|
الجزء الرابع (Re: حاتم موسى عبدالعزيز)
|
رحــلتي مع الموت في ادغال دارفور الم وامل :معاذ حمدالنيل
الجـــــزء الرابع.
ربما اكتب عن مدينة نيرتي ما تفيض علي به الذاكــرة من تلك الشهور التي قضيناها بين روابيها الخضراء ...وصخورها الشامخة كشموخ انسانها الرائع....
ولكن في الحقيقة ان نيرتتي هي من كتبتني .... فانا اردد قصائدها في ساعة وفاء ولمسة حب.....
فلقد إستقبلنا اهالي نيرتتي بجبل مرة استقبال الفاتحين....
وفتحوا لنا قلوبهم قبل دورهم.... وانزلونا منهم منزل الاخ من اخيه... والوالد من ولده ...ولولا سنة الحياة لمافارقناهم... فكيف والجسد قد يفارق الروح ....
في قرية نيرتتي حطينا رحالنا.... وقبل البداية .....
التحية لكل روح طاهرة كانت معانا.. وفارقتنا في تلك البقاع ....
مابين نيالا وجبل مرة وزالنجي وشمال دارفور ...وشرق الجبل فاشر السلطان.. دربات ...ودوبو العمدة ...وقمة جبل مـــرة ....ومنطقة روركرو وٲسال ربي ٲن يتقبلهم في الشهداء....
وانحنا في السودان حقارة مابنرضابا..
بنمووووت جــت يوم واحد يهبش عرضنا.. وارضنا ...
واولادنا بموتو بي ورانا ...ونسوانا وحريمنا....
هو العيشة شنو كان مابقت بي عزه.... والموت بي شرف تاج حايفضل فينا نتوارثو عبر الاجيال....
دا ياهو السودان.....
حطينا رحالنا بمحلية جبل مرة... في قرية نيرتتي....
المعسكر ماكان بعيد شديد من الحله.... يعني علي بعد ربع ساعة.... وسوق نيرتتي علي مــرمي حجر من المعسكر....
ترتيب وتنزيل الشنط ما اصعب من نصب الخيم علي امتداد المعسكر بشكل مستطيل علي جميع اطراف المعسكر.... والضباط عندهم مكاتب في النص... واهم غرفة طبعا غرفة الميز والتعيينات... وزي ماقال نابليون الجيوش تمشي علي بطونها ....
معانا مقدم شرطة تابع للاحتياطي المركزي اسمو بشير.... وملازم شرطة اسمو حماده ...طبعا حمادة دلع محمد في الغالب لكن الملازم دا من يوم شفتو بنادو ياجنابو حمادة يعني مرة بالغلط مافي زول قال محمد ياربي اسمو حماده حقيقتا ولا مجرد لقب عليمك الله .... ومعانا ملازم تاني اسمو علي دا عندنا معاهو مواقف طريفة ان شاء الله حانتناول جانب منها في الاجزاء التالية.... يعني كوكبة من خيرة ضباط الشرطة.... والخيرة عرفتها من صفاتم.... ناس بصلوا اوقاتم في المسجد... واي زول بعمر مساجد ربنا دي..... انسان مو هين بالحيل وراجل قلبو فيهو خير كبير....
ومسجدنا كان فيهو امام .... بس صراحة شوية عندو مشاكل في اللكنة ...واللغة... عشان كدا سعادة المقدم بشير بعد ماجينا نيرتتي واستقرينا اوكل لي مهمة الامامة في مسجد المعسكر انا ومعي زميل تاني اسمو حسن ورغـم انو حسن كان صوفي وانا كنت سلفي كان في احــترام بيناتنا وود وكنا بنتانقش احيانا في بعض امور الدين والشي الخـــلاني ارتاح لي حسن انو رجــل طيب وبقبل الدليل بس شوية عندو حب للشيوخ وامور الصوفية دي لكن مع الايام لو لقا الطريق الحق بتبعوا بس باللين والكـــلام السمح....
عد الاسبوع الاول في نيرتتي... وياداب بدينا نعرف الامكنة والمعالم البارزة في الحي....
ويوم الجمعه سوق نيرتتي بكـــون عامر بالمواطنين من داخل وخارج قرية نيرتتي.... الداير يشتري... والداير يبيع في سوق الجمعه من كل اسبوع... وسوق الجمعه دي حاجة ثابتة في غالبية انحاء السودان ...حتي في الخرطوم في منطقة الحاج يوسف بتلقا سوق الجمعه...
في سرعة البرق اتاقلمنا مع الطبيعه الساحرة للمنطقة واختلطنا بالمواطنين في تمازج جميل لابناء السودان الواحد
وكان معسكرنا حديث الحي ومضرب المثل في الاخلاق والتعامل الراقي ....دا طبعا مابمنع من وجــود بعض السلبيات.... والظواهر الشينة بتكون في اي مجتمع.... لكن الحكم بكون للغالب والاعم....
وفي اول شهر يمر علينا في نيرتتي بدت المؤمريات التامينية للمناطق.... مابين جبل مـــرة وكاس.... ومابين جبل مرة وزالنجي ....واحيانا مــؤمريات ادارية لنيالا لمتابعة التعيينات والمهمات وبدل العمليات....
وفي يوم من الايام طلعت مــامورية من نيرتتي قاصدة مدينة نيالا البحير في مهمة خاصة وطلعت تلاتة عربات صغيرة بصحبتم بعض الزملاء منهم صديقي العزيز محمد ضرار حامل الرشاش الاسد الضرغام المابخاف اول ماااقالو مامورية كان اول الناس البادروا للمامورية دي....
وطلعت المامورية وفي منطقة كبري النحل كان في خطر بهدد كل العربات...
بالاخص اذا كانت القوة ضعيفة والعدد ضئيل...
تلاتة عربات عسكرية دي باعتبارا وجبة دسمة لقطاع الطرق....
الشي الانا عايز اقولو انو اكعب شي واجهنا في دارفور دي انك ماااابتقدر تعرف عدوك تحــديدا...
لانو الاعداء مشتتين.... واحــدين بنهبوا وبقطعوا الطريق مواطن ولا عسكري بشيلو حقك حمرة عين ورجالة عــديل كـدا....
وممكن لو لقو فتاة حلوة ودخلت في مزاجم بغتصبوها قدام اهلها وابوها واخوانا.....
وممكن يسوقوها معاهم رجااااله كــدا
ولو في زول طنطن من اهلها مصيرو اما الموت واما السجن والاسر والاهانة....
والقصص البتدل علي كـــدا كتيرة جــدا وحانتناول واحـــدة في الايام الجاية من القصص الدارت مــع واحد زميلنا مساعد في الشرطة ....
وقسم تاني من الاعــداء ديل الناس البحاربوا في معسكرات ثابتة وعندهم قوة ومنعه وديل هم الهدف الاساسي حقنا ...اما قطاع الطرق ديل فشكلهم شماسة ساكت عايزين يلمو قرشينات وديل برضو خطر كبير علي امن المواطن واستقراروا......
اهافي منطقة كبري النحــل دي.... العربات كانت بتمشي بي سرعه جـنونية... اقرب للخيال... والشارع غير ممهد اصلا... واخونا محمد ضرار قاعد في زاوية العربية وشايل معاهو الرشاش في وضع استعداد ترقبا لاي هجوم مفاجأ... بس المفاجأةكانت غير المــرة دي.....
العربية اصطدمت بحفرة اخلت باتزانا وطارت فوووق.... بس السواق كـان حريف قدر يرجعا من جــديد لي مسارا السليم ...طبعا سواقين الاحتياطي ديل يحيروك مكملين الفهم كلو وتحلف تقول دي ماعربات دي طيارات... بس المحــزن انو حامل الرشاش اخونا محمد ضرار صديقي العزيز مع اختلال توازن العربية كان بين امرين انو يمسك الرشاش مايقع منو او يمسك العربية عشان هو مايقع... وكانت المعادلة صعبة والزمن قاتل وقبل مايتخذ قرار واضح لقا نفسو طايح من العربية وياريت لو الموضوع وقف في سقوطو من عربية الدوشكا كان الامــر ساهل معالجتو بالاخص انو محمد ضرار حريف جدا في التعامل مع الوقعات الزي دي بس لمن هو وقع الرشاش بتاعو كان بعانق السحاب قبل مايهوي في رحــلة العودة مباشرة علي راس محمد ضرار وكانت الاصابة بالغة...
وقاتلة...
ومميتة....
بعد تلاتة ايام في مستشفي نيالا قرر الطبيب المختص نقل محمد ضرار الي مستشفي الشرطة ببري لاجـراء عملية معقدة جــدا...
وصباح اليوم الرابع واثناء نقل الاخ محمد ضرار وقبل ايداعه داخل الطائرة كانت الروح تفيض الي بارئها...
ومابين الارض والسماء رحل الشاب الخلوق محمد ضرار عن دنيانا الفانية ليودع الدنيا عبر سماء نيالا الي عالم الاخــرة.....
ياااااه ان العين لتدمع... وان القلب ليحزن... واناعلي فراقك يا محمد لمحزونون... ولا نقول الا مايرضي الرب....
ربنا يبدلك بي خطيبتك حورية من الجنة سبحان الله! !!
الواحد يخطب ويحدد العرس ومشيئة الله غالبة ....
وصونا قالو لينا الشردة لي بثينه الراجل الحمش فوق الجمر بمش يخلي سمعه زينه وصونا بالصرامة والنخوة والشهامه يوم المحن تجينا وصونا قالو لينا الشردة لي بثينه الراجل الحمش فوق الجمر بمش يخلي سمعه زينه
لحدي الاسبوع الفات انا ومحمد كنا بنتونس عن العرس حتي وراني صور خطيبتو وشدة اشواقو ليها...
اصبر يامحمد كلها كم شهر ونرجع من الجبل ونفرح بيك...
محمد بي ابتسامة يقولي الفيهو الخير ربنا يسوي ...
ياسلاااام الفيهو الخير ..... والخير مابعرفو الا ربنا لانو علمو واسع... وسابق ...ولاحق... وعام... وشامل ...وكامل ...وتام...
اما انحنا علمنا محدود وقاصر ....
اكيد الخير يا محمد دايما بجي من ربنا... وداعا صديقي محمد ضرار...
اول فقيد من سريتنا في ارض الخضرة التي تحولت بفعل مصاصي الدماء
الي ملحمة الدم....
الدم فقط ولا شيئ سوي الدم....
وفي نيرتتي تتوالي المفاجأت
ويتعالي صوت الرصاص والدوشكات...
والاربي جي ليضيع صوت الكلاش مع رزم المدفعية والدبابات...
انه صوت الموت
والي اللقاء في الجــزء الخامس لنتابع سويا الاسرار في ارض الاسرار جبل مــرة....
رحلتي مع الموت في ادغال دارفور الم وامل ....الي اللقاء......
|
|
|
|
|
|
|
العنوان |
الكاتب |
Date |
رحلتي مع الموت في أدغال دارفور الم وأمل (قصة مشوقة واقعية سوف تستمع بكل لحظاتها) | حاتم موسى عبدالعزيز | 03-29-16, 10:11 AM |
الجزء الأول | حاتم موسى عبدالعزيز | 03-29-16, 10:18 AM |
Re: الجزء الأول | قصي محمد عبدالله | 03-29-16, 10:26 AM |
Re:رحلتي مع الموت في أدغال دافور | محمد حمزة الحسين | 03-29-16, 04:39 PM |
Re: Re:رحلتي مع الموت في أدغال دافور | قصي محمد عبدالله | 03-29-16, 05:12 PM |
الجزء الثاني | حاتم موسى عبدالعزيز | 03-30-16, 06:48 AM |
Re: الجزء الثاني | Abdalla Hussein | 03-30-16, 07:11 AM |
Re: الجزء الثاني | ismeil abbas | 03-30-16, 09:01 AM |
الجزء الثالث | حاتم موسى عبدالعزيز | 03-31-16, 07:37 AM |
الجزء الرابع | حاتم موسى عبدالعزيز | 04-01-16, 09:46 AM |
Re: الجزء الرابع | امجد الجميعابى | 04-01-16, 02:19 PM |
الجزء الخامس | حاتم موسى عبدالعزيز | 04-02-16, 12:55 PM |
الجزء السادس | حاتم موسى عبدالعزيز | 04-03-16, 09:31 AM |
الجزء السابع | حاتم موسى عبدالعزيز | 04-04-16, 12:45 PM |
Re: الجزء السابع | الأمين عبد الرحمن عيسى | 04-04-16, 07:19 PM |
الجزء الثامن | حاتم موسى عبدالعزيز | 04-05-16, 09:30 AM |
الجزء التاسع | حاتم موسى عبدالعزيز | 04-06-16, 10:35 AM |
Re: الجزء التاسع | مهند سوركتي | 04-06-16, 03:48 PM |
الجزء العاشر | حاتم موسى عبدالعزيز | 04-07-16, 07:57 AM |
Re: الجزء العاشر | مجدى محمد مصطفى | 04-08-16, 07:56 PM |
الجزء الحادي عشر | حاتم موسى عبدالعزيز | 04-09-16, 07:41 AM |
الجزء الثاني عشر | حاتم موسى عبدالعزيز | 04-10-16, 11:59 AM |
Re: الجزء الثاني عشر | محمد فضل الله المكى | 04-10-16, 04:19 PM |
Re: الجزء الثاني عشر | محمد هاشم ابوزيد | 04-11-16, 01:00 AM |
Re: الجزء الثاني عشر | حاتم موسى عبدالعزيز | 04-11-16, 08:15 AM |
Re: الجزء الثاني عشر | Saifaldin Fadlala | 04-11-16, 09:53 AM |
Re: الجزء الثاني عشر | عبد الحميد فخر الدين | 04-11-16, 10:17 AM |
|
|
|