يقال ان البلولة ود جبر الدار الجماعة اشتروا ليهو فيزا عامل تربية مواشي دون أن يطلب منهم ذلك، فجبر بخاطرهم وحضر الى السعودية على مضض، بعد شهرين، تلاتة كدا القعده غلبتو تب..وغالبته لواعج الاشواق، تذكر أهله وداره وسعيته وعاوده الحنين، وجد نفسه بين عشية وضحاها، يجوب في هذه الفيافي والصحاري والمنافي خلف سعيد ليست سعيه وبيئة ليست بيئته، وما زاد الطين بلة أن أمه وخالاته اتصلن عليه فبكن وابكنه، وتذكر قول القدال "أماتي القبيل بي حنهن لجني...كرفة وقلدة كيف شوق اللبن رجني". قال للكفيل يا زول هوي انا مسافر...الكفيل قال ليو يا رجال عين خير، تو الناس...قال ليهو يا زول قلتلك انا ما بقعد، الكفيل قال ليهو كان العمل ما عجبك...احولك لي شغلة تانية...قال ليهو يا زول انا عندي "اماتن لي ما بنفاتن" الكفيل نادى سوداني يشرح ليهو...الجماعة أخدو ليهن قعدة شوية كدا. جاء الكفيل قال ليهو أها أخوك أيش فيه. قال والله اقولك قولا: الزول دا قال ليك قفاه اعوج تب..ما في طريقتن بتقعدو.
02-28-2016, 07:45 AM
almulaomar
almulaomar
تاريخ التسجيل: 07-08-2002
مجموع المشاركات: 6485
ود الشيخ تحياتي يا زول البلولة دا راجل تمام وإتخاذ قرار صحيح بالرجوع إلى البلد. صديقاً لينا إسمه علاء الدين هاجر مكرها شأنه في الهجرة شأن البلولة ، أها أول ما وصل قعد تلاته يوم يقرأ في إسم كفيلو غلبو تب ، وحدثني أنه ذات جمعة والأنمة مجتمعه كان قاعد مع شلة عزابه فإذا به يصرح للجميع بأن البلد دي صعبه وهو ما حا يقعد كتير وهو أول ما يعمل ليهو حافله حا يرجع فتصلح أحد الحضور وقال له قلت شنو قال ليهو قلت أول ما أعمل لي روزا برجع البلد ، قال ليهو إنت مؤهلك شنو قال ليهو متوسط أها وعارف الروزا بي كم قال ليهو لا والله قال ليهو أنا معاي دبلوم عالي في الكمبيوتر وبكالوريوس وشغال من ما جيت وقد كان سبب هجرتي شراء سراول جينز ماركة ليفايز وقد كان وقاعد لليوم ثمانية سنوات عجاف وما أنفكت. صاحبنا تاني يوم لقيتو حايم في السودان أزول علك عافيه خير الجابك شنو قال لي الجابني شنو كان راجل سافر وأغترب.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة