|
|
 ارحل...معناها "انت" ترحل
|
نحن لمن قلنا أرحل
كان قصدنا ... انو ترحل ..
مش تبدل في الكراسي .. والترابيز الدواير ..
والترلات البتاكل في ضهرنا ولا بتخجل ..
أرحل ... أرحل
يعني شتت ..
يعني فارق ..
غووور في ستين الف جردل ..
مابيفرق لو تغير انت نافع ..
او تخت في بدلو شافع ..
ولا مجنون لافي حايم في الشوارع ..
او مسطَل ..
نحن دايرين ..
زول زراعة .. يعرف الواطه البتنتج
يعرف المحصول ونوعو
والبذور الما بتفشل
نحن دايرين ..
زول تمرجي
يعرف المرض الموطَن
لينا يكشف كل عله
ماهو بس دكتور ويصهل
نحن دايرين ..
زول مدرس
يمسك الطبشيره يشرح
تمرق المعلومة منو
لي اقاصي بلادنا توصل
نحن دايرين ..
زول مهندس ... يفهم المكن المعصلج
يركب الترحيل جماعي
يلبس الابرول ويسهر
يلحق الفي الريف معطل
نحن دايرين ..
زول حقوقي
قاضي يحكم بالتساوي
يستمد منهج قضاهو من شريعة رب اعدل
نحن ماااادايرين كراسي ..
لا لا ما دايرين مناصب ..
نحن دايرين بس بلدنا
تبقي لينا
ونبقي فيها
ونبقي ليها
وهل تصدق ..
شان دا يحصل ..
لازم ابدا ..
كلو كلو ..
انت ترحل
(منقول - واتسب)
|
|
 
|
|
|
|
Hatim Alhwary
nour tawir
فيس بوك
تويتر
انستقرام
يوتيوب
بنتيريست