Quote: اولا شكراً ليك يا وليد ... لكن انا حقيقي مستغرب منك انت بالذات يا وليد .. انت رجل حقاني جدا ومن خلال متابعتي لي كتاباتك في البورد دا بشوف انك واحد من قلائل يقولون الحق ولو على أنفسهم .. الشئ التاني يا وليد مافي زول قال انو مافي فقر في السودان ولا في زول قال انو نحن ح نقرر نيابة عن هؤلاء النسوة ممن يعانين الكثير ... يا وليد اسأل المرأة المتسولة دي وقول ليها هل في امكانك انك تقعدي سنتين ولا تسمعي صوت ولدك الشايلاهو دا؟ هل في امكانك انك تقعدي سنتين في أرض تبعد الاف الاميال وانتي ما عارفة اولادك حيين ولا ميتين؟ هل في امكانك انك تستحملي انك تقعدي في بيت فيهو سيدة كبيرة في السن فوق التسعين سنة ولا تستطيع ان تقضي حاجتها إلا بواسطة ولا تستطيع أن تغتسل بعد قضاء الحاجة، وفي البيت اربعة رجال يلبسون كما يريدون ويخرجون ويدخلون عليها وهي في نص البيت؟ بل وقد يصل الأمر إلى التحرش وفي نفس الوقت هي ممنوع عليها أن تمتلك هاتف تتصل به على أهلها، فهم قد يسمحون لها وقد لا يسمحون أن تتصل بأولادها لمدة قد تصل لسنتين وقد تزيد.. وهي لا تستطيع الخروج من المنزل إلا معهم وليس لها يوم اجازة وتعمل لعدد ساعات يتجاوز 18 ساعة بلا توقف أو راحة ولو توقفت أو ارتاحت قد تتعرض للضرب؟...قانون العمل السعودي يا وليد لا يشمل خدم المنازل والسائق الخاص ومن في حكمهما وذلك بنص المادة السابعة من نظام / قانون العمل السعودي... عليه فلا يحميها إلا لائحة (الجابا الأخ حسين عبد المجيد فوق) ليس لها قوة القانون ولن تقبل الهيئات القضائية الخاصة بنظر قضايا العمال النظر في قضيتها.... عليه فحقها رايح رايح يا وليد وقد تعمل لمدة ثلاث سنوات مثلاً ولا تحصل على راتب ثم تستيقظ الصباح وتجد نفسها في السيارة متجهة إلى المطار بعد يكون كفيلها عمل ليها تأشيرة خروج وعودة (ما ح يعمل ليها خروج نهائي لانو الجهات المسئولة في المملكة لا تسمح بتأشيرة الخروج النهائي إلا بعد إحضار مخالصة المرتبات) وتمشي أهلها وتكون شغالة تلاتة او اربعة سنة (سخرة) بدون أي راتب غير اكلا وشرابا ... أها تفتكر حكومتنا أو السفارة ح تهتم بي انو ترجع ليها حقوقها؟؟؟
مرحب عمار
كلامك ده كلام ممتاز ..يعلن عنه وتملك هذه المعلومات لمن تريد ان تعمل .. وهي حرة
بالنسبة لحكومتنا ..هي تنتهك حقوق هؤلا النسوة في السودان .. فكيف نعشم انها حا تجيبها ليهم من خارجة
المفروض يحصل انتو في دولة السعودية تعملوا كيان .. رابطة مجموعة منظمة كيفما يكون تكون مهمتها متابعة العاملات ومتابعة مشاكلهم ... ومهمتها التانية تشكل وسيلة ضغط لتعديل كل هذه الثغرات الاتحدثت عنها في القوانين السعودية ده ياهو الشغل المفروض يعملوه الناس
لكن ما يمنعوا النسوان ديل .. ويسطوا على حقوقن .. في ظل ظرف طاحن داخل البلاد
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة