|
|
 ونسة حميّر ...
|
: سلآم آ الدبزاوي.
الدبزاوي: اهلاً.
المكادي: يا حمار شايل هموم الدنيا مالك، إن شاء الله خير ؟.
الدبزاوي: كِدي أقعُد. أجيبلك قبضة برسيم ؟.
المكادي: لا، لا شكراً. شارب لي مُوّاصة هسّع.
الدبزاوي: مُوآآآصة !؟.
المكادي: ايّ مُوآصة ، مالآ ؟.
الدبزاوي: بتسمِّن، ونصيحتي ليك تاني كان جابوها ليك لا تشربا.
المكادي: ليّه، في شنُو ؟.
الدبزاوي: يا حمار إنت ما سامع بالضبح الواقع في البلد دي، علي اليمين المُوآصة دي ماسورة؟.
المكادي: اللتاريك مقلّع عِويناتك، وضايقابك الوسيّعة !؟.
الدبزاوي: بصرآحة، شِي يخوِّف. بعدينِك عمّك اللقروُّب دا شايفو اليومين ديل مُهتمي بي شديد،
زوّد الكوتة بتاعت العلف، وكل مرّة اسمعو ليك، يا ولآد الحمار دا علِقولو وادُو اليشرب.
المكادي: بيني وبيّنك، المسعلة خترة بالحيل. هسّع انا براي النفّة البنِفها في الليل دِيّك دمستها وبقيت
اصبح كل يوم نخاشيمي ديل ملطمات. خايف يجي جزآر فايت بالشارع يشعُر بوجودي.
الدبزاوي: حليل زمان، بالله الوآحد كان ينقُل اليوم كُلّوُ، شي طماطم، شي عجوّر، شي ليمون،
شي تمُر، شي خدارات، وعييييييييك السوق دا نتُرسو لآمِن يقنِت. هسّع إتعطلنا وكمان جابت لها ضبح !.
المكادي: حرّم صدقت. كنا مدلعين، وكمان الحِلآقة اللت الرسم دي جبناها نحن. هسّع الخواجات سووها
موضة، وختفوها منهم بني آدمين البلد دي. الوآحد تلقاهو حالق حلآقتنا الزمان، وخالط الجكسوية بتاعتو،
وقاعين في أفخم محل بيرقر. يدفسوها لحم حميّر وحالقين حلآقة حمير، وبعد شويّة يقعدوا يهنِقو !.
الدبزاوي: عليك الله كان ما نفر ديّل نحن بيضبحونا؟. هسّع نوع ديّل بيغيرُولُن نظام حُكُم ؟.
المكادي: وكمان الحكاية فيها إضطهاد، الوآحد يقوليك، عليك الله ناس الحكومة ديّل ما حمير ؟،
بالله علي عثمان تقول مُخو مُخ حمار، علي اليمين البقولوا الخدر دا، الحمار ما يقولوا، بالله دي بلد دي ؟
يحكُما حُمار زي دا ؟، لُغتو كولها جِلِد كديس، وجزمتي، وهوت ضوق، ومزارعين الجزيرة والبيبسي !،
وهكذا ؟. عليك الله يا الدبزاوي، هسّع دا زول يشبهوهو بينا نحن !؟.
الدبزاوي: يا اخي دا جوّعُن لآمن بقو يكابسو فوقنا نحن.
الريفاوي: سلآم يا حمير، هوّي.
: مرحبتين حباب الريفاوي.
الدبزاوي: جاي من وين يا حمار ؟.
الريفاوي: من غابة ناس ود حِتيل.
المكادي: يا حمار إنت جنيّت ؟، علي الطلآق غابة ناس ود حِتيّل دي كان يبقى ابوي
رئيس الجزارين ما ادخُلا.
الريفاوي: في شنو ؟!.
المكادي: دِي ختفو منها الدنقلآوي، والغتسة الياها.
الدبزاوي: غايتو الله مرقك، لكن تاني ما تعملآ.
الريفاوي: غايتو بقينا الوآحد مِن تمسى الوآطة دي يقعُد يِتلفّت.
المكادي: هلآ، هلآ اوّل زمان من الليل يمسى تسمع غوغاي القعوي في التُرع، وحِس الصُبار،
وفحل أُم صِريصِر، وتكون تحتك كُوليقة قصب، تاكُل وتنفنِف الليل كُلو، ومرّة، مرّة تاخُدلك هِنيّقة،
والقمرا ضاربة في موية الجداوِل، هلآ، هلآ.
الريفاوي: ايَّ والله زمن !. إنت الجماعة ديّل سوُّ شنو مع القعوي ؟.
المكادي: ما سجمُن، لكن ترا من طروهو دمس الغوغاي.
الدبزاوي: والله الوآحد الحياة دي مِسخت عليهو، عليكم الله دي حكومة دي ؟.
الريفاوي: غايتو انا خوفي كُلوووو من ناس الصالح العام.
المكادي: ناس الصالح العام ياتُن ؟.
الريفاوي: مِياهُن البيسوو الفتاوي للحكومة.
الدبزاوي: قصدك هيئة علماء السودان.
الريفاوي: بسسسس ياهُن، هسّع يحللو لحمنا.
المكادي: غايتو شقاوتنا شقاوة، اكلو لحمنا بالبلآدة، وهسّع بقو ياكلونا
عيّنك يا تاجر. غايتو المخيّر الله !.
الريفاوي: غايتو ناس علماء السودان ديّل بيعملوها فينا، قبل الليلة
وآحد قال، لبن الحمير بينفع القُحة، الجماعة قاموا علي نسوانا ما خلولِن
ضرعاً محيّن، وخلّو دِحيشاتن ينيصن من الجوع.
الدبزاوي: يا حمار ديّل مُو هُن، ديل علماء البحوث.
الريفاوي: كُلهُن زي بعضُن، مُش ناس حكومة ؟.
المكادي: والله قال ليك الجماعة بيظبطو من لحمنا جِنِس كُفت،
وسُجُوك، ولحمة مفرومة، وهوت ضوق، مُباااااالغة.
الريفاوي: عليك الله هسّع كان ما الرئيس اب فقهة دا، الناس ديل بيعرفو الهوت ضوق ؟.
الدبزاوي: لآزم نشوف طريقة نتخلّص بيها من ناس الحكومة ديل !؟.
الريفاوي: غايتو بي في الليل إتحصنوا قبل النوم.
المكادي: انا جاتني فكرة نتخلّص بيها من الجماعة ديل.
: فكرتك شنو ؟.
المكادي: باكر من الصباح نمشي نقيف قدام القصر، ونرفع يافطة نكتب
عليها ( يا ترحلوا يا نرحل، الحميّر كِترت في البلد)
.
: تصبحوا علي خير.
ود المدير...
|
|
 
|
|
|
|
|
| العنوان |
الكاتب |
Date |
| ونسة حميّر ... | معاوية المدير | 12-04-14, 10:04 AM |
| Re: ونسة حميّر ... | معاوية المدير | 12-04-14, 10:15 AM |
 Re: ونسة حميّر ... | علي عبدالوهاب عثمان | 12-04-14, 10:37 AM |
 Re: ونسة حميّر ... | معاوية المدير | 12-04-14, 11:21 AM |
| Re: ونسة حميّر ... | Hassan Makkawi | 12-04-14, 11:36 AM |
| Re: ونسة حميّر ... | أبوبكر عباس | 12-04-14, 12:35 PM |
| Re: ونسة حميّر ... | ABDALLAH ABDALLAH | 12-04-14, 01:29 PM |
| Re: ونسة حميّر ... | علي عبدالوهاب عثمان | 12-04-14, 01:42 PM |
 Re: ونسة حميّر ... | معاوية المدير | 12-04-14, 10:21 PM |
 Re: ونسة حميّر ... | معاوية المدير | 12-05-14, 03:12 AM |
| Re: ونسة حميّر ... | munswor almophtah | 12-05-14, 03:40 AM |
| Re: ونسة حميّر ... | جلالدونا | 12-05-14, 02:20 PM |
 Re: ونسة حميّر ... | معاوية المدير | 12-06-14, 12:03 PM |
| Re: ونسة حميّر ... | معاوية المدير | 12-07-14, 00:21 AM |
| Re: ونسة حميّر ... | معاوية المدير | 12-07-14, 11:52 AM |
 Re: ونسة حميّر ... | Hassan Makkawi | 12-07-14, 12:45 PM |
| Re: ونسة حميّر ... | مني عمسيب | 12-07-14, 12:53 PM |
| Re: ونسة حميّر ... | Hassan Makkawi | 12-07-14, 12:59 PM |
| Re: ونسة حميّر ... | معاوية المدير | 12-08-14, 00:01 AM |
| Re: ونسة حميّر ... | معاوية المدير | 12-08-14, 06:51 AM |
| Re: ونسة حميّر ... | معاوية المدير | 12-08-14, 07:12 AM |
|
| |
معاوية المدير
فيس بوك
تويتر
انستقرام
يوتيوب
بنتيريست