بوست لتوثيق كلام الحبوبات في السودان!!!

Quote: Quote: : يا ود أسحف من قدامي شوف ليك شغلة اقضاها غووور من هنا يا شافع بلاء يخمك تاني ما اشوفك جاري بجاي قدام الكانون دا .

Quote: : Quote: الليلة من صباح الرحمن عندي لوّاية لا نفعتني حلبة لا محريب لا حزا برية سلامتك يا بت أمي ، كدي النشوف ليك التكل جوا اكان القي شوية حرجل أغليها ليك باقي بنفع اللوًاية دي

Quote: Quote: Quote: جنس اللواية دي يا هبة آختي من يوم فتحتا عيني في الدِنيا دي ما جاتني الشكية لابيدن قوية.. واليوم أتّقول أربحا و عقاب شهر!!قمتا من الصباح مورودة وراسي مووجعني برجا يوسف يوديني الاستباليه برية سلامتك يا بت امي بسس علي الاسبتالية و علي الحكماء النبي فوقك اكان تمشي ليهم ما شفتي اليومة ديك فاطنة بت عباس كيفن تبزوها بكم حقنة في يدينها و جات راجعة بي حمتها ؟ عندي سفوفة بديك ياها و الكمدة بالرمدة بلا اسبتالية بلا سجم

Quote: Quote: Quote: اظاهر عليْ معيونة يا هبة يختي بخور أتّيمان اجّابو ليْ محمد باقي ليْ ما زي حق زمانك لا فيهو عللي لا فيهو قاقا و مختوتة فيهو حبيبة عين عروس صحي والله ، والزمن دا خلق الله أصلو ما بريحوا لا بعرفوا يقولوا ماشاءالله و لا بصلوا علي النبي ( بسس عليهم ! ) و انتي زااااتك ما بتسمعي الكلام كم مررررة كلمتك قلت ليك خاتم النص دا ما تقلعيهو من صباعك و قهوة الاحد دي ما تفطيها ، أصلو الجماعة ديل ( بدستورهم ) ما تزعليهم أها خمي و صري عاد كان قبلو عليك بدستورهم يا يمة لا يدخلو جسمنا ولا يعرفو أسمنا يعفو و يرضو