|
Re: عباطه جهاز شؤن المغتربين والبطاقه الذكيه (Re: صلاح ليون)
|
البنك بديك بطاقه فيزا رصيدها صفر تمش تغذيها في تربيزه البنك جنبهم جوه بي مبلغك المستحق للدفع + ٤ ج اضافيه كرسوم تعبئه ،، ولو ماسالتو مابوريك حتمش تركب صف الدفع شان تدفع وحيقولو ليك غذيت مبلغك ناقص ، مع انك دافعو كامل بس الاهبل داك ماوراك انو في رسوووم تغذيه بطاقه 😡😡😡وهكذا وانت زول كبير ووراك مليون شغله تقعد تعديا صفوف ونقصت وزيد .. من الاخر عند تضريب استحقاقاتك الماليه اسال الموظفه يازوله انا حدفع كم .؟؟ لانو في ٧٣ ج مابتظهر في الالتزامات الماليه وهي رسوم تاشيرتك ،ودي برضو رجيعه تالته .. وهكذا تلتله
| |
|
|
|
|
|
|
Re: عباطه جهاز شؤن المغتربين والبطاقه الذكيه (Re: الطيب عباس)
|
اخونا الطيب عباش وضيفه الكرام سلام عليكم
Quote: البنك بديك بطاقه فيزا رصيدها صفر تمش تغذيها في تربيزه البنك جنبهم جوه بي مبلغك المستحق للدفع + ٤ ج اضافيه كرسوم تعبئه ،، |
دي هبالة كبيرة
Quote: ولو ماسالتو مابوريك حتمش تركب صف الدفع شان تدفع وحيقولو ليك غذيت مبلغك ناقص ، |
ودي أم الهبالة زاتها انت عارف دي زي رسوم المغادرة زمان ما كان يضيفوها في رسوم البطاقة وخلصنا الله يقرفهم مودتي
| |
|
|
|
|
|
|
Re: عباطه جهاز شؤن المغتربين والبطاقه الذكيه (Re: معتصم سليمان)
|
Quote: البنك بديك بطاقه فيزا رصيدها صفر تمش تغذيها في تربيزه البنك جنبهم جوه بي مبلغك المستحق للدفع + ٤ ج اضافيه كرسوم تعبئه ،، ولو ماسالتو مابوريك حتمش تركب صف الدفع شان تدفع وحيقولو ليك غذيت مبلغك ناقص ، مع انك دافعو كامل بس الاهبل داك ماوراك انو في رسوووم تغذيه بطاقه 😡😡😡وهكذا وانت زول كبير ووراك مليون شغله تقعد تعديا صفوف ونقصت وزيد .. من الاخر عند تضريب استحقاقاتك الماليه اسال الموظفه يازوله انا حدفع كم .؟؟ لانو في ٧٣ ج مابتظهر في الالتزامات الماليه وهي رسوم تاشيرتك ،ودي برضو رجيعه تالته .. وهكذا تلتله |
مساء الخير اتو البوديكم هناك شنو بلد الضياع دي موش كان وصيتوم كن بقيت ميسي او انيييستا مابتقدروم اختصر وصاياك واسمع مني الدايرو تجيبو بره او عمرة او زيارة او القاهرة دي تسالمو وتقالدو وتشمو هوا بحري وترجعوا معقولة يبقو علينا غربة وجهاز مغتربين ومن اسمو ده ساي مابذكرك بي جهاز الامن والمخابرات الناس هناك يحسدوك ساي على اللغتراب حتى الجنس اللطيف من يشوف المترب يتخشن قال ادفع اربعه جنيه قال اربعة ماسورت بيتكم او اربعة صلايب سكري لامين جهازوم المابختشي عالم بطالة على قولت اللوا مجييييدو
| |
|
|
|
|
|
|
Re: عباطه جهاز شؤن المغتربين والبطاقه الذكيه (Re: حامد بدري)
|
الاخ عباس الطيب سلام
ده نظام جديد لراحة المغترب نقبله او نرفضه
والقبول يكون بذكر الحسنات
والرفض بذكر السيئات كما ذكرت انت
واخيرا نبحث عن الاجود دون اساءة للناس
بنقد بناء ينفع الناس
فليكن ذلكم هو الحوار حتى نستفيد جميعا ومعنا
الجهاز او من يمثله اعلاميا لتوضيح كل الامور
والله من وراء القصد
مع كامل الاحترام
| |
|
|
|
|
|
|
Re: عباطه جهاز شؤن المغتربين والبطاقه الذكيه (Re: السمانى عمارة)
|
عزيزنا السماني يعني ،،، كنا نتمنى أن تحدثنا عن المشكلة نفسها وتشاركنا الرأي في سلبية القائمين على جهاز المغتربين وعدم إحترامهم لنا كبشر ،،، وتعاملهم معنا كبقرة حلوب فقط لا غير لذلك الموضوع ما مستحمل إي وعظ وإرشاد وبناءً على ردك ،،، إستنتجت بأن الموضوع لا يعني لك شيئاً وعملاً بالمثل الداراجي ( البكا بحررو أهلو ) ،،، كان ردي لك أتمنى أن أكون قد أفحمتك والله من وراء القصد إحترامي سيدي
| |
|
|
|
|
|
|
Re: عباطه جهاز شؤن المغتربين والبطاقه الذكيه (Re: سيف الدين محجوب)
|
Quote: عزيزنا السماني يعني ،،، كنا نتمنى أن تحدثنا عن المشكلة نفسها وتشاركنا الرأي في سلبية القائمين على جهاز المغتربين وعدم إحترامهم لنا كبشر ،،، وتعاملهم معنا كبقرة حلوب فقط لا غير لذلك الموضوع ما مستحمل إي وعظ وإرشاد وبناءً على ردك ،،، إستنتجت بأن الموضوع لا يعني لك شيئاً وعملاً بالمثل الداراجي ( البكا بحررو أهلو ) ،،، كان ردي لك أتمنى أن أكون قد أفحمتك والله من وراء القصد إحترامي سيدي |
مرحبا حبيبنا ابو السيوف تعرف اخر زيارة لجهاز الشوم ده اصناف اصناف من العذاب ونحنا نستاهل يااخوي الجوازات مكومة قدام التاشيرة بي شكل انا لو ضابط بملص الميري وامش بيتي على الدين لو جيت خميت عشرة جوازات ومرقتا زول يعرفك ماف عشوائية وطبعا بستفيدوا منها ناس ورا ورا خلف التربيزة وللسماني نقول اقنع من خيرا فيها احسن حل ماتمش الا للشديد القوي الب الناس ودت اسرررا للقاهرة او بجيبوهم زوارة وعمرة وحج برا معط المفروض يستقطبونا عشان بنمش الاجازة للمتعة وتقضية وكت حلو وبنحرك سوق الشقق المفروشة والمطاعم ووسال النقل لكن هل هم بعرفو كلام زي ده
| |
|
|
|
|
|
|
Re: عباطه جهاز شؤن المغتربين والبطاقه الذكيه (Re: الطيب عباس)
|
أخونا الطيب عباس سمي (برضو أنا ودالعباس)
السلام عليكم ورحمة الله وبركاته ،
أخوك ما ناقش الموضوع بالله ممكن تورينا أهمية البطاقة الذكية وفيما تستخدم وكيفية الاستخدام وهل هي ضرورية لعمل إجراءات التأشيرة
معلش تزودنا بشرح وافي من أيه تو زد ، مع شكري وتقديري .
| |
|
|
|
|
|
|
Re: عباطه جهاز شؤن المغتربين والبطاقه الذكيه (Re: ولياب)
|
سلام لكل الحضور الاجراءت من الالف لي الياء -تمش بدري شان موسم الاجازات الايام دي والصفوف حتكون اسكت بس 😶 - اول ماتخش قبل كل شي في ناس مكتات التصوير جوه ( كلهم اولاد كوستي طبعا ) لازم تعمل فيا انك مولود في كوستي وتحنك معاهم شان يكرموك وصور كل مستنداتك (الجوازات كلا و الخدمه الوطنيه والرقم الوطني )واسالم بوجهوك تفتح الملف وين في الاكشاك الفي صاله الانتظار يسارك تشتري ملف وتتوكل الصاله .. - تمش تركب صف المطالبات تطبع ورقتك فيا المبلغ وتسال الموظفه ( السمينه ديك ) قروشي كم حادفع كم بتوريك قوليا بالتاشيره كم شان وتحسبا عشان التوتل بدون تاشيره بكون ناقص حق التاشيره ومابطبعو مع مطالبات الزكاه والضرايب والخدمات والمتاخرات لو عندك .. - تاني تطلع الصاله بره بتلقي ناس ببيعو بطاقه البنك بي مبلغ ٢١ ج فاااضيه تشتريا وتمش الصاله جوه - في اقصي شرق الصاله بتلقي موظفين ٢ بشحنو البطاقات بالمبالغ ( تديم مبلغ مطالباتك وتخت فيو حق التاشيره وخت ليك ١٠ ج اضافيه شان ماترجع تاني ) لانو لو مااديتم مبلغ زائد عندهم عموله لشحن البطاقه ٤ ج تخصم من مبلغك وبيطلع مبلغك ناقص وتااااني حتتطر ترجع🏃 تغذيا 😡👌🏻 واخيراً وبعد تدفع تمش ضابط التاشيره تختم وتحمد الله - لايقبل الدفع نقداً .. تحتفظ بالبطاقه بتنفعك في اجازه اخري دمتم سالمين
| |
|
|
|
|
|
|
Re: عباطه جهاز شؤن المغتربين والبطاقه الذكيه (Re: عمر أبوعاقلة)
|
تحية اخونا الطيب عباس شكرا لتنويرك لنا جعله الله فى ميزان حسناتك انا ان شاء الله ماشى فى عيد الاضحى ودى معلومات اكيد بتختصر لى الكتير من الوقت سؤال اخير : هل ممكن ادفع ببطاقتى لشخص اخر مثلا اولادى المستقلين بجواز خاص . وبالتأكيد افراد الاسرة( طبعا اذا كان فيها مبلغ كافى)
| |
|
|
|
|
|
|
Re: عباطه جهاز شؤن المغتربين والبطاقه الذكيه (Re: عباس محمود)
|
الاخ السماني وجميع المشاركين التحايا والاشواق نعم قصد بها التسهيل علي المغتربين اولا يطلب منكم شراء البطاقة ثم الذهاب للحسابات لاعطائكم كشف بما عليكم ثم الذهاب لبنك لشحن المطلوب عليكم فيما يسمي البطاقه بعدها للحسابات لسحب الرصيد الذي كان بالبطاقه ويتم ارجاع البطاقه فارغة ومن ثم الي الجوازات لعمل التاشيره كل هذه صفوف وفي اماكن متفرقه هل هذا تسهيل اخ السماني ام تعقيد يجب تسهيل الاجراء ان يكونوا جميعا في منطقة واحده البطاقة /الحسابات /البنك /الحسابات كما \كرت كل تجربه لهل ايجابيات وسلبيات هل تمت معالجة السلبيات الحال كما هو لقد سافرت اكثر من ثلاث مرات ولا جديد
| |
|
|
|
|
|
|
Re: عباطه جهاز شؤن المغتربين والبطاقه الذكيه (Re: Salah Habib)
|
Quote: سؤال اخير : هل ممكن ادفع ببطاقتى لشخص اخر مثلا اولادى المستقلين بجواز خاص . وبالتأكيد افراد الاسرة( طبعا اذا كان فيها مبلغ كافى |
نعم الدفع بي بطاقة واحده لانك حتديا كل جوازات الاسرة اولاد وزوجه عشان تاشر ليهم .. هم مايهمم بطاقة منو المهم الكاش دولة تحب الفلوس زي عيونا .. والله لا وراك طشاشان الشبكه حتامن .. وانصح الكل باخراج البطاقة القومية لانو نفسك حيقوم لو ما طلعتا اسه كل شي بقي بي البطاقة القومية والرقم القشري ..
| |
|
|
|
|
|
|
|