|
نعى اليم ...... سودانيز اون لاين دوت كم تحتسب الزميل فتحي البحيري فى رحمه الله
وداعاً فتحي البحيري
|
|
 Re: ماهو انسب واضمن استثمار في السودان لمغترب (Re: احمد سيد احمد)
|
Quote: السلام عليكم
ارجو اقتراحاتكم وافكاركم النيرة وشكرا مقدما |
سلام ود سيد احمد
خليا دولار او ريال براهابتزيد ليك خصوصاً الحج علي الابواب بتلقي الدولار ضرب فووق ..( البقول ليك ود عباس كضاب اتحداو ) وبعداك تقوم تفكا وتسال سؤالك دا ؟؟
اقترح شراء قطعه او تما واشتري شقه في مصر .
تحياتي
| |
 
|
|
|
|
|
|
|
|
Re: ماهو انسب واضمن استثمار في السودان لمغترب (Re: عثمان الأمام)
|
حبيبنا الاستثمار أحسن في السعودية ..
ممكن بوفيه .. أكلات سودانية ..
تختار المحلات المناسبة في جدة أو الرياض ..
شوف ليك سعودي كويس ..
كثير من الاخوان إستثمروا هنا في السعودية
محل سودانيين فقط يمكن يكلفك أقل من 30 الف
بس تكون أخو إخوان .. ومعاملتك حلوة .. وكلامك حلو
تلقى الشلل بالجملة .. وكما ما تنسى القهوة بطريقة شرقنا الحبيب ..
الفول لازم يكون بلدي .. الكمونية .. وفي الغداء قراريص ..
صدقني ناس عندنا في جدة هنا تكسب بأقل تكاليف ..
بس كمان عندهم مقدرات التعامل ..
في السودان التضخم الشهر الفات 14% ..
مودتي .. وفقك الله ..
| |
|
|
|
|
|
|
|
|
|
Re: ماهو انسب واضمن استثمار في السودان لمغترب (Re: عثمان الأمام)
|
انا كنت عايز اقول للجماعة الذين تكرموا بالإجابة عليك بإنهم يكونوا جادين .لكن كلامهم يحمل الجد و الهزار و الإحباط و التحذير و التنبيه.
عشان كده كلامخم ده خليه في بالك و خليك حذر لأنه في استثمارات كتيرة في السودان و ناجحة جداز لكن الامشروع الذي يناسبك قد لا ينناسب لك.
و ثاني خلفيتك و خبرتك السابقة لها اثر كبير في اختيار المشروع المناسب.
باختصار الإجابة ما ساهلةز و ما في إجابة جاهزة.
لازم عشان الواحد يديك الغجابة المناسبة يلاقيك أو يتصل بيك و يعرف كثير من التفاصيل .ثم بعد داك الواحد يقدر
يديك اقتراح.زمجرد اقتراح و ليس إجابة نهائية.
غنت الأول شوف الاقتراحات العندك شنو او الاقتراحات الاقترحوها ليك شنو و بعدين أسأل عن المشروع الفلاني او الفرتكاني.
لكن سؤال مفتوح كده ما في زول بيتجرأ يديك اقتراح .
الله يوفقك و يسدد خطاك
| |
|
|
|
|
|
|
|
|
 Re: ماهو انسب واضمن استثمار في السودان لمغترب (Re: Hani Arabi Mohamed)
|
Quote: تاني حاجة شوف استثمار حقيقي مضمون في مكان آخر بعيد عن السودان.
بعد داك من العائد الحيجيك ان شاء الله تشوف حاجة تعملها في السودان
بحيث لو خسرت في السودان - ودا غالباً الحيحصل -
يكون عندك استثمار برا |
أفضل اقتراح ...
أضف إليه استثمار العائد في السودان في العقار يعني تشتري عقارات جاهزة لو أمكن وتأجر .. أو تبني وتأجر ...
| |
|
|
|
|
|
|
|
|
Re: ماهو انسب واضمن استثمار في السودان لمغترب (Re: أبوبكر عباس)
|
السلام علي سكان البوست
في السودان في اكثر من مجال مضمون الاستثمار فيهو بس صراحة ناس الحكومة ديل ما مضمونين
يعني السياسات الاقتصادية ما مستقرة او اصلا ما موجودة... وعادي ممكن الجماعة "يهنضبوك"
لكن في العموم الآن في حوجة ماسة للتخزين المبرد في الشمالية ونهر النيل والولايتين بقدموا ليك
حوافز كبيرة لان في مشكل في استيعاب انتاج البطاطس والبصل وكثير من المحاصيل الاخرى
في المقابل اثيوبيا ماف زييها واقل مبلغ مطلوب للاستثمار في حدود ميتين الف دولار اذا ما زاد
والله يوفقك
| |
|
|
|
|
|
|
|
|
|
Re: ماهو انسب واضمن استثمار في السودان لمغترب (Re: Frankly)
|
السلام عليكم
بالنسبة للاستثمار افضل استثمار الان
1- مطعم متخصص بيتزا
2-كافتيريا حديثة
3- مطعم حديث ( ومن ضمن اكلاته المندي )
الشرط الأساسي لنجاح هذا المشروع الموقع المميز والإدارة الناجحة
اعرف من أسس محل باقل من ذلك في موقع مميز وأصبح من انجح
المحلات واعرف من أسس بمبلغ خرافي ولكن سوء الموقع والإدارة
اصابته بالإفلاس المبكر
--------
ولو ربنا وفقك ممكن من المحل ده تفتح فروع ويكون فايض الأرباح شغل اخر عقارات وخلافه
| |
|
|
|
|
|
|
|
|
|
Re: ماهو انسب واضمن استثمار في السودان لمغترب (Re: Frankly)
|
بارك الله لك في مالك
ارى من الاستثمارات المضمونة وهي اشبه بان يكون استثمار مركب وطويل الأمد بمعنى ان نتائجه مستقبلية
وتكاد تكون مضمونة، فقط يحتاج منك الاشراف المباشر
الفكرة:
بما انه دائما المدن عندنا امتداداها افقي فهذا يزيد من تنامي السكن والسكان لخارج مراكز المدن وتتنامى معه الحاجة في الخدمات طويلة الأجل.
عليه انصحك بشراء عدد ستة قطع متجاورة والبدء في إقامة مدرسة ثانوية عليها في امتدادات المدن الجديدة
وبناءها بأقل سعر ممكن ومن الممكن الأستعانة بأحد الاخوة هنا حيث له خبرة في البناء بصورة حديثة وكلفة اقل
وان شاء الله (والفكرة هي اقامة مدارس ثانوية نموذجية) وسياتيك العائد من اول سنة وبصورة مربحة ومضمونة ويعتبر استثمار طويل الأجل
ويمكن ان تبنبى المدارس بحيث يكون مرفق معها معارض تجارية خدمية للتأجير او مخازن
وفي حال فشل مشروع المدرسة تكون الأرض قائمة وقابلة للبيع و الخروج من التعثر.
ربنا يوفقك ويعطيك من فضله
تقبل تحياتي والاخوة المتداخلين
احمد
| |
|
|
|
|
|
|
|
|
|
Re: ماهو انسب واضمن استثمار في السودان لمغترب (Re: aosman)
|
.....تحياتي للجميع .....
لكن هناك استثمارات غير منظورة وهي مربحة ومضمونة ومصاريفها محدودة،ويحتاج الشخص الي مكتب صغير يدير منه اعماله،وهو شراء لودر واتنين قلاب واحد ستة متر والثاني اقل اربعة متر ويعمل في الاتي
نقل المونة (تراب ورملة)
نقل الخرصانة بانواعها .
لان عملية البناء اصبحت متسارعة والطلب علي مواد البناء كبير.
بس محتاجة حبة صبر ومثابرة...
......بالتوفيق.....
| |
|
|
|
|
|
|
|
|
|
Re: ماهو انسب واضمن استثمار في السودان لمغترب (Re: Dr. Ahmed Amin)
|
ثم أوعك تشتري بيت أو عقار في السودان أسمع نصيحتي !!
توثق عند محامي وتسجل في الأراضي وتدفع رسوم تحسينك وتتسلم شهادة بحثك ، وتطلع تصديق بناء رسمي وتبني البيت طوابق وبرضو مافي ضمان وممكن يصلبطوا فيك ويقلعوا البيت !!!!
أسأل مجرب ما تسأل طبيب !!!
اللهم لا اعتراض !!
| |
|
|
|
|
|
|
|
|
|
Re: ماهو انسب واضمن استثمار في السودان لمغترب (Re: لطفى العمده)
|
Quote: ...طبعا كلامك دا ماجامع مانع ......فاي قاعدة عندها شواذ.....عشان كدا ...نجاح الانسان في المثابرة ولكل مجتهد نصيب ...الان هناك ابناء تحار لم يستطيعوا المحافظة علي ارث ابائهم واجدادهم .....
|
سلام ابراهيم
ابناء التجار الذين لم يستطيعوا المحافظة على ارث ابائهم حصل ليهم الكلام ده فى ظل هذا النظام
فى ظل هذا النظام التجار والمزارعيين الحقيقين خرجوا من التجارة والزراعة بافعال النظام وحل محلهم الطفيليين والانتهازيين وناس لا علاقة لها بالتجارة والزراعة وغير مؤهلين لها وكل تاهيلهم هو انتمائهم لهذا النظام !
والله فى ظل هذا النظام لو دخلت اى استثمار فى السودان وانت تملك مال قارون تطلع منه مديون ومطارد كمان !
مؤهلات الاستثمار فى السودان اليوم وفى ظل هذا النظام لا علاقة لها بمن يملك راس المال
| |
|
|
|
|
|
|
|
|
|
Re: ماهو انسب واضمن استثمار في السودان لمغترب (Re: Ahmed Yassin)
|
إيك تخش السوق بي قروشك ..
في ظل التماسيح والسماسرة ..
إنك تخسر قروشك دي شغلة مضمونة 100% ..
لأنهم حيدردقوك وياكلو قروشك ..
ويفكوك عكس الهوا ..
نصحيتي ليكـ ..
تخش السوق سمسار أول ..
بعد ما تعرف الحاصل في السوق وتتودك ..
جيب قروشك من بره ..
لانه النماذج البنعرفها ..
لي ناس اتاكلت قروش اغترابهم وشقى عمرهم ..
في السوق ما تديك الدرب ..
ونصيحتي التانية ..
إياكـ تمشي الخاص ,,. ...
لانه دي بداية المقرشة ..
وما اطعم قروش المغتربين الداقسين ..
| |
|
|
|
|
|
|
|
|
|
Re: ماهو انسب واضمن استثمار في السودان لمغترب (Re: يحي قباني)
|
التحايا لهذا الحضور الجميل .
رغم أنّي قرأت كل المداخلات بالبوست ، اللهم الّا أن تكون احداها سقطت عن سهو ، و مع ذلك لست هنا لأقدّم نصيحة او استشارة عن الموضوع المطروح للنقاش لأنّي ببساطة لست مختص في هذا المجال ، و لكني فقط احببت أن اعرض مداخلتين أجد نفسي متّفقًا معهما تمامًا ، الاولي مداخلة الاستاذ Frankly و التي جاء في جزء منها أنّه من الافضل سؤال من له تجربة حقيقية في الاستثمار في السودان.
المداخلة الثانية مداخلة الاستاذ Willeim Andrea و التي جاء في جزء منها : تعرف كل واحد من الاخوان أداك حسب تفكيرو او مما سمع و عمرها القروش ما بتعمل الواحد تاجر او صاحب مشاريع ناجحة .
لا أقول أنّ الشخصين اعلاه قد قدّما افضل مشورة لصاحب البوست في الإجابة علي سؤاله عن الاستثمار و لكني فقط أجد نفسي اتّفق معهما في بعض ما قدّماه و ذلك لأنّي قد استمعت و قرأت لرجال اعمال وصفوا رجل الاعمال الناجح بأنّه يطلب المشورة من المختصّين و لا يطلبها من أيّ شخص علي وجه العموم . حتي و إن كان ذلك الشخص يعمل في مهنة مستشار و حتي و إن كان متخصصًا في مجاله ، إذ لا تجب استشارته ما لم يكن قد جرّب بصورة عملية ما يقول . و بمعني آخر أنّ المستشار المالي المختص في مجال الاسهم لا يجب اعتماد مشورته ما لم يكن له حساب بالبورصة و يمارس الاستثمار في الاسهم بيعًا و شراء و نتيجة اعماله تشير الي نجاح حقيقي و ملموس ، و كذلك المستشار في مجال تجارة العقارات و الذي لا يكفي أن تكون له شهادات تثبت تخصصه في المجال لأنّ العمل في مجال العقارات يعتمد علي المفاوضات و علي المعرفة الكاملة بقوانين الدولة التي يمارس فيها نشاطه و بمعرفة اسعار بيع و شراء و ايجار العقارات . و بالطبع فإن تلك امور لا يتم تدريسها في الجامعات و التي تهتم فقط بتدريس الجوانب الاكاديمية و التقنية دون سواها من المجالات .
النقطة الثانية و المتعلّقة برأي الاستاذ Willeim Andrea اراها نقطة موضوعية للغاية لأنّ كل صاحب بزنس يتقن مجاله دون ما عداه من مجالات ، و لو اعطيت صاحب مخبز اموال إضافية لاستثمرها في الافران و اذا تحدّثت مع ( سقّا ) لقال لك إنّ افضل استثمار هو سقاية الماء ، و هكذا . و اصحاب الخبرة و الشأن في هذا المجال يقولون بأنّ الشخص يلزمه اولًا الاستثمار في المعرفة بالمجال الذي يريد أن يضع امواله فيه و بعدها يفكّر في الاستثمار لأنهم يرون أنّ اهم خطوة في الاستثمار هي ( الخطّة ) خطّة الاستثمار و الاستثمار بلا خطّة ببساطة يعني استعداد الشخص لأن يتعلّم بالمبلغ الذي قرّر أن يستثمر به . لأنّ الاستثمار بغير خطّة واضحة يعني الدخول في دائرة التجربة و الخطأ و بهذا يكون تعليمًا و تدريبًا و ليس استثمار .
ينصح رجال الاعمال بأن يستثمر الشخص فيما يعرف بعد أن تكون له خطّة استثمار واضحة تسبقها دراسة و اهتداء بشخص مجرّب للمجال ، أو بالعدم فمشاركة شخص مجرّب و ناجح في مجال الاستثمار ( المُقرّر ) لأجل ضمان الابتعاد عن مجازفة الدخول في دوّامة التخمين .
إذن الخطوة الاولي في الاستثمار بحسب رأي رجال الاعمال تبدأ بالتدريب علي يد شخص مستثمر و ناجح في الاستثمار و بعد فهم قواعد اللعبة ( لعبة الاستثمار ) يمكن للشخص حينها أن يستثمر بمفرده و دون الحاجة لناصحين .
| |
|
|
|
|
|
|
|
|
|
Re: ماهو انسب واضمن استثمار في السودان لمغترب (Re: جلالدونا)
|
بصراحة القروش دي ما تبعي انا ..تبع ناس اخونا وانا مؤمن بأنو نصف رايك عند اخيك ومؤمن بانو تداول الراي مع عدد كبير من للناس الفاهمين زيكم بيفيد الزول وبطلع منه باراء ناصجة...
دحين فعلا يا ود المشرف زي ما قال اخونا جلال دونا ياريت تدينا تفاصيل اكتر عن موضوع الشقق في الامارات دا لانه بصراحة هو من اول مقترحات اصحاب المبلغ بس المعلومات الكافية عنه غير متوفرة فياريت تفيدنا.....ودا لا يعني انا الاراء والمقترحات القيمة التي طرحها الاخوة بالاعلى اهملت ولمن ان شاء الله كلها قيد نظر الجماعة وبشكركم اخونا ود الباوقة وان شاء الله بجيك ف الخاص
| |
|
|
|
|
|
|
|
|
|
Re: ماهو انسب واضمن استثمار في السودان لمغترب (Re: احمد سيد احمد)
|
السلام عليكم ورحمة الله وبركاته
أولا هذا المبلغ صغير جدا ، يساوي حاليا حوالي800 ألف جنيه .. أي أقل من مليار كما يقول الناس حاليا ..
بهذا المبلغ لا تستطيع أن تشتري بيت ، أو أرض في حي كويس .. يمكن أن تشتري في المناطق البعيدة عن وسط االمدن .
هنا اتحدث عن العاصمة فقط ..
وحتى الكافتريات الحديثة صاجبة المواقع الجيدة لا يمكنك امتلاك أحدها ، وقد تدفع المبلغ كله كخلو رجل ..
المهم ، هذا الكلام قد يكون محبطا ،لكنه هو عين الحقيقة .. إذا علمت أن العربة البوكس موديل 90 ممكن يصل سعرها 200 ألف ..
لذا أنا أرى أن يدخل المغتربون في شراكات تؤهلهم للاستثمار في السودان ، أو في أي بلد آخر ..
على كل حال أنا أنصح بالاستثمار الزراعي بشقيه .. يعني ممكن تشتري مزرعة 5 فدان ، سعرها بين 250 إلى 500 ألف حسب الموقع ،
وتبدأ فيها مشروع تربية ضأن أو ماعز ، وتبيع ألبانها ومنتجاتها الأخرى ، وتسوق الذكور في اسواق اللحوم أو مواسم الذبيح ..
ويمكنك أن تبحث عن شريك لتعمل في مجال الدواجن لأن تكلفة الانتاج الحديث مرتفعة جدا ، يعني الهنقر بس بيحتاج أكتر من مليار
أتمنى لك التوفيق ..
| |
|
|
|
|
|
|
|
|
|
Re: ماهو انسب واضمن استثمار في السودان لمغترب (Re: ودقاسم)
|
سلام للجميع ..
كلام الأخ ودقاسم صحيح .. المبلغ صغير ويكفى للإستثمارات الصغيرة .. وأعتقد أن فكرة ودقاسم هى بمثابة أسلوب حياة طويل الأجل ــ الله يطوّل الأعمار فى الطاعات ــ .. يعنى تبقى تربال حديث وتدرع العراريق والجلاليب وتبقى مع مشروعك.. أما حكاية رقشة وحافلة وعييك وعاك ده يبقى شختك بختك .. يقوم يلم فيك أولاد لذين حرامية سماسرة ياكلوك حى .. فالناس مع الحر والغبار وشمس النهار ديك والفلس الضارب أطنابه على قارعة الطريق فقد أصبحوا سعرانين إلاّ فيما ندر .. وذلك واضح من هذه الردود المحبطة التى تجعلك تحس أن البلد لم يبقى فيها ود حلال وانعدم منها الخير ..
إذن ربما أصبح تغيير نمط حياة الفرد للحقل والحيوان والهدوء بعيداً عن لهاث المدن ودنيا الوحوش البشرية هو أفضل استثمار ..
والله أعلم ..
إستفسار جانبى لمحمدالمشرف .. وين فى دبى ممكن تشترى ليك استوديو بـ٢٥٠ألف ريال؟؟ :) ..
| |
|
|
|
|
|
|
|
|
|
Re: ماهو انسب واضمن استثمار في السودان لمغترب (Re: Munir)
|
المبلغ في حال تحويله إلى عملة سودانية بطلع مبلغ بسيط لا يمكن استثماره في العقار
الخرطوم العاصمة تعاني بشكل عام مشكلة حادة في مياة الشرب وكثرت الأحياء السكنية الطرفية بكثافات سكانية عالية وانشطة متعددة اسواق، مطاعم ، كافتريات ، محلات شاي، حركة بناء أولى وخلافه ووهي أنشطة تحتاج لإمداد مائي منتظم ومستمر إضافة للشرب والإحتياج المنزلي
أقتراحي أن تقوم بجولة في داخل احياء العاصمة المختلفة وامتدادها في الخرطوم وبحري وأمدرمان وتختار في كل منطقة عدد من الأحياء وتنزل فيه اسطول من كواري المياه (حمار+ برميلين + إطارات مستعملة وكم ماسورة) وفي كل منطقة تعمل ليك مندوب يحصل العائد
ودي وسيلة استثمار مضمونة لأ تحتاج لمنصرفات تشغيل تذكر وفي ذات الوقت كبيرة العائد وإيرادتك في اليوم الواحد لن تقل عن مليون بالقديم يعني 30 مليون في الشهر وتكون الأصول في ذات الوقت موجودة (الحمار + والبراميل).
أبعد من الإستثمارات البراقة ..............دي بتلفت الإنتباه وتغطس الحجر.
| |
|
|
|
|
|
|
|
|
|
Re: ماهو انسب واضمن استثمار في السودان لمغترب (Re: saidahmed shami)
|
| Quote: لطفي شاركنا تجربتك |
تجربتي او طوحي بالاصح كان أكبر من التجربه
لكن اجلت بعض المشروعات لدواعي استراتيجيه
المشروع وكالة سفر وسياحه
ببساطه عملت شركة , وهذا موقعي علي الانترنت
https://www.google.com.sa/url؟sa=tandrct=jandq=andesrc=sandsource=webandcd=1andcad=rjaanduact=8andved=0ahUKEwiuvMbym_3NAhXJA8AKHSM-CUQQFggjMAAandurl=http%3A%2...o0vvROkF64lGhI_FPq5Q
ومن كل اسماء الاعمال نشطت وكاله السفر بشكل غير عادى
بالرغم من انني متغرب عن البلد اكثر من 15 سنه
وصبرت ريال ورا ريال الي ان جمعت ما يعيننى علي فتح الشركة
وطبعا لم يكن لي من المعارف والواسطات ما يسند ظهرى
فلجأت الى فكرة كانت ( معشعشه ) فى راسي منذ زمن
وهي استخدام طلاب الجامعات كوسطاء مبيعات لتذاكر السفر بعموله مجزيه
نسبه الوكاله فى اي تذكرة 9% مما يعنى لو كانت تذكره السفر من الخرطوم لدبي
ب 3000 الف يعني حق الوكاله 270 جنيه
لو بعت عشره تذاكر في اليوم تربح 2700 جنيه
كنت استخدم اكثر من عشره وسطاء طلاب لو كل واحد جاب عشره زبائن يعني مجموع ما تجنيه الوكاله 13500 يوميا
نصيب الوسيط 5% ونصيب الوكاله 4 % اما البيع المباشر فتكون ال 9% ربح خالص للوكاله
تكاليف انشاء الوكاله لا تتعدى ال 50 الف ريال
تتمثل في ايجار وتجهيز الموقع بالاجهزة والبرامج اللازمه زائد 50 مليون لوزارة السياحه وعشرين مليون diposit عند خطوط السفر لحجز التذاكر الكترونيا
الموظفين محاسب وبنتين خبرة ومندوب خارجي وعامله نظافه ومدير ثقه
| |
|
|
|
|
|
|
|
|
|
Re: ماهو انسب واضمن استثمار في السودان لمغترب (Re: احمد سيد احمد)
|
الاخ أحمد سيد احمد ... وضيوفك الكرام ..
السلام عليكم ,,
حسب خبرتي .. احسن استثمار في السودان هو العقار ( استثمار جبان ) ومافيه مخاطر .
وزي ما قالوا ليك الاخوان .. المبلغ حقك بسيط لعمل استثمار كبير ذو عائد مجدي ..
والافضل ان تفتح حساب في بنك امدرمان الوطني او بنك فيصل الاسلامي
وتودع المبلغ والذي يساوي تقريبا بين 750 الى 800 مليون بالقديم
في حساب استثمار وديعة لاجل .. وعائدها السنوي يتراوح ما بين 12 الى 13 في المية
يعني في السنة ربحك فوق المية مليون .. (تسعة ملايين شهرياً )
وانت مرتاح ... وراس مالك بزيد كل سنة ..
والمبلغ في امان . لا ضرائب ولا جبايات .. ولا يحزنون ..
وتقبل تحياتي ,,,
| |
|
|
|
|
|
|
|
|
|
Re: ماهو انسب واضمن استثمار في السودان لمغترب (Re: محمد مجيدو)
|
سلام للجميع عدنا لهذا البوست الجميل والمهم والمفيد
بتعليق شوية أكبر وأعمق .
معروف في حالة عدم إستقرار الإقتصاد instability
وبسبب :
- تعطل الانتاج أو ضعفه بشقيه الزراعي والصناعي( شح مدخلات ,حروب فساد ,جفاف ,سوء إدارة وسوء تخطيط كذلك ارتفاع الضرائب والجبايات وهجرة الايدي العاملة الماهرة وندرتها )
تبقى السمات الرئيسية لهذا الاضطراب الاقتصادي .
1- سلبية ميزان المدفوعات ( واردات أعلى من الصادرات ) فضلا عن أن هذه الواردات بلا سيطرة فمعظمها كماليات ( كريمات , اثاث , اواني منزلية, اكسسوارات الخ)
2- انهيار العملة المتسارع Devaluation
3- ارتفاع التضخم المتسارع Inflation
في تلك الحالة يلجأ أصحاب االأموال الى العقار ليحموا مدخراتهم لذلك تعتبر الخرطوم واحدة من أغلى الأماكن في العالم من ناحية العقارات مباني وأراضي .. بل تكاد تضاهي لندن ومكة . رغم أن هاتين البقعتين لهما اسباب مختلفة ( موضوعية وصحية) .
وكذلك من مظاهر الانهيار الأقتصادي لا توجد سيطرة على الاسعار .. النكتة القديمة بتاعة أخونا القال ( ما ننوم ) أصبحت واقعا .. نفس الصنف من نفس الرف في الدكان ممكن الصباح تلاقيه بسعر مختلف . ولا تلوم صاحب الدكان لأنه يكون الصباح مر على تجار الجملة بالسوق العربي مثلا واكتشف أنه السعر زاد عندهم .. ولكي يستطيع أن يتسترد بضاعته التي باعها لا بد أن يرفع السعر . والناس اصيبوا باللا مبالاه . لا أحد يعترض أو يحتج ..
نأخذ الناحية الثانية المواصلات .
لو اشتريت أي وسيلة مواصلات حافلات أو بصات .. البنية التحتية سيئة والشوارع مدمرة .. ستستهلك السيارة قبل أن تسترد رأسمالك .. فضلا عن سوء الاستقلال من قبل المواطنين انفسهم وكذلك السائق ومساعده .إذا كان الحافلة حمولتها خمسة وعشرين راكب سيركب بها أكثر من خمسة وثلاثين .. الباب لوحده فيه أكثر من خمسة .غير المترادفين على الكنب .
بقى مجال واحد وهو قابل للمغامرة ما ذكره الأخ المسلمي وعلى عبد الوهاب
وهو مجال الأكل ( مطاعم )
بسبب بسيط إنه المطعم بعد مصاريف التأسيس ( تجهيز المطعم )
يبقى لك رأس المال التشغيلي ( رأس المال العامل) وهو أنه ستشتري المدخلات يومية ( لحم دقيق بهارات خضروات وزيوت إضافة لمرتبات العاملين ومصاريف المياه والكهرباء) وهذه أنت تستطيع أنك تجاري فيها السوق لأنها مشتريات يومية ..
يصبح النجاح متوقف على الموقع و الكثافة السكانية وجودة المنتج والدعاية الجاذبة .
وأنا أقدم لك هذه المشورة بصفة مزدوجة .. اولا تخصص الإقتصاد .. وثانيا لاني ابن تاجر تربى بالسوق وعمل به قبل الاغتراب ..
| |
|
|
|
|
|
|
|
|
|
Re: ماهو انسب واضمن استثمار في السودان لمغترب (Re: ود الباوقة)
|
Quote: واغترابك يدل على تعثر المشروع وعدم جدواه
يا اخي درديري
ابو السيد دا لو جاني في الخاص بجيهو ليكم |
عشان كدا أنا سميتها مغامرة ..لأنه ذكرت الاسباب الموضوعية التي تجعله يمكن أن ينجح
لكن هو لو جاك في الخاص ممكن ينجح فعلا معاك
بس دا ما عنده علاقة بالآستثمار والسؤال المطروح
| |
|
|
|
|
|
|
|
|
|
Re: ماهو انسب واضمن استثمار في السودان لمغترب (Re: ود الباوقة)
|
أنا بالجد مستغرب ممن يقول أن المبلغ بسيط وصغير ولا يكفي
لأن دي ما مشروة ولا تقييم صحيح اللهم إلأا إذا ارتبطت رغبة صاحب رأس المال باستثماره في مشروع معين فعندها يمكننا أن نقول أن هذا المبلغ صغير
لكن على وجه العموم صاحب رأس المال لم يحدد وجهته الاستثمارية وعليه تكون الإقتراحات في حدود المبلغ الذي بحوزته دون تقليل من قيمته
هناك مشاريع كثيرة جداً يمكن تنفيذها بهذا الملبغ بل بجزء منه
لكن مشكلتنا الحقيقية في السودان هو أننا ننظر للاستثمار كبقرة حلوب نريد لبنها بدون أن نتعب في تغذيتها وهذا ضرب من المستحيل
كما الرغبة الكبيرة للبعض بأن يكون عائد المشروع من اليوم الأول
ونقطة سالبة أخرى في الأستثمار السوداني هو المحاكاة وعدم التفكير في الجديد والتجديد والتمدد فبائع الفول تجده هو هو بعد عشرين سنة من مزاولة المهنة لا يفكر في عمل ساندوتشات وتوزيعها على الشركات والمحلات التجارية وهكذا
أفضل استشارة هي استشارة المجرب لأنه سيعطيك عصارة تجاربه ويقيك من الوقوع في أخطائه ولكن مع ذلك لا تقلد تقليدا مطلقاً بل حاول أن تستفيد من التجارب ووضع بصمتك عليها
من المشاريع التي تتطلب مبالغ بسيطة:
صناعة البلوكات الأسمنتية
المحلات التجارية الصغيرة (مواد استهلاكية) وماد منزلية
الزراعة في البيوت المحمية
زراعة الأسماك
تربية الماشية للحليب واللحوم
دربية الدواجن اللاحم والمبيض
صناعة البيوت المحمية
أكشاك المياه والمرطبات وبعض المعحجنات الحلوة
تصنيع المعجنات والخبائز
محلات فساتين الزفاف
محلات ألعاب الأطفال
المكتبات المدرسية
تصنيع وتحضير المنتجات اللحمية من سجوق وبيرقر وكوفتة
تصنيع وتوزيع العلف للدواجن والأسماك والأبقار
الزراعة في مساحات صغيرة 5 - 20 فدان. في أرض مستأجرة أو ملك
محلات غسيل الملابس بالغسالات والكي بالمكاواة الكهربائية
مغسلة عربات.
العمل في الحفريات وأبار وصهاريج المياه
كسرات الأحجار
بنشر أطارات
صناعة الأثاث المنزلي البسيط
إعادة تنجيد الأثاث المنزلي
وغير ذلك الكثير
| |
|
|
|
|
|
|
|
|
|
Re: ماهو انسب واضمن استثمار في السودان لمغترب (Re: الفاتح شلبي)
|
فرانكلى سلامات ..
قلنا مبلغ صغير يلائم المشروعات الصغيرة .. زى اللستة الجبتها دى ..
لو الله وفقك وقلبك قنوع ممكن كشك ليمون يعيشك عيشة متوسطة .. لكن المشكلة ليست النشاط الإقتصادى ذاته ولكن العقبة غالباً تكون فى مدخلات إنتاجك التى تكون عند ناس راسمالهم الفهلوة .. زمان واحد صاحبى تخرج مهندس وقال لى أنا بس عايز أعمل مشروع دواجن .. فقام جاءنى بعد فترة قصيرة ساخط وقرفان .. مالك يازول ؟؟ قال لى الإنتاج كله يمشى لجيوب تجار علف الدواجن الذين يتحكمون ومسيطرون على سوق الدواجن .. فتأمّل .. تكون جاى تشتغل بنفس تلقى فى تماسيح قانصين ليك ..
عالم بطّالة زى ما قال مجيدو ..
وبمناسبة مجيدو ، ياريت ينوِّرنا عن قصة إيداعات البنوك دى .. !!
| |
|
|
|
|
|
|
|
|
 Re: ماهو انسب واضمن استثمار في السودان لمغترب (Re: عبدالعظيم مكى)
|
مساء الانوار وكلو سنة واتو طيبين
اشتري مكينة زي حقت الاردني داك واطبع وبيع 
بالجد البلد وصلت مرحلة من التكلس وصعوبة العيش لاتطاق لامن يكون عندنا بلد اول شئ بعدين نفتش للاستثمار والعيشة فوقو والاستمتاع بيو
اكتر من مية اسرة من اقرب الاقربين لينا هاجروا لمصر والماهاجروا تقريبا كل شهر شهرين بمشو ويجو ومشترين وماجرين هناك
بمعادلة بسيطة تجيب ليك قروش عملة صعبة وتحولا لي جنيهات عشان تعمل مشروع وتشتغل وتكسب وتجي بعد فترة عشان تقيييم مشروعك تلقا بس فرق العملة ضيييع زمنك ومجهودك مثال بسيط جدا اشتريت لي ارض قبل اربعة سنوات بمبلغ مية وستين الف ريال الان تساوي مية وعشرين الف ريال بس بي ادي السمسار الحمار بقول لي في فايدة مية مليون
قروشم دي يربطوها صرة في خيت ريالات كده بس يستثمروها هنا او يعصروها هناك ريالات براها بتزيد صدقني
مثال تاني ود اخوي عندو بيت ورثة في الشجرة منتظر سنة عشان يتباع ليو بي سعر كويس جاب ليو سبعمية وخمسين في وكت الريال بي الفين وخمسمية باعو بي تنمية في وكت الريال بي تلاتة ونص نصحتو بحكم معرفتي بي سوق العملة ويحولا ريالات كانت قرابة التلتمية الف تصدقوا فرق العملة بس كان حيوصل الارض لمليار ومية عشرة الف لو سمع كلامي الفرق تلاتة وتمنين الف ريال
| |
|
|
|
|
|
|
|
|
|
Re: ماهو انسب واضمن استثمار في السودان لمغترب (Re: عبدالعظيم مكى)
|
تحية
ارجع اعلق على الجزئية (الاخ مجيدو) بخصوص ايداع المبلغ فى بنك وتلقى فائدة سنوية12%
فلنفترض اودعت مبلغ 250 ريال تساوى بسعر اليوم3600 يعنى 900 مليون جنيه بفائدة 12%
ستربح بنهاية السنة108 الف جنيه . رصيدك اصبح 108+900= 1008 الف( مليار و8 الف جنيه
بعد عام كامل.
2/ فلنفترض احتفظت بالمبلغ 250 الف اى مايعادل900 الف . السنة الجاية السعر ح يزيد لعدم ثبات
الجنيه السودانى. على الاقل الريال سيصل4100 - 4200 . بحساب انه السنة الماضية كان2700 والان3600
فالمبلغ بنهاية العام سيبلغ 250×4200= 1050 مليار وخمسين الف جنيه.!!!
يعنى لو اودعتها فى البنك حتكون خسران42 الف فعليا .. وما مضمون لى قدام تقدر تعرف بقت كم!!
مع خالص تحياتى
| |
|
|
|
|
|
|
|
|
|
Re: ماهو انسب واضمن استثمار في السودان لمغترب (Re: Salah Habib)
|
في خلط كبير جداً بين عوائد المشروع سلباً وإيجاباً وبين إعادة رأس المال بالعملة الصعبة
حساب رأس المال كل سنة بسعر صرف الجنيه أمام العملات الأجنبية فيه خطأ كبير إذ لا يراعي تأسيس البنية التحتية للمشروع والأصول الثابتة والخبرات المتراكمة وهذه لا تقدر بثمن.
أعتقد المستثمر السوداني عندما يحول رأس ماله للجنيه السوداني فيجب عليه أن يحسب عوائده من اليوم الأول بالجنيه السودان فقط.
أما إذا أراد الاستثمار بالسودان مع رغبته في جلب ريعه لخارج السودان فليفكر في مشاريع للصادر.
| |
|
|
|
|
|
|
|
|
|
Re: ماهو انسب واضمن استثمار في السودان لمغترب (Re: Munir)
|
سبحان الله برغم ان الموقع يجمع اصحاب خبرات وتجارب في كل جوانب الحياة
الا ان الخوف من كل تجربة يجعل الانسان يتوقف كثيراً قبل ان يبدا اي خطوة
في استثمار ماله او تنميته وهذه مصيبة كبيرة والاولى ان نتناقش في هذه المخاوف
بمعنى ما هي الدواعي للمخاوف التي تجعل استثمار بعض المال مجازفة وكأن المغترب
مكتوب عليه ان يعيش حياته مغترباً ولا يفكر في العودة فصاحب المليار
يعتبر راس ماله صغير وصاحب العشرة مليارات ماله معرض للنهب بشتى الطرق
من ضرائب وجمارك واتاوات ومكوس وفي الاخر يصبح المغترب المستثمر ملوص
| |
|
|
|
|
|
|
|
|
|
Re: ماهو انسب واضمن استثمار في السودان لمغترب (Re: جمال خضر)
|
اخي جمال خضر
في عام 96 عملت دراسة جدوى لمشروع تهجين اغنام نوبية مع سعانين هولندي
واجيزت من قبل البنك الزراعي
وتمت الموافقة بالمشاركة والتمويل
وقبل ان ابجأ
وكان وزير المالية قدس الله سره عبد الرحيم حمدى ارتفعت مدخلات انتاج الاعلاف بنسبة اكتر من 30%
فطرشقت الدراسة والمشروع
نظريا
اي استثمار في السودان ذو عائد عالي وناجح
فعليا
اي استثمار في السودان فاشل بنسبة 1000%
ليه
السبب عدم وجدود دولة ذات رؤية واضحة لادارة البلد
شغالة برزق اليوم باليوم والضرائب والجبايات
فنفر كل رجال الاعمال الى الجارة اثيوبيا وعدد من الدول الافريقية
كلام زول مختص وولد تجار اتربى في سوق امدرمان
| |
|
|
|
|
|
|
|
|
|
Re: ماهو انسب واضمن استثمار في السودان لمغترب (Re: Munir)
|
سبحان الله برغم ان الموقع يجمع اصحاب خبرات وتجارب في كل جوانب الحياة
الا ان الخوف من كل تجربة يجعل الانسان يتوقف كثيراً قبل ان يبدا اي خطوة
في استثمار ماله او تنميته وهذه مصيبة كبيرة والاولى ان نتناقش في هذه المخاوف
بمعنى ما هي الدواعي للمخاوف التي تجعل استثمار بعض المال مجازفة وكأن المغترب
مكتوب عليه ان يعيش حياته مغترباً ولا يفكر في العودة فصاحب المليار
يعتبر راس ماله صغير وصاحب العشرة مليارات ماله معرض للنهب بشتى الطرق
من ضرائب وجمارك واتاوات ومكوس وفي الاخر يصبح المغترب المستثمر ملوص
| |
|
|
|
|
|
|
|
|
|
Re: ماهو انسب واضمن استثمار في السودان لمغترب (Re: احمد سيد احمد)
|
| Quote: وبمناسبة مجيدو ، ياريت ينوِّرنا عن قصة إيداعات البنوك دى .. !! |
د. منير .. سلام .. وكل سنة وانت طيب ,,
انا عن تجربة طويلة امتدت لاكثر من 20 سنة
اتعامل مع بنك امدرمان الوطني ..
ولي حسابان .. بالدولار وبالجنيه السوداني
في البداية كانت الفائدة تصل الى 21 في المية
واخذت تتناقص سنوياً الى ان وصلت 13 في المية حاليا ..
( يتم احتساب الفائده بتقسيم عدد العملاء على مجموع الودائع )
الشي الجميل .. في حساب الدولار تقدر تسحب
بنفس العملة ( الدولار ) اي مبلغ تحتاجه دون اي مماطلة او تاخير
حتى لو كان المبلغ كبير ... ولقد سبق وان سحبت 20 الف دولار
في وقت كان الدولار شحيح وشبه معدوم .. وتم تامين المبلغ
لي في نفس اليوم ... و تعامل الموظفين راقي جدا .. للامانة ..
كورنر : ....... بالرغم من انني مقيم خارج السودان ...
وعندما احتاج اي مبلغ من الحساب في الخرطوم ..
فقط اقم بارسال فاكس للبنك واطلب منهم تسليم المبلغ المعين
لفلان من الناس ... واعزز رسالتي هذه بمكالمه هاتفية للمسئول في البنك
ويتم صرف المبلغ فورا حسب طلبي .. كان دولار او جنيه سوداني ...
وانا اشكر لهم تعاونهم المستمر في خدمة العملاء ...
ان شاء الله تكون اتنورت يا دكتور ؟؟؟
تحياتي ,,
| Quote: يعنى لو اودعتها فى البنك حتكون خسران42 الف فعليا .. وما مضمون لى قدام تقدر تعرف بقت كم |
الاخ صلاح حبيب ... سلام .. وكل سنة وانت طيب ..
ولتجنب الوقوع في خسارة حسب حسبتك ..
يمكن ايداع المبلغ بالدولار الامريكي ..
ويتم السحب ايضا بالدولار .. زيا دار ما دخلك شر ...
اما اذا قيمنا نتائج اي مشروع حقيقي قائم على الارض
بسعر الدولار في ذلك اليوم اكيد حتلقى المشروع خسران ..
وتقبل تحياتي ,,,
| |
|
|
|
|
|
|
|
|
|
Re: ماهو انسب واضمن استثمار في السودان لمغترب (Re: محمد مجيدو)
|
الأخ العزيز
المبلغ الذى بيدك يساوى خمسة وستون ألف دولار بالتقريب وهذه بالجنيه السودانى تساوي بالسعر الموازى حوالى
مبلغ 900000 بسعر اليوم وهذه فى السودان قيمة عربية ولن تسمح لك إلا بقيام مشروع صغير غير مضمون العوائد
ولا تنسى أن الحكومة ستلهط منك مبلغا محترما للترخيص وتسجيل إسم العمل ورسوم المحليةبالأضافة للرشاوى والتى
إن لم تدفعها لن تستطيع التقدم لخطوة واحدة.
لقد ذهب أصدقاء ومعارف لنا بمبالغ ضخمة للإستثمار فى السودان فتحلّقت حولهم عصابات الحكومة ولهطوا منهم مبالغ
معتبرة فعادوا بخفّى حنين.
يا عزيزى نصيحة لك من عالم ببواطن الأمور الإستثمار الحيد الذى يناسبك فى حدود مبلغك هو أن:
1. تستثمر فى سندات شهامة بالسودان وهى مجزيةومضمونة العائد
2.تضع المبلغ بالدولار فى البنك الأهلى المصرى أو أى مصرف آخر ولن تندم أبدا.
3. شراء شقة فى القاهرة وتأثيثها وتأجيرها بالشهر.
والله من وراء القصد......
| |
|
|
|
|
|
|
|
|
|
Re: ماهو انسب واضمن استثمار في السودان لمغترب (Re: محمد أحمد الريح)
|
تحياتي صاحب البوست والإخوة الزملاء ...
والله يا مجيدو فكرتك دي ممتازة .. ولم أكن أعتقد بان ذلك ممكن ..
كان كدي هلا هلا .. يا بنك أمرمان الوطني جاك زول قريب ..
ان شاءالله سازور البنك واستفسر عن موضوع وديعة الدولار ..
وأعتقد بان هذه الفكرة جديرة بالاهتمام ..
خاصة بعد ثناءك على زوق موظفي البنكـ
| |
|
|
|
|
|
|
|
|
|
Re: ماهو انسب واضمن استثمار في السودان لمغترب (Re: Dr. Ahmed Amin)
|
الأخ مجيدو
رغم تحفظ البعض على شرعية الودائع الاستثمارية تبقى هي الأفضل (بالدولار)و الأقل مخاطرة مع الانخفاض المستمر للجنيه السوداني. و شكرا على مشاركتك القيمة.
Quote: في البداية كانت الفائدة تصل الى 21 في المية
واخذت تتناقص سنوياً الى ان وصلت 13 في المية حاليا .. |
نسبة ال 13% تعطى للودائع بالعملة المحلية و تقريبا الودائع بالدولار في البنوك السودانية عوائدها في حدود ال 6% (طبعا البنك برضو تاجر شاطر).
تحياتي.
| |
|
|
|
|
|
|
|
|
|
Re: ماهو انسب واضمن استثمار في السودان لمغترب (Re: الحاج حمد الحاج)
|
سلامات أخ مجيدو .. وأشكرك على مداخلتك الواضحة التى حرّكت قرون الإستشعار نحو بنك أمدرمان الوطنى ده .. وأظن مداخلتك دى صاقعة وأكبر دعاية للبنك مفروض يدوك عليها مكافئة أكبر من كل المبالغ الأنفقوها للترويج فى الميديا .. فإنعدام الثقة فى المؤسسات السودانية هو أكبر عائق لتدفق مدخرات المغتربين للداخل .. وأظن أنه لو فعلاً البنك حريص على جذب العملات الصعبة فليستمر فى التعامل مع المغتربين بالطريقة الذكرتها دى .. ولربما كانت مداخلتك دى ستفتح الباب على مصراعيه لأموال المغتربين الطاشة فى أثيوبيا ومصر وغيرها ..
| |
|
|
|
|
|
|
|
|
|
Re: ماهو انسب واضمن استثمار في السودان لمغترب (Re: الحاج حمد الحاج)
|
Quote: في خلط كبير جداً بين عوائد المشروع سلباً وإيجاباً وبين إعادة رأس المال بالعملة الصعبة
حساب رأس المال كل سنة بسعر صرف الجنيه أمام العملات الأجنبية فيه خطأ كبير إذ لا يراعي تأسيس البنية التحتية للمشروع والأصول الثابتة والخبرات المتراكمة وهذه لا تقدر بثمن.
أعتقد المستثمر السوداني عندما يحول رأس ماله للجنيه السوداني فيجب عليه أن يحسب عوائده من اليوم الأول بالجنيه السودان فقط.
أما إذا أراد الاستثمار بالسودان مع رغبته في جلب ريعه لخارج السودان فليفكر في مشاريع للصادر. |
أفتكر كلام Frankly دا في غاية الأهمية.
يعني لو قررت الاستثمار داخل السودان ينبغي عليك العمل وفق القواعد الداخلية وتصبح شخص (محلِّي) بمعنى الكلمة.
وتطلع وتنزل بأسعار سلعتك/خدمتك مع السوق مع كل شروق جديد.
وبالتالي تصبح قيمة أرباحك وأهميتها مربوطة بالمستوى المعيشي في السودان والتزاماتك اللأخرى . فالكثير من الضروريات في السودان غالية بالمقياس المحلي ولكن لو ضرّبتَ تكاليفها بالدولار أوالريال حتكتشف إنها أرخص مقارنة بالخارج.
على سبيل المثال: سعر كيلو اللحم في السعودية حوالي 30 ريال بالمتوسط: أي أكثر من 100 الف جنيه وهو أغلى من سعر نظيره في السودان!
صحيح إذا أخذنا المسألة من منظور القوة الشرائية للإنسان العادي طبعاً الوضع مزري، ولكن محور البوست هو عن أصحاب الاستثمار في السودان..
بوست مهم ومفيد لكل قبيلة المغتربين..
| |
|
|
|
|
|
|
|
|
|
Re: ماهو انسب واضمن استثمار في السودان لمغترب (Re: Frankly)
|
بالنسبة لشغل البنوك والربا والمضاربات ووو الكثير من مصطلحات الإسلامية لدى الجمهور شك عميق وتوجس من أى نشاط مالى مرتبط بالبنوك لأنو طوالى يربطوه ليك بالربا ..
عموماً ، أتاريهو فى كلام كتير فى الفقه يضبط ويوضح كل هذه المعاملات .. وأذكر أنه كان هناك برنامج فى تلفزيون السودان إسمه هدى للناس تعاقب عليه عدد من المقدمين .. لكين أميز هؤلاء كان الداعشى الموسوعة د.محمدعلى الجزولى .. وكان يقدم البرنامج قبل زوبعة إلتحاقه بداعش بأسلوب ولغة شبابية جذابة.. وفى تلك الفترة كان البرنامج عن فقه المعاملات المالية الإسلامية وكان يشرح هذه المصطلحات بدقة وتبسيط بأسلوب جميل يخليك تضحك من شدة الإعجاب ..
الزول ده لو ركّز على المواضيع يكون قدم خدمة راقية للجماهير بدلاً عن الخطاب الداعشى العجيب الشغال فيهو ده ..
قبل فترة قصيرة شفته فى التلفزيون تانى فى نفس المواضيع الفقهية، قلت الزول ده تاب ورجعوه التلفزيون واللـّ شنو؟ لكين يخيل لى كان إعادة للحلقات القديمة ..
مفروض التلفزيون يركز على هذا النوع من التثقيف لأنو فيهو علم دقيق وعميق .. غايتو أنا حلقات محمدعلى الجزولى مستعد أحضرها مية مرة ..
| |
|
|
|
|
|
|
| |
احمد سيد احمد
أيمن محمود
Abdalla Hussein
الطيب عباس
د.محمد حسن
الطيب بشير
علي عبدالوهاب عثمان
محمد عبد الله الحسين
محمد البشرى الخضر
محمد الامين محمد
Hani Arabi Mohamed
Frankly
محمد المسلمي
احمد عمر محمد
aosman
willeim andrea
الامين موسى البشاري
صلاح حمد
جمعة هري بوش
علاء سيداحمد
Mohd Ibrahim
محمد حيدر المشرف
Osman Musa
مامون أحمد إبراهيم
Ahmed Yassin
لطفى العمده
جمال ود القوز
saidahmed shami
Elhadi
يحي قباني
جلالدونا
Muhamed Hassan Abdalla
ودقاسم
Munir
محمد مجيدو
الفاتح شلبي
حامد بدري
جمال خضر
الحاج حمد الحاج
طه داوود
فيس بوك
تويتر
انستقرام
يوتيوب
بنتيريست