قرأت قبل يومين في أحد الصحف السودانية خبر وفاة طفلة بسبب انصعاقها بالكهرباء، ومن منا - في السودان - لم يسمع بخبر وفاة أحد الاشخاص بنفس السبب! وعملية التأريض (grounding, earthing) عملية غير مكلفة وضرورية مقارنة بفوائدها في حماية الأشخاص، الاجهزة والمنشآت.
وعليه ندعو الجميع خاصة من ينوي البناء في المستقبل للقيام بهذه العملية
01-07-2016, 08:17 PM
طلحة عبدالله طلحة عبدالله
تاريخ التسجيل: 09-14-2007
مجموع المشاركات: 18010
Quote: وعملية التأريض (grounding, earthing) عملية غير مكلفة وضرورية مقارنة بفوائدها في حماية الأشخاص، الاجهزة والمنشآت.
في حل أسهل، استخدام RCD
residual current device
متوفر ورخيص
لاحظ أنه يفصل الدائرة بالكامل عند أول احساس بمرور التيار في خارج الحمولة
الجهاز بمبدأ الفرق بين التيارين (differenetial current). ____________ التأريض لا يعطي ضمان عدم الموت، بل تخفيف الصعقة، فلو مسار التيار كان أفضل عبر الجسم فالموت لمن تعاطف ومرر التيار عبره.
01-09-2016, 06:50 AM
أيمن محمود أيمن محمود
تاريخ التسجيل: 01-14-2013
مجموع المشاركات: 4940
الفكرة بسيطة، التيار في الخط والراجع بيكون واحد طالما الحمولة مستقرة، لمبة مثلاً، وفي الحالة دي الحلقة المعدنية البيضاء لا تتولد فيها قوة مغناطيسية لأن التيارين كل واحد يلغي التاني لأنهم عكس اتجاه بعض وقيمتهم متساوية، أو ما يحصل شورت قيمة واحد منهم بتكون انخفضت، الفرق دا بيخلي الحلقة المعدنية تتمغنط وتولد تيار خفيف في (sensing coil) وبدوره يحرك مفتاح يفصل الكهرباء.
أحكي ليك قصة حصلت لي مع البتاع دا زمان، مشيت اتشالق في صيوان حفلة وعامل فيها فني كهرباء، حفلات زمان، بيعلقوا الكشافات في حديد الصيوان، المهم قومي يا الكشافة أعملي أرضي مع ماسورة الصيوان ويمر التيار للأرض عبر الماسورة الفيها الكشافة، مش كدة وبس، التيار اللئيم كان بيغشى كل مواسير الصيوان ويتسرب منها للأرض، نولع الكشافات بعد شوية تطفي براها، نولعها تاني، كجك تطفي، سمعتي المهنية، مشيت على البتاع في الصورة الفوق دي، كان المتهم الوحيد فالباقي أنا كلو بعرفو، ياهن أسلاك ولمبات وكوبسيات، لقيتو بيقفل براهو الكلب، الحتة السوداء دي أرفعها لفوق تكون عاصية، أخليها كجك تجي واقعة براها والصيوان يطفي، قلت يمكن الياي بتاعو برد، قوم يا حاتم أحشر ليهو عود تحت البتاعة السوداء دي عشان ما تنزل لتحت وتفصل الكهرباء، عليك أمان الله قبال ما أزح منو سمعتو ليك عمل هزيز كدة وأظنو سخن برضو، بس قلت بتكون دي عادتو، الخواجات ديل مناعيل، ما الكشافات ذاتا بتسخن وبتحمر بيض عديل.
أها، لتاني يوم الصباح الصيوان بيكهرب في الناس نسوان ورجال، أي زول مسك ماسورة أخد مساج ليلي وضهرو انطلق، الكهرباء بتعمل دلك كويس 50 هيرتز، ما بطالة، آخر ضحية كان زميل دراستنا والله عيني ليهو والله قبض الماسورة وغلبو يفكها، قايلنو سكران أتاريهو مشلول، غايتو جروهو من الماسورة، والله ما قدر يقيف على حيلو، الكهرباء بتاكل الكرعين تاريها. كان درس عجيب في الليلة ديك. _____ الشمس مرقت، مشيت للجهاز لقيت لونو بقى أسود وريحتو نار نار. وعودي راكب. لكن ما كتلنا زول.
جزاكم الله خير على المعلومات الطيبة .. الأخ حاتم بالدارجي في الاسواق يقولون عن ذلك (المفتاح) بالمفتاح الحساس .. حتى أن البعض يفتي ويقول بأن (المفتاح) الاسود خفيف الحساسية هو نظام امريكي .. ونظام المفتاح الذي ذكرته هو نظام بريطاني وذو حساسية أكثر.. نريد معلومة أيضاً عن التأريض .. لقد قابلني في سوق الكهرباء (قضيب) نحاس يبلغ طوله متر وله (اكسسوار) تقريباً لربط الكيبل الرئيسي للأرضي هل يقصد الاخ أيمن التأريض بقضيب النحاس الذي يدفن في ارضية المبنى بعيداً لتفريغ الكهرباء ؟؟ آمل الافادة والتنوير.
01-09-2016, 07:19 AM
أيمن محمود أيمن محمود
تاريخ التسجيل: 01-14-2013
مجموع المشاركات: 4940
Quote: الفكرة بسيطة، التيار في الخط والراجع بيكون واحد طالما الحمولة مستقرة، لمبة مثلاً، وفي الحالة دي الحلقة المعدنية البيضاء لا تتولد فيها قوة مغناطيسية لأن التيارين كل واحد يلغي التاني لأنهم عكس اتجاه بعض وقيمتهم متساوية، أو ما يحصل شورت قيمة واحد منهم بتكون انخفضت، الفرق دا بيخلي الحلقة المعدنية تتمغنط وتولد تيار خفيف في (sensing coil) وبدوره يحرك مفتاح يفصل الكهرباء.
مشكور يا حاتم على شرح فكرة عمل الجهاز - شرح مبسط وواضح
قصتك العجيبة ذكرتني حتة استبدال الفيوزات زمان باسلاك ذات سماكة اكبر
Quote: لكن ما كتلنا زول.
حتى لو زول مات - حا يرموها في الكهرباء ما في الكهربائي
01-09-2016, 08:08 AM
حاتم إبراهيم حاتم إبراهيم
تاريخ التسجيل: 08-11-2014
مجموع المشاركات: 3382
Quote: حتى لو زول مات - حا يرموها في الكهرباء ما في الكهربائي
يازول والله ديك كانت أدبة
الأسبوع البعد الحفلة أنا بسمع أخبار الناس الطقاهم الماس ومسردب هههه مع كل قصة جديدة أنا قلبي يعمل "شح" أدرنالين تقيل، وأقول دا واحد الله مرقو.
احتمال كبير زول في موقفي داك كان حيعترف ويقول الخطأ منو، بس أنا كنت مصدوم صراحة وبستعرض الشريط كلو من نهار اليوم داك لتاني يوم الصباح لو طفل مات كنت حأقدم اعترافي كيف ووضعي النفسي يكون شنو، والله يا أيمن متذكر التفاصيل كأنها حصلت أمس مع أنها في الثمانينات.
في كل الأحوال أي إصابات تتعلق بالتيار قطع شك هي أخطاء بشرية وفنية. ________ الكهرباء ما بتدور الملاواة.
01-09-2016, 08:23 AM
حاتم إبراهيم حاتم إبراهيم
تاريخ التسجيل: 08-11-2014
مجموع المشاركات: 3382
Quote: الأخ حاتم بالدارجي في الاسواق يقولون عن ذلك (المفتاح) بالمفتاح الحساس .. حتى أن البعض يفتي ويقول بأن (المفتاح) الاسود خفيف الحساسية هو نظام امريكي .. ونظام المفتاح الذي ذكرته هو نظام بريطاني وذو حساسية أكثر.. نريد معلومة أيضاً عن التأريض .. لقد قابلني في سوق الكهرباء (قضيب) نحاس يبلغ طوله متر وله (اكسسوار) تقريباً لربط الكيبل الرئيسي للأرضي هل يقصد الاخ أيمن التأريض بقضيب النحاس الذي يدفن في ارضية المبنى بعيداً لتفريغ الكهرباء ؟؟ آمل الافادة والتنوير.
مرحبا أستاذ وائل حمزة
طبعاً بعد الدرس الحار الإجباري بقيت من عشاق الجهاز دا غصب، المهم سؤالك بياخد في النهاية وصف (السلامة) أو (safety) ودي مقصود منها حاجتين باختصار
1- ==== إما سلامة المعدات من التيار أو الجهد العالي (overload) ==== مثلاً عندك خلاط ولا تلفزيون أو مكوة خسرانة أو حصل فيها شورط وسحبت تيار أعلى من المحدد أو صاعقة بسبب تفريغ في يوم ماطر
2- ==== أو سلامه البشر في محيط الأجهزة الكهربية بسبب تقصير الدائرة "الشورط" (short circuit) ==== عندك تلاجة بتضرب ناس البيت ماس كل ما يجوا يفتحوها، أو مغسلة موصلة بموتور المضخة أو مكيف موية أول ما الزول يلمسو يروح ضاربو كهرباء، أو صيوان حفلة مواسيرو بتقشط في الناس كهرباء الليل كلو لأنو في واحد مطرطش عمل التوصيلات بما تيسر
لكل حالة من الفوق ديل جهاز منفصل بوظيفة محددة، للأسف كلهم من برة بيشبهوا بعض لكن حأحاول أقدم معلومة مبسطة أول بعدين نشوف كلام علمي ومسميات عشان الناس تتبعها.
بالنسبة للتجهيزات الخاصة بالحماية من الصواعق حأجيب عنها في يوم تاني.
01-09-2016, 09:00 AM
حاتم إبراهيم حاتم إبراهيم
تاريخ التسجيل: 08-11-2014
مجموع المشاركات: 3382
طيب، الجهاز التحت دا اسمه (Circruit Braker) والغرض منه حماية الأجهزة الكهربية، وعادة تتم الحماية لمجموعات منها، مثلاً بيت فيهو مراوح ولمبات ومكيفات وأجهزة إلكترونية أخرى (تلفزيونات وكمبيوتر إلخ) فيتم تخصيص واحد منها لكل مجموعة يعني اللمبات تاخذ واحد والمكيفات واحد تاني، وهكذا.
دي طريقة تفترض توفر الأجهزة بنمط محدد سلفاً (مبنى سكني أو داخلية أو عمارة مكاتب مثلاً) والطريقة التانية يتم تخصيص جهاز لكل غرفة بحساب متوسط سحب التيار في الأجهزة في الغرفة، ودي طريقة تناسب البيوت العادية فلأربعة غرف مثلاً تحتاج لأربعة لكن إذا كنت حتركب مكيفات كبيرة مثلاً فيستحسن تعمل ليها جهاز منفصل.
الجهاز مجرد معبر للتيار يعني السلك (الخط الحامل للتيار) يدخل من جهة ويطلع من التانية بس، يعني ما عندو قطبية، فكرة عمل الجهاز إنو طالما التيار المسحوب في حدود معينة فالجهاز يكون مجرد امتداد للسلك إلا في لحظة تجاوز التيار لحد معين (الخلاط مثلاً رميت فيهو حاجة صلبة وقفت الموتور) فيفصل الجهاز الكهرباء ويحافظ على الأسلاك والخلاط مثلاً. نفس الجهاز يحمي المنزل من في حالة الصواعق.
التقنية تعتمد على التأثير الحراري على المعادن، فمرور التيار في حد معين يجعل قطعة معدنية في وضع تحافظ فيه على الجهاز في وضع التوصيل، زيادة التيار يجعل القطعة المعدنية تنحني (أو تستقيم) وتقوم بدفع ميكانيكي لفصل التيار، عادة هذا النوع يتطلب الانتظار ثواني قبل أن يتيح لك لك إعادة توصيله مرة أخرى.
بصراحة دا الجهاز الأنا حشرت ليهو العود، البتاعة الحمراء في الفيديو الفوق أنا أبيت ليها تنزل تحت، فقامت سخنت لأنو التيار بقى أعلى من المسموح (كان 20 أمبير أظنو) الكشافة العاملة شورط كانت بتاخذ كفايتها من التيار وتولع بيهو وتدي الواطة الفائض عن حاجتها عبر المواسير بتاعة الصيوان، بدون ما تعمل حساب لحدود التيار المسموح، وأنا تميت الناقصة، هيع، كرم سوداني أصيل.
_______ اشتروهو واستخدموهو، ما تابوهو.
01-09-2016, 09:27 AM
أيمن محمود أيمن محمود
تاريخ التسجيل: 01-14-2013
مجموع المشاركات: 4940
الجهاز الخاص بحماية الأفراد من تقصير الدائرة هو الأشار ليهو الأخ وائل باسم (الجهاز الحساس) وهو نفسه البديل لنصيحة الأخ أيمن باستخدام التأريض أو إضافة سلك تالت يعمل على تمرير التيار في حالة حدوث توصيل خاطيء (fault) أو البنسميها بالعامية الماس.
الجهاز الحساس الغرض منو حماية الناس من الكهرباء، فإذا كان سليم ويعمل بكفاءة فهناك فرصة ضعيفة جداً لحدوث الوفاة
لاحظوا إنو الجهاز المعروض فوق في الحقيقة يقوم بوظيفتين حماية الأفراد من تقصير الدائرة وحماية الأجهزة من التيار العالي، اتنين في واحد.
المبدأ الهندسي هنا
شكل الجهاز دا زي الفوق زي ما ملاحظين، وطبعاً أغلى، بس مهم جداً، السيناريو المتوقع مثلاً تلاجة أو موتور موية موصول بطريقة غلط، في اللحظة البيتم فيها لمسو بواسطة شخص حفيان مثلاً أو كان ماسك حيطة جنبو بيتم تمرير تيار إضافي خارج الدائرة المفترضة من المفتاح الرئيسي للجهاز وعودة التيار للخط الراجع، الفرق البسيط دا بينشط الجهاز ويفصل الكهرباء قبل ما الزول يشعر حتى بأنه في كهرباء، حتى لو كانت ثواني وتم صعق الشخص فالأثر لا يكون قاتل.
أرجو ملاحظة أن الكهرباء تقتل بتأثيرها في وظائف القلب والأعصاب والموت يكون نتيجة للاختناق في الواقع بسبب عدم وصول الاكسجين لخلايا المخ، حأوضح دا في مداخلة تالية. _______ اشتروهو واستخدموهو، ما تابوهو.
01-09-2016, 10:02 AM
حاتم إبراهيم حاتم إبراهيم
تاريخ التسجيل: 08-11-2014
مجموع المشاركات: 3382
سيناريوهات تقصير الدائرة للأسف لا يمكن ملاحظتها حتى إذا كان هنالك تأريض (فكرة الأخ أيمن) فيمكن عمل التأريض لكن يظل الخطر موجود بانتظار الضحية فقط.
توصيلة كوبس غير جيدة يلامس فيها السلك الحامل للتيار الجزء المعدني، هذا خطأ شائع ويحدث في كل الأوقات
ملامسة جهاز موصول بالكهرباء وغير موصول بطريقة جيدة حتى لو كان محمي بالتأريض
ما سيحدث هو إصابة بصعقة كهربية لكن احتمال الوفاة ينخفض بتقليل زمن التعرض للتيار أو ضعفه لارتفاع المقاومة (ملابس مثلاً أو أحذية) لكن يظل الخطر موجود ومستمر
حالة يصلح فيها الجهاز الحساس التيار يمر عبر الجسم إذا كان الشخص يقف على أرض مبتلة أو يستند إلى حائط بيده
سيناريوهات أخرى للحالة: 1- هبشت ليك سلك عريان في وصلة المكوة وهي شغالة 2- الشافع قام دخل مسمار في الكوبس 3- باب التلاجة عامل ماس 4- المكيف بتاع الموية الطلبمة بتاعتو وقت في الموية وكهربت كل الجسم المعدني للمكيف وأي زول يهبشو يطقو 5- موتور الموية بقى قديم وفيهو أسلاك بقت هابشه الجسم المعدني بتاعتو والماسورة اتكهربت 6- جات مطرة ورمت سلك العمود في الموية في الحلة بتاعتكم 7- عربية دقشت عمود الكهرباء وقوم يا السلك ألمس الزنكي بتاع الأكشاك في السوق كل المعادن حتكون مكهربة 8- عمود الكهرباء جنبو شجرة والاسلاك ماره عبرها وجات مطرة كل الشجرة حتكون مكهربة 9- لمبة باب الشارع ما معزولة كويس، جات المطرة والموية وصلت بين السلك وباب البيت بتاع الحديد، مافي زول يدخل أو يطلع 10- أي جهاز كهربائي في الورش أثناء الجو الغائم أو الرطوبة العالية في الجو (دربكين، مكنة لحام إلخ)
في السيناريوهات الفوق دي كلها لازم تعالج المشكلة أول، لأنو مفتاح الجهاز حيفصل تلقائياً وما حيخليك تشغل أي حاجة، اللهم إلا تحشر ليهو عود، زندية كدة بس، ممكن طبعاً إذا كان دا آخر فاصل في الحفلة وما داير تقتل فرحة الناس، بس أعمل تحذير أول، حيبوظ المفتاح طبعاً.
01-09-2016, 10:38 AM
الطيب عباس الطيب عباس
تاريخ التسجيل: 09-22-2015
مجموع المشاركات: 2269
سلامات صاحب البوست وضيوفة موضوع هام جدا قبل شهر بس كنت بتكلم مع الكهربجي وهو زول من رانكلات الخليج خبرتو عالية في الخليج ورجع السودان وسالتو نظام التاريض كيف ضحك فيني وقالي هنا ما بنشتغلو قت لي ياخ انا دايرو وبشتري ليك كل السايكو بريكر بتاعتو رفض وبشده قالي هنا ماف نظام زي دا ؟؟ الطبلو ن12 خط والمفاتيح كلا ثلاثية بس عقليتنا في الشغل في السودان تعتمد علي كلمة ( كل الناس ما عمل وما مهم ) للاسف ..! ودا البسبب الحوادث والصعق الله يسترنا
01-09-2016, 10:37 AM
حاتم إبراهيم حاتم إبراهيم
تاريخ التسجيل: 08-11-2014
مجموع المشاركات: 3382
الكلام هنا عن الكهرباء العامة (AC) المعروفة للناس والبتدخل بيوتهم من عمود الشارع
عند مرور التيار الكهربي عبر الجسم كما في الحالة النموذجية التحت دي
أو كهربجي مثلاً طالع في كرسي بلاستيك وماسك سلك حي لن يتأثر أبداً ولن يشعر بمرور التيار في جسمه، لكن إذا طلب منك مناولته زردية ولامست يده وانت حفيان مثلاً فالتيار يمر عبركم الاتنين للأرض وانتوا وحظكم.
الحدود الدنيا والقاتلة للتيار:
16 ملي أمبير تبدأ العضلات في التقلص، حالة الشعور بالرجفة، ودا بسبب التردد 50 هيرتز وليها تاثير المساج، ما بطال للناس الصحتهم كويسة بس تجنبوا القلب
20 ملي أمبير تنشل عضلات القفص الصدري ويصعب التنفس، التدخل السريع وعمل تنفس صناعي
100 ملي أمبير يتداخل التردد 50 هيرتز للتاثير على عضلة القلب مباشرة، التدخل السريع وعمل تنفس صناعي
الموت يحدث لانخفاض الأكسجين في الدم وعدم وصوله للخلايا الدماغية، يمكن فإذا تم الوصول للشخص في الوقت المناسب يمكن عمل تنفس صناعي سريع حتى إذا توقف القلب عن العمل.
التأثيرات الباقية حتكون غير ملحوظة لأنو حروق الكهرباء بتكون تحت الجلد ولا تظهر في السطح، بتدمر الخلايا تحت الجلد وتظهر في شكل لون محتلف وعلاجها طبيعي بالأكل والشراب لتجديد الخلايا.
طبعاً دا يختلف عن التعرض للحريق بالكهرباء بسبب التواجد المباشر قرب مكان حدوث حالة الدائرة المقصرة (الشورط) مثلاً اتصال سلكين جنب الجسم فالحرق هنا بسبب الحرارة مش الكهرباء وهي عالية جداً (الاف الدرجات) أو مثلا احتراق محول كهرباء (أمية) بجواره شخص أو مفتاح تحويل كبير في محطة ودا ببساطة ممكن يذوب الجسم بكامله أو يحوله لفحم بسبب الحرارة وليس التيار، دي بتلاحطوها لما تتلامس الاسلاك أثناء العواصف ويبدأ عرض الألعاب النارية المخيف داك هههه.
أظن في حالة عملية لحادث أشخاص حاولوا يسرقوا نحاس لكيبل كهرباء ارضي 10 ألف فولت (تخين بسماكة قزازة البيبسي) حفروا مكان عايزين يقطعوا والكهرباء شغالة، وجابوا المنشار وبدو النشر، المنشار أكل البلاستيك الفوق أول والكهرباء ساكتة، وبدأ ياكل شبكة أسلاك الصلب الداعمة والكهرباء ما قالت حاجة لسة، والمنشار دخل في شريط الحديد الملفوف، والكهرباء ما سألتهم، أها بعد دا بدأت تظهر الأسلاك الأربعة الملونة بتاعة النحاس وبدأ القطع في السلك الأول بدون ما يشعر بالتيار الماري في جسم (احتمال لابس جزمة)، أول ما المنشار عمل شورط بين الكيبلين، هنا الكهرباء قالت كلمتها. عثروا على جثتين متفحمتين ووجدوا أوراق شجر العشر حول الموقع لونها بني، فقط بسبب الحرارة العالية المتولدة.
المسألة الحاسمة في الموضوع هي مقاومة الجسم وحالتة أثناء التعرض، الكهربجية يدينهم خشنات ممكن يلمسوا الأسلاك العارية مباشرة بسبب المقاومة العالية للجلد الناشف، إذا كانت يدينهم مرطبة فهناك فرصة كبيرة لتعرضهم للصعق. ____ كفاية الليلة، حأرجع لسوالك يا أيمن.
01-09-2016, 10:54 AM
حاتم إبراهيم حاتم إبراهيم
تاريخ التسجيل: 08-11-2014
مجموع المشاركات: 3382
Quote: موضوع هام جدا قبل شهر بس كنت بتكلم مع الكهربجي وهو زول من رانكلات الخليج خبرتو عالية في الخليج ورجع السودان وسالتو نظام التاريض كيف ضحك فيني وقالي هنا ما بنشتغلو قت لي ياخ انا دايرو وبشتري ليك كل السايكو بريكر بتاعتو رفض وبشده قالي هنا ماف نظام زي دا ؟؟
وارد جداً فالعقلية هنا إنو الأجهزة الكهربية المنزلية أهم من سلامة الأفراد
الراجل دا مقاول توصيلات ويبدو لي احساسو ميت وما مر بموقف العود بتاعي، أو مات زميل ليهو قدامو.
قرارك سليم وضروري تشوف غيرو باسرع فرصة، من الأفضل تستشير مهندس كهرباء مش مهندس توصيلات (فني)، الجهاز المطلوب في حالتك إذا عايز تحمي أهل البيت كأولوية اسمو (MCB modular shorth circuit breaker).
إحرص على تجربته، كلها بتجي بميزة التجربة، فيها زر أو فتحة ممكن تدخل فيها مفك أو تختبرها. هذا الاختبار لازم يكون شهري، فانت ما حتكتشف إنو معطل إلا بعد ما يحصل الحادث لا قدر الله.
المهم ممكن لو سمحت تورينا لو عايز اعمل حماية كاملة لي سكان البيت ولي الاجهزة الكهربائية اشتري شنو تحديدا واركبو وين؟ ولو محتاج لي فني منو الفني الممكن يقدر يعمل الشغل ده بشكل بروبر (يعني اجيب كهربائي عادي من السوق ولا لازم مهندس كهرباء) وكيف اقدر اختبر لو الجهاز شغال كويس
يعني باختصار ورينا بشكل عملي نعمل شنو تحديدا علما باني ما افهم اي شي في الكهربا
تحياتي
01-10-2016, 03:11 PM
Yousuf Taha Yousuf Taha
تاريخ التسجيل: 05-03-2013
مجموع المشاركات: 1034
عندي جهاز جديد - غالي ومهم جدا - لسا ما اتوصل، ال Output current بتاعتو 20 - 65 A بتنصح نستخدم ليه RCD خاص؟ وكم مللي أمبير؟
آسف للتأخير
بكون بعده طبعاً، علبة التوزيع (Distribution Board) ما فيهو غير الفيوز والمفتاح الرئيسي فكل وحدات الحماية بتجي بعده.
بخصوص الأجهزة انت هنا بتحتاج لوحدة تحمي الجهاز من الجهد العالي سواء كان لفترة طويلة (surge) أو عابر (Spike) زي ما بيحصل أثناء الصواعق مثلاً، و (RCD) القصد منها السلامة للبشر من الصدمات الكهربية مش الأجهزة، فلذلك اللوائح الخاصة بها مرتبطة أكثر بالأجهزة الليها علاقة مباشرة بالأشخاص زي السخانات وحمامات السباحة ومعدات الحمام المختلفة
بالنسبة لجهازك وبافتراض أنو في منطقة جهد الشبكة العام بتاعها 220 فولت (اسمي)
خليني أوضح حقيقة مهمة، اختيار جهاز الحماية (MCB "mini Circuit Breaker") مش ببساطة مطابقة التيار الاسمي في الجهاز الحنشغلو مع المكتوب على جهاز الحماية، فهي عادة بتفصل الكهرباء عن الجهاز لما يسحب تيار أعلى بكتير من التيار الاسمي، مثلاً إذا جهازك 65 أمبير عادة جهاز الحماية بيفصل الكهرباء على الأقل إذا سحب الجاز كهرباء أعلى من القيمة دي تلاتة مرات أي 195 أمبير، دا مبدأ عملها، لأنو في أجهزة ومعدات بتسحب تيار عالي جداً أكثر من عشرة أضعاف عند بداية تشغيلها (الموتورات ولمبات النيون) وفي أجهزة أخرى بتسحب تيار عالي عند إيقافها، فإذا اخترت جهاز الحماية بنفس التيار الاسمي للمبة نيون مثلاً فما حتقدر تولعها أبداً، لأنو في لحظة تشغيل المفتاح جهاز الحماية حيفصل ليك الكهرباء، أو بيسموها (tripping)
طيب، حتختار جهاز الحماية حسب نوع الجهاز بتاعك، مع إني ما فهمت يعني شنو (output current) فهل دا جهاز بيزود بالطاقة (منظم مثلاً) ولا جهاز بيستهلك الكهرباء (جهاز طبي مثلاً) والمدى 20-65 دا المبين على الديباجة بتاعتو؟
على العموم، إذا كان جهاز بيزود بالطاقة فغالباً نوع الحمل بتاعو (inductive) يعني فيهو ملفات وبالبلدي غالباً بيكون تقيل، هنا الرقم التاني بتاعك (56) دا التيار الأعلى لحظة التشغيل وبعدها بيستقر على (20) ما لم توصل منه أجهزة تسحب التيار منه.
أجهزة الحماية المنظلية بتجي بأنواع ثلاثة على حسب منحنيات فصل الكهرباء (trip curves) النوع (B): يفصل الكهرباء في حالة سحب الجهاز لتيار أعلى بتلاتة إلى خمسة مرات من التيار الاسمي النوع (C): يفصل الكهرباء في حالة سحب الجهاز لتيار أعلى بخمسة إلى عشرة مرات من التيار الاسمي النوع (D): يفصل الكهرباء في حالة سحب الجهاز لتيار أعلى بعشرة إلى عشرين مرة من التيار الاسمي
أما كيف تعرف النوع فهو مكتوب على جهاز الحماية من برة مثلاً (C16) معناها جهاز الحماية يعمل في المدى (C) بتيار اسمي 16 أمبير، حسب الصورة أدناه
في حالة الجهاز بتاعك شوف انت حسب المواصفات المبينة عليهو هل بيسحب تيار أعلى من المدى المبين ولا لا، عشان تعرف تختار لأنو مش كفاية توصيف الجهاز بأنو (غالي ومهم) بل الأهم الخصائص بتاعتو في استهلاك الكهرباء وكمان الاستخدام، ممكن أقول ليك اختار جهز حماية في المدى (B) لأنو أكثر حساسية وبيفصل في أي زيادة للتيار عن تلاتة أضعاف التيار الاسمي (amperage rating) بس إذا كان الجهاز من النوع البيتأثر بالفصل الفجائي للكهرباء دا حيدمره في فترة قصيرة من الاستخدام، مثلاً جهاز البروجكتر دا بيحتاج لفترة خمسة دقائق على الأقل لغاية ما يبرد حتى يفصل الكهرباء تلقائياً لأنو تعريض العدسة بتاعتو لفرق مفاجيء في درجات الحرارة (بقطع الكهرباء مثلاً) بيضعفها مع الزمن وفي النهاية حتتشقق وتنكسر براها. أما إذا كان جهاز طبي داعم للحياة (life support system) فمن الخطأ اختيار المدى (B) بالتأكيد لأنو حياة الشخص أهم من سلامة الجهاز، فغالباً حتسمح بتجاوز التيار للحدود الاسمية على أمل إن يكون في جهاز تاني (backup) تسعف بيهو المريض قبل ما الجهاز الأول يخرج من الخدمة. _____ في إمكانك تجيب صورة للوحة الخاصة بالمواصفات عشان أديك معلومة تفصيلية.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
أيمن محمود
طلحة عبدالله
Hani Arabi Mohamed
حاتم إبراهيم
وائل حمزه الزبير
الطيب عباس
أحمد الشايقي
فيس بوك
تويتر
انستقرام
يوتيوب
بنتيريست