البولو لعبة البرجوازية، بلعبوها بالحصين وعندهم مضارب طواااال كدة زي الشواكيش، لعبة غريبة، مش عادة في اللعب بتتحرك الكورة؟ زي ما بيحصل في كورة القدم والتنس والطايرة؟ هنا في البولو بيتحركوا الناس والكورة ثابتة، يعني الكاميرا بتجيب ليك الكورة ثابتة في الواطة وفجأة تشعر بزول غرفها كف واختفت من الشاشة، بعد شوية يكبروا ليك اللقطة حتان تشوف دا منو الكفتها دا ههههه، نفس التقنية بتاعة تصوير لقطة صيد السمك في فيلم (Castaway) توم هانكس، Track-out.
دا نفس الشعور بتاع المتابعين لزولك في البوست، بكونوا مركزين معاهو وفجأة يشعروا بيهو انطق من جهة غير معلومة، طبعاً هي معلومة بالضرورة، تصلح مع شخص متوسط القدرات لكنه قصير الذاكرة أو لا يصبر على البحث والتمحيص ويفتقد الدقة في الوصف، وتعتمد على اقتناص فرصة وجوده القصير، تديهو الطقة وتخليهو يمشي في الاتجاه الانت عايزو، ما ضروري تواصل معاهو، تأثيرها متوسط ويجب أن تستغل بحيث لا يغضب الشخص لأن الغرض هو أن تكرر الضربات في أوقات متعددة.
السيناريو:
1 بوست في موضوع متكرر ومسيخ نوع البوستات العندها اتجاه واحد ديك وكل أسبوع تلقاها في وشك ومافي جديد. 2 البوستات النرجسية أها دي بوستات في موضوعات متغير، لكن من تاني مداخلة تحس بأنو سيدها قاصد نفسو، دا الذكرى بتنفعو، لو مؤمن 3 البوستات الغريبة نوع البوستات البتحس بأنو سيدها الله ما قسم ليهو فهم للدنيا، دا طقو بلا خوف.
المتطلبات:
1 بوست من النوع المذكور أعلاه وهدفك تدي صاحب البوست مذكرة.
التنفيذ:
1 المداخلة الأولى هي طقة واحدة مافي غيرها خليها خفيفة لكن جادة عشان تحركو من هنا لهنااااااك، بيلقى ليهو زول تاني يطقو برضو. 2 الخطة البديلة التسخينة، إذا أبى يتحرك معاك من محلو.
النتائج المتوقعة:
1 الهياج البطيء المطقوق حيبدأ يتفاعل من الضربات ويسخن شوية شوية لحد ما تجي لحظة يقوم يبُق فجأة، مش الزناد مرات إلا تحكو كذا مرة؟ أها دا نفس الشيء، ما تدخل هنا خليهو، البركان برضو بيهيج وينفس عن دواخلو، ما انت كمان غلطان، أكضب عليك؟ 2 بوستات الرد بتقوم الصباح وفجأة تلقى بوست باسمك وغالباً حيتلموا فيك زي سمك البيرانا (أو البيراكودا) أي واحد داير ينهش قطعة منك 3 الكيد الرخيس في شغل حيتعمل تحت تحت، يعني حشد وشكاوى سرية ضدك أو ربما استفتاء لكشف شخصيتك أو تهديد باعتبارك إرهابي، وارد جداً.
الأسلوب:
1 كل الأساليب تصلح كل الأساليب دي بتنفع: ساخر، وعظ، فكاهة، صرامة.
النكهات:
1 دي نكهتها واحدة بطعم النجيل الأخضر.
النماذج العملية:
1 للأسف مافي حاجة فريش حالياً، لكن القائمة المعروضة قدامي فيها أول اتنين الشغيل وأسامة لكن بتذكر بوست اتفتح باسمي لغرض حسمي للأبد واتقفل بسرعة الظاهر عدتي كانت جاهزة للخطوة دي.
2 الحاقد : حاتم ابراهيم يعلن كفره وجهله الحاقد : حاتم ابراهيم يعلن كفره وجهله , وجب عليه الاعتزار الحاقد : حاتم ابراهيم يعلن كفره وجهله , وجب عليه الاعتزار دا واحد مهووس داير يبقى رئيس الجمهورية، زندية ساكت، اليبقى، لكن ما ممكن يبقى سيد زول كلو كلو
الملاحيظ:
يفترض ما تتواجد في مسرح الجريمة ابداً بعد الطقة، شوف ليك موضوع تاني
اتوقع إنو بعد عدد من الطقات يتفتح بوست باسمك، أوعك تخش فيهو لأنك ببساطة حتثبت الجريمة عليك إلا إذا ضامن إنو موقفك قوي
أعمل فرقات زمنية مناسبة حسب نشاط "الكورة" المهم تخلي زولك يتلفت ذات اليمين وذات الشمال وأي ذات أخرى الوقت كلو، دي الفكرة.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة