مابين النضال والنفاق السياسي !#

Quote: انفعل ود الطاهر قائلاً: أنت يا أستاذ أظنك فاكرني بهيمة؟.. حقيقة أنا بحترمك زي ما بحترم أي متعلم يحاول يعّلم أهلو ويفتح مخهم على الدنيا.. لكن مشكلتك ومشكلة أغلب المتعلمين انهم بفتكرو انو المعرفة وفهم الدنيا عندهم هم وبس، وانو أصلاح البلد في أيديهم هم وبس وحا يتم بمعرفتهم هم وبس.. يا أستاذ الله يرضى عليك وعلى اخوانك فتحو أمخاخكم معانا شوية.. بالله شوف البعملو فيهو ناس الشفيع وسلام وسط العمال.. عليك الله عاين للحصل في عطبرة.. الشغل العملتو هيئة شئون العمال دا ما درس لكل الناس.. ناس سليمان موسى والطيب حسن ومحمد عثمان المدير ديل اتخرجو من مدرسة الصنايع في جبيت.. فيهم الحداد والسباك والبراد والكهربجي لكن فهمهم لقضية البلد ما أقل لو ما اكتر من ناس الكلية.. وأهم من دا أنو الرجال ديل بمثلوا مش عمال السكة الحديد وبس، ديل زي ما عارف يا أستاذ بمثلوا مدينة كبيرة وهامة ذي عطبرة وديل عملوا الشي الصعب الأنا بفتكر انو ناس الكلية لحدى الآن ما مشو فيهو كتير اللى هو توعية الناس بقضية البلد وتوعية الناس بحقوقهم.. صحى ناس الكلية شغالين وسط الخريجين.. لكن عليك الله يا أستاذ كم عدد الخريجين في البلد وأعمل مقارنة بينهم وبين العمال عشان تعرف الفرق وتقدر شغل جماعة سليمان موسى في عطبرة.. من ناحية تانية يا أستاذ أتذكر معاى أنو ناس الكلية كل زعلهم من الأنجليز انو المرتبات نقصت بعد الحرب يعنى زى ما بقولو ترنشوها.. وانو الخواجات فاتحين خط تلفون مع الطائفية والنظار والعمد والشراتى وما مع ناس الكلية..