للبيع السريع, قطعة أرض فى حى الازهرى درجة اولى, المساحة 500 متر من المالك مباشرة ..

رغم مخاشنة سابقة لكين قلنا نخش فى الموضوع ولو عاوز تأستك أستك براحتك :)

المهم بالنسبة لموضوع البيع .. أنا طبعاً مابقدر أفتى .. لكين حأرمى وجهة نظر .. وهى .. هل ياترى قعادك إنت وأولادك قعاد نهائى ؟ـــ القعاد النهائى ده أسأل الحاج حمد من النكتة بتاعته ـــ .. وهل إذا قررت إنت فى عمرك الحالى هذا القرار النهائى برضو أولادك بعد يكبروا حيكون ده قرارهم النهائى .. وهو قرار الهجرة للأبد والعيش كأجنبى لجنا الجنا؟؟ أم ياترى أنهم سيتضجروا من العيش كغرباء للأبد ويحنوا للعودة للجذور .. وحينها يلقوا إنو أبوهم حاجز ليهم البيت أوقطعة أرض يكونوا أسيادها ويستقروا فيها ..

حسب علمى أن الـ٥٠ألف أو الـ ٦٠ألف دولار مابتجيب ليها بيت لأسرة صغيرة إلاّ فى الضهارى أو البرارى .. وإعتماداً على المنطقة لربما يصعب إيجاد عمل مجزِ .. أو ربما ظروف الشغل تضطرك للإنتقال لمنطقة أخرى فلا تدرى ماذا تفعل بالبيت إن لم تستطع تأجيره .. ذلك فالبيت الذى ستشتريه سيسعك أنت والزوجة فقط حينما يكبر الأولاد ويصلوا سن الإستقلال .. وحسب التربية الغربية فالغالب أنهم سينفصلوا من الأسرة سواءً بالزواج أو العمل فى مناطق بعيدة ..

على أى حال هذه خواطر ونظرة فى المستقبل المجهول وأحسب أن أغلب المهاجرين يتفكرون فى نفس هذه الزاوية .. لذا أنا عن نفسى أحبذ أن تترك للأسرة وتد مدقوق وسط البلد يبقى ليهم ركيزة لو فكروا يرجعوا بلدهم .. ولا يستحب أن نعمل ليهم خيارات جنود طارق بن زياد الذى حرق المراكب حتى يكون الدخول لأندلسيا هو الخيار الوحيد وللأبد .. لكن شوف حكمة التاريخ .. رغم حرق المراكب دار الزمان وقفل العرب راجعين من أندلسيا ..

معليش على التنظير، لكين رغم إنو إعلانك ده صغير وبسيط فإنه سيحرك قرون الإستشعار لكثيرين عندهم مسائل مشابهة .. ويستثير تساؤلات الإستقرار النهائى وإتخاذ قرار مصيرى للأب ونيابة عن الأسرة والصغار ..