سوداني نوبي وافتخر بمنطقتي التي يجيد رجالها الطباخة

Quote: والله ما تتصور ريتحتنى كيف وفرحتنى قدر شنو. أنا لامن كنا أطفال أبوى عليه رحمة الله كان بيخلينى أنا وأخوى يوم واحد يغسل العدة ويوم يقش البيت وهو مرات يجى من الدكان يعمل لينا إستيك ولا كستليته وللا محشى. وشاى الصباح وفطور الصباح والبنشيلو معانا المدرسة كان بيجهزو لينا. وعندو طريقة عمل سندوتش فول بالسمنة والفلفل لغاية الليله أنا بتمتطق فى طعمه

الله يريحك ويسعدك دوما اخوي عبدرحمن ويرحم الوالد ويسكنو الجنة ديل ناس امنو بالعمل وقيمتو وفايدتو وياريت لو كلنا ننهج نفس طريقم

Quote: تعرف هسى أنا الحمد لله أجمل إنجازاتى بتكون لامن أعمل لى أكلة وأولادى وللا الضيوف يتكيفو منها. حتى أولادى بيصرو على أطبخ ليهم مرات. متعة ما بعدها متعة. عشان كدا أولادى فنانين جدا فى الطبيخ وما تتصور زوجتى بتفرح قدر شنو لامن الواحد فينا يقوم يعمل ليه غدوه ولا عشوه. والطريف إنو ولدى الصغير لمان كان فى الروضة فى المدرسة النموذجية، نادتنى مديرة مطعم المدرسة الكندية اللى هى عندها ماجستير تغذية وقالت لى "تعرف ولدك دا كوناسور (يعنى ذواقة بدرجة عالية من الرقى)" قلت ليها كيف؟ قالت لى "مافى أكل بيعجبو وهو الوحيد فى الأطفال ديل يقول الأكل دا مسيخ ولا مافيهو بهارات، ولا زايد ملح ولا ناقص ملح". ودى نعمة ياخى.

هههههه قتا لي جنن مديرة المطعم بعد شوية حيعينو ليك مستشار غير متفرغ ربنا يحفظو وامو وكل اخوانو واتا كتر ليو من طبخاتك

Quote: أذكر مرة وأنا صغير مسافرين لى حلفا بالقطر. لقينا كل السفرجية من "أندينا" وطبعا كنت عارف ناس عمنا محمد حشاش طباخ الحفلات النوبى البارع وناس فندق السودان. قمت سألت أبوى عليه رحمة الله:"ليه كل قرايبنا طباخين وبوابين حتى الفى مصر". قال لى كلام ما نسيتو وما حنساهو لغاية لقاء رب العالمين. قال لى نحن إتشردنا من ما بنو سد أسوان وإتفرقنا وناسنا إتشتتوا وهم كلهم كانوا ترابله فلما جو المدينة فى الهجرة ما لقو غير الأعمال دى. بس إتأكد إنو كل واحد فيهم بيشقى ويشتغل عشان أولادو يكونوا أحسن منو." وبدا يعدد لى فى الأسماء: فلان المهندس دا أبوه كان بواب، وفلان الجراح ابوه كان طباخ ووكيل الوزارة أبوه كان سفرجى فى فندق السودان. وحتى المدير العظيم دا أبوه كان بواب فى المحل الجابوهو مدير ليهو. وقدر ما ولدو قال ليهو يا بوى كفاك بعد دا حقو تمشى ترتاح، ابوهو زعل وقال ليهو "إنتا بتستعر منى؟ ما هى دى الشغلة الربتكم وعملتك إنت مدير وأخوك طبيب واختك مهندسة. أنا بأفتخر بيكم وأنتو تخجلو من شغلى؟ تعرف ياولدى أنا لامن زملائى يقولو لى يا أبو المدير بفرح قدر شنو؟" بعدين أبوى قال لى لازم تعرف حاجة مهمة "الراجل ما فى شغل بيعيبو وما فى شى عيب على الراجل عملو إلا ثلاثة: الكذب والسرقة والخيابة".

العمل والاكل من عرق الايد مافي اجمل منو واعظم منو وابهاتنا وجدودنا فخر لنا جميعا

Quote: طبعا بتعرف إنو أول موسوعة طبية فى التاريخ كتبا جدك أموحوتب. ورغما عن إنو العالم إنبهر بإكتشاف أوربا فى الستينات للتتراسايكلين الأحدثت طفرة نوعية فى معالجة التهابات الباكتريا الحيوية وكان طفرة فى تاريخ المضادات الحيوية، كل الأبحاث الحديثة فى تاريخ الطب وما يسمى بعلم الطب الآثارى (Medical Archaeology) وجدوا أنو النوبيين كانوا بيستعلموا التتراسايكلين من فترة تقارب الثلاثة آلاف سنة وبيستخلصوها من طريقة معينة فى تحضير "الدكاى" الواحد دا؛ تقول لى "مـيـلـــــوحــــــة؟ وحتى الميلوحة يا أخى المكونات الغذائية والوقائية الفيها تحيرك. شكرا يا صديق وكتر "هيرك".

الدكاي والميلوحة سرهم باتع قاليك مرة جماعة عندهم عرس ودافنين دكاي واحد مسيخ لي مولانا وواحد مر تقيل لي ناس الطنبور اها لامن بقو على العقد وكتبوا كتابم واحد قاليهم من فسسسسسسلتون كوباية ويكا تر اها واحد دغيل مشى عبا ليو من المخمر مولانا جغم منو جغمة ومعاها تمطقة وقاليهم اونقا فسسسسسسسسقا :)عايز يحللو عمك