فطومة يا بت المطر اشتقت ليك حسيت معانٍي الوحشة في درب السفر ملّيت عبارات الحنين انا داير أجيك واسكب زكايب الشوق غنا ما بين بوادر وبين حضر صحرا ووهاد وضفاف تعاني الانحسار من ده النهر انا وانت وجهين للوجود منك معاني الانتما مني قول عاشقاً عنيد لا برضى فيك لا بخشى في ريدك خطر عينيك يا فطومة زي قمرين حنان روعة ضفائرها جارية نيلين في امان يازولة كم منك بشيل هاذا الصباح نور الصباح وانا من صباحك بانبهر والبس جمال حسنك وشاح ولسة ما قلت الكلام الفيك يا عشق العمر انا احتبستك انت في جوايا دهشة مؤجلة لي حين اصادف نور عيونك تملاني بي كل الجمال واكتب كلاما عمرو ما اصلا خطر تبدا الترانيم ( في حضرة من اهوى ) ايقاع دلاليك تغري للدخري البطان ايقاع دميرة النيل متموسق مع حاني الوتر حالي الكلام من بين بسيماتك يسوق فيني ويستف في المشاعر اقول درر وابقاك احساسا قصيد والقاك في ليل المنافي احساس خرافي باقة زي منارات المرافي وانا زي سفين في لجة ضايع، وغير عيونك كيف اكون الدروب لو ما بتودي الي عيونك تبقى امعان في الضياع ياروعة الشوق التياع وحسيس حنين جوة العروق ساد واختمر ما بيني بينك قصة الزول والنخيل وحلاةة الهمس الندي والدنيا ليل مرات سمر مرات عتاب زولاا بريد ومرات غنا والرملة تعكس فضة النور القمر ساقية بتشيل من النهر جوة القواديس حاجة من طعم الولف ما النيل ولف لي زول عرف طعم البحر بينا نم مجرور من بداية الدارة لا عند بدايات الصباح وقت السحر لون الخواطر فيه لصفة مقلتيك وبسمة تحمل بين مسامتها الصفا اهواك عشق مجدول وفا اهواك ارض نشفانة بتشابي بي كل الشبق لي هاتن السحب الركام وانا فيك متوجوج غرام بيناتنا عهد الريدة مهما اتباعدت بينا الدروب او جار زمان بالفرقة بيننا ميثاقنا الا نفترق او في لحظة يهزمنا الضجر فطومة يا شتلة محنة قرييفة جابت لي صداع عايز اجيك اتكرفك خرم السنين اتشقك ريحة التراب مخلوطة بي عرق الترابلة وممزوجة بي احلام بنياتنا الصغار بي مدرسة معروشة ، ما مكشوفة للحر والشمش و كنبات خشب ما قعدة في طوبة وحجر احلامنا يا فطومة ما حاجاتاً كتار حاجات بسيطة تشبه عيون الطفالنا لمن يضحكو والفرحة بي لعبة بتسر حاجاتنا يا فطومة اننا عايزين نعيش زي البشر وبس
(عدل بواسطة د.محمد حسن on 10-25-2015, 10:46 AM) (عدل بواسطة د.محمد حسن on 10-25-2015, 10:49 AM)
10-25-2015, 10:53 AM
ابو جهينة ابو جهينة
تاريخ التسجيل: 05-20-2003
مجموع المشاركات: 22492
الشفيف الرهيف د . محمد حسن ( وانا فيك متوجوج غرام بيناتنا عهد الريدة ) دام واستدام ... التحية ليك ولي فطومة وان شاء الله تتحقق كل احلامنا واحلامكم ونعيش في راحة وهناء ...
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
د.محمد حسن
ابو جهينة
ياسر السر
فيس بوك
تويتر
انستقرام
يوتيوب
بنتيريست