|
دكان عبد الله وقدرة فول
|
في يوم سهران كنت بونس قمر الليل وكنت بناغم للنجمات بين استار العتمة افتش عنو شليل وانا متوزع بين افكار في الغربة تناوش وبين احساس مفتول وعليل جيتي وجاني معاك هبوب النسمة الشاربة النيل واتحاورنا عن حلتنا وشارع بيتنا وعن دكان عبد الله وقدرة فول واتكلمنا عن جمعية الحي وناس الحي وشكل الشارع وحمل الناس الاضحى تقيل ولمن جيتك شايل الشوق اتحسستي رذاذ الكلمة زي رصاص الا لانك صادقة شديد طلقة قولك كانت زهرة وصارت لي مشوارنا دليل واتقاودنا مرة نقول الكلمة غموض مرة نهازر بالالفاظ ومرة نبوح الريدة عديل ونرجع تاني مرة تحسي الخوف وتتقولي ابعد مني ومرت اقول يا زولة تعالي نغني الريدة ونرسم للاطفال الجاية نشيد وفجاة نحس الريدة تزيد تهدر سيل يامرواد السهر الكحل للعينين يا مسدار الرحلة وفيه حنين الكلمة بميل رهق السفر الفينا يئن انين الرهق الكامن جوة الروح منو نعبي ومنو نشيل وانده ليك يا نية بتشبه طعم الفرحة صباح العيد ايدي وايدك يلا نرص القافية الشاردة ويلا ندوزن للاعصاب الجوة الكلمة ويبقى اللحن الصاخب ناعم صولا تفتق للاحساس وتشد الحيل يوم لاقيتك بين اجفان الفجر الصادح بي ابهارك جد حسيت بالزمن القادم فيه ملامحك فيه بتقاصر حبل الهم الكان متمدي طويل يا مشوارا زاد في طوله يا مسدار الرحلة عقيم يا دوباي في الصدر مقيم يا شاشاي جواي رزيم انا بتنفس من انفاسك لما تهلي مرات اسكر ومرة ازيح العتمة وازيل والقى عيونك جوة عيوني وتبقي بصيرتي ولمن منك تنزل دمعة حرفي اليك بصير منديل يمسح منك وجعك وآسي ويرجع لي ، ولمن يرجع لي بيرجع زمنا صافي زمن الالفة ولون احساس الناس الصادق وخالي الزيف يازولة بتدي الكلمة طعم الحق وعشم الحلم الجوة الخاطر هاك مني الريدة اقوى عهود ومعاك بكون الواقع احلاى وكله جميل وبس
|
|
|
|
|
|