|
|
 بالدارجي، بالمفضوح، والمستفز: عشاري يكتب عن الرق في السودان
|
يا مثقف يا رقيق، تَخيَّل أن زوجتَك الحالية هي أبوك مشام أنقوي! .. بقلم: عشاري أحمد محمود خليل طباعة
الأربعاء, 24 أيلول/سبتمبر 2014 11:45
mailto:[email protected]@outlook.com
(1)
في جميع الأحوال، الرق معرف قانونا في المادة 1(1) من اتفاقية الرق للعام 1926، وهي المادة التي تقرأ: "الرق هو المكانة [المقامية] أو الوضعية لشخص تُمارس عليه أي من القوى والسلطات المتصلة بحق الملكية أو كلُّ تلك القوى والسلطات".
ولأن الدولة الحديثة، كالسودان، لا تعترف بمقامية أو "مكانة" للرق، يتم تعريفه بخصائص"الوضعية". فكل وضعية شخص يُمارَسُفيها عليه التحكمُ الذي يرقى إلى درجة الاستحواذ، كما نستحوذ شيئا نملكه ونتصرف فيه، يتم تكييفها على أنها وضعية رق. مما ينطبق على حالة السيدة أبوك مشام أنقوي.
وأنا اخترت وضعية السيدة أبوك من بين مئات الحالات الأخرى، بسبب أن البيِّنة بشأن وضعيتها موجودة عند أسرة مادبو الحاكمة في دار الرزيقات. الأسرة الحاكمة التي حرر حد أعضائها السيدة أبوك من وضعيتها التي كانت عاشت فيها لمدة عامين في الرق، وأعادها إلى حياة الحرية والكرامة مع زوجها دينق دينق ماقوت وأطفالها السبعة، ووالدتها ألويل، وأشقائها، منهم باك مشام، الضابط السابق في القوات المسلحة.
فنجد في وضعية السيدة أبوك مشام أنقوي جميع قسمات الرق، أهمها التحكم الذي يرقى إلى درجة الاستحواذ.
فقد تم اختطافها بالقوة العنيفة المسلحة من بيتها في أشورو في شمال بحر الغزال. وجرى اقتيادها عنوة من بلادها إلى دار الرزيقات. وأثناء تلك رحلة العبور، كانت أبوك تتعرض للضرب من رجال المليشيا بالسوط.
وتم التوقف بها مع نساء وفتيات وأطفال مختطفين آخرين في أبو مطارق، عاصمة الرق في دار الرزيقات. حيث تمت القسمة للغنائم البشرية والمادية وفق إسهام التجار ورجال القبيلة وشيوخها في تموين الغزوة، ووفق قوة الدور في تنفيذ الغزوة. وكانت أبوك من نصيب أحد مختطفيها، آدم عبد الرحمن من قرية سوق بيِّن، مكان ليس بعيدا من دائرة أبو مطارق دائرة أحمد عقيل أحمد عقيل، ومن دائرة الفردوس التي فاز فيها لاحقا حسبو عبد الرحمن مساعد عمر البشير، الرئيس، على ما أذكر.
ما أن وصلت أبوك إلى قرية سوق بيِّن، حتى تم تدشين مقاميتها المنحطة بدعوة رجل المليشيا آدم عبد الرحمن لابنته كلتومة أن تركب فوق كتف أبوك وظهرها. وكذا تم تغيير اسم السيدة أبوك مشام أنقوي إلى "زهرة آدم". ومن بعد، جرى استغلالها، وتخديمها في الرعي وجلب الماء ودق العيش وطحنه. واعتدى عليها آدم عبد الرحمن جنسيا وتسبب في حملها بالإكراه. وباع آدم طفلها الرضيع، من زوجها دينق دينق ماقوت، لكنه اضطر إلى إعادته لها. وكان آدم وزوجاته وأمه يضربونها، وهو ضربها بنعله ليفقدها ثلاثة من أسنانها الأمامية، قبل خمسة أياما فقط من تحريرها. وكان يقيد حركتها، ويضعها تحت المراقبة، ويأخذ طفلها رهينة لكي لا تهرب، ويأتي بغير ذلك من أفعال ضدها في وضعيتها الجديدة.
فما دامت هذه هي وضعية أبوك الثابتة، ووضعيات غيرها لا تختلف عنها إلا في تفاصيل صغيرة، تكون الوضعية وضعية رق. لأنا نجد فيها أشكال أفعال "التحكم الذي يرقى إلى درجة الاستحواذ". ونجد رجل المليشيا يمارس جميع سلطات "الملكية" في السيدة أبوك مشام أنقوي.
(2)
إنكار وجود الرق في دار الرزيقات
يظل "المثقف" الشمالي العربي المسلم، القديم، وهذا تعميم مقصود، ينكر حقيقة هذا الرق. وهو رق له كذلك خصوصياته التاريخية والعنصرية والمتعلقة بالسياسة وبالحرب. الرق الذي دعمته وتسترت عليه حكومة حزب الأمة برئاسة الصادق المهدي، والذي وجد دعما لاحقا مكتوبا من قبل مبارك الفاضل المهدي ("دفوعات عشاري"، في سودانايل). وهو رق له خصوصية لأنه تسببت فيه أيضا قيادات القوات المسلحة السودانية (المليشيات، قطار بابنوسة واو، سياسة الأرض المحروقة). وهذه الخصوصيات المستفظعة هي التي تجعله رقا، إضافة إلى التكييف القانوني الأساس في اتفاقية الرق. وتعبير "الرق" إيحائي أيضا، نريد به أن نبرز هذه الخصوصيات. وبهذه الخصوصيات يتم استدعاء المحاسبية والعدالة الانتقالية.
ويظل الإنكار للرق يتصاعد، حتى بعد انفصال الجنوب، وكذا بسبب انفصال الجنوب. حتى لا يقال إن الرق كان من مكونات النفسية الجنوبية الطارئة التي حفزت الجنوبيين، بالمشروعية الأخلاقية، لرفض الوحدة مع الشمال العربي الإسلامي. الشمال القديم المُتمثِّلُه المثقف الذي ينكر وجود الرق (مصطفى البطل، مبارك الفاضل، وكثر غيرهما). والمتمثله المُدغمِس لحقيقة الرق بتضييق التعريف (الصادق المهدي) أو بتوسيعه وتمييعه للحد من حده القاطع (عبد الله علي إبراهيم، حسن الترابي)
...
أتناول في هذا المقال المثقفين الذين يرفضون تكييف الوضعية قيد النظر على أنها رق. وهم قطاع واسع من المثقفين المتعلمين، أغلبهم في المعارضة، ومن حزب الأمة على الأكثر، ومن "مثقفي" الرزيقات، ومن سلالة الإنقاذ. موقفهم واضح. إنو دا ولا رق ولا حاجة. دي مشاغبات، وعادات، ومراشقات بين القبيلتين الدينكا والرزيقات. والشكلة أصلا في مصالح الرعي والأرض. وإنهم بيتشاكلوا من زمان. وبعدين بيعملوا مؤتمر صلح. وبيرجعوا المخطوفين من كل طرف لقبيلتهم. وبيتصالحوا. حاجة بسيطة.
(3)
نصيحة الدكتور حامد البشير
نصحني الأخ الدكتور حامد البشير، عالم الأنثروبولوجيا، أن آخذ هؤلاء المثقفين الذين ينكرون وضعية الرق بالرأفة. "برَّاحة"، شوية شوية، بهدوء. يا عشاري، أشرح ليهم أولا تعريف الرق، كلمهم بالوقائع، وكدة يعني ... حبّة حبَّة. يا هو دا السودان.
يعني،بالعربي، ما استخدم معهم لغتي المعهودة. وهي لغة تحترم عقولهم، وتدخل معهم في الموضوع طوالي، لأني أفترض أنهم عارفين. ومافي أي دلع، إنهم والله ما فاهمين الموضوع ومتأثرين بالقبيلة وبالسياق الثقافي. أعرفهم يفهمونها طايرة.
أقصد دائما إلى استفزاز أفكارهم، ومشاعرهم أيضا. فالأفكار والمشاعر متلاحمة في الدماغ. ولا يكتب الكاتب في الشؤون الاجتماعية بدون مشاعر أو عواطف إلا وهو يقصد إلى إخفاء موقفه وموقعه. يريد ان يخدع القراء بأنه "محايد". وأنا أُعَرِّفهم مباشرة بالمكان الذي أقف فيه. وأعرف أنهم عندهم مواقف، وأنهم ليسوا بريئين أو محايدين كما يدعون.
فتكون بيني وبينهم البيِّنة والحجة المنطقية، لا حركات الحياد والكلام عن "الموضوعية". أقصد أن أخرجهم من طورهم منفعلين للتعامل مع المشكلة، مشكلة الرق.وللإفصاح عن مواقفهم. لأن في ذلك ما قد يعينني على فهمهم بصورة أفضل، وما قد يقودهم إلى اكتشاف أبعاد جديدة. لا أريد أن أتركهم مرتاحين إطلاقا، وخلاس كأنو الموضوع نقاش في جمعية أدبية، وكأنو موضوع الرق انتهى.
...
أريد اليوم أن أجرب تنفيذ نصيحة الدكتور حامد البشير. فأفترض "عدم الفهم" لدى هؤلاء المثقفين. وعليه، أريد في هذا المقال أن أُقرِّبَ الصورةَ أكثر لهذه الفئة الما قادرة تفهم "الرق" يعني شنو، أو عاملة ما فاهمة. سيان.
سأستخدم الأسماء "كمال"، و"ليلى بشير الهادي"، و"أحمد، حمودي" كأسماء وهمية، كما هو واضح ولا تشير إلى شخص بعينه. لتقريب الصورة.
واستلف الوعاء المعروف في المحاجة، أعلم أنه يستدعي العاطفة، واستخدمه شوقي بدري في مقاله. "هل تقبل هذا لأختك" سألوني هكذا عن مريم يحيى. ولا أستخدم هذا الإطار لدعم حجتي، ولكن لعرض موضوع الرق في إطار استفزازي مختلف لا يقنع أحدا، لكنه يبرز بعض الأبعاد التي قد تكون خافية على المنكرين لوجود الرق.
(4)
يا مثقف، يا رقيق، يا كمال (اسم كأي اسم!)
السيدة أبوك مشام أنقوي زي زوجتك، واحد. زوجتك نفسها الإنت عايش معاها اليوم.
ولو كنتما موافقني في الحتة دي، حدد موقفك واكتب لنا هنا في سودانايل. قول لا، في فرق. قول "والله أبوك دي دينكاوية ساكت! وأنا زوجتي من أسرة عربية مسلمة، جعلية حرة، ومن بنات الأسر في الخرطوم". نكون فهمنا، وكل واحد يمشي في طريقو.
يا كدة، السيدة زوجتك والسيدة أبوك حاجة واحدة، يا كدة لأ، السيدة أبوك مشام أنقوي دي غير!
...
أنا عارفك حتقول إنو أبوك مشام أنقوي والله يعني برضو تاريها متزوجة واحد زيي،كدة. صاح إنو دينكاوي، لكن، في النهاية، "بنو آدم". اسمو دينق دينق ماقوت. وكمان عندها أخو اسمو باك مشام كان ضابط في الجيش، ممكن يكون كان دفعة أخوي عبد النبي. وكمان قالوا عندها أخو تاني بيقرا مع ود عمي حمدان في جامعة الملك محمد الخامس في الرباط. وعندها أخو تاجر هنا ساكن في الجريف. دي حاجة عجيبة.
يعني عندها أسرة، حاجة غريبة، والله! ايوة ايوة. أبوك مشام أنقوي زي زوجتي ليلى بشير الهادي (اسم). ما في أي فرق. وأبوها الكتلوهو بتاعين المليشيا قالوا الناس إنو دا كان من أغنى الجنوبيين. كلنا سودانيين. الله نفسو قال خلقناكم من قبائل وشعوب لتعارفوا. حاجة عجيبة!
لا بأس. هذا تقدم.
طبعا أنا عارفك يا مثقف يا رقيق، وفاهمك كويس.
تِحِت تِحِت قاعد تقول إنو أبوك برضو خادم ساكت، وإنو زوجتك ليلى بشير الهادي امرأة حرة بت قبايل.
تشومسكي قال 99% من الكلام مُدَوِّر جُوَّة في الدماغ، وما بيطلع برة. عارفك بتتكلم مع نفسك وبتقول صاح أبوك قبيلتها أكبر قبيلة في السودان، لكين العدد يعني شنو؟زوجتي ليلى بشير الهادي بت أسر.وأبوك دي خادم ساكت. سمعك.
وعشاري دا زاتو لازم حبوبتو دينكاوية. لازم فيهو عِرِق. كلامو دا ما ساكت. خليهو يورينا جدو بعد خليل. حتلقوهو مرجان ولا ياقوت. خليل دي زاتها أظنها كانت خميس، هو بتاع لغويات قلبها!
سامعك. الكلام دا جوا هناك في أعماق دماغك، وما بيطلع. لأنو لو طلع حيشيلوا منك لقب "مثقف" وحتبقى واحد "رقيق" ساكت.
لكين أنا ماشي معاك.
يا مثقف. شوية شوية. زي ما قال دكتور حامد البشير. حَبَّة حبَّة. برَّاحة. بدون أي استفزاز، لحدي ما أجيبك في القاطرة. في اللفة. في الموضوع الأساسي. الحيخليك تتجنن. إنت عارفو شنو. بخليهو للآخر. في نهاية الحصة.
وبعد نهاية الحصة، كدة أسمعك تاني تتجرأ تقول والله دي حاجة بسيطة دا ما رق دي مشاغبات بين القبائل.
(5)
يلة، يا مثقف، نبدأ:
تصور أن زوجتك ليلى بشير الهادي هي أبوك مشام أنقوي! (انت قبيل قلت الحالة واحدة كلنا سودانيين).
تصور وتخيل. هذا الذي ينازعك في الموية والمرعى جاء يوما بالمليشيا بتاعتو إلى حلتكم في هجوم كاسح. كلهم مسلحين وراكبين عربات دفع رباعي (خيول)، وبكاسي (حمير) ولواري (جمال).
ولو التصور دا صعب عليك، حاول تتخيل إنو أبوك نفسها زوجتك، لكن اسمها ليلى بشير الهادي. اسم زوجتك القاعدة دي.
يعني، تخيل أن زوجتك ليلى بشير الهادي هي ذاتها المرأة التي حدث لها ما حدث لأبوك مشام أنقوي.
زوجتك ليلى يكون خطفوها بتاعين المليشيا. وساقوها من بيتك. وضربوها بالسوط .وشغلوها خدامة. وباعوا ولدك. وكسروا سنونها لما ضربوها بالمركوب. وفي الآخر بعد سنتين، رجعوا ليك. زوجتك. ليلى بشير الهادي. حنوا على حالتك.
ما حأسألك لسع دا رق ولا مشاغلات قبلية.
(6)
إنت طبعا هربتَ لما هم هجموا على بيتك. لأنو بتاعين المليشيا كانوا حيكتلوك لو لموا فيك. زوجتك ليلى بشير الهادي الفاهمة قالت ليك "أجري، يا كمال". لأنها بتحبك. وما عايزاهم يكتلوا أبو عيالها. مستعدة تضحي. عارفاهم بتاعين المليشيا عايزين النسوان والفتيات اليافعات والأطفال. وهي عارفة إنو أنت وأخوانها، وبعد ما ناس المليشيا يشيلوها، ويعملوا فيها الدايرنو، حتجو تفتشوها سما أرض عشان تحرروها. في النهاية أنت زول ما بطال. بس العنصرية عاملة ليك أرضي، ومقفلة ليك مخك وعيونك.
حبة حبة يمكن تبدا تفهم، زي ما بيقول دكتور حامد البشير.
..
وانت برضو عارف إنو بتاعين المليشيا ما حيكتلوا زوجتك ليلى بشير الهادي. لأنهم أصلا عايزين مرة تشتغل ليهم بالنهار. وبالليل كمان، أوف كورس. إنت مثقف وفاهم الحاجات دي بتكون كيف. لاكين الموضوع دا نجي ليهو بعدين. في الآخر.
(7)
زوجتك كلمتك بي الحصل ليها
يا مثقف يا رقيق، طبعا زوجتك ليلى بشير الهادي،بعد ما رجعوها ليك، كلمتك بالحصل ليها كلو. خلال سنتين في سوق بيِّن في الفريق بتاع الرجل من المليشيا.
"تصور يا كمالـ بتاع المليشيا ال######## دا ضربني بالسوط. شايف الآثار لسع يا ها قاعدة. شايف؟"
هي ذاتها زوجتك الجميلة. لكني أراك لم تعد تراها جميلة. بعد العملوا فيها بتاعين المليشيا. في قرية سوق بيِّن مع الرجل الفظ آدم عبد الرحمن وأسرته من ثلاث زوجات شريرات وامه الماكرة وابنته كلتومة قلية الأدب.
كانت زوجتك تتذكرك وتفكر فيك يوميا. وهي الآن بعد التحرير مبسوطة إنها رجعت ليك. عايزاك تتحرك. وانت مهموم بتكرج في أسنانك.بعد الإهانة العرضك ليها بتاع المليشيا ماسك زوجتك عندو سنتين. ما عندك همة. ما قادر تتصور كيف انت تكون حصلت ليك حاجة زي دي. في السودان العزيز العربي المسلم. يشيلوا زوجتك عديل كدة، ما يرجعوها ليك إلا بالواسطة بعد سنتين! طبعا بتفكر ترحل من السودان، تمشي إسرائيل.
تاني تجي تقول مافي رق؟ يا مثقف، يا رقيق! مرعى وماء. وحاجات زمان. وصلح. وتبادل الأسرى. وينها الأسيرة الإنت شلتها من ناس آدم عبد الرحمن عشان تبدل بيها زوجتك؟ أمور الاحتيال دي خليها. هسي جات كفي بيتك جوة أوضة النوم.
(8)
زوجتك لا تتوقف عن الحكي:
"عارف يا كمال، بعدين تخيل بتاع المليشيا المجنون دا عمل فيني شنو. أول ما أنا وصلت لحلتهم في سوق بيِّن جاب بتو كبيرة عمرة 17 سنة وقال لي أبركي! عشان بتو تركب فوقي. يعني أنا حمارة".
إنت بتسمع ساكت، يا مثقف يا رقيق.
وماسك أعصابك. تقول لنفسك: مراشقات بسيطة، ما فيها حاجة. يعني شنو؟ ما أنا ذاتي مرات قاعد ألعب حمار حمار مع بنتي نادية.كنت برضو ببرك زي الحمار وبنتي ندويةعمرها ثلاثة سنة تجي تركب فوق ضهري. ونضحك. ما فيها أي حاجة. عايش الهذيان.
مبارك الفاضل المهديبرضو طيب خاطرك وكلمك قال ليك ما فيها أي حاجة. قال ليك لاحظ إنو لما زوجتك ما قدرت تقوم بي كلتومة راكبة فوق ضهرها،وآدم ضربها بي كعب البندقية لحدي ما وقعت، الحاجَّة أُم بتاع المليشيا جات وشالت مرتك عشان تطيب خاطرها.
مبارك الفاضل المهدي كلمك، إنت ما سامع؟قال ليك شايف، العجوز دي حساسة كيف؟ كلمك قال ليك ديل ناس محترمين بتاعين المليشيات ديل، وعندهم أخلاق ورحمة. الحاجَّةالكبيرة أم آدم جات وشالت مرتك عشان ترضي عليها وتخليها تنسى. في أول يوم تجي ضيفة عندهم ما ممكن يعملوا ليها كدة.
(9)
يا مثقف،
طبعا مرتك برضو كل يوم تكلمك بالشغل عند ناس المليشيا، آدم عبد الرحمن الرزيقي "الفارس"وزوجاتو الثلاثة.
وأنتيا مثقف يا رقيق، متذكر كيف إنك كنت بتعِز زوجتك، ومريحها، لا تنضف بيت، لا تغسل، لا تترسل. بس حِنة وتياب وزيارات للأهل وآولاد حلوين مؤدبين، وانت تستعرض، عن استحقاق.
"تصور يا كمال من أول الصباح كانوا بيشغلوني أدق العيش وبعدين أطحنو.علموني المرحاكة، بالقوة. عشان يعملوا عصيدة. لحدي ما قامت لي حاجات هنا في يديني. هسي انتهت، بالحنة. الحنة دي ما عاجباك ولا شنو؟"
طبعا إنت مثقف ما فاهم. لا فهمت كلام زوجتك الأولاني عن دق العيش والطحين ولا التاني عن الحنة. مخك مشوش. عايز تتهرب من الموضوع داك، الموجعك. طوالي غيرتَ الموضوع.
(10)
زوجتك شافتك ما فهمت قصة المرحاكة في بيت بتاع المليشيا هناك في دار الرزيقات. ولا فهمت إشارة الحنة. هي برضو غيرَت الموضوع، وبدت تحكي ليك قصة الرعي بالغنم.
"اتخيل يا كمال، أنا ليلى بت البشير الهادي، بت أسرة كبيرة، وزوجي كمال بطولو وعرضو، شمالي عربي مسلم، يدوني خمسين خروف وغنماية ويقولوا لي يلة أمشي أرعي بيهم. وأوعك تجي راجعة قبل الساعة تلاتة. وكمان مرسلين معاي ولدهم، الله يرحمو مسكين مات من العطش. مرسلنو يراقبني عشان ما اشرد.
وأنا اشرد كيف يعني، ولدي حمودي معاهم ماسكنو رهينة.
ديل ناس عجيبين".
طبعا إنت مثقف سوداني ورومانسي خالس. بتحب الغنم والخرفان والمراعي.ترفض ان تستوعب هذا الذي وقع لزوجتك. تنكر. فتهرب إلى أحلام اليقظة، وتستمر تهذي. أنت تحب حالة الهذيان، لأنها تريحك من مواجهة الواقع المر..
زوجتك بدت تستغرب. لا ترى أي تعاطف من جانبك. وما في أي فهم. كأنها بتتكلم مع حيطة. تقول ليك شغلوني راعية بالغنم، تقعد تعمل بتاع بيئة ونوستالجيا لي أيام زمان، وما أحلى الأغنام والخراف في الخريف والدعاش. يا سلام!لعبة حلوة، "راعي راعي".
(11)
زوجتك ليلى بشير الهادي كلمتك.
"تتصور يا كمال، كل يوم كانوا يرسلوني أمشي الدونكي أجيب موية بالحمار. مرتين في اليوم. خمسة باقات أملاهم. أربعة فوق الحمار وواحدة أشيلها فوق راسي. شعري في راسي اتقطع. لكن شايفاهو هسي رجع زي ما كان زمان. إنت ما شايف؟".
برضو هي شايفاك ما فهمت.
(12)
يا مثقف يا رقيق،
زوجتك ليلى بشير الهادي تحكي كل يوم.
"تتخيل يا كمال، ولدك أحمد كان شالوه مني وفطموهو غصب، وشالوهو باعوه، عديل كدي. دي حاجة عندهم عادية. جننتهم اسأل ولدي وديتو وين؟ جيبوهو! لحدي الله لطف، الاشتراه وبراه ورجعوا وشال الخرفان بتاعتو".
طبعا، يا مثقف، إنت شايف ولدك يا هو داك قاعد يلعب. عمرو هسي أربعة سنة. وبديت تكرج في أسنانك، تاني.والدم يغلي في عروقك. يا دوب بديت تفهم شوية. إنو "الحاجة دي حاجة تانية". كلام عشاري دا يمكن يكون صاح.
إنت طبعا بتحب ولدك أحمد موت. قبل ما يخطفوهو مع أمو أخوانوا كان بيسموهو "حمودي". لكن إنت كنت بتحب تناديه "حميدتي". انت يا مثقف كنت بتحب المليشيات. متأثر بكلام الدكتور عبد الله علي إبراهيم قال ليكم دا جسد قبيلي تاريخي معروف وله وظيفة اجتماعية، والقبيلة مرات عندها ترايبالفيود، يعني نزاع قبلي، ولازم يكون عندها مثل هذا الجيش المحلي الشعبي، زي ناس قرنق واحد.
بس أنا ما قادر أفهمك، يا مثقف. دكتور عبد الله علي إبراهيم، المفكر بتاعكم، قال ليكم "يا جماعة دا رق". وقال ليكم "بس انتو قولوا رق، لاكين خليكم مصرين إنو رق حِبي، افريقي، بتاع مراشقات، ومشاغلات، زي بتاع المورلي البيخطفوا أولاد الدينكا، يعني ما عنصري.كدة حتقدروا تطلعوا من الورطة الدخلكم فيها عشاري دي. وتدخلوه وعشاري زاتو في ورطة. بسكل ما هو عشاري يقول رق، تقولوا ليهو "وبتاع جون قرنق دا شنو؟ وبتاع المورلي، كمان" وما تنسوا المذابح بتاعت رييك مشار وسلفا كيير الأخيرة. برضو قولوا ليهو دا رق. كدا نطلع حبايب. كلو عند العرب صابون. يعني ما في مشكلة. الحالة واحدة. السودان كلو رق. ولا عدالة انتقالية ولا كلام فارغ".
(13)
يا مثقف يا رقيق، أخيرا،
نجي للحِتَّة الخطِرة، "شوف شامة فيسيلا، في الحِتة الخطِرة"! ... تتذكر البلغارية الجميلة، في كلية الآداب؟
خلينا نكون جادين.
زوجتك كلمتك بي الحصل ليها كلو. إنت فاهم كويس"كلو" دي يعني شنو. بتحبك. وكلمتك بالتفاصيل. امرآة فاهمة، زي ابوك مشام أنقوي. وبتفتكر إنها متزوجة من مثقف فاهم. وما ممكن تعمل ليك أنو الموضوع كلو كان بس رعي وغسيل هدومو مرحاكة وموية من الدونكي. في حاجات تانية. بالليل. ومرات بالنهار.
وهي شايفاك تكرج في سنونك، وتتعصب، عرقان، وخايف من سيرة الموضوع، خاصة مع التومات. أنا ما كنت عايز أجيب الموضوع بتاع التومات دا. لأنو حساس وبيعمل ليك أعصاب.
"ما تتحسس كتير كدة يا كمال!" تظل زوجتك تردد. امرأة قوية. فاهمة. مثقفة.
اسمع هنا،
ما مفروض تكون عندك أي مشكلة إنو بتاع المليشيا ظل يعتدي جنسيا على زوجتك على مدى عامين. عديل كدة. جريمة بالإكراه. وعشان تفهم. دي سياسة الحكومة الإنت بتحبها. الإمام الإمام مجننا. يا دابك حتبدأ تفهم.
...
تذكر أن باك مشام، شقيق السيدة أبوك مشام، كلم الرئيس كارتر لما زارني في بيت الإيجار في الرياض إنو بتاعين المليشيا "ساقوا أختي وعملوا ليها كدة وكدة وكدة".كلمو بالتفصيل.
وانت برضو سمعت وقريت الكلام بتاع مبارك الفاضل قال ليك إنو بتاع المليشيا "اقترن" بي زوجتك و"أنجبت له"، يعني هو مبارك عمل ليك فتوى شرعية."اقترن بيها"! يعني على سنة الله ورسوله. وقال ليك إنو بتاع المليشيا كان بيعامل مرتك كويس مرات.يعني مفروض ما تشوف فيها حاجة. داير شنو تاني؟
ديل ناس حزب الأمة فاهمين الحاجات دي كويس. وفاهمين الإسلام. قالوا ليك ما فيها حاجة، خلاس اسمع الكلام. إنو بتاع المليشيا "اقترن" بزوجتك و"أنجبت له أطفال"، كلام مبارك الفاضل. ارجع اقراه في سودانايل. يمكن يساعدك ويخفف عليك شوية.
يا مثقف، يا رقيق:
أنا متعاطف معاك. وعايزك تغير آراءك المهببة دي. وعندي ليك نصائح:
ما أسمعك تقول "المرة دي أنا ما عايزها تاني"، و"ما قادر أتحمل"، "بعد الحصل ليها" في دار الرزيقات، وشنو ما عارف. انت كنت مفتكر الحكاية لعب يعني. يا ها دي. آي. عديل كدة. رق.
حتكون شنو كمان تاني؟ وإنت زاتك السبب. لا يوجد رق! حبة خيال مافي؟
وما أسمعك تاني تقول "مراشقات" ولا "مشاغلات قبلية".
...
خليك راجل مثقف، فاهم. إنو زوجتك كانت مُكرهة، وما عندها أي ذنب.
يعني مشكلتك كلها هسي في الحتة دي بس؟ ما قبيل قلت دي حاجات بسيطة! مشاغبات ومراشقات وعلاقات مرعى وأرض ونعمل صلح نكون أخوان. يلة أمشي أعمل صلح مع آدم عبد الرحمن، بتاع المليشيا!
بس خلاص لما جينا للموضوع الأساسي، قعدت تتبكى وتعمل عندك أزمة نفسية!
وما اسمعك تاني تقول التومات الحلوات ديل "بنات حرام أنا ما عايزهم". كلام أولاد العرب دا خليهو. تذكر إنك رجل"مثقف".
شايف أبوك مشام أنقوي سيدة راقية وفاهمة كيف؟ حصل ليها نفس الحصل لي زوجتك. بالتفصيل..
سمعت قصة أبوك مشام أنقوي؟
قالت إنو البنتين الهي ولدتهم بالإكراه من الرزيقي بتاع المليشيات ما بناتو ولا حاجة. قالت إنهم ديل بنات راجلها دينق دينق ماقوت. البتحبو. ودينق فرح بالبنتين بعد ما شافهم مع أبوك بعد حررها عيسى مادبو. دينق طار من الفرح. سموهن أنقار وأشان دينق دينق ماقوت. أبو الزفت!
الرجالة الجد جد، يا ها دي. مش الرجالة التانيةالفي مخك. الفي مخك دي، أي واحد ممكن يعملها. ######ك الألزيشن المربوط دا ممكن يعملها وهو مربوط. خليك راجل جد جد.زي دينق دينق.
ولما تبقى راجل جد جد زي دينق دينق ماقوت، يمكنك أن تبدأ تفهم "الرق".
الرق يا هو كدة. بالعربي السوداني، ....
عشاري أحمد محمود خليل
mailto:[email protected]@outlook.com
نقلا عن سودانايل
|
|
 
|
|
|
|
|
|
|
|
Re: بالدارجي، بالمفضوح، والمستفز: عشاري يكتب عن الرق في السودان (Re: Nasr)
|
ود عباس
إزيك
قريت كلام عشاري كاملا
والحالة التي يتحدث عنها لا شك حالة رق
لكني أسأل عشاري
هل هناك مؤسسات قائمة تعمل في استرقاق الناس
تبيع وتشتري وتنهب وتخطف ؟
هل هناك تجارة بشر في المنطقة بكامل مقومات تجارة البشر ؟
وسؤال للذين أنكروا وجود الرق
هل الدينكا لم يتمكنوا مطلقا من اسر نساء الرزيقات؟
وهل من الممكن أن يسردوا لنا قصة اسيرة مقابل قصة الأسيرة الدينكاوية التي أوردها عشاري ؟
| |
|
|
|
|
|
|
|
|
Re: بالدارجي، بالمفضوح، والمستفز: عشاري يكتب عن الرق في السودان (Re: Nasr)
|
نصر
كيفك يا زول
وجود مؤسسة الرق في السودان وجود قديم ومعروف وما بيحتاج لأدلة، والمؤسسة التقليدية انتهت، لكن بقت موجودة كممارسة ثقافية إجتماعية، بمعنى أنها موجودة في الذهنية الإجتماعية السودانية.
وحدة د. عشاري ربما مطلوبة للتخلص منها نهائياً، في إطار "الشينة منكورة"، وحتى المدافعين عن عدم وجودها والمنكرين في نظري، يلعبون دوراً مهماً في تقليص انعكاسات الرق في مجتمعاً، بمعناه الحرفي أو الإصطلاحي.
كون أن الكثير من الناس يصنفون بعضهم البعض كعبيد وسادة، هذه الظاهرة موجودة، وبين المثقفين والأميين والبدو والحضر على حد السواء.
وكثيراً ما تصدمني هذه العبارات (وأنا صغير لحدي سنة خامسة ابتدائي) كنت استعمل نفس العبارات (نقطة التحول كانت في حضور مسلسل جذور)، ومنها تمكنت في مرات (ليست كثيرة على كل حال) في تنبيه اصدقائي أهلي لعدم تصنيف الناس على أساس (عبيد وسادة).
الذهنية التصنيفية تعمل أحياناً بمعزل عن الوعي (راجع عبارة تشومسكي في صلب مقال عشاري)، وبالتالي هذه الذهنية تسعى للتبرير دوماً والإنكار، ولكن الإحتفاء بها هنا هو أنها (تدين هذا الفعل) وهي مرحلة متطورة.
لو أخذنا مجتمع سودانيز اونلاين، لشاهدنا كيف أن الكثير من (النخبة) استعمل عبارات عنصرية (أو إيحاءات) وكيف اضطر إما للإعتذار أو التبرير. وهنا تنبع أهمية عمل مثل عمل د. عشاري (بصرف النظر عن النوايا)
لأنه بإختصار جعلنا نتبه لمثل هذه الممارسات (مهما كانت اسبابها من مشاكل في المرعى أو غيره).
أقول قولي هذا وأنا انتمي لمجموعة قبلية في السودان ما زالت تطلق النعوت على مجموعات أخرى بأنهم (عبيد وخدم)، وهذا معنى من معاني "الرق" التى أقصدها هنا.
فعشاري (كعالم لغويات) يعرف جيداً هذه القضية، ووجودها في مجتمعنا هو من الأشياء التى تعمق وتزيد من حالة الإضطراب السياسي والإجتماعي (حالة الجنوب والغرب الآن).
ربما تبدو أخف عبارات ثقافة الرق هي عبارة (ود ناس وبت ناس) وهي مقابل موضوعي (لعبد وخادم)، وهي عبارة كانت ومازالت اكثر العبارات انتشاراً في إطار الرق الثقافي وربما لا ينتبه ناطقها للمدلولات التي تحملها.
أراني مصطفاً مع نصر في دعوته لمزيد من "الحساسية" تجاه الموضوع. والقصة تبدأ بالقوانين الرادعة والحافظة للحق.
لأن ما في النفوس لا نستطيع تغييره، وعندما يعود أي واحد أو واحدة منّا إلى بيته له مطلق الحق أن يقف أمام المرآة ويرى نفسه سيد الناس جميعاً وأعزهم منزلة، وأنا مالادونه من الناس هم مجرد عبيد وخدم له ، ولكننا سنعمل أن تظل دعاواه هذه حبيسة المسافة الفاصلة بينه وبين مرآته تلك.
في عقدنا الإجتماعي ستون الأشياء صعبة ولن نسمح له ببمارسة رؤاه لنفسه وللآخرين على أي من مكونات مجتمعنا.
شكراً لدكتور عشاري ودكتور بلدو على إثارة الموضوع وجعل النقاش حوله مفتوحاً.
شكراً للمنكرين للرق في السودان بكافة تمظهراته، فبإنكارهم وضعتم الرق في مكانه الطبيعي كشئ مستنكر ولا يجوز الدفاع عنه.
وشكراً لمحاربي الرق في السودان بكافة تمظهراته، فبإثارتكم الدائمة له قللتم كثيراً من آثاره الظاهرة، ومهمدتم لمجتمع خالي من العنصرية للأجيال القادمة.
| |
|
|
|
|
|
|
|
|
|
Re: بالدارجي، بالمفضوح، والمستفز: عشاري يكتب عن الرق في السودان (Re: Nasr)
|
this is disgusting and outrageous
أقسم بالله العظيم أن هذا البلد قد أهين على يد ابنائه حتى فقد قيمة الوطن نفسها..
حينما كتبنا عن الرق فى ذات المكان وفى منابر أخرى..
انبرى لنا بعض الذين يظنون فى السودان خيرا..
وكّذبوا ما كتبناه...
رغم شهادات أخرى للمنظمة السودانية لحقوق الانسان وهى مّوثقة بكل الوسائل..
لا توجد مؤسسات للرق فى السودان..
ولكن الحكومات السودانية تعلم بالامر وتشجعه وتتستر عليه..
حكومة الصادق المهدى الثالثة هى التى أعادت الرق الى السودان كاشرس ما يكون...
والدليل هو هذا الكاتاب..
الانقاذ مارست الرق...
وجمعت ابناء النوبة فى معسكرات فى شمال كردفان وعلى دفعات...
من عمر خمسة سنوات الى اثنى عشر عاما ممن كانت تجمعهم فى الغارات على الاهالى فى فترة التسعينيات..
و ما فوق ذلك يجّند راسا للحرب ليقتل أهله..
ثم أختفوا جميعا ولا أحد يعرف عنهم شيئا..
الانقاذ استخدمت ميناء سواكن ايضا عند أول قدومها..
لممارسة هذه التجارة..
وقد ألتقى أحد الجنوبيين بأبن أخته فى أحدى الدول التى استرقته...
فطلب منه الصبى أن يذهب ولا يعود ليبحث عنه...
لآن سيده لو علم بألامر فسوف يقتله..
ثم الانقاذ مارست نظام السخرة على النوبة فى معسكرات شمال كردفان فى تسعينيات القرن الماضى..
بالعمل فى المشاريع الزراعية الكبيرة المملوكة للقطط السمان فى الدولة..
الآمر الذى اوصلناه الى الامم المتحدة...
ورد على عثمان محمد طه بأن السودان سوف يعمل على محاربة الرق..
وليتنى أستطيع أن ارفق المستند الموجود بطرفى..
خلاصة الموضوع..
مالم تحصل ثورة حقيقية فى السودان...
عن الانسان وقيمته وحقوقه...
فسوف نظل دولة هلامية لا تحمل من مقومات الدول شيئا..
ونظل نلف حول أنفسنا كما الدراويش فى حلبة الذكر..
| |
|
|
|
|
|
|
|
|
|
Re: بالدارجي، بالمفضوح، والمستفز: عشاري يكتب عن الرق في السودان (Re: nour tawir)
|
ما كتبه عشارى يدعم ويعزز كتاب (من سمات الرق فى السودان)..للراحل المقيم ابراهيم نقد..
وهذا معناه أن الرق لم ينته فى السودان فى أى مرحلة من مراحلة..
فالقترة الزمنية التى كتب عنها ابراهيم نقد..
والان عشارى..
فترة زمنية محدودة..
وليس هناك ما يضمن عدم وجود مستتر للرق بين كتابى نقد وعشارى..
يحدث كل هذا بسبب المفاهيم العروبياسلاموية فى السودان..
| |
|
|
|
|
|
|
|
|
|
Re: بالدارجي، بالمفضوح، والمستفز: عشاري يكتب عن الرق في السودان (Re: nour tawir)
|
تعرف يا الصادق
Quote: وجود مؤسسة الرق في السودان وجود قديم ومعروف وما بيحتاج لأدلة، والمؤسسة التقليدية انتهت، لكن بقت موجودة كممارسة ثقافية إجتماعية، بمعنى أنها موجودة في الذهنية الإجتماعية السودانية.
|
وفي ظروف بعينها
الرق قفز من "الذهنية"
وصار واقعا كما تحكي وقائع إسترقاق أبوك
موضوع مقال عشاري
وجود الرق في الذهنية عمل مخيف
وعودته بلحمه وشحمه دا الخايفيين منه بالجد
لذلك
وكما أشرت
يجب أن تتواصل حربنا ضده
والحرب ما تقيف إلا أن نري
مثقفي الجلابة
من ناكريين ومبررين ولا مبالين
في طليعة المحاربين
| |
|
|
|
|
|
|
|
|
|
Re: بالدارجي، بالمفضوح، والمستفز: عشاري يكتب عن الرق في السودان (Re: Nasr)
|
أتفق معاك في النقطة دي يا نور
Quote: ما كتبه عشارى يدعم ويعزز كتاب (من سمات الرق فى السودان)..للراحل المقيم ابراهيم نقد..
وهذا معناه أن الرق لم ينته فى السودان فى أى مرحلة من مراحلة..
|
لكن بختلف معاك في دي
Quote: وليس هناك ما يضمن عدم وجود مستتر للرق بين كتابى نقد وعشارى..
يحدث كل هذا بسبب المفاهيم العروبياسلاموية فى السودان.. |
لو قريتي كتاب نقد عن الرق
مرة تالتة ورابعة
لرأيتي أن الرق موجود في معظم الثقافات وفي مختلف أنحاء العالم
وفي مختلف العصور
(وبمختلف التبريرات والحجج
وأحيانا "النصوص")
(يعني ما إختراع عربإسلامي)
وسيكون الإسلام خير عون في محاربته
إن شاء الله
وكان العرب "والعروبيين"
دايريين يطور ثقافاتهم ومناهج تفكيرهم
ويندرجوا في الحرب ضد الرق
وثقافته
فألف مرحب بهم
| |
|
|
|
|
|
|
|
|
|
Re: بالدارجي، بالمفضوح، والمستفز: عشاري يكتب عن الرق في السودان (Re: Nasr)
|
Quote: وكان العرب "والعروبيين"
دايريين يطور ثقافاتهم ومناهج تفكيرهم
ويندرجوا في الحرب ضد الرق
وثقافته
فألف مرحب بهم |
الأستاذ نصر ،
كثيراً ما تستوقفني الآية 221 من سورة البقرة:
(وَلَا تَنْكِحُوا الْمُشْرِكَاتِ حَتَّى يُؤْمِنَّ وَلَأَمَةٌ مُؤْمِنَةٌ خَيْرٌ مِنْ مُشْرِكَةٍ وَلَوْ أَعْجَبَتْكُمْ وَلَا تُنْكِحُوا الْمُشْرِكِينَ حَتَّى يُؤْمِنُوا وَلَعَبْدٌ مُؤْمِنٌ خَيْرٌ مِنْ مُشْرِكٍ وَلَوْ أَعْجَبَكُمْ أُولَئِكَ يَدْعُونَ إِلَى النَّارِ وَاللَّهُ يَدْعُو إِلَى الْجَنَّةِ وَالْمَغْفِرَةِ بِإِذْنِهِ وَيُبَيِّنُ ءَايَاتِهِ لِلنَّاسِ لَعَلَّهُمْ يَتَذَكَّرُونَ.)
تحياتي
| |
|
|
|
|
|
|
|
|
|
Re: بالدارجي، بالمفضوح، والمستفز: عشاري يكتب عن الرق في السودان (Re: Nasr)
|
Quote: وكان العرب "والعروبيين"
دايريين يطور ثقافاتهم ومناهج تفكيرهم
ويندرجوا في الحرب ضد الرق
وثقافته
فألف مرحب بهم |
الأستاذ نصر ،
كثيراً ما تستوقفني الآية 221 من سورة البقرة:
(وَلَا تَنْكِحُوا الْمُشْرِكَاتِ حَتَّى يُؤْمِنَّ وَلَأَمَةٌ مُؤْمِنَةٌ خَيْرٌ مِنْ مُشْرِكَةٍ وَلَوْ أَعْجَبَتْكُمْ وَلَا تُنْكِحُوا الْمُشْرِكِينَ حَتَّى يُؤْمِنُوا وَلَعَبْدٌ مُؤْمِنٌ خَيْرٌ مِنْ مُشْرِكٍ وَلَوْ أَعْجَبَكُمْ أُولَئِكَ يَدْعُونَ إِلَى النَّارِ وَاللَّهُ يَدْعُو إِلَى الْجَنَّةِ وَالْمَغْفِرَةِ بِإِذْنِهِ وَيُبَيِّنُ ءَايَاتِهِ لِلنَّاسِ لَعَلَّهُمْ يَتَذَكَّرُونَ.)
تحياتي
| |
|
|
|
|
|
|
|
|
|
Re: بالدارجي، بالمفضوح، والمستفز: عشاري يكتب عن الرق في السودان (Re: بدرالدين بابكر مصطفى)
|
لمزيد من الفائدة نجلب هنا مساهمة لشوقي بدري
عن ذات الموضوع
Quote: مبارك الفاضل والفرفصة
09-23-2014 08:18 PM
حدثت مذبحة بشعة للدينكا في مدينة الضعين حيث الشرطة والجيش والسلطة المدنية والسلطة القبليه ممثلة في الناظر والعمد والشيوخ . وقتل وحرق 2 الف من المدنيين اغلبهم من النساء والشيوخ والاطفال . وكان هذا في فترة حكومة ديمقراطية يقودها حزب الامة . وكان مبارك احد وزراءها
في حكومة ديمقراطية سابقة يقودها حزب الامة حدثت مذبحة واو التي كانت في حفل زواج مذدوج . وقتل الجيش الاغلبية وماتت عروس وبقي عريسها ومات عريس وبقيت عروسه . وجلس رجال الجيش للشرب والاكل من طيبات العرس .
وكانت مذابح كثيرة منها مذبحة جوبا ومذبحة رمبيك . واغتيالات كثيرة منها اغتيال الزعيم وليم دينق عند كوبري التونج ومعة ستة من رفاقه . واشارت اصابع الاتهام للظابط صلاح فرج . وقتل ممثل البابا الاب لوهيرو ومعه مجموعة من التابعين . وقتل القس ووالد الاخ مارتن مجاك امام داره في رمبيك بواسطة الجيش وواصلت السياره طريقها مثل ساعي البريد . ولم تحرك الحكومة الديمقراطية ساكنا .
ولكن في مذابح الضعين حدث الامر في مدينة وامام شهود . واحرق القطار والبشر , وسمعت من الناس ان شحوم الاجساد البشريه المحترقة كانت ظاهرة علي الرمال لسنين . وكتب الدكاترة عشاري وبلدو كتابا . وصف المذبحة بالتفصيل واعطوا اسماء المجرمين وشكلهم ومقاس احذيتهم . ولم تتحرك الحكومه الديمقراطية . بل قبض علي عشاري لان بلدو كان خارج السودان ووجهت له الديمقراطية تهمة محاربة الدولة . وتلك التهمة عقوبتها الموت . ولم يقدم الجناة الي المحاكمة .
والآن نقرأ لمبارك فرفصة وتملص من المسئولية في سودانايل. ويقول انه ليس مسئولا عن حظر عشاري من السفر الذي امتد لتسعة سنوات . وان وزير الداخلية وقتها كان سيد احمد الحسين . وهذا يعني ان مبارك الذي كان يدفع له الدينكا مرتبه ومخصصاته كمواطنين ليس معنيا بما يحدث لهم . وانه كان يجلس في مجلس الوزراء كمتفرج .
لقد نشر البطل عشاري وثيقتين سريتين تؤكد ان السلطات الامنية قد برأته وطالبت برفع الحظر عن قرار منعه من السفر . ويقول مبارك في فرفصته المنشوره في سودانايل ، انه عندما صار وزيرا للداخلية لم ياتيه التماس من عشاري او اي حهة اخري . الالتماس والاستسماح وطلب العفو يقدم للملوك والاباطرة في الديمقراطية هنالك حقوق المواطن . والوزير خادم واجير عند المواطن . والوزير لا ينتظر الالتماس . ولقد اعتقل في زمن مبارك الاساتذة الحاردلو و الواثق كمير ومحمد محمود وآ خرين الذين ذهبوا لمفاوضة قرن في ندوة امبو . ومنعوا من السفر في ظل نظام ديمقراطي يكفل حريه الرأي والتنقل . انها المحن السودانية .
يتفرفص مبارك ويقول ان ما حدث هو شئ عادي يحدث بين القبائل السودانية . كما يحدث اليوم بين الرزيقات والمعاليا . وان هنالك استعلاء يمارس بين القبائل . فما يحدث بين المسيرية ليس اي استعلاء فهم قبيلة واحدة ولكنه اقتتال بسبب مصالح اقتصادية . ولقد لعبت الانقاذ كعادتها واججت النيران . وساعد وجود السلاح الناري في ايدي الجميع . واول من وضع السلاح الناري في يد المراحيل لمقاومة الحركة الشعبية هو حزب لامة والكيزان . وكان عصام ابن الترابي يوزعه بنفسه ، بمباركة خاله ووالده . ولكن غارات القبائل الشمالية علي الجنوبيين سمتها الاستعلاء العرقي .
ولقد هدد الظابط محمد باشا ابن السلطان دينق مجوك لانه منعه من نهب ابقار الدينكا وارجع الابقار المنهوبة لاصحابها . وقتل ثلاثة من ابناء السلطان وثلاثة من ابنائه في لحظة واحدة . ولم يطاله القانون . واغتيال السلطان الاخير ماهو الا نتاج للتعالي العرقي .
في حاله السيدة ابوك التي اغار الرزيقات علي قريتها وقتلوا ابوها واهلها واخذها خاطفها وطفلها الرضيع الي قريته . وقام ببيع طفلها بعشرة خراف . يقول مبارك ان والده الخاطف كانت رحيمة بابوك وان الخاطف قد تزوج ابوك وخلف منها توئمين . وهذا لا يعني ان هنالك جريمة . والذي ساعد ابوك هو ان شقيقها كان ظابطا في الخرطوم . والا لما انقذت وعاد لها ابنها وذهبت لتعيش مع شقيقها .
هل يقبل مبارك بمثل هذا الزواج لشقيقاته او بنات اسرته . السيدة ابوك كانت متزوجة . وعندما تقول انها عندما كانت لا تقدر علي العمل الشاق كمسترقة يقوم خاطفها بتحطيم اسنانها . ووزير الداخلية حامي الدم والمال والعرض لا يتأثر .
بالنسبة لي السيدة ابوك ليست باقل قيمه من شقيقاتي او بناتي .واعرف سيده من الدينكا . كانت تطلب مني ان اتوقف في شارع العرضة في نهاية الثمانينات لكي تنظر الي منزلها في شارع العرضة . وهو المنزل الضخم من الطوب الاحمر والذي هو صوره طبق الاصل من المنزل الذي يجاوره ، وهو منزل آل محمد علي شوقي صديق والد ابنها. وكانت تطلب مني ونحن في طريقنا الي ابنة خالتها والدة الاخت مريم النجومي كابتن فريق كرة السلة في الخرطوم ، ان اتوقف في الاسكلة في مواجهة فندق الهيلتون حيث كانت تصل بالباخرة من الجنوب وفي صالونات الدرجة الاولي وتتنزه بالحنطور في الخرطوم مع زوجها وهي ابنه السلطان . وكان زوجها يفتخر بانه حفيد التربال وتزوج ابنة السلطان . تلك كان الوالدة منقلة عمر مرجان والدة عمر ابراهيم بدري . كان ذالك زواج دفع مهره بقطيع من الابقار حسب عادات الدينكا . والا لما صار عمر ابنا لابيه .
ابوك اسم مقدس عند الدينكا . ولقد قلت عند موت الزعيم جون قرنق . وكنت اسميه باكون ديت او الفيل الكبير . اهلنا الدينكا اروع الرائعين يقولون عن المصاب ضارعين . ابوك ام دينق ،احضري من السماء لتملئي بيت دينق بالضياء . فحياتنا قد صار مليئة بالحزن والشقاء ,,, فحسب المثولوجيا الدينكاوية فابوك هي ام دينق ويطلب منها الرحمة . ودينق احد الملائكة الثمانية الذين يتواصل الانسان عن طريقه بالخالق ,,نجاليك ,,. واثنين منم من الاناث ومن الآخرين قرنق ارانق ، دينق ونقور .
ان الجنوبيون اهلنا واحبابنا . واذا كان الشماليون يقتنعون بهذه الحقيقة لما انفصل الجنوب ولعشنا جميعا في سلام .
في قضية تيجوك يكتب عشاري بالتفصيل . بعد دردقة برميل الجازولين بواسطة من كتب عشاري وبلدوا اسمائهم . خرجت من القطار تيجوك ، لتجد زهرة ابنة العمدة مسلحة بعكاز وسكين وبعد ان طعنتها علي راسها وخاصرتها تنتزع الف جنيه كانت تحت ثيابها وتنتزع ابنها وتأخذه الي قريتها . وتتمكن استخبارات الدينكا من استرجاع الطفل فيما بعد . ماذا عمل الصادق ومبارك لهؤلاء المجرمين ؟؟ واليوم يتفرفص مبارك ويحاول بتبريرات فطيرة ، ويقول ان هذا يحدث بين القبائل . متي اختطف المعاليا اطفال الرزيقات بغرض الاسترقاق ؟ هل يستطيع مبارك ان يتخيل خطف ابناءه او ابناء اهله بغرض ارسترقاقهم ؟؟ المشكلة ان عدم محاسبه المجرمين في حوادث الضعين . شجع آ خرين في حرق وقتل الفا من الشلك في الجبلين . وكان هذا بعد سنتين من مذابح الضعين , وبالرغم من البوليس و القرب من كوستي والجيش السوداني الذي كان يجوب المنطقة لم يسلم الشلك . وهذا الامر اصابني باقتناع بأن السودان كان يسير نحو الهاوية . والشلك اهلي وعشت وسطهم ويحمل اربعة من ابنائي دمائهم . والشلك شعب منضبط لهم حكومة مركزية ممثلة في الرث والسلاطين والشيوخ . ولهم نظام ديمقراطي راقي .
ويتفرفص مبارك ويتحدث عن مذابح بور في 1991 ومذابح بانتيو قبل شهور . وهذه اشياء ليست في المقرر او الاجندة . الموضوع هو مذابح الضعين واعتقال عشاري ووضعه في السجن وحظره من السفر . ومواجهته لعقوبة الموت في نظام ديمقراطي . فليرد علي هذه الاسئلة . ولا تحاول ان تلقي اللوم علي الانقاذ . فانت كنت باختيارك جزءا من الانقاذ . ووصفك الصادق بآكل الفطيسة . وقلت انت ان الصادق قبض من الانقاذ ولا يزال يقبض . وصدقناكم الاثنين . فالساعة الخربه تصدق في تحديد الوقت الصحيح مرتين في اليوم .
لماذا لم تقدم انت كوزير للداخلية عمر حسن احمد البشير الي المحاكمة عندما ازهق ارواح ثلاثة من البشر في عرس في المجلد عندما كان يجاري فرسان المسيرية ويطلق الرصاص بيد واحدة في حفل عرس . ووقتها صديقك فضل الله برمه وزير للدفاع خلفا للصادق المهدي .لماذا ولماذا ومرة اخري لماذا .
نحن الذين تفتحت عيوننا علي الدنيا وسط الدينكا ، يرتبط البشر بالنسبة لنا الي موتنا بالدينكا . وعندما نقرأ في مذابح الضعين كيف ضربت دينكاوية حامل وداسوا بطنها حتي اخرجت جنينها لا نقدر ان نمسك دموعنا بعد كل هذه السنين لانها اختنا . وعندما نسمع مبارك يتحدث عن اغتصاب اختنا او ابنتنا ابوك ويصفه بالزواج ، نتألم نفس الالم عندما نسمع الترابي يقول ان البشير قد قال ,, ان الغرباويبة اذا ركبها جعلي فهذا شرف بالنسبة لها ,,.
لقد كان عمر نور الدائم رحمة الله عليه يقول بملئ فمه البلد بلدنا وانحنا اسيادها . والبتكلم حنضربوا بمليشياتنا . وبعد ده حنسلمها للمسيح الدجال . ولقد سلموها للترابي الدجال . كان اجدي بالدكتور ان يقول البلد بلدنا وانحنا خدامها . وتصرف الصادق ومبارك من منطلق البلد بلدهم .
وعندما حقق الرائد آدم دليل الذي صار لواء شرطة فيما بعد مع عشاري . لم يتطرق للتهمة وكان ما يهمه كما اورد عشاري هو ، كيف كتبوا ؟ ومن ساعدهم ومن مولهم ؟؟وهذا ما كان يهم الثالوث عمر مبارك صادق .
من وثائق عشاري ان ادارة المباحث الجنائية المركزية بوثيقة ,, سري للغاية ,, بتاريخ 10 مارس 1988 الي السيد مدير الجوازات بتبرئة الدكتور عشاري احمد محمود من البلاغ رقم 17836 لعام 87 وبتوقيع لواء شرطة عبد اله عبده كاهن .
ووثيقة اخري بتاريخ 13 مارس 1988 من وزارة الداخلية سري وعاجل لسلطات مطار الخرطوم وثغور متعددة بسبب رفع الحظر عن دكتور عشاري . وبتوقيع نقيب شرطة عبد الحافظ ابراهيم عن فريق الشرطة . وبالرغم من هذا لم يطلق سراح عشاري . لان البلد بلدهم وهو اسيادها والبقية اولاد الغسالة . ويستعجب البعض كيف وصلنا الي هذا الدرك . ولم يستمعحزب الامة من قبل لقرار المحكمة الدستورية بقيادة القاضي صلاح حسن . بخصوص القضية الدستوريه في الستينات .
من المحن السودانية وكما كتبت انا قبل سنين عديدة وقبل اي اتصال بيني وعشاري ان نطام الصادق ارسل الفانح سليمان من دائرة المهدي التجارية لمساومة عشاري . والآن يعود اسم الفاتح . وبينما عشاري في سجن الانقاذ يصير الصادق شريكه في السجن . اما مبارك فلقد سهل له صهره غازي للهروب خارج السودان .
شوقي بدري
|
نقلا عن الراكوبة
| |
|
|
|
|
|
|
|
|
|
Re: بالدارجي، بالمفضوح، والمستفز: عشاري يكتب عن الرق في السودان (Re: تبارك شيخ الدين جبريل)
|
شكرا تبارك علي إيراد مقال مبارك
ننقله هنا للفائدة
Quote: تعقيب علي دفوعات الدكتور عشاري .. بقلم: مبارك المهدي طباعة أرسل إلى صديق
السبت, 20 أيلول/سبتمبر 2014 09:35
المنهج الذي يقترحه الدكتور للتشهير بقضاة باعتبار انهم أفسدوا استنادا علي بيانات يتقدم بها طرف واحد دون وجود آلية محايدة تستمع للطرفين والشهود وتقيم البيانات وتصدر حكمها يعتبر منهج معوج لا تقره اي شرائع وضعية كانت ام سماوية.
نشر وقائع الفساد في الصحف امر مطلوب ومعمول به وهو مدخل لفتح التحقيقات الرسمية لتبيان الحقائق قبل إصدار اي إدانة ولذلك الصحف نفسها لا تنشر اي معلومة الا اذا كانت لديها وثائق تثبت تلك المعلومة خوفاً من الملاحقات القانونية التي قد تكلفها غرامات كبيرة.
هذا النهج الذي يدعو له الدكتور عشاري هو ذات المنهج الذي قاده ليصف الحكومة الديمقراطية بقيادة السيد الصادق المهدي بأنها حكومة مجرمة ويصفني انا شخصياً مبارك المهدي باني مجرم هكذا دون اي منطق او أسس فقط الغبن الشخصي.
كنت أتوقع ان يكون الدكتور عشاري وقد نال درجة الدكتوراة في علم الاجتماع اكثر موضوعية وهو يتناول قضايا الشأن العام وان يستطيع التجرد من مشاعره الشخصية وهو يناقش هذه القضايا ولكن حقيقة تفاجات بأسلوبه المندفع بالعنف اللفظي وإصدار الأحكام بهذا الاندفاع.
والغريب انه ليس لي سابق معرفة او تعامل مع الدكتور عشاري، فعندما اصدر كتابه المشترك مع الدكتور بلدو في عام and#1640;and#1639; كنت وقتها وزيرا للصناعة وتابعت من علي البعد تداعيات إصدار الكتاب مما حدا بالأخ سيداحمد الحسين وزير الداخلية آنذاك وبناء علي قرار من مجلس الأمن القومي حظره من السفر. ولذلك عندما وليت وزارة الداخلية في فبراير and#1640;and#1641; كان قد مضي عامان علي الامر ولم استلم منه او اي جهة التماساً ولم يكن هناك ذكر لموضوعهم. ولكن طالما اثار الدكتور الموضوع مرة اخري في مواجهتي لا مانع من تبيان الحقائق والإدلاء برأي رغم انني امتعضت من المساجلة بينه وبين الأخ وليد مادبو ولذلك امتنعت عن التعليق وقتها.
اولا: لا اتفق مع الراي القائل ان ما يحدث بين هذه القبائل من خطف ومساجلات يعتبر رق رغم وجود استعلاء قبلي تمارسه معظم القبائل في السودان علي بعضها البعض.حتي القصة التي أوردها الدكتور عن السيدة أبوك تؤكد ذلك لان السرد أوضح اختلاف في معاملة أفراد الاسرة مع السيدة أبوك فبينما يقسوا عليها صاحب الدار ، تتعاطف معها والدته ثم يعود مرة اخري صاحب الدار ليحسن معاملته معها ويعيد لها ابنها بعد ان يقترن بها وتنجب له أبناء. اذا هذا سلوك فردي وليس جماعي.
ثانيا: حادثة القطار المؤسفة لم تكن مدبرة بل جاءت كرد فعل لقتل الدينكا لعدد من الرزيقات في المرعي في سفاهة وسرقة أبقارهم. فعندما علم ناظر الرزيقات بحادثة الاعتداء تحسب لرد الفعل فقام بحماية عدد من الدينكا في منزله وعدد اخر في نقطة الشرطة او المدرسة حسب ما اذكر والبقية وضعهم في القطار ليبعدهم من الضعين ولكن لسوء الطالع تأخر القطار في التحرك الي ان جاء اصحاب الثأر واحرقوا القطار.
ثالثا: الحكومة وقتها شكلت لجنة تحقيق واللجنة رفعت تقريرها ولكن مثل هذه المواجهات القبلية يتم في العادة تسويتها اهليا من خلال دفع الديات والتعويضات.
رابعا: السودان شماله وجنوبه مبتلي بالمواجهات الدموية بين القبائل التي تنشأ بسبب الصراع علي الارض او كرد فعل لسرقة الأبقار والاختطاف مما يؤكد ان حادث القطار لم يكن بسبب الرق او العرق ومثال لذلك
and#1633;) الأحداث الدموية الشهر الماضي بين الرزيقات والمعاليا حول الأبقار والمرعي والأرض والتي حدثت كرد فعل لمقتل أفراد من الرزيقات اعتدوا علي أفراد من المعاليا وسرقوا منهم أبقار فقام المعاليا بتتبعهم وقتلهم فاستنفرت كل القبيلة وهجمت علي المعاليا، يموت البعض من اجل العصبية وهو لا يدري حتي في ماذا يقاتل.
and#1634;) الحرب التي اندلعت بين المورلي وقبيلة اللوي نوير في جونقلي بسبب سرقة الأبقار واختطاف قبيلة المورلي لأطفال النوير وكلاهما قبائل افريقيا
and#1635;) الصراع الدموي الذي انفجر مؤخراً بين فرعين من بطون قبيلة المسيرية بسبب الارض
and#1636;) الصراع الدموي في منطقة كبكابية بين القبائل العربية حول تعدين الذهب.
انا اسرد كل هذه الأمثلة للاستدلال بها علي طبيعة وحقيقة هذه الصراعات المؤسفة التي فاقم منها ومن ضحاياها وجود السلاح الحديث بسبب الحرب الأهلية وسياسة الانقاذ التي استخدمت تلك القبائل بما فيها القبائل الجنوبية في حروبها الأهلية
لقد ساهمت مع اخرين في التسعينات في انشاء أسواق للسلام في المناطق الحدودية الواصلة بين الرزيقات والمسيرية والدينكا في المناطق التي كانت تسيطر عليها الحركة الشعبية آنذاك تحديدا أسواق واروار في شمال بحر الغزال وكنت أزور المنطقة بصورة دورية واخاطب العرب والدينكا في هذه الاسواق لحثهم علي مزيد من التلاحم والتعاون وقد كانت تلك تجربة ناجحة للغاية بلغت فيها الثقة ان يرسل ضباط الحركة الشعبية زوجاتهم مع العرب ليعالجوا في المستشفيات في الشمال ويعيدوهم معهم الي أزواجهم
اما في جبال النوبة فعندما مارست الانقاذ سياسة الارض المحروقة وانقطع إمداد قوات المرحوم الشهيد يوسف كوة من الجنوب بسبب انشقاق مجموعة الناصر بقيادة دكتور رياك مشار،شهد المرحوم يوسف كوة بان القبائل العربية الحوازمة والمسيرية انقذتهم من الموت والاستسلام وامدتهم بالملح والطعام والذخيرة عبر جسر من الدواب استجابة للنداءات التي وجهناها لهم في محاربتنا لسياسات الانقاذ آنذاك
اما ابلغ تعبير عن انتفاء العنصرية عن قبيلة الرزيقات تمثل في تقديم الرزيقات للأخ الشاب العمدة احمد حبيب رحمة الله علية عمدة الزغاوة في الضعين ليصبح ممثل مدينة الضعين في الجمعية التأسيسية عام and#1640;and#1638; عن حزب الأمة.
وأخيرا يا استاذ عشاري كيف تفسر مقتل عدد and#1634;and#1632; عشرون الف من قبيلة النوير في مدينة جوبا علي يد الدينكا في أعقاب احداث ديسمبر الماضي ردا علي مقتل ضابط وجنود من الدينكا في القيادة في جوبا
او ماذا تقول عن انتقام قبيلة النوير من الدينكا وأبناء دارفور في بانتيو مطلع هذا العام
او ماذا تقول عن مذبحة بور عام and#1641;and#1633; علي يد مجموعة الناصر التي راح ضحيتها and#1637; خمسة الف من الرجال والأطفال والنساء من دينكا بور
هل هذا رق ام عنصرية ام هي حقيقة موروثات قبلية شائهة غذتها ثقافة الحروب الأهلية وفاقمتها الأسلحة الحديثة حيث كانت هذه المعارك بالحراب والسكاكين في الماضي وكان ضحاياها يعدوا علي أصابع اليد
مبارك المهدي
|
كدي أقروا الحتة دي
" تتعاطف معها والدته ثم يعود مرة اخري صاحب الدار ليحسن معاملته معها ويعيد لها ابنها بعد ان يقترن بها وتنجب له أبناء"
يقترن ليه بمرة متزوجة؟؟؟؟؟؟؟؟؟؟؟؟
دا ياتو عرف ودي ياتو شريعة
إذا مبارك ما شايف العنصرية في النقطة دي
فالمصيبة كبيرة
| |
|
|
|
|
|
|
|
|
|
Re: بالدارجي، بالمفضوح، والمستفز: عشاري يكتب عن الرق في السودان (Re: محمد حيدر المشرف)
|
كتب ود قاسم
Quote:
هل هناك مؤسسات قائمة تعمل في استرقاق الناس
تبيع وتشتري وتنهب وتخطف ؟
|
ود قاسم ..حبابك يا صديق
كل سنة و انت طيب..
لمن قريت خواطر الدكتور في سودانايل ، طفر سؤال في راسي:
هل يمكن ان يجرؤ استاذنا دكتور عشاري بان يتخيل انه الكوماندر بول مالونق؟ او بالعدم النقيب اكيك طونق؟
نعم يا ود قاسم كانت هناك مؤسسات قائمة تعمل في استرقاق الناس و تبيعهم بمعدل ارباح كان يصل ثلاثمائة الف دولار في الأسبوع (طبعا وكت داك حكومة السودان بتاعة الكيزان لو دقت راسها في السما ما بتقدر تتحصل على مبلغ ز ي ده..!!).. لكن دكتور عشاري ح يعمل نايم وماح يقول للناس المنظمات دي حقت منو و تابعة لناس منو (نحن طبعا ح نقول في حتة تانية).
كتب ود قاسم:
Quote:
هل الدينكا لم يتمكنوا مطلقا من اسر نساء الرزيقات؟
وهل من الممكن أن يسردوا لنا قصة اسيرة مقابل قصة الأسيرة الدينكاوية التي أوردها عشاري ؟
|
الدنيكا ، سواءا كانوا دينكا ملوال (بحر الغزال) أو دينكا توج أو دينكا انقوك ..حدثت حالات اختطاف لنساء البقارة (مسيرية ، رزيقات ، سلامات) لكن ما تعشم انو تسمع تفاصيل ، لأنو هناك منظومة قيم اجتماعية و ثقافية وغشامة رجالة بتمنع الناس تتكلم في حاجات ز ي دي.. و الدكتور عارف الحتة دي كويس لكن استغراض الأمور بحجب عينو عن رؤية الحقيقة..
اكتر من كده..اقول بالفم المليان يا صديقي و اتحدى فيها أي مزعم كان.. البقارة من الشرق للغرب : اولاد حميد ، حوازمة ، مسيرية ، رزيقات ، هبانية ، سلامات ، تعايشة ، طيلة حروب السودان الحديثة (من سنة 1983) و انتا جاي.. عمرهم ما بادروا.. و كل الأحداث كانت ردود افعال لأحداث سابقة..يعني الناس ديل ما قاعدين يسألوا زول في بكانو.. لكن لو هبشتهم.. بتحصل البلاوي..دي واحدة..
التانية.. منظومة القيم قاعدة توقف الناس ديل من الحكي..لأنهم جهلاء بالحقوق و القانون بيتفكروا الكلام في حاجات ز ي دي عيب.. ودي النقطة التي استغلاها ناس الحلوق الكبيرة التي تعرف تجوعر بصورة كويسة..
ودي ليك يا ود قاسم..ومش معروف..جايز يهدروا فيها دمنا عدييل..في دار المسيرية هناك اسطورة جبلين بت الدرحمان..و قتلت في احداث في سنة 1977..كانت في الفريق..هجموا عليهم الدينكا ( أي و الله الدينكا المساكين ديل ، ) و كتلوا خلق كتيرة.. من بينهم زولة حامل ، كتلوها و شقوا بطنها و مرقوا منها تيمان يرفسوا و شقوا بطونهم برضك..جبلين برضك كانت حامل.. ابوها ركب الجواد و قام متخارج (ما كل المسيرية شجعان ، برضك فيهم الرهيف)..و كانت بتقالع فيهو و بتقول ليهو ( ابا انطيني البندقية)..وكانت بندقية جيم تلاتة..وعمك اتخارج بالجيم تلاتة..و قاتلت هي حتى تم اغتيالها..مثل هذه الحكاوي يا صديقي مثقف يساري مثل استاذنا دكتور عشاري ما عندو زمن ليها .. لأنو مركب نضارة لإتجاه واحد..
ودمتم
كبر
| |
|
|
|
|
|
|
|
|
|
Re: بالدارجي، بالمفضوح، والمستفز: عشاري يكتب عن الرق في السودان (Re: كمال عباس)
|
كبر
سلام
كتبت ليك بهناك وما شفت المداخلة دي
لكن على العموم وزي ما قال نصر، القصة مش انتصار لجهة ضد الاخرى، وانت هسع ما تقع في نفس الشيء الانت ما خده على دكتور عشاري
وثق لينا التوثيق الصحيح يعني الرق كله سواءا قاموا بيه البقارة ولا الدينكا
دا الشيء الاساسي النحن بنسعى ليه
ودكتور عشاري حتى لو كان متحيز لجانب مشكور انه خلى الموضوع في الشمس
وبصرف النظر عن منه البيمارسوا مفروض تتم محاربته وكشفه
اكتب لنا اولا عن الرق في منطقتك واعرج على الباقي، لانه زي ما كتبت بهناك
انت بتديني احساس انه مش البقارة بس بيمارسوا الرق لكن الدينكا برضه
ودي لغة تبريرية ما بتشبهك
| |
|
|
|
|
|
|
|
|
|
Re: بالدارجي، بالمفضوح، والمستفز: عشاري يكتب عن الرق في السودان (Re: Nasr)
|
سلام يا نصر المقصود هو إتجاه إسلامي - لا الإتجاه الإسلامي المعرف بالالف واللام - إتجاه إسلامي بمعني مذهب أو مدرسة وكما تعلم فإن الإسلام وعلي الرغم من أنه حض في بعض الحالات علي عتق الرقيق
كما في كفارة الفطر المتعمد في رمضان الا أنه لم يقطع بتحريمه لذا تختلف المذاهب والمفاهيم في مسألة الحظر والتحريم التام للإستعباد....
| |
|
|
|
|
|
|
|
|
|
Re: بالدارجي، بالمفضوح، والمستفز: عشاري يكتب عن الرق في السودان (Re: كمال عباس)
|
يا نصر سلام.,..
لا ينكر الرق فى السودان الا مكابر..
والرق فى السودان شامل مانع..
من بيع البشر...
حتى بيع البلد متر متر..
وأن العقدة الحقيقية فى السودان وسبب كل هذا العناء والتعقيدات..
هو من وراء هذه الممارسة الغير اخلاقية وغير انسانية..
بأختصار...
الرق موجود فى السودان منذ الاذل..
وحتى الآلفية الثالثة..
وهو سبب عدم قبول الاخر...
وهو سبب رفع البندقية...
وهو سبب اضطهاد الغير...
وهو سبب كل البلاوى..
أهمية البوست فى رأيى هى فتح هذا الجرح الغائر فى صدر الوطن...
حتى يتم تنظيفه ومعالجته..
حتى نستطيع أن نلحق بركب الآمم..
التى كلما سارت خطوات الى الامام...
نسير نحو خطوات أوسع الى الوراء..
بشارى لم ينطق عن الهوى..
وابراهيم نقد لم ينطق عن الهوى..
والارقاء الذين تم تحريرهم مايزالون أحياء..
| |
|
|
|
|
|
|
|
|
|
Re: بالدارجي، بالمفضوح، والمستفز: عشاري يكتب عن الرق في السودان (Re: كمال عباس)
|
يا نصر سلام.,..
لا ينكر الرق فى السودان الا مكابر..
والرق فى السودان شامل مانع..
من بيع البشر...
حتى بيع البلد متر متر..
وأن العقدة الحقيقية فى السودان وسبب كل هذا العناء والتعقيدات..
هو من وراء هذه الممارسة الغير اخلاقية وغير انسانية..
بأختصار...
الرق موجود فى السودان منذ الاذل..
وحتى الآلفية الثالثة..
وهو سبب عدم قبول الاخر...
وهو سبب رفع البندقية...
وهو سبب اضطهاد الغير...
وهو سبب كل البلاوى..
أهمية البوست فى رأيى هى فتح هذا الجرح الغائر فى صدر الوطن...
حتى يتم تنظيفه ومعالجته..
حتى نستطيع أن نلحق بركب الآمم..
التى كلما سارت خطوات الى الامام...
نسير نحو خطوات أوسع الى الوراء..
بشارى لم ينطق عن الهوى..
وابراهيم نقد لم ينطق عن الهوى..
والارقاء الذين تم تحريرهم مؤخرا مايزالون أحياء..
| |
|
|
|
|
|
|
| |
Nasr
ودقاسم
الصادق اسماعيل
nour tawir
بدرالدين بابكر مصطفى
تبارك شيخ الدين جبريل
محمد حيدر المشرف
Kabar
محمد على طه الملك
كمال عباس
حامد بدري
فيس بوك
تويتر
انستقرام
يوتيوب
بنتيريست