحية ) تضعف تدريجيا ..
ثم تخلى المجتمع عن فكرة محورية كانت تقول أن السلطة مصدرها الله أي القوة الغيبية ..
واتجه لفكرة أن المجتمع نفسه هو مصدر السلطات ..
من هنا نبعت فكرة الدولة وسيادتها ..
فتراجعت فكرة القوة الغيبية لمكانها الطبيعي أي الروح وحاجته وليس المجتمع وحاجاته..
هل أنتهى الصراع بين القوتين المادية والروحية في المجتمعات المعاصرة ..
لم ينتهى بعد وإن أصبح دور القوة المادية في تنظيم الشان الاجتماعي أكثر وضوحا مما سبق..
خاصة بعد أن توسع الاهتمام بالاعتماد على معايير أخلاقية لأنسنة القوة المادية.
| |
|
|
|
|
|
|
|
|
|
Re: إلحاد المستنير المدغمس (Re: معاوية الزبير)
|
يا معاوية يا مدير أصلاً هو عاديني في الرجرجة والدهماء هو محق لكن يعد الملك دي هرطقة منه ي، يا بك المحبة دي الخلتني أشك انك الانتي كرايس لكن معاوية الزبير عملنا ليه مراجعات وأفاد انه ما عندك عين واحدة وطوال إقامتكما معاً لم ير الجساسة ، يا معاوية يا زبير صاحبك عكليتة وما دخل مدخلاً إلا ورفض الخروج منه ما بشتغل بمخرج الملك اصله بنطبق عليه المثل يبخروا فيه وهو يليث وما بنهدي إلا تجيبوا ليه شيخة ترقيه لأنه بكاي
| |
|
|
|
|
|
|
|
|
|
Re: إلحاد المستنير المدغمس (Re: muntasir)
|
مسا الخير
تخاف من الموت جليتا مالك جاري للنار قلنا ليك نارك اتا قدام وبتاكلا براك لا بحلوك الاستنوروك لاغيروم حساب فردي ولو رجعتا بس للقران بتمعن بتلقى كل الدايرو
القران ده اقنع مورييس بوكاي دكتور واعلم منك وخبير ومستنير فقط بتشريح جثة الفرعون اامن بعطش رمضان ونار القيامة ودخل الاسلام
ياخي خلينا من علم التشريح والاجنة سايح دخل حمام مالقى ورق تواليت سعل انضف كيف قالوا ليو المسلمين مابستخدموا الورق موية وصابون عشان الطهارة بحث عن الدين البفتش لنضافة ناسو اكتر من قصة الورق دي واسلم اتا قايل الاسلام اتا حتزيدوا شنو هرطق مابدا لك ندعو الله يهديك ويعفو عنك ياميسي ابرويس
| |
|
|
|
|
|
|
|
|
|
Re: إلحاد المستنير المدغمس (Re: حامد بدري)
|
يا حامد بدري ياخ ابوبكر دا كل كم شهر بيطلّع جنين حي من ناقة ميتة وبعد كم شهر تانين جنين ميت من ناقة حية.. سبحان الخالق
ولم (يبهته) ذلك، و راسو وألف سيف ما يفك درب الشك دا
فاا شنو
ما تستفزو ياخ بي قصة الخواجة والكلينيكس
| |
|
|
|
|
|
|
|
|
|
Re: إلحاد المستنير المدغمس (Re: معاوية الزبير)
|
| Quote: ندعو الله يهديك ويعفو عنك ياميسي ابرويس |
أول حاجة، ميسي ابرويس هو أمير المؤمنين عمر البشير.
تاني حاجة، خروج البتاع دا من المصران الأخير دا، وحركة قفل وفتح البلف الأخير دا، ونظافتو دي مسألة فيها فنيات فايتة عليك يا زول، يا أدبي!
كدي يوم جرب النظافة بالورق وقارن؟
الزول المفروض ما يحكم علي غائب!
غايتو نظافة الموية دي المفروض نحسنها بلبس قفاز في اليد اليسار.
يعني تجي داخ الحمامات تلقى صناديق قفازات كل المقاسات ومكتوب جنبها: واحد بس.
الحاجة التالتة، أنا ما جليت الخوف من الموت بتاع ود أم بعلو دا، لكن كنت قايلك بتخوف فيني بالنار (البعاتي) البعدو.
| |
|
|
|
|
|
|
|
|
|
Re: إلحاد المستنير المدغمس (Re: أبوبكر عباس)
|
| Quote: طرح المستنير يمكن تصنيفه بأنه لا ديني (irreligious) و لا أدري (agnostic) و لكن وصفه بالإلحاد دي أفتكر ما دقيقة |
يا حافظ ياخوي انا ماش افرز ليك دا شنو ودا شنو, في الكورة في المريخابي و الموردابي و النيلابي .. إلخ إلخ, كل التصنيفات جي لا يعنيني منها سوى أنهم جميعا ليسوا بأسياد بلد :)
وما يفرق بعد كدا عدم الدقة في الفرز
و يا معاوية انا جاد في قصة القشرة, أولا ناس الجواز و احتياطي الفور أول و الونسات و الحجى الظريف دا ما بيأكل عيش تميّز وتفرّد هنا
أو ما بأكّل عيش فينو طاعم زي المنظر بتاع العقل المتحرّر من المسلّمات و الشكّاك الذي يطرح الأسئلة الجريئة التي يعجز أو يهرب منها و عن الإجابة عليها الرجرجة - دا المنظر العام يبدو لي كدا من برة
وذلك لمحاولات حشر الأسئلة دي و الإشارات الجريئة في بوستات و مواقف ليست ذات صلة نهائي, تحس أن الغرض من اثارتها هو الاثارة في رقبتها وليس العثور على أجوبة - على بعد نقرات ماوس لمن كان جادا.
و لنخفف قشرة طيب ونقول تحسيس - تحسيس دي حقوقها محفظة لحتّوت و اًصحابه حاجة كدا قريبة من تحشيش الزمان
ولنقل المستنير يحّسس, الحاجة دي ممكن تقراها مع الاصرار على التداخل أن يكون مميّزا و خارج ما يبدو صندوق و رفع كثافة الآخرين, يعني الحوار و الجدال لأجل الجدال في حد ذاته و ليقال حريف و طقطقه ليك و رشّاه وبتاع
و امور مستجدي سودانيز دي :)
| |
|
|
|
|
|
|
|
|
|
Re: إلحاد المستنير المدغمس (Re: أحمد محمد عمر)
|
ههههه
تسويق استنارة بكّور شرف لا أدعيه و تهمة لا انكرها يا ابوحميد
لكن يبدو لي الأقرب للحقيقة بدل يكفّر عن تقول يعبّر عن خيبته في الإيمان بخلافة بكّور للبروف حسبما صوّر لنا :)
| |
|
|
|
|
|
|
|
|
|
Re: إلحاد المستنير المدغمس (Re: محمد البشرى الخضر)
|
صباح الخيرات والبركات
Quote:
أول حاجة، ميسي ابرويس هو أمير المؤمنين عمر البشير.
تاني حاجة، خروج البتاع دا من المصران الأخير دا، وحركة قفل وفتح البلف الأخير دا، ونظافتو دي مسألة فيها فنيات فايتة عليك يا زول، يا أدبي!
كدي يوم جرب النظافة بالورق وقارن؟
الزول المفروض ما يحكم علي غائب!
غايتو نظافة الموية دي المفروض نحسنها بلبس قفاز في اليد اليسار.
يعني تجي داخل الحمامات تلقى صناديق قفازات كل المقاسات ومكتوب جنبها: واحد بس |
وحات نظري الحتة المكرفسة زي قدوم والي الخرتوم دي لو لبستا ليها قفازات ماتعرفا نضفت ولا لا مافي طريقة الا باحساس وملامسة كاملة للمنطقة وتحسس منعطفاتا القفاز بحرمك منها زي ممارسة الجنس بالعازل قفازاتك دي ماتنفع الا مع الدكاترة
اينعم ادبي بس قريت مجالا بديك شووف للحاجات بي عين كويسة كده اقرا هنا
Quote: امت صحيفة (ذا ادفوكيت) التي تصدر في (لويزيانا) بـ(الولايات المتحدة الأميركية) في عددها الصادر يوم 27 مايو 2005 بعمل تحقيق صحفي كان مفاده:
1- في كل يوم يتم دفن حوالي 35 شخصا على قيد الحياة نتيجة اعتقاد خاطئ من الأطباء أو حتى الأهل بأنهم ماتوا فعلا (تذكر إننا نتحدث هنا عن (الولايات المتحدة) حيث قمة الرعاية الطبية والتطور).
الدفن حيا .. أسوء كوابيس الانسان
2- هناك شخص من كل 50 شخص يدفن حيا بالخطأ على مستوى (الولايات المتحدة) نفسها فقط.
تلقت الصحيفة رسالة من السيد (مارك فولنجويث) ويعمل حانوتيا في دار للدفن قال فيها:
بعد أربعين عاما من العمل في مجال الدفن .. أصبحت على قناعة تامة بأن (عددا كبيرا من المرضى) قد دفنوا أحياء دون أن يدرى بهم احد بسبب التسرع في الإعلان عن الوفاة (نتيجة توقف القلب أو التنفس لفترة) دون الوضع في الاعتبار كونها حالة (وفاة سريرية - Clinical death ) حيث تبقى بقية الأعضاء حية طالما لم يتخثر الدم ويحدث التيبس حتى إذا عاد القلب والرئة للعمل تتجاوب معهما بقية الأعضاء فيستيقظ الميت وسط ذهول الجميع. |
وبعد تخلص قصة جنازة المناقل سمعتا بيها النطت بعد الغسيل
| |
|
|
|
|
|
|
|
|
|
Re: إلحاد المستنير المدغمس (Re: Hatim Alhwary)
|
مشكلة المستنير (ودي راجع ليها) انه وقع في فخ اسمه "بخيت شواف"
وبخيت دا زول عجوز الناس كانت طالعة عشان تتحرى هلال رمضان فهو شاف سبيبة من حاجبه الأشيب فافتكره هلال
فقال ليهم داك هلال
المعاه امعنوا النظر ففعلا شافو هلال "صحي صحي"
فقالوا ما شاء الله بخيت شواف
فقام قال ليهم وداك تاني هلال
بكور زول ممتع في الحكي عندما يحكي قصة قصيرة او طويلة وانا واحد من الناس الكانت بتشرق بالضحك من بوستاته عندما يحكي قصصا
لكن لما شاف الناس كلها قالت عليه ظريف في الحكي
حب يسحب الحتة دي على الدين
فقال ليهم وداك تاني هلال
لكن الاشكال انه ظرافته في الدين سمجة لمن عضيرة
جدية بكور في البحث عن الحق مثار شك
لأنه لو كان يبحث عن الحق حقيقة ولو كان زي ما قال معاوية بقرا اي ورقة فيها بسم الله ما كان فك فينا صاروخ كروز الما بنقرع وما ممكن يصدر من بحاثة باحث عن الحق حقيقة
البقول انه ما في حاجة اسمها محمد وانه مروان ابن الحكم اخترع الحكاية دي
ودا بقودني لمقاربات ود البشرى "الرمادي المونساتي" انه زول قشار ما اكتر
المستنير وعولاتها واحد من اسبابها نفخ المونساتي والرمادي ود البشرى "وربعه" القايلين ما بجي الخريف واللواري بتقيف
ولنا عودة
| |
|
|
|
|
|
|
|
|
|
Re: إلحاد المستنير المدغمس (Re: احمد الشيخ)
|
غايتو ياقول المثل اتنين لو قالوا ليك راسك ماف اتبّنو!
احمد عمر قلنا غالاط ساي لكن كمان المولولاتي ود الشيخ معناها اتبّن راسي
يا مستنير أنا متين نفخت في استنارتك, كدّي وقّعها لي الناس ديل شكّكوني
أنا حسب ما أذكر جيتنا مستنير ومنفوخ من يومك :)
| |
|
|
|
|
|
|
| |
معاوية الزبير
يحي قباني
أبوبكر عباس
جلالدونا
محمد على طه الملك
Hani Arabi Mohamed
عبدالحفيظ ابوسن
علي عبدالوهاب عثمان
حامد بدري
Hatim Alhwary
عمر عثمان
احمد الشيخ
حيدر حسن ميرغني
Hafiz Bashir
Osama Siddig
علي دفع الله
عادل ابراهيم احمد
عثمان عووضة
محمد البشرى الخضر
سيف النصر محي الدين
عبداللطيف حسن علي
ABUHUSSEIN
معاوية المدير
منتصر عبد الباسط
فيس بوك
تويتر
انستقرام
يوتيوب
بنتيريست