|
Re: المستنير يترجل عن المنبر (Re: Mohd Ibrahim)
|
يا أحمد عمر، في بوست طقطقتي للمشرف تداخلت الأخت إخلاص المشرف، طبعا الاسم الأخير يدل على إحتمال علاقة قرابة بينهما أها، إخلاص تداخلت مداخلة نوع مسك العصاية من النص داك قلت يا ود يا مستنير، حيدها قمت بخفة شديدة دلعت اسم إخلاص في ردي لها خلال طسعتاشر دقيقة (حافظ إيتال 2016) حسمتني ليك حسم شديد قعدت يومين أفتش في مداخلاتها معي؛ عسى ولعل ألقاها بالغلط في يوم من الأيام خاطبتني باسم دلعي "بكور، بكّة، أبكر في الأخير إعترفت بالهزيمة
| |
|
|
|
|
|
|
Re: المستنير يترجل عن المنبر (Re: محمد البشرى الخضر)
|
كتل الدش بحتاج تكون حريف وسريع في الإعتراف مثلا في بوست المشرف، من دكتور سيف قال ليهو: " لا أتفق معاك" طوالي المفروض يفرمل دكتور سيف معروف بإنحيازو المتعصب التام لليسار المفروض الكيشة دا طوالي يعرف انو قدامو حفرة لو واصل معانا بنسنفكو بنسنفكو
الحاجة التانية في الحرفنة: ما ترحم أصدقائك لو وقعوا شوف عليك الله، البقت في كمال عباس بهناك لافي صينية ليهو عشرة أيام لحدي ما حننني!
| |
|
|
|
|
|
|
Re: المستنير يترجل عن المنبر (Re: أبوبكر عباس)
|
Quote: لو واصل معانا بنسنفكو بنسنفكو |
يا مستنير قلنا حريف ضمنة وكتلت الدش واي شي لكن كمان ما تسوقنا ساي وتدّعي حرفنة الوست العشرة التابعناها و الأيادي الحسبناها انت الأخدتها وفي قبولك كمان رغم الخرخرة ومحاولات الدك - تقرا الترجل و صرف النظر
| |
|
|
|
|
|
|
Re: المستنير يترجل عن المنبر (Re: أبوبكر عباس)
|
أمّال انت قايل السيك جاي من وين؟ من يطرح نفسه مستنير و ذو مهمة مقدسة لرفع مستوى الحوار و الاستنارة في البورد - كما البروف الله يطراه بالخير- لا يكون مبلغ همه و اعظم علمه: رفعت ليك كثافته, ضغطته ليك لامن آمن, ورّمتو ليك و سائر أدوات الناس العاديين في سودانيز خلّيت شنو لأبو حسين طيب :) في مقياس الاضافة المفيدة للحوار و القيمة و المحتوى و المعلومة الجديدة من واحد لعشرة حيث واحد أقل ما يمكن وعشرة الحد الأقصى اذا ابو حسين في منطقة الواحد و الاتنين انت بالكتير تلعب في زون تلاتة تلاتة ونص,أربعة دي ما بتحصّلها :)
| |
|
|
|
|
|
|
Re: المستنير يترجل عن المنبر (Re: محمد البشرى الخضر)
|
الله يسألني يا ود البشرى، الكلمات دي بقولن عشان أخفف بيهن الجرعة العالية من الوضوح والكلام المباشر والإستنارة؟ بخاف زول يقع كك رقبتو تنكسر. المشرف دا بياع دواء في الدكاكين وبعرف كويس أثر الأوفر دوز دا
| |
|
|
|
|
|
|
Re: المستنير يترجل عن المنبر (Re: أبوبكر عباس)
|
Quote: بعدين شنو يا مستنير انت قايل نفسك بشاشا كسح؟؟ |
شن قاب لقاب يا محمد؟! أربعة وتمانين في المية من الناس البتجي تتصفح المنبر دا، بجوا مخصوص عشاني أنا
عليك الله، جيب عباراتي بتاعت بوست الشتيمة، يمكن مص يعملن توقيع
| |
|
|
|
|
|
|
Re: المستنير يترجل عن المنبر (Re: أبوبكر عباس)
|
سلام عليكم ابو حتحوت ياخ ايحب احدكم ان يأكل لحم اخيه ميتا؟ ياخي ابو حسين هسي سالك ؟ الكلام دا ما صاح منك بعدين الزول غايب وما قاعد يجي المنبر الا مرة او مرتين في السنة اعتذر للراجل ياخ😉😉
| |
|
|
|
|
|
|
Re: المستنير يترجل عن المنبر (Re: محمد البشرى الخضر)
|
النهار دا حصلت لي حاجة عجيبة. جاتني غفوة، أحلم ليكم نائم لي تحت شجرة في بيتش في فلوريدا اسمو: White sand beach كدي اكتبوا اسم البيتش دا واطلبوا من قوقل صور في عين النائم يجي يقيف جمبي رجل املح لابس ابيض ومتلفح بتوب ابيض وراكب ليهو فرس ناصع البياض، في جبهتو غرّة عنابية، كورك لي: بكّة... بكّة قمت من النوم من غير خلعة، جلست في الرملة البيضا وعاينت ليهو وقلت ليهو: حبابك سيدي جدع لي ثمرة جوز الهند، لما صبيتها انقسمت نصفين، رائحة السائل الناصع اسكرتني قال لي مواصلا: البتسوي فوقو دا خليهو، الناس خاتات لحوبة تذكرت كلام اسماعيل الولي لاسماعيل الزعيم صحيت من النوم لقيت عندي رغبة اعتذار لكل الناس الانشبكت معاهم وما زلت منشبك معاهم ندمت انو في النوم ما كملت شراب جوز الهند دورت عربيتي وذهبت لسوق بر دبي جنب الخور طلبت من بتاع الكافتريا سندوتش فلافل وثمرة جوز الهند بمصاصة تمعنت في جمال الخور وتعجبت من جني البخليني اترك متعة الفرجة في الدنيا والانشباك مع اشباح!! قررت أن لا أفتح المنبر مرّة اخرى وان انتحر بكبكي سلام لكل العنقالة الهنا
| |
|
|
|
|
|
|
Re: المستنير يترجل عن المنبر (Re: أبوبكر عباس)
|
معقول يا مستنير ياخ تبيع الرسالة و المهمة المقدّسة بعصير جوزهند وفلافل !! يعني اسّي ننوّر كيف تاني احنا
_________
على الأقل تمو لينا فلم البورداب المشاهير الاستقبلتهم , الأسامي الانت جبتها ما فيها ع أو ص
| |
|
|
|
|
|
|
Re: المستنير يترجل عن المنبر (Re: محمد البشرى الخضر)
|
المهم لكل أجل كتاب. قبل الترجل النهائي وفِي مداخلتي الأخيرة هذه، وبعد تلاتة سنوات من الاستنارة الحقيقية هنا، داير اعتذر لكل الذين أنرت لهم طريقهم بجلافة، بعتذر عن الجلافة وأحتسب الاستنارة الموضوع أبدا ما شخصي حتى بالإمارة مرات كتيرة بحاول اتذكر وأقول: الزول الجاك وعفصك بكديسة الكدارة دا، يا مستنير، يا الله، انشبكت معاهو وين؟ وين؟ مرات اتذكر لو المدة قريبة المهم، العفو والعافية وأسئلتي المعلقة عافيها ليكم والحمد لله ما في راجل ولّ مرة طالبني سؤال ما جاوبت عليهو
سعدت بانارنكم
| |
|
|
|
|
|
|
|