|
|
|
 Re: علاج نفسي لبريمة و أبو رزقة..عقدة الدونية! د. ناهد الحسن (فيديو) تصوير كوستاوي (Re: بريمة محمد)
|
سلام يا كرمبه
شكرا على إيراد مفاكرة الدكتوره ناهد وشكرا لها ايضا على هبش عصب حساس مع إنها كعادة كثير من المشخصاتين الإجتماعيين حملت على الضحايا كتير.
فى الطرح المطروح ولا خلينا نسميها أزمة وطن النجوم البقى وطن الدواس والمكاتله .. التشخيص متماسك جدا بتاع الدكتوره .. لكنها لم تشير إلى الجناه بشكل واضح فى الجنايه الكبرى الإنت ايضا جاى
تمارس شكل من اشكال إسقاط قهرك على ضحايا فى تقديرى(ضحايا ردات الفعل) وعنوانك ذات نفسو يحمل فى طياتو الكثير . ولا ما كدا ؟
يا كوستا
if you dig deep in this place you gonna find your own #### buddy !!
اذكر فى بدايات عهدى بهذا البكان وذلك قبل 10 سنوات بالتمام والكمال ومع ذات العضوين بريمه وعبدالرازق انت كتبت رد لا يمت للباس الأنسنه اللابسو توه ولا بشبه منصة الاستاذ القاعد فوقه دى يا منقه
( قلت لبريمه وعبدالرازق أسالو مننا بنات البقاره ) يعنى يسألو من فحولتك يا سعادتك !!!
كلنا نتاج خستقات الثقافه السودانيه البتتكلم عنها الدكتوره الشوافه ..هذا ما قصدت أن اقوله فى هذه العجاله.
ويظل بريمه وابورزقه ضحايا من أسمو أنفسهم (بعلية القوم) او اولاد البلد وادوات فى يد الدومنت بور او القوى المهيمنه ( الناس البتقول هى عرب العرب)
وإنت من كبار المصاصين لحلمة شطور إمتيازاتها البلميلاد يا صديقى بحكم الجغرافيا وحاجات تانيه حاميانى.
وأقول لاخونا بريمه ناصحا اعمل خطوه تنظيم وشيل مصحف القبيله دا من راسك وخت ليك كورة عسليه اخير ليك و داوس دواس أنسنه.
وشكرا تانى
| |
 
|
|
|
|
|
|
|
|
Re: علاج نفسي لبريمة و أبو رزقة..عقدة الدونية! د. ناهد الحسن (فيديو) تصوير كوستاوي (Re: فارس موسى)
|
الصديق فارس
مشتاقون و ين الحي بيك....مدة طويل يا زول!
رد لكلامك:
أنا وين قلت (بنات البقارة?)
خليك دقيق في الحتة دي!
أنا جبت كود من فنان و أنا في مأمورية في قرية الترتر القريبة من مدينة أبو جبيهة....و هذا الفنان مدرس إبتدائي في تلك القرية و هو من قبيلة بني هلبة و الغنية ليست (بنات البقارة) بل (أسأل عني عذراوات البقارة)....فهمي و فهم كل الناس في تلك القرية الزول دا بقول إنو من شدة إحترامي للمرأة أسألوا عني حتى عذراواتها.....يقصد إنو هو حامي لكل أهل القرية لحدود العذراوات و دا تحدي و شهامة لا حدود لها. و بعدين كيف يصف الشاعر إمرأة بالعذرية و هو إنتهك عذريتها? ما بتجي مش? و كيف يقول أسأل عنى عذراء و هي ليست عذراء!!!
المهم يا فارس دا فهمي للغنية ولو عندك تفسير آخر ليها دا من حقك.
أنا قلت حقي.
تحياتي و ودي
| |
|
|
|
|
|
|
|
|
Re: علاج نفسي لبريمة و أبو رزقة..عقدة الدونية! د. ناهد الحسن (فيديو) تصوير كوستاوي (Re: ABDALLAH ABDALLAH)
|
كوستاوي ..حبابك
كتر خيرك للدعوة على التعليق هنا..
تابعت الجزئية الأولى و الثانية..
و تعليقي عليها ، انو يا كستاوي ، نحن عندنا مشكلة كبيرة في طريقة التفكير نحو الذات.. مثلا كلام دكتورة ناهد ده قلنا تمانين في المية منو ، على مدار السنوات ، في هذا المنبر.. لكن نظرية (مص العرديب) هي التي انتصرت.. يعني ناس كتيرة بتكون مكجناك لله و رسولو..و ما عندها استعداد انها تديك فرقة و تسمع انت بتقول في شنو..!!
المحنة هنا يا صديقي ، يعني نفس الكلام ممكن يتقال ، لكن الناس ما بتسمع لمضمون الكلام شنو ، و دايما بتعاين لمنو هو القال الكلام.. فمن هذا المنطلق..متلك كتار ، محتاجين زول تاني عشان يجي يقول ليهم نفس الكلام حتى بعد داك يكون عندهم قدرة نفسية للتواصل معاهو..!!
فكرة سؤال الهوية ، ناس كتار في السودان حاولوا دراستها و الإجابة على اسئلتها (طبعا حتى الآن مافي اجابة نهائية أو اتفاق بنسبة كبيرة على تكييف الأمر) ، و تعددت المداخل و المناهج ، و دكتورة ناهد قدمت نهج جديد هو المدخل السايكولوجي لتفسير الإحساس بالقهر و ازاحة القهر في التفكير السوداني.. يعني ده التجديد هنا و هو غير مسبوق..!!
ذهنية القبيلة (دي ملاحظة للدكتورة ، لو متابعة معانا هنا) سايدة في معظم الدول الأفريقية ، و ادت لحروب كثيرة للغاية ، يعني ليست مقصورة على السودان فقط ، و لكن هناك تجربتين جديرتين بالملاحظة و الإعتبار: تجربة مصر ، و المدهش انها ظلت تحت نير حكم شمولي لفترات طويلة ، بل تكاد تنعدم تجربة الديموقراطية في مصر، ففي مصر اختفت ذهنية القبيلة تماما ، و انمحت من الذاكرة المصرية و لم تعد معيار عنصرية.. و السؤال ليه؟..الحصل شنو بالضبط عشان المجتمع المصري يصل مرحلة محو فكرة القبيلة بالرغم من وجوده تحت حكومات شمولية باطشة؟..
التجربة الثانية ، هي تجربة الصومال ، مع وجود عوامل الوحدة من لغة و دين و ثقافة ، الإ ان الصومال اتفرتقت تماما ، ووضعها لا يخفى على احد . و الملاحظة هنا ، ان الصومال تحت حكم سياد برى الشمولي الباطش وصلت مرحلة التوحد (من قبل ، كانت اكتر من صومالين) و صارت قطر واحد ، و حينما انهار الحكم الشمولي ، البلد اتفرتقت قطعة قطعة..(عشان كده يا دكتورة ، المواطن البيقول ليك نحن الديموقراطية ما بتنفع معانا ، اعتبره ذكي للغاية و فاهم واقعو وواقع الدول من حولو)..و السؤال: ليه الصومال انتكس من حالة الدولة الوطنية القومية الى دولة القبائل و الحروب؟..
في اعتقادي الفقر و غياب التنمية و الدولة القوية التي تفرض سلطتها ، هو الذي احدث الردة في الذهنية السودانية . لا توجد بنيات قوية تعوض الناس الإحساس بالإنتماء ، الأحزاب السياسية تجربتها لا تسر ، طريقة الإدارة تجربتها لا تسر.. و يا دكتورة السوداني هو الكائن الوحيد القاعد يشتم بلدو لسلسفيل جدها التحتاني..!!
البنية الإجتماعية الوحيدة التي تجاوزت محو فكرة القبيلة في السودان هي كرة القدم ، هي البنية الوحيدة الممكن الناس تنتمي لمكوناتها و تنحاز ليها (حتى لو تكلف الأمر ان تكون ضد قبيلتك)..في كرة القدم الناس بتقيف و بتحس بالإنتماء للهلال ، المريخ ، الموردة ..الخ.. من غير ما تعاين لقبيلة اللاعب شنو و هو منو و جاي من وين..هذه الخصلة غائبة في المكونات السياسية و الدولة..!!
شكرا ليك يا كستاوي ، و التسامح مفازة طويلة ، و بالشايفو في السودان اليوم ، المفازة دي ما ح نقدر نمشيها..!!
شكرا لدكتورة ناهد..ولا بديل للحفر في الصخر لتطل شمس التسامح..لا بديل تب..!!
كبر
| |
|
|
|
|
|
|
| |
Kostawi
بريمة محمد
فارس موسى
ABDALLAH ABDALLAH
Asim Fageary
فرح الطاهر ابو روضة
Kabar
اسماعيل عبد الله محمد
فيس بوك
تويتر
انستقرام
يوتيوب
بنتيريست