|
|
 التعيس وخائب الرجاء .. البنك السوداااااااااني المصريييييييي
|
السودان بلد غريب تصدقو عندنا اكثر من 30 بنك جارتنا السعودية بترول بالاضافة لي فائض ميزانيتها إنعش السودان عدة سنوات وإخليهو من الدول كان ما كبيرة ممكن تقول عليها الدول مستوي دخل الفرد فيها عالي والمواطن شارب واكل كابي بنزينو مرتاح نايم في الكندشه وممكن كمان تجيب ليها شغل كفالات وعماله تصدقو السعودية فيها (8) ثمانية بنوك فقط لاغير.
ضربنا مثل بالسعودية عشان فرقنا البحر والمشوار قريب.
السودان ماشي في اتجاه بخطة عشرينيه بنك لكل مواطن حكاية بنك لكل قرية انتهت زمااااااان من شدة تطورنا في مجال البنوك اللعيت جار النبي – ابو قمي – العزازي ... تصدقو دي كلها فيها فروع لبنوك.
تحدثنا عن اكثر من 30 بنك بالسودان اما لو عايزين نحصر فروع الثلاثين بنك ما بنقدر البنوك عددها اكثر من المستشفيات والمراكز الصحية بالسودان اول مرة الزول اسمع بنوك تنشطر او تولد بنوك اخري المسألة زي حكاية مواقع النت تكون مع جماعه في منبر تزعل منهم تلم ليك قروب وتعملو منبر جديد .. البنك الزراعي ولدو بنك المزارع وبتو بنك الثروة الحيوانيه اما لو جينا لي بنوك التنمية ديل ناس السفسفه ذاتا عييييييك بنك التنمية الاسلامي – التنمية التعاوني – تنمية الصادرات – اما جماعتنا بتاعين شنو الاسلامي تعد لما تفتر ، المحير والغريب بنك السلام حاجة عجيبه قاعد لي شنو ما خلاس الحكاية انتهت حقو إفرتقو
اما حكاية البنك السوداني المصري الجديد ودعايتو المكرهانا التلفزيون وراهو مصيبه.....
كان عندنا زميلنا كان شغال معانا في البنوك ولاحظ احد العملاء توريداتو كثيرة وحسابو ماشي لي فوق راح تابع خطواتو اتجسس عليهو عرف الراجل بتاجر بين مصر والسودان خلق معاهو صداقة بعد فترة زميلنا قدم استقالتو من العمل ولملم قريشاتو قال عايز اتاجر بين مصر والسودان سأل من الاشياء المربحه قالو القمصان الرجاليه مشي خمي بي قروشو كلها قمصان اشكال واللوان وشحن الكراتين البضاعة وصلت السودان الراجل دقش تجار القطاعي إوزع ليهم.
خيبة امل كبيرة الراجل كل ما افتح كرتون واطلع دستة قمصان القاها مقدمة فقط ... يعني قميص بي لياقة وصدر وزراير ضهريه ما فيهو....
قال ليك اولاد النيل يا حبيب !!!!!
صاحبنا فقد راس مالو وشقي عمرو بعد كده إلي ابقي زي الراجل العجوز والقصة المشهور البتقول:
كان في راجل عجوز كل يوم بمشي البنك بودع فيهو 5000 دولار في حسابو الموظفين احتارو في الامر كلمو المدير بي قصة الراجل العجوز المدير قال ليهم: لو جاء الزول دا نادوهو لي لازم البنك استفيد منو وهو استفيد من البنك بدل القروش تكون في الحساب قاعده بدون فائده ومنها الراجل اتكسب بي فوائد البنك.
الراجل جاء البنك ودخلوهو للمدير سألو المدير : انت شغال شنو؟؟
الراجل : عاطل عن العمل
المدير: القروش بتجيبها من وين وقت عاطل؟؟
الراجل: بعمل تحديات (( واشارط )) مع الناس البكسب إشيل 500 الف دولار
المدير : كذاب ما معقول تكسب اموال بي الطريقة دي قول الصدق يا زول
الراجل : تتحداني أنا ممكن ابوس عيني لو بوستها تديني 5000 دولار
المدير : اتحداك لو تبوسها
الراجل طلع عينو تركيبه باسها ورجعها .. المدير دخل اللعبه وعايز ارجع قروشو قال ليهو عندك تحدي تاني ب5000 دولار الراجل قال ليهو ممكن اعضي اضاني .. الراجل طلع سنونو عضي اضنينو ورجعها ((سنونو تركيبه)).
تاني يوم الراجل جاء البنك دخلوهو الموظفين للمدير قعد اترجي فيهو عليك الله رجع لي قروشي الراجل قال ليهو انا برجع ليك قروشك بتحداك علي حاجة لو فزته برجع ليك العشرة الف دولار ضعف لو انا الفايز تديني 5000 دولار.
المدير قال ليهو: عايز تمقلبني تاني قول لي اول شنو التحدي
الراجل قال ليهو : انت لابس ملابس داخليه لونها اسود
المدير فرحان.. لا كذاب ما اسود ، الراجل : اسود يا زول بتغالطني ، المدير: يا زول انت بتغالطني في ملابسي اللابسه .
الراجل طيب طلع ملابسك خلينا نشوف ثم التفت الراجل بالزجاج خارجا علي الموظفين..... والموظفين كلهم اعاينو باندهاش راح الراجل شال من كل واحد 5000 دولار وقال ليهم ما قلت ليكم انا مديركم بخلي ليكم عريان.
البنك السوداااااااااني المصريييييييي ... غايتو دا بتم ليكم الناقصة من بنوك الانقاذ وبخليكم عرايا .. يا حلليك يا مرسي الما اتهنيت بيهو.
|
|
 
|
|
|
|
عباس الدسيس
فيس بوك
تويتر
انستقرام
يوتيوب
بنتيريست