|
|
 حـــــــــــــــــــــــــــــــــــــــــــالة
|
يا اغلى زول
شايلة من النيل
سماح
يا زول عيد
والعيد خليته
شان
عينيك ما تزعل شديد
فطومة يا كل الندى
وكل بنوت الحلة اتسمو عليك
من فارقتك
فارقت العيد
والعيد شنو
لحظة تكهرب
رغم المسافات الفواصل
وارتعاشات جوة الفؤاد
واحساس سعيد
كان السفر
حالة قدر
كان ارتياد لي حالة في جوف الزمان
كان ارتهان
وكانت ضفاف النيل بتحضن لي قليب زولا بعيد
عينيك بتبرق بالاماني المترفات
وانت الحلم
عصفور بسافر في الفجر
ويرجع على النيل في العصر
ويهدي لي عينيك
من زولا بريد
كلمات اغاني الرجعة ترفل في المنال
والمزازيك تلتهب
لمن تعانق لي حروف عاشق عنيد
اهديك صولاات الفرح
جوقة مزازيك القرب
وكمان حنين
وايقاع طبول الاستواء
ارعاد بيرزم ويرقص
على ضو البروق
احساسي بيك
دوما بزيد
يا حليوة
يا كلمة تهاني بين عيون اصحاب
ويا كلمة معيادة بين قلوب
مشتاقة لي نبضة هوى
ويا احالة من زهو الصغار
بي لبسة
بي فستان جديد
انا حبي ليك
حالة تصوف
وانجذاب
تقابة نيرانها العصب
مداحها شرياني ووريد
يازولة عيد
غنيني بيك
واديني منك كم سؤال
عن حالي
عن غربة كيفن
فينا تنخر في العظام
ونقاوم السهر البياخد
ديمه حال النوم
ويهرب
في الصباح
وتهرب نجيمات الوناسة
وينزوي القمر الوحيد
في اللحظة
بكتب عينك احلى قول
وليك اقول
فطومة يا بت عزة
يا عزة حروف
يا
منتهى الريد الوطن
يازولة في عينيك لي
اجمل وطن
شلتك
تعاويذ في المسافة
وشلتك
ترياق مقاومللسنين
ترياق مقاوم للعساكر
وكل حرامي
وكل سايس
شلتك جريد
نخل الضفاف الما بنزل راسو
لي كل باشبزق
شلتك كلام جوايا ليك
جايك بيه في
زمنا فريد
يا بنية من وجع الليالي
الشايلة احزان الغلابة
يازولة من ضحكة صغار
بي فرحة القادم يوزع في الهدايا
انا ليك بريد
مليان هوى
جواي مستف بالنشيد
يازولة عيد
وبس
|
|
 
|
|
|
|
د.محمد حسن
فيس بوك
تويتر
انستقرام
يوتيوب
بنتيريست