روضة السلفي الصغير

Quote: صياغة الإنسان في السودان صياغة الإنسان في السودان ... فكرة عقيمة ... فاشلة سقيمة ... عاقبة وخيمة ... يجب تحطيمها ... من صناع وإلى عمال ... ومن جلاد وإلى سجان . صياغة الإنسان في السودان... ما سبقن عليهو مخلوق ... لا في الإنس ولا في الجان . صياغة الإنسان في السودان ... بما قل وما دل ... يقودوهم قطيع من ضان. وبالتفصيل ... يفرموهم ... يعجنوهم شمال وجنوب ... شروق وغروب ... حسب النهج في الخطة الترابية ... مع الأشباح يحشروهم ومن تمساح ولي سفاح وبالعكاز يكوجنوهم ... والكيزان يغرفوهم ... وبإسم الدين ... وعكس الدين وبي مخا تقول من طين ... وبي نظرية شيطانية ... دبابة وطبنجية ... من حاطب ولي عجان يعوسوهم بينيران لهيب الحرب في الصيجان ... والنسوان ... ثلاث ورباع ... لحاجة نفس في يعقوب بدون عدل ودون قدرة !!! يخموهم نعاجا تابعة للخرفان . سجن وتأبيدة بالجملة ... وعيشة شاقة بالهملة ... مقيدة في زرايب السلطان . ده كله كمان ... عشان ما نقوى نبقى حديد ... هدفنا نزيد بلا تحديد ... مهم بس يكتروا الصبيان ... وما همانا ما خصانا لا تعليم ولا عيشة ... ولا مأوى وإن شاء الله ينوموا في الخيران . والتعليم ليك يا غشيم ... حتأكل نيم ... ما ذات قيمة ... لا أدوات ولا معمل ... بننصب خيمة أو صيوان ومسح سبورة بالقطران ... وبدل كراس تكون ليحان. ويدخل شيخ ويمرق شيخ ... وبي إرهاب يوسع ضرب بالسيطان ... وبدل ما تربية وتعليم صحيح بصحيح ... نواكب المارس للمريخ ... ضرب بالسيخ !!! وسقاية فكر إرهابي ... مخلوط بسموم زرنيخ ... شراب ومحاية للحيران . وبدل ترغيب مع تشجيع وبي تحبيب ... يكون ترهيب ويتأهل خنوع وذليل . هدفنا يكون ضنيب وأضان . أصلوا سياسة مقطوع راسها من الساق ولي ساسها ... ودايما هاينة لي ناسها . وسايطة كمان مع الجيران . والناس وصلت المريخ ... أساسا بإحترام ناسا ... وعلم ساسا ... مدعمة بوفاق الرأي برغم إختلاف ناسا ... وسيلتها مركبة ناسا ... عشان ما يوسعوا إستيطان . وناس الهانة بالجبخانة في السلخانة ... غرف أشباح وزنزانة ... معاهم صول يصول ويجول ... ولا ديغول ... وتلوث بيئة قاتلة مسيئة ... ومستنقع من الباعوض والضبان . ده كل القيل ليهو دليل ... وبيتعليل عيان وبيان كلام نسوان ... ودلالية وو داعية ... في الصدقة والصبحية والدكان ... سياسة الهم ... ما لحقتنا في حلـَـتنا ... في عافيتنا وأمست ونسة في حلتنا ... عدمنا الموية في الحنفية ... لهثنا وراها بالبرميل والجركان . ما بالك كلام جمهور من نمولي ولي حلفا ومن الغرب لي كسلا ... من الشيب والشبان ... جيل القهر والحرمان . والساقية تدور ... هلوموا نجر ... نواصل الكر ... نواصل الفر ... من الكشة وين بتفر . يلتقوا في حبل مبتور ... وكلام مهتور ... ولي خاطرنا ما مجبور ... تخبط وهرجلة قالوا ده الدستور !!! ... يصوغوا الشعب قطع شطرنج في الإيدين ... يمارسوا اللعب بالإذقان. والساقية تدور ... نعيد ونخرج الحيران ... نزيد ونولع النيران ... ما قتل الروح بقى مهنة وبقى إدمان . والخالف من الطلبة وللضباط قبل العيد ... سريع إندفنوا في رمضان . ونقدل ونلبس الدبورة والنيشان ... ونسقي الموية بالبوليمر وبالديدان ... وبالبوتاسيوم نخبز العيش وإن شاء الله يجيبلهم سرطان ... ونزيد ونعلي في البنيان ... والنسوان ثلاث ورباع ... جهرا وبالكتمان ... ومرسيدس بدل تايوتا والنيسان . وحقيقة نقولها ... لا بد قولها ... عساكرنا وشرطتنا وعموم جيشنا دوام مظلوم ... جنى كبدتنا والمصران . والإنسان في السودان قبل ما يصير ذليل مقهور ... أدب فطري وعلم مشهور ... كريم وحبور ... وضمير بلور ... وثقافة مزيج من الدلوكة والدنقر والوازا والطمبور !!! ولها مذاقها في الوجدان . وحب الدين قديم للحين ... ما خلطة ترابيين ... من تمساح ولمرافعين ... ما تدشين وما تمكين . أساسه متين بعمق النيل وطوله وعرضه ... مصوغ إنسان إلهي كمان . وهم ناسين ومتناسين ... للبن الأم ... سقاية نيل وموية بير ... بشريان نقي وأصيل ... معدن شعب عزيز بالحيل ... وجيل عن جيل سليل فرسان . والإنسان في السودان ... قبل يبتدعوا للكوجان والبوجان ... تقول ولدوهوا بأسنان ... فهيم بالفطرة دون تعليم ... ما هوا بهيم ... خصوبة بيئة عالية رفيعة ... بي عادات وتقاليد عظيمة شان ... وهيهات ليهم النية ... دي ما جينات وراثية ... ضمير صافي وحسن نية ... وحب الناس فينا أساس . ونكران ذات فينا صفات ... حقيقة وما أنانية ... بعيدة مجافية للنكران . دي موية نيل إلاهية ونكهة تربة خاصية ... واضحة وبي شفافية ... بيها المولى عز وجل وبيها نمجد الرحمن . خلاصة القول ... نهاية زول وقتل النفس جوه النفس ... وقتل الفن أيا كان في الفنان ... وبدل إبداع ... نصوغ إنسان خنوع وج ب ان ... ومن إسترليني لدينار ... وبالدولار ... نخم الثروة بالكيمان . خطط شيطان من الروضة ولي الجامعة ... خطط مبنية من رملة ... عقول متحجرة وخملة ... وتفصيلا وبالجملة ... وبإذن الله ... سقوطها آيل البنيان .

(عدل بواسطة زياد جعفر عبدالله on 04-21-2014, 10:14 AM)