مرحب ود قبانى و رمضانك مبارك كدى قبل ضربة البداية الحاجة دى لاقتك وين _ و انت الجابك بى جاى شنو يا دكتور _ جيت احضر التلاوة دى او كما قال متّعنا بيها و بعدين نشوف ال فى الكتاب ابو داوود و د على المك
06-23-2016, 06:14 AM
جلالدونا
جلالدونا
تاريخ التسجيل: 04-26-2014
مجموع المشاركات: 9387
زمااااان يا قبانى طلبت منّك اغنية للقامة الاستاذ بلاص بتقول بعض كلماتا لقيت الناس حزينة وجوها و قلت تحية ما ردّوها حاصلة مصيبة بس دسوها تومتى وين ودوها الليل و الليل يا ناس الليل الليل جانى الخال وساقنى بعيد و قالّى القسمة مو بالايد زولن تريدو شديد ابعدوهو ساقوهو بعيد الليل و الليل يا ناس الليل و الليل هذا بعض ما علق بالذاكرة من ابداع لم استمع له حينا طويلا من الدهر ف شنو يا اخوى طلبنى الليل الليلى دى ما تلحّقو لى وجعتى فى اغنية بلاّص
06-23-2016, 06:27 AM
يحي قباني
يحي قباني
تاريخ التسجيل: 08-20-2012
مجموع المشاركات: 18708
Quote: مرحب ود قبانى و رمضانك مبارك كدى قبل ضربة البداية الحاجة دى لاقتك وين _ و انت الجابك بى جاى شنو يا دكتور _ جيت احضر التلاوة دى او كما قال متّعنا بيها و بعدين نشوف ال فى الكتاب ابو داوود و د على المك
دردشتك السنة دي مالها كلها جلاكين و ناس ما عندها موضوع ... __________________________________________
رمضان كريم عليك و كل الحلوين ... و العيد مبارك ان شاء الله ...
__________________________________________ علي المك يا جلّي لما سلم على الحضور في الجلسة دي و سألوهو ...
قال ابداً .. ان جيت اسمع التلاوة دي !!!
التلاوة يا جلي ... ابوداؤود و يا عين بتخافي مالك ...
عمك عبيد عبد الرجمن و مجاراة ابوصلاح و لحن كرومة يا ليل ابقالي شاهد ...
و الله ما عارف أقول ليك شنو يا جلال ...
كدي اسمع التلاوة براك ... و قول لي كان انا غلطان !!!
06-23-2016, 06:44 AM
يحي قباني
يحي قباني
تاريخ التسجيل: 08-20-2012
مجموع المشاركات: 18708
ياسلااااام ياااخ ابداع ما بعدو ابداع ليه لونك احمّر لونو هو اصّلن لونا كان شنو ؟ احمر برضو !!! ابو العيون ذاتو عاد شوف جنس الشبكة دى شغل يسحلب بالزول عدييييييل كدى شكرا قبانى و شكرا شعبى و بعد الدخلة الفائقة الابهار دى الاستاذ على المك و اثره الابداعى فى ثرائنا الغنائى و الادبى ياريت استاذنا محمد المرتضى حامد و استاذنا معاوية محمد و المَعلَمة الكبير محمد النور كبر و اخرين و اخرين يسجّلون حضورا هنا بى رغبة ملحّة لتوقيعاتهم المموسقة
06-23-2016, 08:43 AM
ABUHUSSEIN
ABUHUSSEIN
تاريخ التسجيل: 08-14-2002
مجموع المشاركات: 39330
السلام يغشى الجميع وكت الشبكة اصطادت اخونا الأكبر قباني اذن ماتفكوه حتى تعصروه وتطلعوا منو الزيت لأنو دا صيد ثمين(حسب اعتقادي يا كبسور). عايزين نبحر في محيطات المعاني. بس انا طالب اغنية الليل الليل ياجمال الليل التي تحوى اعظم بيت في الحقيبة بالنسبة لي: لي شلاخك وقفن شهود واثمر فرعك جوز النهود
06-23-2016, 03:47 PM
يحي قباني
يحي قباني
تاريخ التسجيل: 08-20-2012
مجموع المشاركات: 18708
Quote: السلام يغشى الجميع وكت الشبكة اصطادت اخونا الأكبر قباني اذن ماتفكوه حتى تعصروه وتطلعوا منو الزيت لأنو دا صيد ثمين(حسب اعتقادي يا كبسور). عايزين نبحر في محيطات المعاني. بس انا طالب اغنية الليل الليل ياجمال الليل التي تحوى اعظم بيت في الحقيبة بالنسبة لي: لي شلاخك وقفن شهود واثمر فرعك جوز النهود
لي معاك عودة يا ود الشيخ ان شاء الله ...
06-23-2016, 06:01 PM
محمد حيدر المشرف
محمد حيدر المشرف
تاريخ التسجيل: 06-20-2007
مجموع المشاركات: 20359
ايام الجامعة ، كانت لي زميلة وصديقة من بنات سنار ، امتحنت رياضيات بحتة..يعني الناس المفروض يمشوا هندسة وكده ، لكن الظروف الخاينة جابتها لينا في قانون..اها يوم جيت لاقيتها بالصباح ، ومعاي باقي نعاس كده..نوع النومة الما تمت ، عشان تلحق ليك محاضرة قانون دولي خاص..اول ما شافتني قالت لي: مالك عيونك حمر كده ، امبارح كنت مساهر ولا شنو؟.. قلت ليها : ايوه ما نمت كويس.. قالت لي: ليه؟ قلت ليها: ناس هندسة ياخي.. ساهروا بينا.. (العادة في تلك الأيام ، انو ناس هندسة بيخشوا البركس بعد الواحدة صباحا ، وكان عندهم عادة شينة : يقعدوا يغنوا ليك غنا ما انزل الله به من سلطان..!!).. قالت لي: مالهم ناس هندسة..؟ قلت ليها: بيغنوا غنا يساهر بي الما بعرف السهر ..! ضحكت الضحكة اللذيذة ديك.. وقالت وهي تطيب خواطري : ياخي ناس هندسة ديل بيكون قاعدين يذاكروا..! صريت وشي وقلت ليها: يذاكروا كيف يعني؟..ياخي ناس بيغنوا وانتي بتقولي لي بيذاكروا؟ قالت لي: بتكون عندهم (دالة) ولا (منحنى) ولا (زاوية) ولا (جيب زاوية) رايح عليهم ، وعشان يفهموهو بيقوموا يغنوا.. لأنو الغنا برضك هندسة يا عم..! غايتو..قطعتها في حناني وسكت ساكت..حتى لا اكتب عند زميلتي زول من ناس قريعتي راحت..!
وانا بأسمع في اداء الثنائي ..ابوداود والعطبراوي.. اتذكرت كلام صاحبتي ، الله يطراها بالخير ..!!
غايتو الشغل ده يا يحي قباني ، فيهو هندسة.. فيهو (دالة) ، (منحنيات) ، (زوايا) ، (جيوب زوايا) ، واضيف عليهم (تفاضل وتكامل ) عدييل..!! ويا ناس هندسة.. اشتغلوا معانا فلسفة..و اسمعوا الشغل ده..يعني دايرين تحرجونا مع صاحبتنا ولا شنو المعني؟.. ولو زغتوا.. نبقى مهندسين برانا بطريقتنا ونشرع يمين وشمال..(علي بالحلال ظتا وقتا الإتنين قاعدات هنا..!!..ناهيك عن اللوغريتمات..!!!!!!) كنت اتمنى أن اسمع نفس الأصوات في ثنائي جديد..و اقرب ناس..الهادي الجبل ، عادل مسلم وحيدر بورتسودان.. ويا ريت يحي قباني يقنع لينا نفرين أو الثلاثة جميعا يشتغلوا نموذج واحد فقط..!
السؤال: عن الغنا والهندسة.. والتداخلات بينهم..!
خارج الموضوع يا يحي: واحد من اهلنا كان مسافر ماشي نواحي دارفور..اها قابلوهم ناس النهب المسلح.. ملصوهم ليك تب..وصاحبنا ما خلوا ليهو غير طاقيتو.. اها مشى الحلة ميطي اللهم الإ الطاقية الفوق راسو..وقعد يحكي لناس الحلة الحكاية بالتفصيل الممل ، وهو اكثر حرصا انو يوضح دورو البطولي في مواجهة ناس النهب المسلح.. اها قام واحد غتيت من ناس الحلة وقال ليهو: كيف يعني ناس النهب المسلح ما شالوا طاقيتك؟.. عمنا ارغى وازبد وقال ليهم: كيف يعني يشيلوا طاقيتي ؟.. على بالطلاق لو شالوا طاقيتي كان عرفوا حاجة..!! فشنو ، كويس صاحبك اتبرع بــ (النهاية).. لأنو لو اتبرع بـ (حاجة فيك) ولا (اضحكي).. ولا (جان والكريسماس) كان عرف حاجة..!!
وبرضو ناس (النهاية) يا ريتهم يفهموا سطر واحد من شاكلة (زي نقر الأصابع لما ترتاح للموسيقي) أو (ضحكك شرح قلب السما)..هذا اذا ما قالوا ليهو: هو بالله السما عندها قلب..ولا الأصابع بتعرف الراحة..!!
جلال تاني ما تناديني.. الإ بعد الفطر يااااااااااااااخ..!
تجرحوا للواحد صيامو في السهلة ياااااااااااخ..
كبر
06-24-2016, 11:22 AM
جلالدونا
جلالدونا
تاريخ التسجيل: 04-26-2014
مجموع المشاركات: 9387
ؤووو سيدنا كبر رضيت الهندسية المقننة عنه ياخى هندست الحاجة لمّا قعّرت عدستا بمقاييس ريختر الارتدادية دون الحوجة للاهتزازية تعرف ناس هندسة ديل ما بغنو عشان طاتاتا وللا جاتاتا و كعوجات تكامل التفاضل و ابن عمهما المستقيم ذو المثلثات ديل بغنو عشان دائرية 20على 6 و الفرق بينا و بين دائرية 20 على 3 شرحو هاشم لو هبش المقدسات العلية ديك كان اهلنا الصوفية و عشاق الليل و الشهقة و النيل انتحروا انتحار جماعى اوعاك تنقطع و رمضان ملحوق .. عندك القضاء و الكفارة
06-25-2016, 06:25 AM
معاوية الزبير
معاوية الزبير
تاريخ التسجيل: 02-07-2003
مجموع المشاركات: 7893
هلا بحبيبنا قباني، وقال ليك القباني هو الوزّان وخاصة الذي يوزن الأشياء الثقيلة ونحن والله نرى فيك حكمة بوزن الأمور، ومن ثم نرجو أن يكون هذا الحوار مفيدا للجميع أما بعد
Quote: علي المك يا جلّي لما سلم على الحضور في الجلسة دي و سألوهو ... قال ابداً .. ان جيت اسمع التلاوة دي !!! التلاوة يا جلي ... ابوداؤود و يا عين بتخافي مالك ...
أنا غايتو في أيام ديمقراطية منتصف التمانينيات قرأت استراحة بالصفحة الأخيرة لإحدى الصحف مقالا للراحل علي المك وصف فيها أداء أبو داؤود لأغنية (يا زهرة الروض الظليل) بالتلاوة، فعجباً..
دمت صديقاً عزيزا
06-25-2016, 04:47 PM
يحي قباني
يحي قباني
تاريخ التسجيل: 08-20-2012
مجموع المشاركات: 18708
Quote: غايتو الشغل ده يا يحي قباني ، فيهو هندسة.. فيهو (دالة) ، (منحنيات) ، (زوايا) ، (جيوب زوايا) ، واضيف عليهم (تفاضل وتكامل ) عدييل..!! ويا ناس هندسة.. اشتغلوا معانا فلسفة..و اسمعوا الشغل ده..يعني دايرين تحرجونا مع صاحبتنا ولا شنو المعني؟.. ولو زغتوا.. نبقى مهندسين برانا بطريقتنا ونشرع يمين وشمال..(علي بالحلال ظتا وقتا الإتنين قاعدات هنا..!!..ناهيك عن اللوغريتمات..!!!!!!) كنت اتمنى أن اسمع نفس الأصوات في ثنائي جديد..و اقرب ناس..الهادي الجبل ، عادل مسلم وحيدر بورتسودان.. ويا ريت يحي قباني يقنع لينا نفرين أو الثلاثة جميعا يشتغلوا نموذج واحد فقط..!
السؤال: عن الغنا والهندسة.. والتداخلات بينهم..!
خارج الموضوع يا يحي: واحد من اهلنا كان مسافر ماشي نواحي دارفور..اها قابلوهم ناس النهب المسلح.. ملصوهم ليك تب..وصاحبنا ما خلوا ليهو غير طاقيتو.. اها مشى الحلة ميطي اللهم الإ الطاقية الفوق راسو..وقعد يحكي لناس الحلة الحكاية بالتفصيل الممل ، وهو اكثر حرصا انو يوضح دورو البطولي في مواجهة ناس النهب المسلح.. اها قام واحد غتيت من ناس الحلة وقال ليهو: كيف يعني ناس النهب المسلح ما شالوا طاقيتك؟.. عمنا ارغى وازبد وقال ليهم: كيف يعني يشيلوا طاقيتي ؟.. على بالطلاق لو شالوا طاقيتي كان عرفوا حاجة..!! فشنو ، كويس صاحبك اتبرع بــ (النهاية).. لأنو لو اتبرع بـ (حاجة فيك) ولا (اضحكي).. ولا (جان والكريسماس) كان عرف حاجة..!!
وبرضو ناس (النهاية) يا ريتهم يفهموا سطر واحد من شاكلة (زي نقر الأصابع لما ترتاح للموسيقي) أو (ضحكك شرح قلب السما)..هذا اذا ما قالوا ليهو: هو بالله السما عندها قلب..ولا الأصابع بتعرف الراحة..!!
جلال تاني ما تناديني.. الإ بعد الفطر يااااااااااااااخ..!
تجرحوا للواحد صيامو في السهلة ياااااااااااخ..
كبر
دائما مداخلاتك باذخة يا صديقي ...
داير اجيك بي مزاج و الله ...
المزاج ما لاقيهو اليومين ديل ... الوكت ممحوق ...
لكن لازم و حتما اجي ارد على الجمال ده ...
06-25-2016, 10:17 PM
MOHAMMED ELSHEIKH
MOHAMMED ELSHEIKH
تاريخ التسجيل: 03-21-2008
مجموع المشاركات: 11826
طبعا الواحد كان بيستغرب في اهلنا الكبار ديل الواحد يقول لك سمحة وشلوخة مطارق وووووو
جانا ابن عمنا محمد عمر"قمر" وهو في مقام العم والأب (والخال ي قبقبة) زيارة في الخرطوم ونحن عذابة . كنت انا المطوف"تبعو" حلة خوجلي الدائرة ثم جنينة السيد على في الخرطوم لملاقاة الأحباب و نعرج على الصحافة والغداء في الثورة مع عم الياس (والد الزميل حاتم الياس) والعودة الى المرغنية بحري. يعني فلفلنا شرق وغرب ومابين النيلين. وعند دخولنا الى المسكن قال عبارته المشهورة:
" النسوان المشلخات اتفقدن تب من البلد"
اريت الخال يطربنا بما لديه من اغنيات الشلوخ
لو تذكر ياكبر معظم فرقة االجامعة الموسيقية في الثمانينات ومازالت كانت من اولاد "هندسة", بقيادة الاكورديونست كمال مش كدى ؟ حتى ناس الكورة يقولو ليك لعب و"فن" وهنسة
06-27-2016, 09:27 PM
جلالدونا
جلالدونا
تاريخ التسجيل: 04-26-2014
مجموع المشاركات: 9387
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة