حوار عن الفكره الجمهوريه مع الاخ المنصوري !

Quote: يا منصوري ، أنا ما بفتكر إنو الرسول صلي الله عليه و سلم أبلغنا بكل ما يعرف علي إطلاقو ! الرسول صلي الله عليه و سلم أبلغنا بكل ما يخرجنا من الظلمات إلي النور و بكل ما يقربنا من الجنه و يبعدنا من النار ، فواتح الآيات دي لو كان علمها بقربنا للجنه و يبعدنا من النار كان المصطفي صلي الله عليه و سلم كلمنا بيها . ال Job description بتاعت الرسول صلي الله عليه و سلم إنو يبلغنا بكل تفاصيل ما يبعدنا عن النار و يقربنا للجنه ، ما إنو يورينا كل ما يعلم ! فكل ما سكت عنه صلي الله عليه و سلم نحن ما مأمورين بمعرفتو لانو معرفتو لا بتبعدنا من نار و لا بتقربنا لجنه !! فهل يعقل يا منصوري إنو تكون في رساله تانيه للعامل منهم أجر سبعين من الصحابه و الرسول صلي الله عليه و سلم ما يتكلم عنها اصلا و لا في حديث واحد ؟ فكر فيهو صلي الله عليه و سلم زي الزول البيوصف ليك طريق سفر إنت ما عارفو ! الرسول صلي الله عليه وصف لينا بدقه متناهيه كيف نبعد من النار ونصل للجنه ، ورانا كل التفاصيل البتهمنا في السفر ده ، الحاجه السكت عنها معناتها ما بتهمنا في السفر ده ، زي إنو ما بهمك لمن أجي أوصف ليك تصل بحري كيف من أمدرمان ، أقول ليك الكبري فيهو اعلام السودان معلقه ‎- رغم علمي بوجود هذه الاعلام ‎- لانو ما مهم عشان تصل بحري تكون عارف إنو الكبري فيهو اعلام ، أها فواتح الآيات دي زي الاعلام الفي الكبري ، حتي لو الرسول صلي الله عليه و سلم كان عارف معناها ، ما مهمه في وصف السكه ، لو مهمه كان ورانا ، عشان كده بستغرب والله لمن تدلل لي بإمساك الرسول صلي الله عليه و سلم عن ذكر أشياء ( كفواتح الآيات ) و تقارنها لي بالرساله التانيه اللي إنتو بتزعمو إنو هم المقصودين بحديث ( (قوم يجيئون في آخر الزمان للعامل منهم أجر سبعين منكم)