السفارة العاجزة عن خدمة جاليتها تصدر بيان في حادث غبيرا ...توجد صور للضحايا

Quote: ]صحيفة شبكة سودانيات الاليكترونية . اصدرت السفارة السودانية بالمملكة العربية السعودية الرياض بيانا اليوم تناولت من خلاله ملابسات حادثة مقتل الاسرة السودانية التي تم الكشف عنها امس بمدينة غبيرة ، وشددت السفارة على ضروة الكف عن الخوض في ملابسات القضية تقديرا لحرمة الموتى ، منوهة الى ان رب الأسرة ومن خلال ملفاتها اتضح انه من اصحاب الاخلاق الرفيعة وكان مثالا للوداعة ودماثة الخلق وحسن المعشر والمداومة على الصلوات في المسجد . واشار بيان السفارة الى ان حدب رب الاسرة على اطفاله واسرته وتوجسه من اصابتهم بمكروه كان هو الهاجس الملاحظ عليه من زملائه منذ اصابته بالوعكة النفسية التي تعرض لها اثر اصابته بداء لم يتحمل آلامه . واشادت السفارة بتجاوب السلطات السعودية وسرعة استجابتها لكافة استفساراتها .

سفارة لا تقدم شيء للبني ادميين الذين علي قيد الحياة وتحاول تساعد الموتي ببيانات بعدم الخوض في ملابسات القضية .....عجبي !!!!!
اين السفارة ودورها من حالات كمية السودانيين الذين يعانون من حالات نفسيه ويتجولون بشوارع المملكة ؟؟؟
وماهو سبب الحالات النفسيه ؟؟ مشاكل الجاليه السودانيه التي تنحصر في اسباب الرزق منها تجديد الاقامات التي اصبحت بمبالغ طائلة والحكومة ذادت الاعباء بعودة الضرائب غير الكفيل قال لي وقلت ليهو وما خفي اعظم.
السبب الرئيسي للحالات النفسيه والحوادث ... الخوف من المجهول وهو العودة للوطن.
سمعنا بحكاية المغترب الذي انتهت خدماته وقرر العودة النهائية للوطن واخطر اسرته بمغادرتهم النهائية لتجهيز احوالهم
حلفت الزوجة ... بي التقطعها اليمين ما ترجع السودان.
دخلو الاجاويد .. يا وليه الراجل خلاس شغلو انتهي وعمل خروج نهائي وانتو تبع الزوج وابواب الرزق واسعه في السودان
قالت ليهم: مداينه بي الله كان اكنكش في سلم الطياره ما اركب ليكم
حزم الراجل امتعته وقرر الذهاب مع اسرته وعلي زوجته ان تكون في الامر الواقع وهو الذهاب للسودان كان راضيه كان مابيه .....
عند مواعيد الطياره صباحا افاق الزوج من نومه لم يجد الزوجه بالشقه ..... أي والله
المرأة هربت من البيت وخلت اولادها
والناس نست الخروج النهائي وبقت تفتش في المرأة....
السودان اصبح بعبع مخيف للاسر والعودة تعني الضياع والناس بقت تقول ليك علي الاقل هنا ماكلين وشاربين بلد حتي براميل الوساخه اصبحت محتوياتها اكياس نايلون ولو بقيت احرف متسول ما تطلع ليك منها لفة كسرة بي ملاح بامية بايت.
والحكومة في المفاوضات الترابي والبشير وغازي اتصالحو ..حرام عليكم
والسفارة في العمارة .. وليالي الحقيبه الشعريه والاحتفالات باستقلال السودان كان راجل و ل مواطن سوداني امشي قول ليهم عندي مشكله غايتو كان امرقنك كرعيك سفارة لو جاتك عطشه وعايز تشرب فيها مويه سعر قارورة المياه بزيادة 100% من ريال رياليين
وانت داخل للسفارة تدفع في القروش لما تطلع والحال ياهو ذات الحال وفي جواي صدي الزكري وجرحك يا غرام الروح لا طاب لا بدور ابري.
حتي الجواز انشطر لي عدة جوازات ويبقي كل زول في الاسرة عندو جواز حتي الرضيع... طيب مالو كويس... بس لازم تدفع وعند استخراج الاقامة ما دام الجوازات منفصله برضو تدفع والخروج والعودة بدل كان لجواز الوالد والوالدة باعتبار الابناء مضافيين برضو تدفع لي كل زول الما بخلي الناس تنتحر جماعي شنو !!!
والسفارة في العمارة وبت المدير صلبا كبير ((بت المدير صلبا كبير كناية عن راحت الموظفيين بالسفارة)) ياخ الناس دي وقت تمشي ليهم تلقاهم ليهم جضوم زي حسين خوجلي وتريانيين والمغترب بقي زي السخل نشفان ووشو مسلوب.
حكاية بت المدير صلبا كبير....
كنا شغالين في البنك بمشتريات الذرة تقيف مع العتالة من الصباح لي العصر في شمس الله الحاره ونهاية اليوم تمشي ترفع تقريرك لمدير الفرع القاعد في المكتب والمكيف ضاربو بالجهات الاربعه.
والراجل اقعد ازرزر فيك ... ما عملتو كده ليه ؟؟؟ وهل راعيتو مستوي التخزين الجيد ؟؟؟ والاسعار مالها عاليه ؟؟ وووووو...الخ ،واشرب في كباية الشاية وبين كل رشفه والاخري افك ليك سؤال او انتقاد او ادانة سلوك أو شجب لبعض الاعمال والزول ضارب الضل والروقه وفي النهاية بياخذ بونص اكثر مننا في المشتريات.
الراجل طلع روحنا بالمداقره.
لبت ليهو يوم ومعاي الموظفيين عشان اسجل لينا زيارة ويعرف سير العمل وكمان هناك مشاكل لازم حضورو عشان اعرفا من الموقع ونرجع المكتب نحلها .
كل يوم نقدم الدعوة ازوغ مننا حتي قررنا يوما المدير كان ما جانا في الموقع بنوقف العمل
والراجل بقي في حيص بيص وعلي الامر الواقع وعدنا بعد امشي المدارس لي الاولاد بجينا بي هناك.
مشي جاب يناتو من المدارس راكبين معاهو في العربية وادانا غشوة صغيره
وقف العريبة....
فتح الباب نزل...
العتالة شافو البنات وعندهم جلالات بقولوها وهم شايلين الجولات .... وقلبو جلاله بي اعلي صوتهم ...بت المدير صلبا كبير....
والمدير ركب العربية وقام جاري.....
يا ناس السفارة بالله اطلعو في شوارع غبيرا ما قلنا ليكم جيبو معاكم اسركم تعالو براكم شوفو الحاصل شنو!!
وخلونا من ندين ونشب ونستكر واصدار البيانات.

Quote: رأيك شنو يا دسيس نكوِّن وفد ونقابل لورد كاميرون عشان يرجعوا يصلحوا لينا الحالة ويفكونا تاني عكس الهواء؟

Quote: السفارات عندكم ... سؤال يا دسيس مش في إحتمال العندكم دي سفارات باللام بدل الراء ولّا أنا غلطان؟ من فضلك لو عندك فكرة أعطيني كشف بالرسوم على المواطن السوداني في السفارة بالرياض. تحياتي كبـّاشي الصـّـافي

Quote: يا ربي ناسنا القُدام طالبوا بالإستقلال من بريطانيا عشان شنو؟.

Quote: أخى المحترم عباس...السلام عليكم... سفارة الجن دى سفارة ولا وزارة شئون إجتماعية؟؟...أنا من وجهة نظرى السفارة قامت بدورها بأصدار البيان ده..ولا ما أصدرت كان قلتو ليه ما أصدرت بيبان.....نعم هناك جبايات بتتاخد مننا كمغتربين ماعارفينها ماشة وين لكن ما بتققل من شأن السفارة فى دورها أمام مواطنيها. بوستك ده محمل السفارة المسئولية الكبيرة لهذه الفاجعة ...... إحترامى للجميع....البيان جيد وفى وقته.........

Quote: Hatim Osman · متابعة · جامعة العلوم والتقانة ياجماعة الخير ... بعد السلام والتحيه لكل الاخوه ... انتو بتنفخو في قربه مقدوده ... الجماعة ديل كان سفاره ولا وزاره ولا حكومه عاااامه .. ماشين بمبدأ ال.... تعوي .. والقافله تسير ... نحن بالنسبه لهم لسنا سوى مصادر دخل ليس الا .. سواء برضانا أو غصبا عنا.. ليس بالمال فقط بل حتى بأرواحنا واولادنا .. والبلد ككل مصدر دخل ليهم ديل باعوها وقسموها وتاجروا فينا اشكال والوان ... ونحنا بندفن راسنا في الرمال ..وعارفين اي حاجه .. لكن اذا للم نتحد ضد الظلم والطغاة والمرتزقه ديل مالينا سوا الدعاء .. واخيرا حسبنا الله ونعم الوكيل

Quote: والله يا جماعة من فترة طويييييييييلة ما لاقي اي اجابة للسؤال دا

Quote: السودان اصبح بعبع مخيف للاسر والعودة تعني الضياع والناس بقت تقول ليك علي الاقل هنا ماكلين وشاربين بلد حتي براميل الوساخه اصبحت محتوياتها اكياس نايلون ولو بقيت احرف متسول ما تطلع ليك منها لفة كسرة بي ملاح بامية بايت.

Quote: امل ان يعجل في تكوين جالية قومية تجمع كل اهل السودان لان كل ذلك من مهامها ..

Quote: بت المدير صلبا كبير كااااااااااااااك ارفعو الجلاله دي مادام بتشردوم احكي ليك قصة واقعيه حصلت في السفاره واحده راجلا راقد في العناية ومعاها فواتير بقرابة المئتين الف ريال وزوجها خدمة تلتين سنة ومحمول وجامعات والظروف الخابرنها كلكم جات السفاره ايام الباهي القصيروني داك قدمت ورقها المهم بعد تلتله ناولا تلاتة الف ريال وقاليها دي بطريقة خاصة المهم المرة زعلانه وفي باب السفاره حكت قصتا لاهل الخير لمو ليها الفيها النصيب المهم اللمة طلعت ليها حوالي اتناشر تلتاشر الف وكان في واحد من اولاد المسلمية مسلمي يعني قاليها تمشي بكره الجنادرية تقابلي فلان وسماهو ليها وضروري تمشي قبل تسعه صباحا المرة مشت هناك ولمو ليها قرابت تلات ارباع المبلغ يادسيس في غربتنا دي ممكن عن طريق الجاليات والفعاليات الثقافية والتجمعات القبلية نحل مشاكلنا وماننتظر منهم شئ هم اصلن عملو شنو لانسان الداخل عشان يهتمو ب المغتربين ربنا يرحموم ويغفر ليهم لو امكن ياعبس تشيل الصوره بالجد مابعرفوم لكن قطعت قلبي بالحزن مابالك باهلهم عشم فيك ياحبيب

Quote: وضعت أصبعك في الجرح يا الدسيس.. الواقع مرير والصورة الواقعية أمرّ من ذلك حسبي الله ونعم الوكيل لهم الرحمة والمغفرة وإنا لله وإنا إليه راجعون

Quote: منذ اصابته بالوعكة النفسية التي تعرض لها اثر اصابته بداء لم يتحمل آلامه .

Quote: اها وانت كنتي وين يا سفارة الهنا؟ وماذا قدمتي له؟ هل قمتي بعلاجه؟ أو مساعدته على الخروج من وعكته الصحية التي لم يتحملها؟ من خلال البيان يبدو للقارئ وكأنها كانت تعرف بمرض الرجل واصابته بداء لم يتحمله قال .. ثم وقفت تتفرج عليه حتى حدث ما حدث بيان الشرطة السعودية كان كافيا جدا .. والسفارة بتكون سمعت زينا كدا اتعامل مع السفارة دي زي الدكان امشي ادفع واخد غرضك منهم وشتت برعاية ذات السفارة شتم مصطفى عثمان اسماعيل الشعب السوداني ونعته بالشحات لم يعترض أيا من العاملين فيها على كلامه .. وانت يا عبس تاني لو هاجمته السفارة دي ما بخليكـ .. والله صحي :)

Quote: السفارة العاجزة عن خدمة جاليتها تصدر بيان في حادث غبيرا ...توجد صور للضحايا

سفارة ايه وخرابيط ايه
هو الكيزان ديل بحترموا السودانين فى بلدن لما يتحرموهم برة السودان
ما هم نفس الفصايل مجرمين وحاقدين ومنافقين وحرامية
الحل الواحيد تجنسوا اولادكم ديل بجنسيات اخرى تكون محترمة من قبل العالم تفتح ليهم ابواب المطارات لما يسافروا
ويحترموا فى اى بلد يمشوا ليها
هسي يا الدسيس السعودين ديل لو قعت معاهم لحدى سن المعاش وقالوا ليك بااااى بتمشي وين ؟؟؟

السودان ؟؟

تفتكر اولادك ديل بقدروا يعيشوا في السودان ؟؟
السودان اصبح دمار وبعبع وقبلة بتخوف

غايتوا انا كل يوم ببوس لى ابوى راسوا ورجلنوا لانوا الانقذنا من الانقاذ

Quote: Abdalazeem Alamas • ‏مهندس صيانة وتشغيل‏ في ‏المملكه العربيه السعوديه‏ كلامك كلو صااح لكن الشعب السودان دمر نفسو بنفسو كل ماجا مسئول زائر منطقه الناس استقبلتو بالدفوف والهتافات وهي جيعانه ماقادرة تاكل وكل ماقالو في انتخابات الناس مسكت في الشجرة وقالت دا الضل ياخي انحنا امرنا لله شعبنا جاهل ومتخلف ومابعرف يطلع حقوقو عمر الهادى علوان • متابعة • الاسلاميه سفارة السجم والرمم دي سفاره دي ما فالحه الا في تحصيل القروش Mohd Hasan • متابعة • الدكتور / يوسف الطيب عباس صح لسانك شريف ابو العلا • الأكثر تعليقا • كلية علوم التقانة سفارتنا زي حكومتنا (كلهم حرامية في حرامية) انا اؤكد ان احد من اهل السفارة لم تكن لدية الشجاعة ليسأل عما حدث في حادثة غبيراء موظفي السفارة لا يستطيعوا مراجعة السجون واقسام الشرطة لتفقد حال السودانيين الموقوفين فهل ننتظر ان يفيدونا في حادث بشع ومرعب مثل الذي حدث ؟؟؟؟؟ يوم قتل الفتي السوداني الخوجلي في منفوحة في احداث الاثيوبين خرج السفير المبجل وقال للاعلام ان الفتي قتل (بطلقة نارية ) وكل الجالية السودانية والجيران واهل القتيل كانوا يعرفون ان الراحل الصغير قتل بسكين في منطقة القلب عليه الرحمة .. سفارة شنو في الحر ده ؟؟؟؟ Mohamed Eisa Abaker • متابعة • الأكثر تعليقا • يعمل لدى ‏‎Najran University‎‏ العم كانتونا ينادي بالاستعمار من جديد- هسع يجوا الجماعة ناطين ليك تاني نعيش تحت نار العبودية !!!!!!!!!!- عبودية قال هسع العايشين فيهو دا شنو- واجب السفارة في الأصل متابعة كل شئون رعاياها في الدولة المضيفة - الا عندنا الرعايا في خدمة السفارة

Quote: مداخلة الحبيب إسماعيل عباس

Quote: اخي الدسيس .. في هذا الامر الجلل السفارة لا تتحمل ادنى مسؤوليه .. خليكم منصفين لمرة واحدة في حياتكم .. هداكم الله