|
|
 الكفاءات السودانية خارج الوطن ما لها وما عليها
|
صراحة الموضوع محير شويتين
انا في موقع تحديد جنسيات لاكثر من 300 وظيفة مختلفة تشمل سودانيين، مصريين ، اسيويين.
احيانا افكر في انو مفروض كسوداني يكون عندي تمييز للسودانيين علي بقية الجنسيات (طبعا بما لا يتجاوز اخلاقيات العمل ) ، لكن الصراحة تجربتي مع تشغيل بعض السودانيين كانت مشكلة كبيرة، برغم انو في سودانيين كتيرين شغالين ومميزين، لكن في نوع منهم ممكن يمسح كل شئ بجرة قلم.
صحيح لما توصل اي سوداني لوظيفة مفروض انه هو بيتحمل مسئوليتو تجاه الشركة اذا فشل او اذا نجح لكن في مجتمع زي المجتمع السعودي برضو بكون فيها صوت لوم اذا جاء من خلالك.
بكل تأكيد الموقف الان مختلف مجرد تحديد جنسيات متناسبة مع طبيعة الوظائف يعني حتي الان ما اتورطت في تشغيل احد من خلالي لكن ده غالباً حايحصل.
فالاسئلة الدائرة الان في راسي
هل اعمل تمييز للوظائف السودانية علي بقية الجنسيات
هل اسعي لتشغيل سودانيين في الشركة
صراحة ما عندي اجابة جاهزة
علما بانو الوظائف المذكورة مختلفة تبدا من مهندسين لي سواقين لي فنيين ورش لي محاسبين
|
|
  
|
|
|
|
|
|
|
|
Re: الكفاءات السودانية خارج الوطن ما لها وما عليها (Re: Gafar Bashir)
|
Quote: فالاسئلة الدائرة الان في راسي
هل اعمل تمييز للوظائف السودانية علي بقية الجنسيات
هل اسعي لتشغيل سودانيين في الشركة |
الأخ Gafar
تحياتي ,,,
أعمل بنظرية ان الوظائف ليست لها جنسية, وعن السوداني لازم تدعمه بس قبل ما تبلغه رسمياً رغبتك فى توظيفه جيبه عندك ودردش معاهـ وان احتاج أعمل ليه إنترفيو ولو لقيته كفؤ للوظيفة وصي عليه يتعين ولو غير كفؤ إعتذر ليه بدون أي تردد ... من واقع خبرتي المتواضعة السعوديين أصحاب الشركات أو مدراء الموارد البشرية يقسمون أمثالك الى قسمين:-
1) شخص رسمي ويحاول تعيين الأكفاء من معارفه ومعارف معارفه أو أصدقائه لكفاءة موجودة فى الشخص المراد توظيفه
2) شخص عاطفي ويحاول تعيين معارفه ومعارف معارفه أو أصدقائه بصرف النظر عن الكفاءة فى الشخص المراد توظيفه
إبتعد عن الخيار الثاني وامسك فى الخيار الأول قشة ما تعتر ليك
| |
|
|
|
|
|
|
|
|
|
Re: الكفاءات السودانية خارج الوطن ما لها وما عليها (Re: الفاتح شلبي)
|
جعفر بشير
تحياتي ..
امشـــي طوالي على السودانيين فقط عليك التدقيق في الاختيار
اختار الأكفأ بدون مجاملة لسوداني على حساب العمل
لي تجربة ناجحة مع تشغيل السودانيين والحمد لله ما خذلوني لغاية الآن
في السودانيين اعتمد الاختيار على اساس الكفاءة والاخلاق واستعمل احساسك الداخلي
كل سوداني عمل معي تحدثت معه ورأيت صورهم الشخصية قبل التعاقد معهم
بالنسبة لي التجربة ناجحة بلا تردد .. رغم اتهامات الجنسيات الاخرى لي
بسودنة مكان العمل واستبعاد الجنسيات الاخرى ...
اهم حاجة لا تجامل احد على حساب عملك .. هذه نقطة محورية من اجل تحقيق النجاح
كن بخير
| |
|
|
|
|
|
|
|
|
|
Re: الكفاءات السودانية خارج الوطن ما لها وما عليها (Re: Hani Arabi Mohamed)
|
Quote: ) شخص رسمي ويحاول تعيين الأكفاء من معارفه ومعارف معارفه أو أصدقائه لكفاءة موجودة فى الشخص المراد توظيفه
2) شخص عاطفي ويحاول تعيين معارفه ومعارف معارفه أو أصدقائه بصرف النظر عن الكفاءة فى الشخص المراد توظيفه
إبتعد عن الخيار الثاني وامسك فى الخيار الأول قشة ما تعتر ليك
تحياتي يا الفاتح |
تعرف يا ريت لو كان الموضوع بالبساطة دي ..:
السودانيين في الشركة ما بسيطين... بس لمن تكون انت في اكبر وظيفة لسوداني في الشركة... بيدعموك علي الاقل معنوياً والموضوع في النهاية ما شخصي بس عشان يكون في سوداني في وظيفة متقدمة في الشركة و بتكون مطالب بتقديم اشياء تجاههم ..... صعب جداً تكون في موقف محايد ... وتكون اجاباتك ليهم سلبية تجاه مشاكلهم في العمل... وده بنفس المنطق بينطبق عليهو اقرباءهم العايزين يشتغلوا لازم يكون عندك حس ايجابي تجاههم ولا حايصنفوك تصنيف ما جميل ... والحقيقة بتلقي في تكتلات للجنسيات عشان كدة اتخاذ القرار ما بالسهولة دي خصوصا وانو مجتمعك خارج العمل هو مجتمع السودانيين.
تسلم يا حبيب
| |
|
|
|
|
|
|
|
|
|
Re: الكفاءات السودانية خارج الوطن ما لها وما عليها (Re: Gafar Bashir)
|
Quote: لي تجربة ناجحة مع تشغيل السودانيين والحمد لله ما خذلوني لغاية الآن
في السودانيين اعتمد الاختيار على اساس الكفاءة والاخلاق واستعمل احساسك الداخلي
كل سوداني عمل معي تحدثت معه ورأيت صورهم الشخصية قبل التعاقد معهم
بالنسبة لي التجربة ناجحة بلا تردد .. |
ده كلام مطمن يا بشاري رم تجربتي السيئة معاهم اكتر من مرة ...
يمكن طبيعة الوظائف هي كمان مشكلة يعني لو هم في نفس تخصصي زي المعاك كان قدر اقيمهم بصورة صحيحة ... لكن اختلاف الوظائف من اعلي لي ادني الوظائف ما بتكون عندك القدرة الكاملة علي الحكم من مجرد مقابلات خصوصا والموضوع فيهو معدات تكاليفها
| |
|
|
|
|
|
|
|
|
|
Re: الكفاءات السودانية خارج الوطن ما لها وما عليها (Re: Gafar Bashir)
|
تحياتي اخ جعفر ....
لست من انصار التعيين بتحديد الجنسية (لن ترضى بذلك لو كان مكانك شخص من جنسية اخرى)...
فلتضع مصلحة المؤسسة التي تعمل بها فوق كل اعتبار ..وتختار الكفاءة دون الاخذ في الاعتبار موضوع الجنسية
قد لا يعجب ذلك بعض السودانيين، وقد تجابه بصعوبات (او مطبات) من الجنسيات الاخرى التي اخترتها...
ولكنك ستكون ارضيت ضميرك ...و ربك (انها أمانة ..وانها يوم القيامة...خزي و ندامة)
| |
|
|
|
|
|
|
|
|
|
Re: الكفاءات السودانية خارج الوطن ما لها وما عليها (Re: Gafar Bashir)
|
| Quote: السودانيين في الشركة ما بسيطين... بس لمن تكون انت في اكبر وظيفة لسوداني في الشركة... بيدعموك علي الاقل معنوياً والموضوع في النهاية ما شخصي بس عشان يكون في سوداني في وظيفة متقدمة في الشركة و بتكون مطالب بتقديم اشياء تجاههم ..... صعب جداً تكون في موقف محايد ... وتكون اجاباتك ليهم سلبية تجاه مشاكلهم في العمل... وده بنفس المنطق بينطبق عليهو اقرباءهم العايزين يشتغلوا لازم يكون عندك حس ايجابي تجاههم ولا حايصنفوك تصنيف ما جميل |
شوفت التصنيف الما جميل دهـ !!!
هذا التصنيف مصدرهـ علاقات شخصية لا تخص الشركة ولا تخص أداؤكم كموظف
| |
|
|
|
|
|
|
|
|
|
Re: الكفاءات السودانية خارج الوطن ما لها وما عليها (Re: الفاتح شلبي)
|
شكرا أخي الكريم لفتح هذا الموضوع
الـ positive discrimination من مبادئ تعمل بهاوكالات الأمم المتحدة وذلك بدعم الفئات الأضعف في العالم بدون أن تفتح المجال لتدني الكفاءات خصوصاً لبعض الجنسيات والعرقيات كالأفارقة والأسيويين ومن ناحية الجندر أيضاً كدعم عنصر النساء وذلك لأن الشائع هو خروج هذه الفئات عند التنافس لعدم وجود دعم كاف لها.
في ممارستي دائماً أحاول دعم السودانيين باعتبارهم من العناصر المحتاجة جداً للدعم وفي بيئة العمل في الخليج العربي يتعرض السودانيين للكثير من الإبعاد بدافع الإشاعة مثلاً كإشاعة (كسل السوداني) وهي نكتة بائخة كما تعلم ولكنها مقصودة وتحدث الكثير من الآثار السلبية على السودانيين تحديداً.
المهم هو دعم تعيين سودانيين بعد معاينة كفاءاتهم جيداً والتأكد من مناسبتهم للأعمال وتشجيعهم على الأداء الأفضل وأؤيد جداً فكرة عمل مقابلة مع الأخ طالب العمل قبل المقابلة الرسمية وأنا شخصياً أقوم بهذا من زمن طويل وأنصح الإخوان دائماً من ناحية المظهر والتصرف والترتيب الجيد للأوراق ومراجعة السيرة الذاتية وترتيبها جيداً وترتيب النفس للمقابلة بالثقة والإجابات المناسبة
أيضاً يتعرض السودانيين للإبعاد بسبب عدم وجود الجنسية السودانية كثيراً من بين الإدارات العليا للشركات أصحاب القرار حيث تكثر الجنسيات اللبنانية والأردنية والمصرية في الإدارات العليا فطالما توفرت لك فرصة اتخاذ قرار فلا تضيعها.
كذلك هناك دعم مهم جداً في ايضاح مستويات الرواتب لطالب العمل بحيث لا يقع في خطأ طلب راتب ضعيف مع الراتب المرصود للوظيفة هو راتب أعلى بكثير مما يطلب.
هناك بعض الأشخاص المستهترين وبعض المشاكل الأخرى من الجيل الثاني من السودانيين المولودين بدول الخليج ولكنها سهلة الفرز بحيث تقدم لصاحب العمل عناصر جادة في العمل ومؤهلة في المجال وقابلة للتعلم ومنضبطة في المواعيد.
ويمكنك الرجوع إلى شخصياً في أي احتياج لكفاءات نادرة لم تتحصل عليها بين السودانيين
والله لا يضيع أجر من أحسن عملاً,
| |
|
|
|
|
|
|
|
|
|
Re: الكفاءات السودانية خارج الوطن ما لها وما عليها (Re: الفاتح شلبي)
|
Quote: شوفت التصنيف الما جميل دهـ !!!
هذا التصنيف مصدرهـ علاقات شخصية لا تخص الشركة ولا تخص أداؤكم كموظف
|
واللللله شايفو يا الفاتح
خليني اكلمك عن ادائي الوظيفي ...
قبل اسبوع مديرعام المشاريع قال لي ده قريب المدير المالي عايزين نوظفو معانا رايك شنو ... قريت السيرة الذاتية للمهندس ولقيتها ما عندها علاقة بي شغلنا ...
تعرف انو مهما وصلت في الصيانة لدرجة عالية في اي شركة ما بتفوت المدير المالي ومدير المشاريع ... ودي فرصة انك تخدمهم الاتنين وبالتالي تكسب حظوة ...
لكن كان ردي كالاتي : المهندس ده غير مؤهل للعمل معانا... واذا المدير المالي عايز يوظفه افضل ان يقدمها لاصحاب الشركة اما بالنسبة لينا ما بقدر اعتمد ليك مهندس زي ده ..
لكن انا بسال لانو الايدو في الموية ما زي الايدو في النار ... والموضوع صعب علي ارض الواقع وفي مجتمع سوداني.
وعارف كلامي الفوق ده فيهو تناقض
لكن تعال اقعد في الكرسي ده وفهمني الحل شنو
| |
|
|
|
|
|
|
|
|
|
Re: الكفاءات السودانية خارج الوطن ما لها وما عليها (Re: Gafar Bashir)
|
تحياتي يا محمد حمزة
Quote: ولن أزيد علي كلام الفاتح شلبي والباشمهندس البشاري
قم بإختيار الكفوء أما الاخلاق فثق ان السودانين هي رأس مالهم خارج الوطن ... |
صراحة هذه قناعتي في الاخلاق
والحمد لله لم اقابل اي مشكلة خلال العمل تمس الاخلاق سواء ذمم مالية او غيره (رغم وجودها في اكثر من مكان) لكن المشاكل التي اواجهها اكثر هي عدم تأقلم السودانين مع الوظيفة رغم انه عارف من البداية متطلبات الوظيفة يعني تجيب سوداني من السودان بعد شهرين يتصل عليك صاحب الشركة يقول ليك ياخي الجبتو لينا ده قال راجع بلدو ... علما بان الفيزا مجانا فقط خدمة للشركة
| |
|
|
|
|
|
|
|
|
|
Re: الكفاءات السودانية خارج الوطن ما لها وما عليها (Re: Gafar Bashir)
|
تقريباً ما تسردهـ يمر به عدد كبير من السودانيين ويا حبذا لو كلهم ساهموا فى هذا البوست بتجاربهم
ما فهمته أنكم تلجأون للتوظيف من السودان وفى ذلك لا شك خدمة كبيرة للمراد توظيفه وللشركة ذاتها حيث أن القادم تواً يقبل براتب أقل من ذو خبرة ومتواجد بالسعودية
قبل مدة اتصل علي شخص مقرب مني بتوظيف شخص يقرب له فقمت بعمل اللازم من تنسيق لمقابلة فى مدينة نائية غير التي اقيم بها ... اختصار الأمر ان المسؤول المعني بمقابلة الراغب للعمل كان بريطاني الجنسية ... ولم أقصر بمباغتة زولنا بإتصال قبل المقابلة ووصيته على كل شئ ... (إلا شئ لم يخطر على بالي) إنتهت المقابلة سريعاً واتصل علي البريطاني وقال بأن زولنا حضر فى الموعد فقلت الحمد لله فى سري (والنقطة دي واحدة من النقاط اللى ذكرتها ليه فى اتصالي) ثم أردف وقال بانه كان لابس نظيف ومهندم وله خلفية كافية عن الوظيفة المعنية (قلت فى سري دهـ خلاص اتعين) ... ثم قال لي البريطاني بأنه لم يرى فى يدهـ أي شنطة ولا ملف اوراق فعندما سألته عن سيرته الذاتية قام من على الكرسي ومد يدهـ للجيب الخلفي للبنطلون واستخرج ورقة مطبقة ومدها له فإذا به يكتشف أنها سيرته الذاتية (وكان قرارهـ أنه لا يصلح للعمل)
فبالمقارنة مع بقية الجنسيات غير السودانيين عند التقديم لوظائف حتى عمالية ياتون وهم بكامل لبسهم وفى اياديهم لو لم يحمل شنطة يحمل حامل أوراق أنيق يفتح الانفس
ملخص رأيي إذا انتبه السودانيين لاحترام المواعيد واللبس الأنيق بالإضافة الى خصالهم الطيب الذي يمدحون بها غيرهم لأصبح سوق العمل فى الخليج حكراً عليهم
| |
|
|
|
|
|
|
|
|
|
Re: الكفاءات السودانية خارج الوطن ما لها وما عليها (Re: الفاتح شلبي)
|
تحياتي استاذنا جعفر بشير ...
انت بدأت التمييز بفتحك هذا البوست ...
انت تكتب في منبر سوداني مفتوح
لو قُدر لي ان اكون في موقعك الوظيفي ...
لتعاملت مع هذا الأمر بسريه و حياديه تامه ...
ايضاً السريه كانت مطلوبه في طرح وجهة نظرك في الأخوة السودانين الذين كانت لك معهم تجارب سيئه ...
تحياتي ...
| |
|
|
|
|
|
|
|
|
|
Re: الكفاءات السودانية خارج الوطن ما لها وما عليها (Re: Elmosley)
|
عزيزي جعفر بشير
والله اسئلتك منطقية جدا وكمان وجدت الاجابات منطقية جدا جدا..
واستاذنا الموصلي لخص ليك الكلام كله في جملة واحدة وهو ان تنحاز لأهل بلدك( السودان) ولكن بشرط الكفاءة والخبرة.. يعني بصراحة العبارة اذا جوك اثنين واحد سوداني والثاني مصري او ليبي او سعودي وكل منهما يمتلك نفس الشهادة والخبرة والكفاءة فلازم تنحاز لابن بلدك..
والله يديك العافية
| |
|
|
|
|
|
|
|
|
|
Re: الكفاءات السودانية خارج الوطن ما لها وما عليها (Re: aosman)
|
Quote: خذ موقفاً وسطاً
لا يظلم
ولا يجامل
ويمنح الفرصة
ويفتح الأبواب لمن أٌغلقت في وجهه
ويوفر لك الحماية من شرّ من أحسنت إليه |
تحياتي يا هاني
طبعا يا هاني ده كلام عاقل جدا لكن في الوقع صعب تحقيقه علي الاقل بالنسبة لي... خليك من انك تميز السودانيين او ما تميزهم .... اذا انت شايف في تكتلات علي اساس الجنسية في الشركة ... كل واحد عنده رغبة يوظف جنسيته او قريبه .. وهي ما مسالة مستهجنة شديد في ثقافتنا العربية دي .. حايكون موقفك شنو؟ تجاه السودانيين المعاك وشايفين التكتلات دي وبعاينو ليك ...
| |
|
|
|
|
|
|
|
|
|
Re: الكفاءات السودانية خارج الوطن ما لها وما عليها (Re: aosman)
|
تحياتي اخ زكريا
عدم تمييز الوظيفة بالجنسية ده ما مقبول حتي للشركة .. هم طالبين تمييز الوظائف حسب الجنسيات ... بناء علي خبرتنا في مجال العمل وفعليا في جنسيات اثبتت قدرتها في مجالات محددة .. يعني هم حايمشوا الدول دي حسب الجنسيات يطلبوا الوظائف ... علبي سبيل المثال .. موظفين تقنية المعلومات خيارنا الاول هو الهند ... الصيانة خيارنا الاول هو الفلبين ... دي مسالة متعارف عليها في سوق العمل السعودي وحتي من خلال تجاربنا في الشركة .
الحقيقة انا زكرت من البداية تمييز السودانيين (في إطار أخلاقي) وده بيعني انو في الاساس في مساحة اختيار ... يعني مثلا اذا مطلوب 30 سائق نقل ثقيل من الدول العربية كم حاتضع منها للسودانيين؟
| |
|
|
|
|
|
|
|
|
|
Re: الكفاءات السودانية خارج الوطن ما لها وما عليها (Re: Gafar Bashir)
|
Quote: تحياتي استاذنا جعفر بشير ...
انت بدأت التمييز بفتحك هذا البوست ...
انت تكتب في منبر سوداني مفتوح
لو قُدر لي ان اكون في موقعك الوظيفي ...
لتعاملت مع هذا الأمر بسريه و حياديه تامه ...
ايضاً السريه كانت مطلوبه في طرح وجهة نظرك في الأخوة السودانين الذين كانت لك معهم تجارب سيئه ...
تحياتي ... |
تحياتي استاذ يحي قباني
اتفق مع حديثك جملة وتفصيلا حول عمومية المنبر ومداخلتك وقفتني كتير
حاولت بقدر الامكان ان يتم طرح الموضوع بصورة عامة مع الاحتفاظ بحد ادني من خصوصيته، واحتمال ما اكون نجحت في حفظ الموازنة دي كتير بدليل مداخلتك ... لكن حاحاول مراجعة المكتوب مرة تانية وابعد بقدر الامكان عن الخصوصية .
شكرا للتنبيه وحاول تعديل المسار الا ن ومستقبلا
| |
|
|
|
|
|
|
|
|
|
Re: الكفاءات السودانية خارج الوطن ما لها وما عليها (Re: Gafar Bashir)
|
أستاذنا الموصلي
تعرف دي الاجابات المريحة شديد امشي لي اولاد بلدك اذا كانوا مؤهلين
برغم اختلاف الثقافة من مجتمع لي مجتمع لكن مسالة (اولاد بلدك) موجودة حتي في ارقي المجتمعات ولو بدرجة قليلة لانها في رايي سلوك انساني طبيعي ... بتختلف كميا اكيد من مكان للتاني لكن في السودان والسعودية وبقية الدول العربية مسيطرة كتير علي سوق العمل ... اذا فكرت تبقي انت محايد كموقف اخلاقي بتكون مطالب بموقف اخلاقي تاني وانت شايف البقية بيوظفوا بناءا علي الجنسية والقرابة
| |
|
|
|
|
|
|
|
|
|
Re: الكفاءات السودانية خارج الوطن ما لها وما عليها (Re: Gafar Bashir)
|
Quote: يعني بصراحة العبارة اذا جوك اثنين واحد سوداني والثاني مصري او ليبي او سعودي وكل منهما يمتلك نفس الشهادة والخبرة والكفاءة فلازم تنحاز لابن بلدك..
|
شكرا أستاذة أميرة
طبعا الكلام ده واضح جدا ويمكن دي كانت قناعتي البديهية لكن مرات بلقي نوع وظيفة ما بقدر اجازف بيها لمعرفتي الكبيرة بالسودانيين ... خصوصا الوظائف التقنية اذا كان في منافسة من دول اسيوية وخصوصا اذا كانت متعلقة مباشرة بعملك او تحت إدارتك بكون فيها تردد.
| |
|
|
|
|
|
|
|
|
|
Re: الكفاءات السودانية خارج الوطن ما لها وما عليها (Re: Gafar Bashir)
|
Quote: كيف اختار شخص من جنسية تانية وانا لا أعرف سيكلوجيته؟
يعني ببساطة إذا لم أجد سوداني مناسب للوظيفة فسأضطر لاختيار جنسية أخرى!
وعملية الإختيار تحتاج إلى حنكة ودراية وشجاعة. |
صراحة المسالة ما بسيطة وفيها حسابات كتيرة جدا
في كتير من الاحيان بكون الشخص جايي من قبل موظف كبير في الشركة فانت قبل ما تعرف سيكولوجية الموظف الجديد بتكون عايز تعرف سيكولوجية الواسطة بتاعتو .. لانها
جدا بتختلف وبتأثر كمان علي عملك في الشركة ... عشان اكون صريح مسالة الوساطة وتشغيل الاقارب هي ثقافة عامة في المجتمع هنا ... ممكن تخلق ليك عداوات كثيرة اذا كانت الواسطة
الجايبة الموظف ما متفهمة
| |
|
|
|
|
|
|
|
|
|
Re: الكفاءات السودانية خارج الوطن ما لها وما عليها (Re: MOHAMMED ELSHEIKH)
|
الاستاذ المستشار أحمد الشايقي
تحياتي وشكرا علي هذه المساهمة الكبيرة في ايضاح الكثير من جوانب الموضوع خصوصا من اصحاب المجال والخبرة في ادارة الموارد والتنمية البشرية.
أوضاع السودانيين في الشركات عموما (وظائف + مرتبات) مقارنة بالجنسيات العربية الاخري ليست جيدة حتي لو كان اداؤهم افضل والشواهد كثيرة جدا في كل مكان، وحسب معرفتي ان هنالك تصنيف حسب الجنسية في سوق العمل حتي ولو كان غير مكتوب يظل موجودا وصراحة حاولت ان اجد تفسيرا لذلك فلم اجد سبب خارج قبول الجنسية المعينة بهذه الأوضاع،ربما كانعكس للأوضاع في بلدها الي درجة كبيرة، أو ان المسالة لها جذورها التاريخية منذ المهاجرين الاوائل الذيين حددوا سقف مطالبهم فاصبحت كقانون في سوق العمل.
كثيرا ما فكرت لو ان السودان كدولة قادر علي توفير الفرص الوظيفية والتحكم في خروج الكفاءات السودانية عبر نظام محدد للرواتب سلفا لربما تمكنا من السيطرة وتوجيه الامر لكن وسط هذه الهجرات العشوائية لا يمكننا ان نحسن من ذلك كثيرا.
هذه الأوضاع هي احدي دوافعي لفتح مثل هذا الموضوع واحساسي باني من موقع عملي يجب ان يكون لي دور بقدر المساحة المتاحة لي وأكثر في تغيير هذه الأوضاع لكني ايضا اتساءل عن المشروعية الأخلاقية لمثل هذا التمييز المبني علي الجنسية ويبدو حديثك هنا عن ان الامم المتحدة لديها هذا البرنامج لدعم المناطق الاقل نموا مطمئن الي حد كبير لمسالة المشروعية.
حقيقة اتفق معها تماما ان عدم وجود الجنسية السودانية في المواقع العليا له تأثير كبير وبالغ في توفير الفرص، وقد واجهت هذا الموقف بنفسي أكثر من مرة وانا علي يقين بان الذين تم اختيارهم لم يكونوا اكثر كفاءة، وأعتقد ان معظم المداخلات هنا تسير في الاتجاه الذي ذهبت اليه من أن المقابلة والتأكد من الكفاءة اولا ومن ثم دعم السودانيين في الوظائف وتحديد الرواتب ... خصوصا وأن الفشل لاي منهم قد يلقي بظلاله علي البقية.
تحياتي يا سيدي
وشكرا للمبادرة
| |
|
|
|
|
|
|
|
|
|
Re: الكفاءات السودانية خارج الوطن ما لها وما عليها (Re: Adil Isaac)
|
الاستاذ بشير جعفر والمتداخلين سلامات...
قرات البوست بعد ان هداني له الصديق قباني وحقيقة استمتعت بكل المداخلات وبفكرة البوست عموما...
ذكر كثير من المتداخلين الكفاءة كمرتكز اساسي للتعين في حين انها عنصر واحد "نعم احد اهم العناصر لكنها غير كافية لوحدها ...
لتعين الشخص... ساشرح هذا بالتفصيل في هذه المداخلة... لكن دعونا نتحدث عن الجنسيات وتبعات التمييز ..
حسب كلام الاستاذ بشير ان هناك تصنيف للوظائف حسب الجنسيات في السعودية وان الشركات تقوم بجلب جنسيات معينة لوظائف
معينة وهذا تصنيف اوجدته التجارب والسنين... وتبني هذا التصنيف من قبل اصحاب الشركات يرجع للحالة النفسية لصاحب العمل
لانه غير مستعد للمغامرة واستجلاب موظفين من دول غير معروف عنها اجادتها لمهام الوظيفة المطلوبة وهذا في تقديري ليس الافضل
لان الاتين من دولة واحدة تكون خبراتهم متقاربة لانهم اتوا من نفس النظام التعليمي ونفس سوق العمل ذو المواصافات الواحدة
وبهذا حتى لو كانت متطلبات العمل الجديد تحتاج لطرق جديده في العمل سيقوموا بتغييره لنفس الطرق التى يتبعوها في بلادهم..
لذلك مناهج التعيين الحديثة تقول ان الـــ The diversity of the work force is the key to a creative and innovative workplace
لان اشخاص من جنسيات مختلفة بطبيعة الحال لهم خلفيات مختلفة وتجارب متنوعة وطرق مختلفة لمجابهة المعضلات وهذا يكّون مخزون معرفي
هائل تستفيد منه الشركة في كل اوجه العمل وهذا ما توصلت له كبريات الشركات العالمية لزيادة فاعلية موظفيها وبالتالي زيادة انتاجها الخ..
وبالطبع يجب ان يدار هذا الاختلاف ويوظف بطرق سليمة للوصول للنتائج المرجوة وهذا موضوع اخر قائم بذاته...
يعني ادراة ما بها سوداني وفليبني و مصري وهندي تكون اكثر فاعلية ومقدرة على الانجاز من اخرى بها احدى هذه الجنسيات فقط الخ..
نجي لموضوع الكفاءة ... الكفاءة احد عناصر التعيين لتحصل على ما يعرف بالـــ perfect fit ... طبعا انا هنا اتحدث بشكل
عام لان هناك وظائف تستبدل فيها الكفاءة بالجاهزية للتعلم والتدريب ولكن يراعى فيها العناصر الثانية ومنها ملائمة الوظيفة للمتقدم او ما يعرف
بالـــ position fit وفيها يجب معرفة هل طريقة عملة الشركة ملائمة للشخص وهل للشخص جاهزية تبني اسلوب مختلف في العمل ومعرفة ما
اذا كان الشخص يسعى للاستمرار في هذا العمل لفترة طويلة وما هي طموحاته وتطلعاته المستقبلية داخل الشركة وما اذا كان هناك عوائق
دينية او ثقافية او اخلاقية تمنع توظيقه او اذا كان يسعي لتوظيف مؤقت مما يشكل turnover risk ....
يعني فحص مثل هذا (احتمال) كان جنبك الشخص الجا من السودان وبعد تعيينه بقترة قصيرة رجع السودان ...
وكذلك معرفة ملائمة مكان التوظيف للمتقدم او ما يعرف بالـــ location fit طبعا هذه تشرح نفسها بنفسها ...
تحياتي...
| |
|
|
|
|
|
|
|
|
|
Re: الكفاءات السودانية خارج الوطن ما لها وما عليها (Re: Gafar Bashir)
|
الاستاذ عادل اسحق
Quote: و هي منافسة شرسة لا يمكن كسبها الا في محيط بني الوطن، حيث إحتمالات الأمان المهني تبدو أكبر وسطهم و هم الذين "حنكوا" المدير المواطن و أصبحوا مكان ثقة لدي المدير المواطن و يمكنهم جلب المزيد من "الأهل" حتي يمتلئ المكان بهم و هذا يصيب المواطن بالهلع، و يبدآ في تنويع اللعب من جنسيات أخري.
|
تحياتي وشكرا علي الإضاءة الكبيرة التي قدمتها ... , وفي الحقيقة وصفت الواقع العربي كما لم يوصف من قبل. وكما اتفضلت التمييز هنا تمييز مزدوج ومركب: أولاً تمييز بين السعوديين والاجانب اذ تتراوح الفروقات لنفس الوظائف الي اضعاف لنفس الوظيفة. والتمييز الثاني التمييز بين الجنسيات والتصنيف الذي تفضلت بذكره ... لذا المنافسة شرسة خصوصا في الشركات التي تتمتع بمخصصات عالية نسبياً ...
قرأت تقريرا بالامس عن انه في المملكة تسيطر الشركات العائلية علي 90% من القطاع الخاص في مقارنة بين الشركات العائلية والمساهمة ... هذا الوضع يخلق المجتمع الذي تفضلت بتشريحه.. هذه الشركات وان تطورت تظل تدار بعقليات المؤسسين فيما يخص الموارد البشرية وعلي سبيل المثال يمكن ان تجد شركة بها قسم موارد بشرية فيه اكثر من 20 موظف مع مدير ممتاز ويفهم جيدا في الموارد البشرية وحاصل علي ماجستير او دكتوراه ... لكنه لا يستطيع فعل شيئ سوي اعادة اجترار نظام المؤسسين بسبب التحجيم المفروض عليه من قبل الادارة العليا والتي هي في الحقيقة اصحاب المال.
| Quote: بالنسبة لوضعك الخاص و في ظل هذا الواقع المضحك لابد لك من إتباع ضميرك المهني و ليس الوطني في مثل هذه الأمور لأن النظام القبلي هذا لا مسئولية فردية فيه و سيرتد أمر العامل/الموظف الغير كفؤ لك رغم آن المدير الذي يوقع عقد العمل مواطن |
بالتأيد سيرتد وهذا هو مصدر التخوف ليس كمسالة شخصية ولكن كجزء من كامل منظومة السودانيين بالشركة لانه اذا صدف وان اتخذت أي قرار خاطئ بخصوص سوداني نتيجة (للانحياز ) سافقد قدرتي علي المساعدة مرة أخري حيث انه حتي الثقة التي منحت لي (والتي انتزعتها انتزاعا) لن تظل كما كانت ... وهذا فقد لنا كسودانيين ... عموما الموازنة صعبة وتحتاج الكثير من الجهد لعدم ارتكاب الاخطاء ... تحياتي
| |
|
|
|
|
|
|
|
|
|
Re: الكفاءات السودانية خارج الوطن ما لها وما عليها (Re: Gafar Bashir)
|
تحياتي يا جعفر وضويوفكم الأعزاء
الآن بالسعودية أعيش في تجربة شخصية مع أهل الشام (فلسطين ، لبنان ، سوريه) هؤلاء منحازون منحازون لأبعد الحدود مع بنو جلدتهم وجنسيتهم ، لا يجاملون البتة ، يخلقوا الوظائف وبمزايا ومخصصات مهولة لبعضهم البعض ، لا يهم عندهم التأهيل ، الكفاءة ، وغيره من معايير اختيار الرجل المناسب في المكان المناسب ، ممكن تلقى مهندس المشروع عشريني العمر ولا تجربة سابقة له وربما لا تأهيل ، نحن كسودانيين فينا موجودة حكاية الإنحياز لبعضنا وتقديم العون لبعضنا وأجزم ذائما يكون ذلك وفق معايير ومقاسات تلبي الحد الأدني في الوظيفة أو المهنة وبأجور ومخصصات متدنية مقارنة مع بعض الجنسيات ، غايتو لو كنت مسئولا وأملك قرارا بتعيين موظف سوف أبحث عن سوداني يستحق الوظيفة بكل الطرق ،
مع تحياتي وتقديري
الشفيع ابراهيم
| |
|
|
|
|
|
|
|
|
|
Re: الكفاءات السودانية خارج الوطن ما لها وما عليها (Re: مني عمسيب)
|
تحياتي استاذ حسين نوباتيا
وشكرا للأستاذ قباني ،وواضح جدا السبب الخلاهو يلفت انتباهك للموضوع، لان مساهمتك هي محاضرة في الحقيقة استمتعت بقراءتها ولما وصلت النهاية كان في رايي انها لسة ما بدت.
| Quote: تبني هذا التصنيف من قبل اصحاب الشركات يرجع للحالة النفسية لصاحب العمل لانه غير مستعد للمغامرة واستجلاب موظفين من دول غير معروف عنها اجادتها لمهام الوظيفة المطلوبة وهذا في تقديري ليس الافضل |
اضافة الي ذلك حتي الموظفين ترسخت في نفوسهم القناعات دي واصبح تحديد الوظائف وفقا للجنسيات هو امر مقبول به بل مسلم به وغير قابل للنقاش، مع ان هناك تجارب كثيرة ومختلفة تؤكد ان التنميط غير صحيح وتجارب بتثبت وجود جنسيات اخري قادرة علي انجاز العمل بصورة مماثلة او أفضل.
التنوع كما تفضلت بخلق تجارب مختلفة مش فقط باختلاف الخبرات لكن في فروقات كبيرة جدا تنتج عن اختلاف الثقافات والبيئات المختلفة، وحالياً اعمل علي دراسة دمج أنظمة إدارية مختلفة لاداء نفس الوظيفة او الوصول الي نفس المحصلة الاختلاف بين الأنظمة محل الدراسة هو في الاساس اختلاف نشوء وتطور يعني اختلاف ثقافي بينتج عمالة وموظفين بطرق تفكير وعمل مختلفة للوصول لنفس النتيجة وده بيؤكد اكثر ان التنوع مطلوب لخلق بيئة قادرة علي الاستفادة من التنوع والابتكار.
في بيئة زي الخليج صعب تتقبل موظف من مستوي (Position Fit) أو (Location Fit) لان معظم الشركات ما بتمتلك أي نوع من انواع البرامج التطويرية للموظفين بل بكون الهدف هو الاستفادة القصوي من خبرات الموظف لصالح الشركة بدون أي اسهام في تطويره. ومعظم برامج التدريب المتوفرة هي في النهاية لذر الرماد في الأعين وليست مسالة مدروسة وممنهجة ومتواصلة.
عموما معظم منطقة الخليج وخاصة السعودية بعيدة جدا جدا عن المفاهيم والمقاييس الاتفضلت بايرادها في حديثك، واظن الاستاذ عادل اسحق قدر يوصفها بصورة دقيقة لدرجة انو الواحد بدا يتساءل هل هو فعلا عايش في بيئة زي دي ... والحقيقة نعم وفي بعض الأحيان الصورة اكثر قتامة من كدة
شكرا للاضافة الكبيرة والتي يحتاج كل جزء منها الي الكثير من النقاش
| |
|
|
|
|
|
|
|
|
|
Re: الكفاءات السودانية خارج الوطن ما لها وما عليها (Re: مني عمسيب)
|
تحياتي يا الشفيع
تعرف مرات الواحد بفكر انو البحث عن الوظائف للسودانيين وخلق رواتب ومخصصات كبيرة مشروع وفقا لسلوك الاخرين (بدون محاكمات أخلاقية )، لانو بتفكر انو من غير المنطقي وسط الغابة دي تفكر في انك تؤدي عملك بمهنية واحتراف تام لانك بعد شوية بتلقي نفسك انت شخصيا مهدد او علي الاقل محجم من المقدرة علي عمل أي شيئ وبالتالي بتفكر طالما الان انت قادر ويدك واصلة افضل تدعم السودانيين وده فيهو بالمقابل دعم ليك نفسك ولتقوية مركزك ، تعرف عندي نموذج لزول زي ده ... لكن في النهاية برجع ويشتكي لي من السودانيين وانه اتورط معاهم كتير لان فشل أي موظف جاء عن طريقك بيرتد عليك، دي المشكلة والمحتاجة معرفة كبيرة زي ما اتفضلوا الاخوة عن طريق المقابلة والمعاينات والتاكد من الخبرات والسلوك ما عدا ذلك بتبقي طبعا حالات شاذة ربنا يحميك ويحمينا منها ...
| |
|
|
|
|
|
|
|
|
|
Re: الكفاءات السودانية خارج الوطن ما لها وما عليها (Re: Gafar Bashir)
|
تحياتي أبو آمنة والمشاركين
حقيقة كل المداخلات قيمة وفي الصميم ، فقط مسألة واحدة أود التعليق عليها وهي أن انحياز السوداني للسوداني التي تحدث عنها البعض مسألة تكاد تكون شبه معدومة اللهم
الا في سعودية اخرى غير التي عشت بها لأكثر من ثلاثة عشر عام ، من خلال تجاربي الشخصية ومن تجارب كثيرين اعرفهم السودانيين أكثر الجنسيات لا يخدمون بعضهم
، بالطبع لا أعني هنا انحياز اعمى بصرف النظر عن الخبرة والمؤهلات ولكن حتى لو استوفيت شروط الوظيفة المقدمة من النادر جداً أن يدعمك سوداني ، والعكس تماماً كما
تفضل الأخ الشفيع إبراهيم بانحياز الشوام لبعضهم البعض رغماً عن تدني الخبرة والمؤهلات .
| |
|
|
|
|
|
|
|
|
|
Re: الكفاءات السودانية خارج الوطن ما لها وما عليها (Re: Gafar Bashir)
|
تحياتي بكري اسماعيل
حقيقة كل المداخلات قيمة وفي الصميم ، فقط مسألة واحدة أود التعليق عليها وهي أن انحياز السوداني للسوداني التي تحدث عنها البعض مسألة تكاد تكون شبه معدومة اللهم
الا في سعودية اخرى غير التي عشت بها لأكثر من ثلاثة عشر عام ، من خلال تجاربي الشخصية ومن تجارب كثيرين اعرفهم السودانيين أكثر الجنسيات لا يخدمون بعضهم .
الكلام البتقول فيهو اكيد سمعتو كتير جدا واحتمال انا في وقت من الاوقات كان ده رأيي ، لكن مرات بحاول القي اعذار زي انو الشخص الانت بتمشي ليهو ما عندو موقع جيد في الشركة او بيحاول المحافظة علي وظيفته مثلا أو مر بتجربة ما جميلة مع مسالة التشغيل،
لكن مرة تانية وفي اثناء العمل بتلقي الموضوع ما محتاج موقع عشان تطلب تعيين او توظيف شخص يعني بمروا عليك اشخاص من مختلف الوظائف (غير سودانيين) طالبين تشغيل اقرباءهم وبدون حياء يعني الموضوع طبيعي، وبكون عندهم اكثر من تجربة تشغيل فاشلة لكن بستمروا في طلب التوظيف
ده غير انهم لما يوصلوا لي مواقع متقدمة يخلقوا وظائف فعليا ... وبالتالي مافي مبرر لعدم السعي لتشغيل او توظيف السودانيين اللهم الا عدم الكفاءة لطالب الوظيفة....
وبصورة عامة اتفق معاك الي حد كبير عن اختلافنا عن البقية ودي ميزة ما جيدة طالما طالب الوظيفة مؤهل زي ما ذكر معظم المتداخلين هنا
ومرة تانية بكرر وبأكد محتاجين لي تكوين جسم او مجموعة أهلية طوعية للعمل علي توفير الوظائف للسودانيين بصورة متطورة واكثر احترافاً من خلال موقع علي شبكة الانترنت ومتطوعين للعمل علي الموقع وعلي التواصل مع السودانيين في جميع المجالات لخلق فرص ووظائف للسودانيين من الداخل والخارج
وانا شخصيا حابد من جهتي حابدا فعليا في التخطيط لعمل زي ده اتمني الكثيرين يشاركوا لانو موضوع فعلا مهم
| |
|
|
|
|
|
|
|
|
|
Re: الكفاءات السودانية خارج الوطن ما لها وما عليها (Re: Gafar Bashir)
|
الأخ/ جعفر
تحياتي
| Quote: انا شخصيا حابد من جهتي حابدا فعليا في التخطيط لعمل زي ده اتمني الكثيرين يشاركوا لانو موضوع فعلا مهم |
مبروك لك تحيزك للسودانيين (الغلابة)، وحيث كان ولم يزل هذا ديدني بمجهود فردي، ففي الأسبوع الماضي وجدت فرصة جيدة لواحد،
يا الله كم فرح وأسرته وقد فرحت كثرا لفرحهم. وللتنسيق معكم لتكوين ( لوبي سوداني ) للتواصل 0564705108 الرياض.
| |
|
|
|
|
|
|
|
|
|
Re: الكفاءات السودانية خارج الوطن ما لها وما عليها (Re: حماد الطاهر عبدالله)
|
Quote: Perfect answers may not exist to all management problems encountered.
What you can learn is a way of looking at and thinking about management situations.
|
شكراً استاذ : Mohamed Abotor
دي حقيقة اجابة جدا مطمئنة، لاني لوهلة كنت ببحث عن الاجابة الشافية وقلق لاني ما حصلت عليها لكن كلامك بيعني انو في مستويات من الاجابة الواحد ممكن يتعايش معاها وبرايي اني وصلت لمستوي مرضي من خلال الموضوع ده للاجابة علي السؤال .. مستوي اقدر اتعايش معاهو بصورة جيدة ومطمئنة0
| |
|
|
|
|
|
|
|
|
|
Re: الكفاءات السودانية خارج الوطن ما لها وما عليها (Re: Gafar Bashir)
|
Quote: مبروك لك تحيزك للسودانيين (الغلابة)، وحيث كان ولم يزل هذا ديدني بمجهود فردي، ففي الأسبوع الماضي وجدت فرصة جيدة لواحد،
يا الله كم فرح وأسرته وقد فرحت كثرا لفرحهم. وللتنسيق معكم لتكوين ( لوبي سوداني ) للتواصل 0564705108 الرياض. |
تحياتي استاذ حماد الطاهر
شكرا علي هذا الاسهام الكبير واعرف ان فرحة الاسر بوظيفة اكبر من فرحة صاحب الوظيفة ... وشكرا لهذا الاستعداد غير المشروط للمساهمة والمجهودات الفردية... سيكون بيننا تواصل باذن الله بخصوص الفكرة ..
| |
|
|
|
|
|
|
|
|
|
Re: الكفاءات السودانية خارج الوطن ما لها وما عليها (Re: حماد الطاهر عبدالله)
|
السلام عليكم
شكرا لصاحب البوست وجميع المتداخلين
موضوع ثر ومهم جدا - تابعناه بكل انتباه وتمنينا المواصلة في سرد التجارب والأفكار ما أمكن...
حبذا لو تفضل اصحاب الخبره بتقديم نصائح عامة للتعامل مع الجنسيات المختلفه الموجودة في بيئة العمل في السعوديه لأننا حديتو عهد جدا بهذه البيئة --
وافر الشكر وعاطر التحايا
| |
|
|
|
|
|
|
|
|
|
Re: الكفاءات السودانية خارج الوطن ما لها وما عليها (Re: محمود سيد أحمد)
|
| Quote: حبذا لو تفضل اصحاب الخبره بتقديم نصائح عامة للتعامل مع الجنسيات المختلفه الموجودة في بيئة العمل في السعوديه لأننا حديتو عهد جدا بهذه البيئة -- |
تحياتي محمود
شكرا علي طرق هذا الموضوع ... وهو لا ينفصل عن مسار الحديث .. وخصوصا وان هنالك الكثير من الافكار المسبقة وهناك الكثير من الافكار (السودانية) عن الاخرين ... خصوصا القادمين الجد للملكة .. منها ما هو واقعي ومنها ما لا يمت للواقع بصلة
سوف اعود للحديث عن الموضوع بعد ترتيب بعض الافكار .. واتمني مشاركة الاخرين عن تجربتهم
| |
|
|
|
|
|
|
|
|
|
Re: الكفاءات السودانية خارج الوطن ما لها وما عليها (Re: Gafar Bashir)
|
اظن ان المداخلة التالية للأخوة الفاتح شلبي و Mohamed Abotor
ممكن تكون مدخل لمناقشة الموضوع:
Quote: قبل مدة اتصل علي شخص مقرب مني بتوظيف شخص يقرب له فقمت بعمل اللازم من تنسيق لمقابلة فى مدينة نائية غير التي اقيم بها ... اختصار الأمر ان المسؤول المعني بمقابلة الراغب للعمل كان بريطاني الجنسية ... ولم أقصر بمباغتة زولنا بإتصال قبل المقابلة ووصيته على كل شئ ... (إلا شئ لم يخطر على بالي) إنتهت المقابلة سريعاً واتصل علي البريطاني وقال بأن زولنا حضر فى الموعد فقلت الحمد لله فى سري (والنقطة دي واحدة من النقاط اللى ذكرتها ليه فى اتصالي) ثم أردف وقال بانه كان لابس نظيف ومهندم وله خلفية كافية عن الوظيفة المعنية (قلت فى سري دهـ خلاص اتعين) ... ثم قال لي البريطاني بأنه لم يرى فى يدهـ أي شنطة ولا ملف اوراق فعندما سألته عن سيرته الذاتية قام من على الكرسي ومد يدهـ للجيب الخلفي للبنطلون واستخرج ورقة مطبقة ومدها له فإذا به يكتشف أنها سيرته الذاتية (وكان قرارهـ أنه لا يصلح للعمل)
فبالمقارنة مع بقية الجنسيات غير السودانيين عند التقديم لوظائف حتى عمالية ياتون وهم بكامل لبسهم وفى اياديهم لو لم يحمل شنطة يحمل حامل أوراق أنيق يفتح الانفس
ملخص رأيي إذا انتبه السودانيين لاحترام المواعيد واللبس الأنيق بالإضافة الى خصالهم الطيب الذي يمدحون بها غيرهم لأصبح سوق العمل فى الخليج حكراً عليهم |
Quote:
(There are 4 Cores of Credibility, and it’s about all 4 Cores working in tandem—Integrity, Intent, Capabilities, and Results. Part of building trust is understanding — clarifying — what the organization wants and what you can offer them. Be the one that does that best. Then add to your credibility the kind of behavior that builds trust. (see the 13 high trust behaviors below). Next, take it beyond just you as the leader and extend it to your entire organization. The combination of that type of credibility and behavior and organizational alignment results in a culture of high trust |
| |
|
|
|
|
|
|
|
|
|
Re: الكفاءات السودانية خارج الوطن ما لها وما عليها (Re: Gafar Bashir)
|
المداخلتين اعلاه بيشكلوا تقريبا اهم محاور مسالة التعامل في السعودية (المظهر العام ... والقيمة الانت بتضيفها للشركة)
والملاحظة انهم بركزوا علي السلوك الشخصي وليس علي الجنسيات الاخري ... ودي لي حد كبير وجهة نظر صحيحة يعني مهما كانت الجنسية الانت بتتعامل معاها في النهاية ممكن تجبرها علي
احترامك واحترام سلوكك بدل البحث عن كيفية التعامل مع كل جنسية علي حدة ... ده طبعا بيتطلب مراجعة في الاساس لسلوكنا كسودانيين ومحاولة تغطية القصور الموجود فيهو والاستفادة م الميزات
المعروفة عن السودانيين في مجال العمل:
في رايي اذا بدات العمل في اي شركة جديدة حتي ول عندك خبرة في شركة داخل السعودية ... الاساس انك تمسح اي افكار مسبقة للتعامل مع الجنسيات ... نعم في تنميط موجود للجنسيات ومنه
(السوداني كسلان) ، المصري (نصاب)، (السعوديين ما بشتغلوا أو ما بفهموا ) ... دي تنميطت سائدة وما نتجت من فراغ .. لكن في راييي انه لا يصح التنميط علي كامل الشعوب وحتي لو كان في سمة عامة لا زال هناك الفروقات الشخصية
فانت بتتعامل مع كل شخص وفقاً لسلوكه الانت بتشوفه وبتقيمه.
نفس الشيئ بينطبق علي التنميط للسودانيين، فانت غير ملزم بيهو ولا انت مطلوب منك تخت نفسك في موضع الدفاع عنه ... لان الدفاع عنه ما هو الا اثبات في الاساس للنمط
| |
|
|
|
|
|
|
|
|
|
Re: الكفاءات السودانية خارج الوطن ما لها وما عليها (Re: Gafar Bashir)
|
في اشياء يجب انو نعترف بيها زي السلوك والمظهر العام للسودانيين:
يعني الاخ الفاتح شلبي ذكر موقف ... بغض النظر عن تفاصيله هو اشارة الي مظهرنا العام وسلوكنا العام ... فيهو في الحقيقة مشاكل كبيرة .. اول مشكلة هي الشكل والزي:
خليني احكي ليك اليوم موقف مريت بيهو شخصياً بيوضح المسالة دي:
كنت مع واحد من المسئولين الكبار في الشركة و جاء الكلام عن واحد من مهندسين الصيانة (نحن 6 مهندسين صيانة في الشركة):
كانت تعليق المسئول الكبير انو صاحب الشركة قال اظن ده ما الشخص الانا عملت ليهو المقابلة في بلدو؟
والموضوع زي ما لخصه المدير انو الشخص يجب انك تعرف وين البيئة الجايي منها في الاول .. لا لبسه ولا شكله ولا سلوكه بيشبه سلوك المهندس لبسو وطريقة تعامله اقرب لي سواق تريلة .. من مهندس ... ودي المدير بفتكر بسبب انه عاش حياته في المخيمات.
و الموضوع هنا ما موضوع (جنسيات) لكن موضوع سلوك شخصي ... لانو المدير الكبير والمهندس من نفس الجنسية .اللي هي عربية ومصنفة اعلي من السودانية.
ببقي انت بمظهرك بتجبر التانيين يحترموك في الاساس بغض النظر عن جنسيتك
بسلوكك القويم بتجبرهم انهم يحترموك بغض النظر عن الجنسية
باداءك المنضبط في شغلك والحضور والانصراف بتجبرهم علي احترامك
وده بيقودك لي المداخلة التانية لاخونا Mohamed Abotor عن ستيفن كوفى (الاربعة الجوهرية).
وصراحة المشاكل الانا واجهتها مع السودانيين في الشغل هي مسالة المظهر العام والانضباط في الحضور والانصراف والكلام الكتير في التلفون اثناء وقت العمل
وانا بالتاكيد جزء من السلوك السوداني ده واحتمال ما قدرت اتخلص منو نهائيا لكن عيل الاقل دايما ببذل جهد لتغييره وده المهم.
في النهاية كل الموضوع ده بعتمد علي بيئة عملك وكل بيئة عمل مختلفة عن التانية ... ببقي فهم بيئة العمل كويس هي الخطوة الاولي ... والثانية تنمية السلوك الشخصي الجيد
| |
|
|
|
|
|
|
|
|
|
Re: الكفاءات السودانية خارج الوطن ما لها وما عليها (Re: Gafar Bashir)
|
| Quote: اعتقد أن السوداني غير مرتب في مظهره - لايجيد اللباقه يصلح في المواقع التي تتطلب الامانه -يجب تحليل شخصيتنا السودانيه - نحن الحلقه الاضعف من حيث الرواتب وخصوصا ان كان مديرك سوداني لايخدمك ولايخدم نفسه |
تحياتي Dafaallah Alaser
وشكرا علي المساهمة، والحقيقة انا كتبت ماخلتي اعلاه قبل اقرا كلامك ... ومن الواضح انو متفقين علي مشكلة المظهر العام للسودانيين واالباقة .. اضافة الي انك ذكرت مسالة الأمانة وهي جزء مما ذكرت انو عندنا صفات جيدة وفعلا بتميزنا اذا حافظنا علي دعمها وفي نفس الوقت نحاول تغيير الصورة النمطية عن السودانيين بدون وضع نفسنا في موضع اتهام ...
مسالة اعترافنا بالنقص ما بعيبنا ... انا قابلت كتير من السودانيين بيرفضوا مسالة التنميط جملة وتفصيلا وكأنها (مؤامرة علي السودانيين) .. وده في الحقيقة السبب الرئيسي انو الكتيرين ما بتغيروا في سلوكهم الجوا بيهو من السودان ...
اي واحد فينا قادر كويس يشوف الناس بتعمل في شنو ويقيم ياتو مستوي الافضل ... واذا كان حقيقة بيمتلك الرغبة ممكن يغير الكثير حتي للناس الحوله ويغير من الشخصية السودانية النمطية وده بيتطلب في الاساس الاعتراف بمشاكلنا ما من باب جلد الذات لكن من باب الرغب في التطور ...
الحاجة المهمة هنا انو موضوع التغيير ماهو صعب ولا هو سهل في الحقيقة لانو تغيير ثقافي وتغيير ثقافي بيتطلب كتير من الوقت والجهد ... لكن مع المثابرة والاستمرار اكيد بيحصل تغيير ... والتغييرات الصغيرة المستمرة بتخلق في النهاية التغيير الكبير.
طبعا بيئة العمل والناس الحولك في السكن والزملاء برضو ليهم تأثير كبير
| |
|
|
|
|
|
|
|
|
|
Re: الكفاءات السودانية خارج الوطن ما لها وما عليها (Re: Gafar Bashir)
|
| Quote: لأخ جعفر تحياتى .. بعيدا - قليلا- عن موضوعك لكنى رايت تجربة غريبة لمدير سودانى فى ( أبوظبى ) فلقد كانت كانت ميزانية التعيين مفتوحة فى يده ذلك الوقت فى أحد المرافق الحكومية هل تصدق كان يفضل تعيين ( الشايقى ) أولا ومن ثم بعد ذلك بقية السودانيين هل تصدق ( تنقاسى ) والقرى المحيطة بها كانت موجودة فى هذا المرفق الهام. ..! |
تحياتي Yousif Bashari
اولاً الموضوع حقيقة مرتبط مع بعضه يعني ما بعيد ...
في بداية الحديث قلت انو السلوك في موضوع زي ده بكون متناقض ما بين الواجب العام وما بين الشخصي ... وجميعنا لا نخلو من تناقض.
نحن بنتساءل عن مشروعية (الانحياز ) لابناء السودان في الغربة ومديرك ده يا سيدي اتجاوزنا مراحل في مسئولية تشغيل الناس علي اساس القبيلة ...
تعرف انو بالنسبة للسعوديين سؤال القبيلة سؤال أساسي مجرد ما تجيب سيرة سعودي بسالوك طوالي (وش هو) والمقصود القبيلة .. لو عايز تمدحو ولا تنبزو
الاردنيين + المصريين وبقية الجنسيات عادة تبدا بالاقرب اذا ما القبيلة المنطقة ... يعني بصورة عامة الموضوع في الغربة طبيعي ومرغوب.
ممكن يكون عندك راي لانك ما شايقي مثلاً ... لكن بالنسبة للشوايقة ده احسن واحد في الدنيا ...
تعرف لو كل سوداني بدا يخدم ناس اهلو ومنطقتو وحتي قبيلتو في الغربة ما كنا محتاجين نفتح الموضوع ده ..
ممكن يكون مصدر التخوف من سلوك زي ده داخل السودان ...
لانو معروف في شركات في السودان محصورة علي قبايل ودي مشكلة كبيرة جدا كلنا عانينا منها لكن لانها في السودان مرتبطة بمشكلة كبر من مجرد التشغيل
مرتبطة بالعنصرية البغيضة النحنا عايشين فيها ... فاذا كنت ما شايقي عاين للموضوع بايجابية طالما في النهاية بعين برضو سودانيين ... احسن من الما بفيدك شايقي ولا جعلي
تحياتي
| |
|
|
|
|
|
|
| |
الفاتح شلبي
الامين موسى البشاري
محمد حمزة الحسين
Hani Arabi Mohamed
Zakaria Fadel
أحمد الشايقي
يحي قباني
Elmosley
aosman
MOHAMMED ELSHEIKH
حسين نوباتيا
Mohamed E. Seliaman
مني عمسيب
فيس بوك
تويتر
انستقرام
يوتيوب
بنتيريست