08:48 AM Sep, 05 2015 سودانيز اون لاين محمد علي عثمان-USA مكتبتى فى سودانيزاونلاين
Today at 12:38 AM الشعارات.. مابتفيد. ! (الونسة ) عن سعر الدولار الليلة زاد .. باكر نقص .. عن الرئيس لو كان رقص .. (الركبة) والوجع القديم .. عن الوزير عن الضفادع والمزارع عن تيقا او س للغلال .. الونسة عن سوق الخضار الزيت غلا .. المطرة جات الجو حلا .. الوالي فات الوالي جا .. سقط البرير والفاز عليهو الكاردينال .. عن ما مازدا .. عن المنتخب سيكافا عن كورة الهلال .. كل السخافات ما بتفيد ..!! الوجعة أكبر من (تقال) .. كل الولاءات ما بتفيد انا عندي يا عالم سؤال ؟ بالله ليه استعجلو وبي سرعة مرقو الاحتلال ؟ هسع اكان نفعو البلد من زيفة من زيفة المصالح والحزب . . من الشعارات المقتقتة بالكذب .. خمسين سنة ما شفنا غير الانحلال .. حكم العساكر ما بفيد غير الحروب الخايبة ما لقينالنا فال ... الواطة تصبح بي حرب والواطة تمسي على نزال .. الضرايب والنفايات والزكاة دمغة جريح ما فتنا خطوة الي الامام .. قبة وضريح حول الامام .. عاش ابو هاشم ومات العاشم في التصليح .. ونحن بنحصد في الاوهام .. ورثو البلد بالفيها باعوها الاراضي وبالتراضي ( اتقاسمونا ) عبيد عبيد .. ورثو الوطن بي حالو وورثونا الانهزام ... الثورة ما صوت احتجاج (على زيت غلا) الثورة ذي ألم الفطام .. يا نجوع ونعطش كلنا يا نثور ونمرق كلنا يا خلو لينا (المؤتمر) ونقول على الدنيا السلام .. ماف زول ينق ينضم يقول : (أسقاط نظام ) أسقاط نظام داير فعل أسقاط نظام ما بالكلام نرسم خطوط الثورة بالخط والمقاس (نحن الشباب) خلونا نقلع كل عباءات الحزب وال نتحد ضد النظام .. سوداني حر .. ضد النظام ندخل زنازين النظام (مليون نفر) هل تفتكر السجن ح يشيل البشر ؟؟ مليون نفر مين يقدرم ؟ من يقهرم ؟ من يجهرم ؟ غير ضو الحقيقة ومظهرم ندي الوطن (حق الولاء) والاحترام .. فلنتحد او نلتحد نحجز قبرنا ونجتهد بعد الف عام .. نقدر نزيل من البلد باقي الحطام ... بس مافي زول يجيب سيرة الوطن او ثورة او حرية او أسقاط نظام .. خليكم مع (الونسة ) ومشاط المجتمع .. وباكر نتم باقي الكلام .. مــا كــل واحــد (خت) صورة وقال نضـــــال ..!! مــا كـــل واحــد نادى سبتمبر تــــعال .. الصورة ما بتنزل تجيب حق الشهيد ...!! كل الشوارع (فــاضـيه) منتظرة الرجـــــــال ..!! .. . قصيدة/ في ذكرى سبتمبر: (الوجعة اكبر .. من تقال) للشاعر الاستاذ / يوسف عوض الكريم (الدوش) /font>
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
محمد علي عثمان
فيس بوك
تويتر
انستقرام
يوتيوب
بنتيريست