مع الاعتذار مقدما للأخ الحبيب ابو الحسين و Nothing personal _______________________________________________ عني فقد درست الروضة في أكثر من مكان نظرا لظروف الايجار و اصحاب المنازل الجشعين اولا ببحري المزاد و قد ظهرنا بالتلفزيون مع بابا فزاري و قدمنا نشيد شهر مايو يا أحلى شهر"كان أحلى شهر ما عارف". ثم بعدها بامتداد ناصر و قد كانت روضة على مستوى جيد و كان لدينا ترحيل من باب البيت لباب الروضة و العكس. ثم اخيرا بالكلاكلة القبة حيث استقر بنا المقام حتى الآن. العجيبة أن مدرساتنا في روضة الكلاكلة حين اقابلهن الآن لا أحس أنهن أكبر مني سنا و لسبب ما توقف بهن الزمان و مضي بي حتى شاب الرأس مني. السؤال هل تؤهلني هذه الــCV لوظيفة في القصر الجمهوري؟
11-30-2011, 10:58 PM
حسين نوباتيا حسين نوباتيا
تاريخ التسجيل: 06-06-2008
مجموع المشاركات: 2473
سلام يا دكتور سيف و طلعت سادن كمان... قلت لي شهر مايو يا أحلى شهر؟ لكن ياخي الروضة براها ما كفاية بعد الروضة لازم تكون درست في سان فرانسيس و أهم حاجة دي:
Quote: يحب العلاقات الإجتماعية ومخالطة الناس دون تعال أو إستكبار.
يعني تكون مخلوق من طينة تانية و الطبيعي إنك تستعلى على الناس و تستكبر لكن لو ما بتعمل كدا يجيبوها ليك في سيرتك الذاتية. قلت لي يا حسين عملتها كلها غنم و قراية و ناس سيدي الواحد يصحى من نومه يلقى كومه. الله كريم علينا.
11-30-2011, 11:25 PM
AMNA MUKHTAR AMNA MUKHTAR
تاريخ التسجيل: 07-31-2005
مجموع المشاركات: 13702
سلام دكتور سيف .. وأحييك على البوست الهادف الذي سيخرج المواهب الدفينة لأعضاء البورد أعجبتني سيرتك الذاتية في الروضة خاصة دراستك في ثلاث رياض مختلفة وهذا لعمري يؤكد انك راجل ما ساهل . بالنسبة لي دخلت الروضة باكراً قبل السن القانونية بأشهر قليلة بعد محاولات عديدة قام بها الوالد مع ادارة الروضة نسبة لرغبتي الشديدة في دخول الروضة والتي سمعت عنها فقط . نجحت المحاولة وفي اليوم الأول تم الإتصال بوالدي بعد اعتدائي على احد الزملاء وقذف احدى المعلمات بقنينة بيبسي وتم طردي من الروضة فوراً . بعد بلوغي السن القانونية ذهب بي والدي الى الروضة وتم رفضي بعد التعرف علي فإضطر الوالد الى اخذي الى روضة اخرى في نفس الحي في مدينة الدوحة (العزيزية) لكنها بعيدة نسبياً عن المنزل . حافظت لأسابيع معدودة على كبت السلوك العدواني الذي كان يلازمني في طفولتي بعد تهديدات مرعبة من والدي العزيز .. المهم اكملت الروضة بخيرها وشرها ولكنها لم تعجبني كنت اتهرب من الذهاب الى الروضة بإدعاء المرض او الفرار ..!
_______ سأقوم بالتعديل في سيرتي الذاتية بعد ظهور اهمية الروضة في الـc.v
11-30-2011, 11:33 PM
محمد حيدر المشرف محمد حيدر المشرف
تاريخ التسجيل: 06-20-2007
مجموع المشاركات: 20359
روضتى كانت اقوى روضة فى الخرطوم .. وأجمل روضه فى العالم أحرزنا المرتبه الأولى بنسبة نجاح 100% والحمدلله كلنا دخلنا الابتدائي .. من هنا فإنى أقول .. وبدون ان يتطرق لى الشك للحظة واحده غنو روضة "ماما راقيه" بالثوره ح 8 كانت أقوى من " رياض الحنان " بما لا يقارن .. بس المشكله انو الدنيا دى ما فير يا سيف يا قريبي
11-30-2011, 11:44 PM
محمد حيدر المشرف محمد حيدر المشرف
تاريخ التسجيل: 06-20-2007
مجموع المشاركات: 20359
انا كنت فى روضة ماما امال حميدة ببرى كوريا و بعدها روضة ماما فاطمة العوض بالقرير الروضتين ديل اقوى من رياض الحنان بتاعت مساعد الرئيس و بما اننى غير متعالى و غير متكبر يعنى ممكن اكون مساعد للرئيس او مستشار
12-01-2011, 05:36 AM
عرفة محمد سعيد عرفة محمد سعيد
تاريخ التسجيل: 11-08-2009
مجموع المشاركات: 443
يلا بعد داك درست روضة ام الطيور( سيتى) بعدين الاعدادى فى ام الطيور ( هاى) وتانى الراهبات ..(حالة) خاصة.شان بابا وكده ثم بعد داك ..يلا..بابا مشى (.لن دن) قومنا قرينا (فى جامعة بريطانية فى (لن دن) ثم معهد عالى كده اسمو(كيف تكون انسان) والحمد لله ده (انسليت ) منو بعرف حاجات حلوة خااالص .. يعنى اتعلمت كيف اجيد اللغة العربية (حاجة هاااى جدا) وتانى اتعلمت فيهو فن الخطابة ..والكتابة( مبالغة) وبرضو كيف اشيل الفاتحة فى بيوت البكاء.... والجيران فى (الفلل) الجنب فيلاتنا ...دائماااا بقولوا لى تعال شان تقرا لينا الرسائل ..لانى بعرف بقعد الحروف سمح.. والاهم من كده ..
والله ما احب اتكلم عنى نفسى كتير لكن انتو مصرين
المحيرنى وقاطع قلبى ..ما عارف شنو ال########ى هنا معاكم شنو...غايتو الزول يقول قسمة وفقط...يعنى نصيب
أها يا (فِرَد)* أنا ما متذكر الروضة بتاعتي ولا داير قصة مساعد رئيس دي انا يا دوبك منافس لعضوية اللجنة الشعبية ومنافسي هو جمال جاكوبس وهو ما متعالي برضه لكن انا نفسي شربت قهوة في السوق زي تلاتة مرات واتونست مع المواطنين عااااادي اها ادعموني ينوبكم ثواب وينوب اهلكم في بري السُكر والزيت والبصل وإحتمالات (العيش) واردة ... بس ما ضمان 100%
ـــــــــــ (فِرَد)* دي محاولة لإثبات إني (شعبي) وغير متعالي
12-01-2011, 06:59 AM
محمد أبوالعزائم أبوالريش محمد أبوالعزائم أبوالريش
تاريخ التسجيل: 08-30-2006
مجموع المشاركات: 14617
غايتو البوست ده، في ناس بتحاحي بعيد منو، لأنهم ما بيعرفوا الرياض وناس خلاوي ساكت.
هسي في داعي؟
محمد المشرف يكلمنا عن روضة ماما راقية، وناس يجوا يقولوا (خلوة الفكي المبارك)؟ ..... وبعد ما (يطلقوهم البيوت) تلقى الواحد حايم بي سروالو من دافوري لي (سكج مكّج).
الله في
12-01-2011, 07:27 AM
ود الخليفه ود الخليفه
تاريخ التسجيل: 07-21-2002
مجموع المشاركات: 3178
Quote: الأخ ود الخليفة تحية طيبة اولا انا درست الروضة في الكنيسة (لووووووووول) اها انت درست الروضة وين , يبدو انو الروضة حتما هي مؤثرة في تكوين مستقبل الفرد والدليل عندك اهو مستشار الرئيس الجديد لشئون شنو كده ما عارف درس الروضة في دار الحنان (الخرطوم 2) واهو حنّو عليهو وعيّنوهو مساعد ياي ,,,, عن نفسي انا خايف يعيّنوني مساعد قسيس. والله انا ما فاهم البحصل شنو شابكننا معارضة وشابكننا لن نشارك وكمية من النقة تقول ديل حيشاركو الشيطان وفي النهاية شفت الانبهالة والانبراشة كيف. كان الله في عون الشعب السوداني مع خالص الود من مساعد .......
Quote: وداعا روضتي الغنا وداعا معبدي القدسي
او كما قال
عندما كنا في الروضه كنا نسال (لمن تكبر داير تبقى شنو؟)
فاخترنا كل المهن ولم يدر بخلدنا اختيار منصب مستشار رئاسي فقد كنا رعاعا
12-01-2011, 07:53 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
Quote: انا روضتي كانت رعي الخراف والاغنام في عثمان نارتي ببدين ..
مشتاقين و الله يا نوباتيا رعي الخراف و الاغنام عملك مدير بنك في امريكا "ظاااتها" لكن مساعد رئيس في السودان ماعندك طريقة للآسف. عموما خلي تلفوناتك احتمال نشوف ليك منصب مساعد معتمد محلية بدين
12-01-2011, 08:08 AM
سيف النصر محي الدين سيف النصر محي الدين
تاريخ التسجيل: 04-12-2011
مجموع المشاركات: 8995
Quote: و طلعت سادن كمان... قلت لي شهر مايو يا أحلى شهر؟ لكن ياخي الروضة براها ما كفاية بعد الروضة لازم تكون درست في سان فرانسيس
العوض سلامات صعبتها خالص بسان فرنسيس دي رغم أنها ما مهمة كما يبدو و إلا كان الجماعة ضمنوها السيرة الذاتية. تخيل يوم "شهر مايو أحلى شهر دي" مشينا الروضة متأخرين و لقينا الجماعة فاتونا قاموا ناس البيت لحقونا ليهم بتكسي. سدانة ليها ضل قال ليك.
12-01-2011, 08:02 AM
ايمان بدر الدين ايمان بدر الدين
تاريخ التسجيل: 10-05-2009
مجموع المشاركات: 1720
Quote: دى سيرة ذاتية كااااربة ، أزكيك رئيس جمهورية ظاااتو
سلامات يا أمونة المشكلة رئيس الجمهورية ما اعلن عن دراساتو "الروضوية" مركز على المؤهلات العسكرية بس و ده شعرا ما عندنا ليهو رقبة. انت بورتسودان دي ما كان فيها روضات و للا شنو؟
12-01-2011, 08:17 AM
سفيان بشير نابرى سفيان بشير نابرى
تاريخ التسجيل: 09-01-2004
مجموع المشاركات: 9574
Quote: نجحت المحاولة وفي اليوم الأول تم الإتصال بوالدي بعد اعتدائي على احد الزملاء وقذف احدى المعلمات بقنينة بيبسي وتم طردي من الروضة فوراً .
سلامات يا محمد عبدالله تاريخك في الروضة تاريخ حافل، لكنه لا يصلح لوظيفة مساعد رئيس كل المطلوب منو يقعد ساكت و مؤدب أو على اسوأ الفروض يبتسم و يصافح الضيوف. لكن قنينة البيبسي الفي الروضة دي بتحرج ناس كتار هنا، ياخ تصدق انو في ناس كانوا بشيلوا فطورهم في كورية
12-01-2011, 08:28 AM
سيف النصر محي الدين سيف النصر محي الدين
تاريخ التسجيل: 04-12-2011
مجموع المشاركات: 8995
Quote: انا كنت فى روضة ماما امال حميدة ببرى كوريا و بعدها روضة ماما فاطمة العوض بالقرير الروضتين ديل اقوى من رياض الحنان بتاعت مساعد الرئيس
سلامات يا عادل مشكلتك أنك عكست الأمور و حركتك كانت في عكس حركة التاريخ السوداني أي من المركز للاطراف و ده ممكن يعطل حصولك على منصب المساعد، لكن ممكن يشغلك في وزارة الطاقة
12-01-2011, 08:54 AM
موسي الراجل موسي الراجل
تاريخ التسجيل: 04-30-2010
مجموع المشاركات: 382
انا دخلت روضة وفشلت فيها ودخلت خلوة وبرضو ما نجحت والسبب ابوي كان مدلعني ........ والله صحي
روضة الحلة كانت تدرس فيها الاستاذة سميرة خضر حماد حياها الله وحفطها ... والروضة كان في حوش النادي حق الحلة الواقع في طريق الزراعة حقت اهلنا ... انا مشيت يومين دوب ما خشيت الروضة اشوف ابوي نازل اجدع الكراس واحصله في الزراعة في الاخر خليت الروضة ودوني خلوة عمنا عبدالله ود الفقير حياه الله وحفظه ...اداني الشهور القبطية (برمودا وكيهكي وماعارف شنو كده ... قلت لي ابوي قلت له الزول ادانا كلام (اطرق اطرق) وما فهمته ...قال لي شيل منجلك واندلاك
الغريبة مما خشيت المدرسة مااسك الاول لمن خلصت الابتدائي والمتوسط ما حصل جبت تاني الفصل زاته .....
اها ما بنفع مساعد رئيس
12-01-2011, 08:44 AM
سيف النصر محي الدين سيف النصر محي الدين
تاريخ التسجيل: 04-12-2011
مجموع المشاركات: 8995
مادام التعيين بقي حسب الروضة فالموضوع يا دكتور سيف ما بقسم معاي اخوك زول حلوة وبس !! بس ليك علي ما اخلي طفل من اطفالي الا ادخله الروضة واوثق ذلك بالصور ..
12-01-2011, 09:10 AM
عبد الدائم سيد أحمد عبد الدائم سيد أحمد
تاريخ التسجيل: 10-28-2006
مجموع المشاركات: 4220
اضيفى للعناوين يا عرفة فيضان بحر ابيض يكسر سور روضة بالكلاكلة القبة ( توجد صور ) كم صوورة كده من اللفة لاطفال يأكلو شطة و عجور .
يا سيف لو كنتو استقريتو فى المزاد ولا برى الوصول للقصر الجمهورى كان حيكون اسرع ... هسه انتا لو عايز تمشى المطار من الكلاكلة لازمك 5 ساعات قبل الاقلاع ..
12-01-2011, 09:28 AM
بله محمد الفاضل بله محمد الفاضل
تاريخ التسجيل: 11-27-2007
مجموع المشاركات: 8617
Quote: سلامات يا عادل مشكلتك أنك عكست الأمور و حركتك كانت في عكس حركة التاريخ السوداني أي من المركز للاطراف و ده ممكن يعطل حصولك على منصب المساعد، لكن ممكن يشغلك في وزارة الطاقة
لوووووووب
عكس الامور ما بتعرفو كان كدا يا دكتور!
انا قريت خلوة الشيخ عبد القادر دينق في القيقر ثم ابتدائيتها، و فابتدائية نمرة 9 في كوستي .. ثم خلوة جامع الختمية في الحلة الجديدة كوستي
اها بتدونا مساعد ياي و لّ المهمشين الا يشيلوا سلاح حتن يتعينوا مساعدين للرئيس!؟
-------
برضو تقولوا لي مافي مؤسسة جلابة!؟
جعفوري دا قدر اللمين اخوي السغير.. و دا قرأ (كمبوني) عديييل! اها كان ما اتعين يبقى الشغلة فوقا ملعوبية تب!
12-01-2011, 11:31 AM
نجاة محمد بابكر نجاة محمد بابكر
تاريخ التسجيل: 09-10-2009
مجموع المشاركات: 571
ألأخ/سيف...........لك التحية ..كان كده أنا مؤهل تأهيل شديد خلاص.
أولآ قريت خلوة قبل الروضة فى خلوة أبوى الشيخ/محمد زين إبراهيم التى تأسست عام 1948 غرب ميدان الربيع بالعباسة..وعشان الخلوة حقتنا كان ما بدقونا لآن خلوة خالى والخال والد.
عندما رحلنا لأمبدة قبل دخول ألأبتدائى دخلت روضة ست زينب بأمبدة جنوب السبيل..مازالت ست زينب على قيد الحياة الله يمتعها بالصحة والعافية..
كل ما أمر بالقرب من الروضة أعتز وأفتخر أمام بناتى وأولادى بأن هذا المكان كان له دور فى نشأتى وتشكيل شخصيتى..
شكرآ لآتاحة الفرصة لى للتعبير عن زمن بعيد كم أهوى الحديث عنه....وأتمنى أن تتاح لى الفرصة أيضآ لآكتب عن ألأستاذة المذيعة القديرة/سعاد أبوعاقلة وذكريات ألأذاعة وركن ألأطفال وعمكم مختار
بنفع أم لا؟؟؟؟ تقديرى وإحترامى للجميع.
12-01-2011, 12:08 PM
AMNA MUKHTAR AMNA MUKHTAR
تاريخ التسجيل: 07-31-2005
مجموع المشاركات: 13702
احمدك يارب انك وانا صغير اعطيتني ماما وبابا البحبوني موت واحمدك الهي انه الكورنفليكس والنيدو زالسيريلاك كان متوفر اربعة وعشرين ساعة في الديب فريجر بتاعنا واشكرك يا ربي انه ماما ما كانت بتسمح لي باللعب مع الاولاد المتوحشيين الاولاد الماعندهم جاكوزي في بيوتهم وبيطلعو الشارع وهم ما فاطرين زيي وزي تامر اخوي وريماز اختي وكمان ماعندهم tv وكانوا بيخالطوا المجتمعات كلها عاليها وسافلها الحمد لله بابا ما كان بيسمح لينا نخالط الناس من طرف وبيقول لينا دايما خالطوا الفي مقامكم يا ابنائي الحلوين الصغننين.. وامممممممح ماما تطرقع لينا في خدودنا الموردات ببوسة حلوة
دي صورة لماما سهى وماما إلطاف وماما نادية وهم ماشيين في طريقهم لروضتنا الحبيبةروضة عصافيرالربيع اللي اتخرجنا فيها انا واخوي تامر واختي ريماز سنة 1987م مع العلم يعني اني من مواليد 1982م وكملت باقي تعليمي بايطاليا واتخصصت فن ديكور وميك اب ...
اما الوحشيين دولك الكانوا بيرعو الغنم والخيل وبيشربو من الترعة فبقول ليهم يا وحشيين يا وحشيين ،،،
والنشيد دا كنا بنقراهو دايما لضيوف بابا وماما وهم بيسالونا درستو شنو يا شاطرين في الروضة
لما كنت صغير بلعب في الموكيت ماما لبستني الجينز والتي شيرت مشيت للأفندي درسني انترنت ناكل إيه ؟ ناكل شيبسي نشرب إيه ؟ نشرب بيبسي نبكي كيف؟ يا ماااااامّي
12-01-2011, 02:10 PM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
أنا مشيت الروضة يوم واحد بس، جيت شارد في نفس اليوم وما رجعت أبدا . . الغريبة لمن الجماعة سألوني ابيت الروضة مالك؟ قلت ليهم :"الفراشة -بتشديد الراء- شينة"!
مساعد محلية بدين بتاع شنو يا سيف ياخ اخوك كان بكون ماسك فوق للخمسين من الخراف والماعز بطلع من الصباح وبرجع مع المغرب ومافي خروق دخلت فيهو شوكة بكونوا ماكلين وشاربين وفرحانين والكورجة دي كلها ما في حمل برضع من غير اذني.. والله حقو يدوني وزارة الدفاع او وزارة التربية والتعليم:)
سفيان والله كلامك سمح بس بعدين تقيف مع اخوك في حروب الردة وكان اخوك لحّقوهو الاستاذ اصولو ما معافي ليك وبريمة والكونت ديل بعينهم خلفاء
قولك بعد السووها الكيزان ديل في زول بخش معاي:)
12-04-2011, 07:57 AM
احمد ضحية احمد ضحية
تاريخ التسجيل: 02-24-2004
مجموع المشاركات: 1877
Quote: لكن انا نفسي شربت قهوة في السوق زي تلاتة مرات واتونست مع المواطنين عااااادي اها ادعموني ينوبكم ثواب
ما شاء الله يا احمد موسى سيرة ترفع لها القبعات و العمم و لكنها للأسف غير كافية و لو دعمناك بنكون خالفنا ضميرنا. كيف ما تتذكر الروضة و هي أهم مراحل الحياة؟
12-04-2011, 12:44 PM
فيصل محمد خليل فيصل محمد خليل
تاريخ التسجيل: 12-15-2005
مجموع المشاركات: 26041
يا سيف نحنا قرينا فى خلوة السيد البدوى ولمن حبوبة لقت الفكى بجلد فينى الفلقة مرقتنى منها لكن بعد حفظت الاجزاء الاولى كلها لغاية "قد سمع" وبعد داك مشيت روضة ست وهيبة فى شارع الاربعين فى العباسية انفع اكون نايبة ريس مركب غرقانة مش؟ تحياتى
12-04-2011, 06:58 PM
طارق جبريل طارق جبريل
تاريخ التسجيل: 10-11-2005
مجموع المشاركات: 22556
Quote: فقد درست الروضة في أكثر من مكان نظرا لظروف الايجار و اصحاب المنازل الجشعين اولا ببحري المزاد و قد ظهرنا بالتلفزيون مع بابا فزاري و قدمنا نشيد شهر مايو يا أحلى شهر"كان أحلى شهر ما عارف". ثم بعدها بامتداد ناصر و قد كانت روضة على مستوى جيد
الاخ دكتور سيف
وجود روضة بابا فزاري وامتداد ناصر في السي في بتديك كريديت تبقا المندوب الدائم في الامم المتحدة
وتدخل مجلس الامن
12-05-2011, 08:05 AM
سيف النصر محي الدين سيف النصر محي الدين
تاريخ التسجيل: 04-12-2011
مجموع المشاركات: 8995
Quote: محمد المشرف يكلمنا عن روضة ماما راقية، وناس يجوا يقولوا (خلوة الفكي المبارك)؟ ..... وبعد ما (يطلقوهم البيوت) تلقى الواحد حايم بي سروالو من دافوري لي (سكج مكّج).
سلامات يا ابو العزائم سكج مكج دي في الخرطوم اصلو ما شفتها و لكن لما كنا نمشي عطبرة في الاجازة كانت اللعبة الاكثر شعبية في شواراعها. فهل انت من عطبرة؟
12-05-2011, 08:18 AM
معاوية الأرباب معاوية الأرباب
تاريخ التسجيل: 07-03-2008
مجموع المشاركات: 1066
الروضة الوحيدة التي كنت أعرفها وأمشي ليها يوميا في طفولتي هي خالتي الروضة بت الضواها ود التنقليل , الله يطاها بالخير فقد كانت تبيع الفول والتسالي والقنقليزوفي الخريف كانت بتقلب عنكوليب وتبش بالشطة والليمون .
يا دكتور سيف يبدو لي أني حأكون مناسب جدا لمنصب مساعد الرئيس لشؤون تأصيل وتحسين سلالات العنكوليب والتبش .
12-05-2011, 08:46 AM
سيف النصر محي الدين سيف النصر محي الدين
تاريخ التسجيل: 04-12-2011
مجموع المشاركات: 8995
بعدتفكيك السؤال وحذف اي استشكال ينم عن استعلاء طبقي...او واقع تجد فيه البرجوازية الصغيرة ضالتها..فان مفهوم الروضة هو استبدال حميد للخلوة وما ادارك ما الخلوة...في منحني النيل في الشمال قريتي وخلوتي وشيخي وحبيبي مولانا (الحسن محمد خير) تغشاه الرحمة وهو في عليين..درسنا الحب واكلنا الحب..تعلقنا بالبيئة والجروف وحملنا المنجل وغرسناه منذ ذلك الزمان في الارض..امنا الرؤوم...وقفنا خلف ابائنا عند الدميرة وفي الاعياد وفي الاحتفاء بموتانا...ودخلنا الدارة خلف كبارنا وهم ياخذون الشبال علي نغم يطوي الليل ويسرجه انوارا...وحشينا القش لمعزاتنا الاليفات وسميناهن باسماء اخواتنا...وكانت كل بنت هي اختنا الكبري او الصغري وكل اب هو ابونا...اصحابنا وقتذاك هم اصدقاء اليوم وكنا بهم ولا نزال كالبنيان المرصوص وفاءا..
رحلتنا في حب الناس لازلت مستمرة...
12-06-2011, 07:00 PM
سيف النصر محي الدين سيف النصر محي الدين
تاريخ التسجيل: 04-12-2011
مجموع المشاركات: 8995
Quote: أنا قريت الروضة في السيالة القديمة. روضة شيخنا عبد الوهاب ود علي.
يا ود المدير علك طيب ياخي الباوقة على ما اذكر كان فيها رياض اطفال، على الأقل عندنا في الجرانيس كان في واحدة و الغريبة انها قريبة من الخلو الفي بيت ناس كرم الله.لكن ود علي ده ما عندنا فيهو كلام.
12-06-2011, 07:13 PM
سيف النصر محي الدين سيف النصر محي الدين
تاريخ التسجيل: 04-12-2011
مجموع المشاركات: 8995
Quote: نطمع فى الا جرين وكان حتلت يكفينا اجر السلام وكان نوباتيا لقيتو له الخلفيه نجيبو له شوك الزريبه
سلامات يا موسى يا راجل يا حليل ايام قطر حلفا ياخ. غايتو الفهمتو من كلامك انك زي اخونا نوباتيا كنت زول سعية ساااكت فبرضك زي اخوك نوباتيا ده بنشوف ليك معتمدية!
12-06-2011, 07:40 PM
حاتم الياس حاتم الياس
تاريخ التسجيل: 08-25-2004
مجموع المشاركات: 1981
سلام يا د.سيف وكثر خيرك عرفتنا على جانب مهم من شخصيات البورد!
اها انا دخلت في روضه طوكر لا اذكر لها اسما لاني اعتقد بانها كانت الوحيده,جميله ومرتبه ومليانه لعب بس فيها بنت بتقرصنا اسمها (كوثر) ومافي زول كان قادر يشتكيها للملعمات الا انا اصغر واحده اشتكيتها ووقفتها عند حدها.ذكرياتي ضعيفه عن الروضه لاني بعتقد باني كنت صغيره شديد....ودخلت المدرسه باكر لاني بنت معلمه اي بديت قبال السنه القانونيه.انفع مساعد حله يا ربي.
12-07-2011, 06:27 AM
الصادق الزين الصادق الزين
تاريخ التسجيل: 09-18-2009
مجموع المشاركات: 2690
الزميل سيف النصر .. تحية طيبة .. والدي رحمة الله عليه كان رجل علم و تعليم .. وبالمناسبة هو الذي وقع عليه الإختيار لتدريس أبناء آل الميرغني في مدرسة الأشراف ببحري ومن تلاميذه السيد محمد عثمان الميرغني و شقيقه الراحل المقيم السيد أحمد الميرغني رئيس السودان الأسبق .. حينما دنت سنوات عمري من الخامسة وكنا نسكن ساعتئذ في الهاشماب أمدرمان في منزلنا الفاتح بابه على شارع الموردة والدايات توقعت أن يتم تسجيلي أنا و شقيقتي أميرة في روضة ست نفيسة الكائنة في الهاشماب قرب المسجد ولكن سجلنا في روضة (فاطمة سلك) في حي العباسية منطقة أم سويقة .. ولم أكن أفهم هذا الأختيار وأنا طفل ذو خمسة أعوام إلا بعد أن دخلت الروضة المعنية ..فلقد كانت روضة فاطمة سلك أشبه بالمدارس ففيها فصلان والدراسة فيها لعامين .. فصل للخامسة أعمارهم و الفصل الآخر التمهيدي للأطفال في السادسة من أعمارهم .. روضة فاطمة سلك رحمها الله كانت أشبه بالمدارس الحكومية فهي تعطي ثلاث حصص في اليوم عربي دين ورياضيات .. كانت المرحومة فاطمة سلك أستاذة قوية الشخصية ذات صوت مسموع وعال تحمل في يدها سوطآ من العنج ولكنها لم تستعمله إطلاقآ .. كنا نرهبها و نحبها كانت تقدم لنا الإفطار المكون من ساندوتشات الفول والجبنة والساردين والبيض بالجبنة والتحلية طحنية مربة و عسل أو فواكه مثل الموز و البرتقال.. كانت الحصص تبدأ في الثامنة صباحآ و تنتهي في الحادية عشر والنصف .. تعلمنا من روضة فاطمة سلك الكثير وعلى مدى عامين وحينما دخلت مدرسة الموردة الأولية كنت أضحك من سهولة المواد من رياضيات و عربي ودين لأنني قد أخذت معظم هذه الموات من ألف البا ياء وحفظ صور جزء عم و الجمع و الطرح والأناشيد في روضة فاطمة سلك .. ومن زملائي و زميلاتي في هذه الروضة أذكر بدالردين موسى وأشقائه و ناجي عباس قدح الدم وعادل عبدالرسول وأشقائه وخالهم الفنان شرحبيل أحمد و الطيب الفاتح الطيب و إلشقيقتان إيمان وإخلاص ختر وإيمان عباس وإصلاح وهدى بخاري .. وطلال التجاني عبدالحليم .. كانت أيام جميلة قضيناها ولعامين في روضة فاطمة سلك ولقد جمعتني الحياة العملية فيما بعد التخرج بإصلاح بخاري زميلة الروضة التي أصبحت زميلتي في بنك الخرطوم أما هدى بخاري فلقد أصبحت محامية وإيمان ختر أصبحت صحفية وعادل عبدالرسول مهندسا وناجي عباس قدح الدم إقتصاديا .. وبدالردين حسن موسى أصبح أنجحنا بعد أن سلك التعليم المهني وتم إبتعاثه لألمانيا بواسطة التدريب المهني في الخراطة وعاد ليفتتح مسبك أمدرمان المركزي. بالمناسبة يا سيف النصر أنا وشقيقتي أميرة كنا أعضاء في كورال بابا فزاري من ضمن برنامج جنة الأطفال التلفزيوني إيام المرحومة رجاء أحمة جمعة ماما رجاء ومن الأناشيد التي قدمناها (صاح الديك فوق الدك كوكو كوكو قال الديك ) ومثلنا فقرات عن البيت تحكي تعامل الأسر مع أطفالهم رحم الله بابا فزاري وماما رجاء و ست فاطمة سلك.
12-07-2011, 08:55 AM
سيف النصر محي الدين سيف النصر محي الدين
تاريخ التسجيل: 04-12-2011
مجموع المشاركات: 8995
Quote: غايتو زي ما قلت في بوست تاني انا قريت في روضة الشهيد أورتشي بس كنا ممنوعين من السياسة ومسموح (تجكس) أبرز إنجازاتي مشيت خطبت بت الكوارتا.
سلامات يا سامي روضتكم دي برضو جمب سلاح الذخيرة زي مركز صحي الشهيد اورتشي؟ ادائك في الروضة يؤهلك لوظيفة المساعد بدون شك، خصوصا اذا وضعنا جزئية الكوارتا دي في الاعتبار.
12-07-2011, 09:00 AM
سيف النصر محي الدين سيف النصر محي الدين
تاريخ التسجيل: 04-12-2011
مجموع المشاركات: 8995
Quote: اخوك زول حلوة وبس !! بس ليك علي ما اخلي طفل من اطفالي الا ادخله الروضة واوثق ذلك بالصور
سلامات يا حاج العوض غايتو فاتت عليك، بس كويس انك مفكر تستثمر في الاولاد. و بالمناسبة ده هو عين ما فعله السيدان ، فما تستغرب بعد ده لو ناديناك السيد العوض LOL
12-07-2011, 09:04 AM
سيف النصر محي الدين سيف النصر محي الدين
تاريخ التسجيل: 04-12-2011
مجموع المشاركات: 8995
Quote: لو كنتو استقريتو فى المزاد ولا برى الوصول للقصر الجمهورى كان حيكون اسرع ... هسه انتا لو عايز تمشى المطار من الكلاكلة لازمك 5 ساعات قبل الاقلاع .
يا عبد الدائم يا نضيف الكلاكلة دي طلعتنا بره التاريخ، لكن مع ده برضو بنحبها.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
سيف النصر محي الدين
حسين نوباتيا
Elawad
AMNA MUKHTAR
محمد عبدالله مختار
محمد حيدر المشرف
Adil Hamza
عرفة محمد سعيد
جمال الباقر
Nagat Sid Ahmed Elshiekh
محمد جلال عبدالله
Ahmed musa
محمد أبوالعزائم أبوالريش
ود الخليفه
معاوية المدير
ايمان بدر الدين
سفيان بشير نابرى
العوض المسلمي
عبد الدائم سيد أحمد
بله محمد الفاضل
انعام حيمورة
عبدالكريم الامين احمد
عبدالله الشقليني
بريمة محمد
قيقراوي
نجاة محمد بابكر
ismeil abbas
حمد فتح الرحمن
HAIDER ALZAIN
عزان سعيد
احمد ضحية
فيصل محمد خليل
سلمى الشيخ سلامة
طارق جبريل
معاوية الأرباب
محمد الكامل عبد الحليم
حاتم الياس
Walid Safwat
Tragie Mustafa
الصادق الزين
فيس بوك
تويتر
انستقرام
يوتيوب
بنتيريست