ول ابا كبر تحيه طيبه وبعد ارجو ان يتسع صدركم لإبنكم وتسع افقكم في الرد علي بعض التساؤلات التي اثرتها في رد لكم في بوست للأخ منصور وقام الأخ منصور بمسح جميع مداخلاتي ولما تحتويه هذه الأسئلة من أهميه لدي - انا لا أعرف اي قبيلة في السودان انتمائي ففي مكتوب علي كل اوراقي الثبوتية الجنسية سوداني فالجوعيه اهلي و البقارة اهلي والنوبة اهلي والبجا و الشايقية والجعليه وكل من هو سوداني هو اخ وابن عم لي - ارجو ان يتسع صدركم لي وتجاوب علي الأسئلة فقد كانت - ولحسن الحظ اني احتفظ بنسخة منها - نصها الاتي ========================= السلام عليكم الأخ ول ابا كبر Quote: اهو قدام الملآ..خلي المظاهرات تسقط حجر عمر البشير ويجينا جاري ونقطع راسو من الأضان للأضان تأكد تماما انو مابجيك جاري براهو دحين جهز سكاكينك وكترها عشان الحجوك كتاااااار ما البشير براهو كتير من الشدر الكبار الإنت قولتهم ديل حجوك معاهو المره دي حساب جد جد بس الله يسقطها Quote: باقي ليك الجموعية بيلغبهم يمسكوا الخرتوم؟ سؤال لو أمكن المانعك اسي وطيلة 27 سنه فاتت هو نظام الإنقاذ يعني وانت وماداير تجي داخل ؟ وله كان سيناريو بينك وبين الخرتوم انكم ماتجو داخلين ؟ بعدين نظام الإنقاذ ده انت الهجرك من بلدك وخلاك تمشي لي كندا وتاخد اللجوء بدل ما كان تمش لي كندا ما كان تجيب الجموعيه وتجي لي الخرتوم ؟ Quote: ويا عمر البشير ، خلي الله يقدرك تعدل خارطة طريق ول ابا كبر و الله ماعارف أو مامتذكر لكن بعد موضوع الحوار طوالي كدا كان في هرطقه حاصل في الجرايد انو الوطني غير خارطة الطريق وبذات في ملف جهاز الامن وكم حاجه تانيه وبعد داك اذكر فيما اذكر انو ختو الملف في الأدراج لو ما خانتني الذاكرة Quote: كل مدن غرب السودان عندنا يا حبيب يا ول ابا كبر سؤال انت عندك مصداقيه في غرب السودان وله عن ناس العدل و المساواة وله عند ناس حميدتي وله عند منو بالضبط عشان بعدين نكون نحنا ناس امسودان نكون عارفين نمش وين بالضبط كدا ونقدر نحاسب منو يعني نحاسب ناس حميدتي وله العدل و المساواه وله ناس عبدالواحد وله حركات المسلحه في الغرب وله ناس الحركة الشعبيه وله وين ؟ اخر حاجه او طلب لي عندك رايك شنو في مداخلة الفيس النقلتها فوق وانت واحد من ناس الحوار وحسب متابعتي لي المنبر دا انت برضو من ناس كندا وممكن انقولها ليك تاني Quote: اسمح لي ان ابين اولا انا من جيل الثمانينات ومن ممن تربيت في عهد حكومة الإنقاذ اسمي عاطف وقبيلتي سوداني لم اغادر بلدي سوي مجرد زيارات خارجيه في معظمها لا تتجاوز الشهر أو الشهرين علي اقصي تقدير حينما دعي منبر سودانيز أون لاين في 2011 في شهر مارس كنت من ضمن الذين خرجو ولم نكن نتعدي اصابع اليد واذكر جيدا المرحوم نقد كان يتقدم الصف في الخرطوم السوق العربي وحينها كنا في امدرمان الشهداء وفي انتفاضة سبتمبر كنت من ضمن الذين خرجو في المظاهرات وكنت اشارك مع الناس المشاركة وشاركت في معظم المظاهرات و الندوات الفاعلة انتمائي الحزبي كما يسمي هو إلي حزب الكنبة أو الغالبية الصامته كما يعرف انا من بسطاء هذا الشعب المغلوب في امره الذي لايملك - في معظم أوقاته - حق العلاج أو حق التعليم أو حتي الأكل و الكهرباء و الماء انا واحد ممن يتعالجون في مستشفي الخرطوم التعليمي أو الشرطة أو بحري و أمدرمان وانت لاتعلم ماهي تلك المستشفيات أو حتي تلك الأوضاع التي فيها - حصل جربته انو يموت قدامك عزيز عشان دواهو مافي أو ماعندك حق العلاج أو لي سبب طبي - انا واحد من الناس الإنضرب من جهاز الأمن وعندي حق عندهم كان الله شال امانتو فيني ولدي بشيل لي تاري ومابخليهو انا واحد من الناس البتلف من الصباح لي بالليل عشان تلقي حق لقمه تاكلها ومابتلقاهو انا راعي من البقارة ومزارع في الشماليه ومع ناس التعدين في الشرق وبمشي الدندر وبنلف البلد كلها زي ماعاوز كدا انت عرفته انا منو ممكن بعد دا اسألك سؤال بتعرف شنو عني عن حالي عن وضعي ؟!!!!!!! الأداك الحق منو تتكلم بي اسمي وبي اسم ابطال شايلين روحهم في ايديهم مهر رخيص لي بلدهم ؟!! الأداك الحق منو تتكلم وتفتح خشمك وتجعر صوتك في قضيه انت مجرد متفرج بتعرف السودان من خلال شاشة تلفون ؟! الأداك حق تقول انو دا مات مقتول قاتلو النظام وله قاتلو الحكومة وله المعارضة ؟!!! جيت البلد لاجئ مدسي وري جواز كندي أحمر قاعد بندفع فاتورتك انت و الزيك 10 اضعاف 1 منها لي تكلفتها و 9 الباقين ماشين لي الفساد اقبل من الصادق من الترابي ومن نقد من اي زول قاعد جوا البلد مكوي بي نارا عافص جمرا الحي لكن انت صدقني امسك في الحوار بي يدينك ورجلينك انت و المعاك واركزو - اعتبرو تهديد او وعيد او حتي من باب النصح - 10 اضعاف الدفعناها لي فاتورتك بنرجعها ومعاها ارباحا وعدا وقسما بترجع بي ارباحها الخلاك من أول كف أو صوط انضرب في ضهرك - دا لو انضرب فعلا - تجري وتكوس في البلود الفيها الأمان -نسيت ايام طوابير اللجوء في مصر وكل واحد فيكم شايل ملف وجاري وري اعادة التوطين - انك تبيع وتشتري فيني بتقول لي دا لو ولدك المات بقول ليك ولي الناس الزيك البيموت دا أخوي ولد عمي وياكفنتو ياكفني انا لكن لا انا ببيعو ولاهو ببيعني انا بختلف مع الصادق وبختلف مع المرغني وبختلف مع عمر الطيب المايوي لكن لاهم ببيعوني ولا انا ببيعهم الصادق انسجن و اتعذب وبتو انضربت واتكسرت يدها وغيرهم كتييير من رموز العمل المعارض جوا البلد قاعدين بالعكس هم قدام في الصفوف الأماميه شوف في الصور حقت المظاهرات بتلقي حزب الأمه والحزب الناصري وحزب الشيوعي وحزب المؤمتر وغيرهم كتيييير وقيادات وقلته ليك فوق نقد الله يرحمه ماباعونا ولا فكونا ولاغيرو جوازاتهم انت اسي متخيل انك مختلف عن النظام عشان بتدعو لي السلام بتعرف لي شنو شوفته ليهو شنو بتبيع بلدك لي المره المليون وجاي تتلكم الواحد قعد 6 شهور وقام جاري وله كتيره سنه او سنتين وقام كابي الزوغه ولو فتشته لي سبب بيكون انو هناك وقفو اجراءات وله قالو ليهو امرق وتعال وله عمل جنايه وله مصيبه جا راجع السودان عشان ينضف ويرجع تاني ههههههههه احنا القاعدين جوا ديل لي الحركات المسلحه و المامسلحه و الحركات العاديه و الغير عاديه وناس قريعتي راحت بنتصافي ونتشايل وزي ماهو بقبلني بقبلو لكن انت خليك في كنديتك دي وله امريكتك دي وقري اولادك وخليكم في مهجركم دا لانكم زيهم يدكم مليانه دم دم وبي نقض انا ممكن اقبل واتسامح في يوم من ضابط جهاز ضربني أو أهاني أو قتل اخوي لكن يستحيل اقبل او اتسامح في حقك انت عارف الفرق شنو بتاع الجهاز ممكن اعتبرو مغصوب وهو اخوي قاعد معاي مكوي معاي في ناري كان رضي وله ما رضي لكن انت الجبرك شنو ما ماكل احسن اكل وشارب احسن شراب ومتعالج احسن علاج وشغال احسن شغل - دا لو ماطلع كلام دينق صح - البخليك تبيع الناس شنو وطلتخ يدك بي الدم شنو انت و المعاك الحساب قرب جهزو دفاتركم ========================================== وفي الختام احب اشكرك علي سعت صدرك وتقبلك لي وانتظر ردكم علي هذه الأسئلة
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Mahamed Eltaze
فيس بوك
تويتر
انستقرام
يوتيوب
بنتيريست