|
Re: خبر سعيد،،،عاد خالي ود النور من قبره بعد عشرين عاما ميتا،،،والحكومة شاهدا (Re: Mirghani Taitawi)
|
اصلو تاني ما يجوني المثقفاتيه وناس العلوم اقولو لي بقيت تروج للخرافة.. الحاضر اكلم الغائب،،من يوم الليلة دي،،انا ترا ماعندي اي شك.. ومرة حكي لنا الاستاذ كمال الجزولي قصة له مع ترب البنية،، وقتها قلت الزول ده مالو... يا ناس المنبر... يا د سيف النصر يا صحباني شديد الايمان انا،،، بالبعاتي وترب البنية الساحر والسحر واشياء اخر... الموتي صاروا ياخدو رواتب... بتعرفو خير من الحكومة وهاكم دي قديمة ,, خالي الخدر ود الشريف توفي لرحمة مولاه في مستشفي مدني،انا بقرا في مدرسة حنتوب،مات مع المغارب،اكان في امان الله الناس الزارو رجعو قالو طاب،العصير اتنازل،انلمو الدكاترة،مع المغرب اتشهد وادي الروح،الدكاترة عصروا،وجبدو ونفخو،،مافي فايدة،هبشو هنا،وهنا،باصابعينن،سماعتن،،،الفاتحة،،ابوكم اتوفي. معاهو الضو ود الخدر،اللسع حي ده،والطيب ودالفكي ممارض زول،الكهربا قطعت والسحابة شايلة، كسرنا العينين وجهزنا ابونا ،لقينا لينا عربة ذي الكومر شال الجثمان،والسواق ساق معاهو رفيق. انا والطيب،والضو،راكبين بي ورا مع الجثمان،والسواق ورفيقو بي قدام،،الليل اليل،والسحاب شال،والبروق اشالعن،ونحن من ترعة لي ترعة،،وفجاة شلع برق مخيف،اعقبته هدير رعد مهول،،طططططط،صممنا اذاننا،واغلقنا عيوننا،،ثم فجاة...... كان خالي الخدر مصنقرا في سطح العربة،،مصنقرا تماما،،وبصوته ذاك القوي،،،زمجر،،،ياساااتر. انا،والطيب والضو،،بصرخة واحدة،،وقفزنا،،وخضنا الترعة العميقة وجريا علي القرية التي كنا قد اوشكنا وصولها،،وقفت العربة،،ناظر مرافق السايق مايحدث،فوجد ميتنا جالسا،فلحق بنا في صراخ عظيم. كان سايق العربة،مشعشع شوية،،وله دربة يبدو مع الموتي والجثامين،،،ساق العربة حتي القرية،،كنا نحن موتي في القرية خوفا ورعبا،وكان خالي الخدر علي رجليه يستقبل حمدالله السلامة،ولكن علي ضوء الفوانيس والبطاطير لاحظ الناس عيونه المكسورة. من ساعتها ولزمن طويل،حدث حكي وكلام يحتل كل المساحة،قرا لنا التحصين،،وعاش خالي الخدر عشرين عاما،،عشرين عاما لم يمرض لساعه،بعيون مكسرة. حتي موته لم استطع ابدا ان اجلس معه لوحدي،ولا اغشي بيته ليلا ابدا..ومات في اتم عافيته ذات خريف في تمام اللحظة التي شلع فيها برق عظيم. يعطيني الطب والعلم تفسيرا لما حدث،وموقن بذلك،،ولكن من يسكت خوفا في الدواخل،،ان خالي مات وحيا. القصة ليست من نسج الخيال ابدا،مسجلة ومثبتة ومعلومة،
| |
|
|
|
|