|
السر الباتع والخيال الواسع في أكل الضفادع
|
الخيال الواسع في أكل الضفادع يبدو ان معظم ادبيات قاموس الإنغاذ "من الليلة حأغير القاف غاءً" ترتبط بالسفسفة وما عارف السر في كدة شنو؟ أتانا بشة شفاه الله بالهوت دوغ وما أدراك ما الهوت دوغ وتبعه وزير ماليته السابق بانهم علمونا أكل البيتزا والآن جاء الدور علي وزير الصحة الولائي مامون حميدة بالجديد المبتكر .. وقال ليكم أخير ليكم تاكلوا ضفادع "تاكلك ام كلكلك" معددأً مزايا الضفادع وبالذات الشحمانه منها بما تحمله من بيروتينات وفتمينات مع سهولة البلع والتحويل الانزيمي للحمة الضفادع بالإضافة لميزة قعونجية اخري تتمثل في من يتناول وجبة ضفادع كاملة الدسم مكونة من شوربة ضفادع ودمعة قعونجات وقعونج بالطوة ودي ممكن تكفيك عن ثلاثة وجبات عملاً بسياسة ترشيد السفسفة اما الغلابة فيمكنهم عمل فتة ضفادع او بوش قعونج وبكرة حنشوف مطعم ضفادع تيك أوي في شكل كنتاكي فرايد فروق وجزارة السر الباتع في اكل الضفادع وغاغ غاغ هبت ثورة الانغاز وغاغ غاغ صبت الأمطارو والناس جمعا للزراعة ساروا. لحسنا الكوع وعرفنا الهوت دوغ واتعلمنا اكل البيتزا ونصحنا باكل القعونجات في عهد الإنغاذ الميمون نحن اكتر شعب انزل في عهد حكامه ليه ما عارف ياريتني كنت عارف!!.. نميري قبل كدة قال لينا البياكل تلاثة وجبات ياكل اتنين والبياكل اتنين ياكل واحدة والبياكل واحدة يصوم الستوت كل اسبوع .. جوا ناس الإنغاز تموا الناقصة وكتر خيرهم اكلونا القعونجات البتقول في زمن الخريف غاغ غاغ غاغ في عملية اعادة تدوير قعونجية لتنظيف البيئة وتسجيل غاغ غاغ كنغمة للجلاكسي. اول مرة في التاريخ اشوف لي حكام مكجنين شعبهم زي حكام الإنغاذ ديل .. حكم تأبيدة مع الأشغال الشاقة.. " 25 سنة في شغل المحاكم يعتبر تأبيدة ولا أيه يا مولانا" وختوا في بالكم فرار الكثير من المحكومين للخارج هرباً من هذا السجن الكبير وبمباركة الجلادين انفسهم يعني العاوز يفوت المطار يفوت جملين! حكم جنن العالم .. شغلوا الناس بعضهم بحق القفة وبعضهم جن في اللفة والباقي شغال واتس آب وآخر ظهور للشعب السوداني كان يوم 6 ابريل 1985. بس خلاث!!
|
|
|
|
|
|