المد المارق من زفرات الفجه وماشى سارب فيك شهيق موجوع مكتف بالدعا ماخد من سماك الجافيه لون حزنه طامح زى وريدك وكلما يوسع يضيق يا صبحك فات بى ليلو سبعة ضحكات بى ليلو يا عمرك طال بى سنينو الرايحه ما لاقيه الطريق ويا فرحك مات بى ليلو سبعة نجمات بى ليلو قمرا مقسم روحه فى وش السهاد يا حالك حال مسجون فى ضلوع الغبشه كاسيهو الرماد يا حليلو جافاهو الرفيق وأماتك الدافقه الحنان تعبت تفتش فى جزاير الريح تفتش ليكا فى وعر الدرب تنده تقالد فى رواكيب الزمان تطيب خاطر العمر الكسيح ما عارفه ضلك من رهابك حننت قلب المكان ما فارزه جيتك من غيابك اتارى المويه دساها الحريق
الجزر:
الموج سليل المويه المويه يا دم البحر يجرى جنب العيون الكايسه دمعاتا جوه العروق الودرت فى عز موتا نبضاتا والواطا بت الكون مرقد الناس المشت بدرى الليل غنوة الخايفين ساكت يعاين فى الودار الموت عديل احسن كتير من الفزع مين البوريك الدرب مين البخت الجمره فى مويه الوجع دربك معلق فى الفضا وفضاك مكتف بالغبار وقلب سفينتك يشتهى الجوه فى خاطر السواحل وبره فى وش النهار الموج سليل المويه المويه يا ست الروا خشم الكلام مليان عطش والريق يباس المشتهى كبى القصائد فينا ناولينا الدوا وبين سلوكة الملح البتيرب فى دمانا حليلا قريفة القعاد فوق الحكاوى الصابه عينه وبين ريحة البن الرمانا قايمة حيشان من وِلف سهرانة نيمات الوداد بين ريحة الملح السكن جنب القلب طوّل دروبك بالبعاد رشرش صقيعة الروح نزِف وريحة الشوق الحمانا نفرد جناحو نبلو فى الضل السمح نعطنو فى النيل النِشِف راقدة كيمان العباد الجاورت نبع الأسى الموية يا الوجع القديم الموية يا ست الروا سفن الغريب بايته القوا والشوق حلم فرزع نجم ليلو الهوا
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
أبوذر بابكر
فيس بوك
تويتر
انستقرام
يوتيوب
بنتيريست