|
|
 يا زولي الصاح
|
خبارك كيف يا زولي الصاح ..
يا زول من نور دفقة أفراح ..
فاقدينك ياخ وحات عينيك ...
والشوق شحتف فينا اﻷرواح ..
يا زولي الصاح ...
اللهفه الفينا شوتنا عديل ..
ريدك خلف جوايا جراح ..
يا ريدي الصاح ...
بخلايا الروح مطبوع انتا ...
كان قولك حبي وما قولي ...
ما شايف زول في كل الكون ..
يستاهل يملا حباب العين ..
مش قلت زمان بكفيكا انا ..
من كل الناس ياكا الهولي ...
ياخ انا عتبة بيتكم بهواها ...
والضلفه حبيبتي ترحب بي ...
كيفن حتكون يا ضي عيني ....
كيفن كان ديك ياخ حاجاتك ...
بهواها وتفهم في قولي ...
اتخيل بس بهواك انا كيف ؟ ..
يا زول يا كيف ..
يا أدفأ مرسى وأجمل قيف ..
يا ابهى صباح نور دنياي ..
رتبني ورتب في الجواي ..
كيفنك كيف ؟ ..
القسمه اختارت والمولى ...
راضين بي حكمك يا الله ..
لكنو هواك بالدم مزروع ..
وعليك يا روح الروح والله ..
دايما متشحتف بيك موجوع ..
ماليني حنين واجمل موضوع ..
يا أمسي وحسع ويوم باكر ..
كذاب لو قلت لقيت زيك ..
وأنا ماني البياع الناكر ..
يا زول جمل جوايا العيد ..
بهواك حتى النفس اﻵخر ..
لو أنسى صباي بهجة عمري ..
ياكا المستقبل والحاضر ...
يا اجمل حرف مزهر فنان ...
زكراك بتجمل في الخاطر ..
يا همسة ريد في روح إنسان ...
بكاي موجوع مرهف شاعر ..
صدقني بريدك يا روحي ...
يا أحلى صباح ..
يا زولي الصاح ..
يا زول من نور ..
دفقة أفراح ...
|
|
 
|
|
|
|
إدريس محمد إبراهيم
فيس بوك
تويتر
انستقرام
يوتيوب
بنتيريست