ريحة الفرح المافى

يا عشم الواطا البتق
تعال قريب واقعد معانا
نادى الغيم البدا يتفرق
يغطى الضل القاعده بره
و وشه محرّق
قول لى الضحكة
مستنين هطولك
قول للغيمة عليكى النيل
الفرتق ضفاير موجو
فى عرس الجروف
قول ليها كيف
نقدر نطولك
قول ليها
عليكى الشدر الشال الحفه
مد مساير حزنك ليل
واداكى من افراح سنينو
عليكى الشوق الهد الحيل
عليكى الموج الحرد الضفه
عزى خسامة الوجع المدفق
طيبى خاطر البحر القبيل
شال نار الشقا الفينا
وادانا من طينو

يا فرح الواطا البتق
عليك الوجع المالى الليل
قول لى الرذاذ الأبا يغشانا
كفاك
قول للقمر الشد شراع العتمة
وعدل الدفه
خلى البت الساكنه دمانا
تفج السكه وتمرق
تلفح توب الإلفة
تجينا معاك
قول ليها
يا مليانه بى رونق جنانا
الغناوى الطاعمه
منتظرات وصولك
راجياكى بى شوقا الطويل
كلم واطاتنا وقول ليها ابشرى
كحلى الشوف بالنهار
ولونى الليل بالهديل
والصباح وديهو هدية
مشتولة فى ضل المقيل

يا غيمنا البدا يتفرق
الأمانى الخايفه
من غيبة فصولك
ماسكه فى الحلم البخيل
ومعاها ماسكين فى صبرنا
حداها قاعدين نندهك
يا ريحة الفرح المافى
معاها قاعدين فوق جمرنا
يا ضو السعد الجافى
كوسنا ليك بلد بلد
دقينا ما خلينا باب
وينا جيتك ووينو وعدك
لى هسه واقفين نسألك
والحزن ساكن عمرنا
مصلوب مع فترالصحاب

والعطش عامت لهاتنا
خاتى رايو مع الرهاب

والعطش عامت لهاتنا
خاتى رايو مع الرهاب