كان عندي عربية كورلا سوداء موديل 96 اتوكأ عليها واهش بها علي غنمي ولي فيها مآرب اخري ! مآرب حسنة !العربات السوداء ارخص من البيضاء ولو تطابقت .. ما تعرفها ارخص ليه .. الا تخش جواها والدنيا صيف .. كأنك خاشي فرن .. الدركسون الا تمسكو بي قطعة قماش ويستحسن تكون مبللة !
ترخيصها الخرطوم ! والترخيص براهو مقيم .. ترخيص الخرطوم افضل .. ممكن ترخص برة الخرطوم لكن ينجضوك نجاض تتمني لو مشيت الخرطوم .. وما بدوك بطاقة رغم انو المرور مربوط بي شبكة
وسيارتي ! بتذكرني عربية محمد عبدالله الريح الحاكا بيها معلقة عنترة
بوصل بيها العيال المدارس واقضي مشاوير المدام بي الليل بعد الواطة تبرد
بناتي لو ماشات مشوار المغرب لازم يشيلو معاهم ملاية يفرشوها للمقاعد .. قالوا بتوسخهم .. ولامن حنبكت خلو الملاية وبقا يقيفو جوة العربية بدون قعاد
اها العربية سعرها ماكان كتير .. لكن ترخيصها الكتير .. رخصتها اول سنة وغيرت الملكية .. وتاني جليتها .. لانو ترخيص عشرة سنوات متتابعات بجيبن سعرها
اها شغال زوغانات .. اصلو ما انقبضت .. وخربت سواقتي .. اكون سايق وبعاين ابعد من طريقي .. والله مرة لفيت من الشارع ودخلت في حفر ووو واكتشفت بعد داك الانا شفتو ما كان بوليس حركة .. حفاظة موية كبيرة بيضا مختوتة في تربيزة كسبيل
اما احمد الله عربيتي دي اصلها ما قابلت بوليس حركة بي وشها .. وانا زاتي والله بقيت لامن اكون ماشي بي كرعيني لو شفت بوليس حركة بزوغ