لما تموت روحك وأنت حي كل شيء فيك حي حقيقة بتشوف وبتسمع وكمان النفس طالع ونازل وتشعر بالكأبه وما في أي فرح جاك ولا فرحت روحك العزيزة دي الساكنة فيك من سنين بس تبكي وكمان بحرقة وتكون في حته ما يشوفك فيها زول أعمل شنو هي دي ما حالة عابرة لا نها قاعدة معي زي كم سنة كدا وأنا كنت غرقان في الفوضي حقتي تقوم تعمل فيها زول مفكر وتتأمل حاجاتك تلقي نفسك حاجة تعيسة جدا أخير منك حمار سيد اللبن ليه الحمار المسكين الفار القذر اللي بياكل كل شيء في أوضتك دي بالجد هو أحسن منك لانو متصالح مع نفسو لا تعرف في اللحظة دي تنعي روحك لذاتك ولا حتي تقول لأي زول أنو روحك ماتت تخاف يقولوا خلاص بالجد دا جنا عديل كدا بس تسكت وتقعد تفكر العلاج شنو عشان روحك تقوم تتحرك كدا وتحقق حاجة أنشالله رياضة يومية وكمان في الامسيات يا خي زي نوعك مرض وجربان بطريقة معفنه جدا هو العفن ما قذرة وتكون زول ما بتستحم أها أنت نضيف وكمان حمامك مريتين في اليوم برضو منتهي العفن لا نو روحك ماتت تقعد تفكر في مخرج من أو كيف خلاص ما حصل الموت لروحك العجيبة دي طيب ما في زول عارف هي راحات في حق الله أها التعامل مع بقي سكان جسمك يكون كيف قلت يا ود أنت عايز أستشارة عاجله من أحد مواطني الدول المتقدمة لانو كل جمعه الامام في الجامع ديل ناس أروحم ماتت وماديين وما بعرفوا الله خلاص أمكن عندهم علاج لحالتي دي مشيت عندي صديقة من مالطا شعالة في منظمة ساكنة في الرياض شارع الجزا ر ضربت تلفون وحددت موعد ومشيت الكلام كلوا في السياسية والموسيقي زهجت منها جدا أسمعي يا لورين أنا روحي ماتت )معاي سول ) عرفتي وبدايت أشرح كيف روحي ماتت أشوف ليك الخواجية تضحك زي اأنو أن بحكي في نكته يا دا حظ شنو هي ذاتا طلعت ماسورة وكمان مصديه طلعت منها مشيت شارع النيل قاعد قدام الفندق الكبير مستغرب أسوي شنو جوا عسكر النظام فتشك فتشك قعدت أبكي الضابط المعهم قالما تبكي أنت كان عندك عرقي ولا بنقو جيبك بمرقك من المشكلة بالله شوفوا الوهم دا أن روحي ميته وبيكي عليها يقول عرقي قال أخير مشوا بعد ما طلعوا حتي مقاعد العربية قالت لنفسي جنس دا بيقتل الزول بطولا خليك من روحك العيانه دي !!!! وبعد ها مشيت المقابر رزت قبر أمي وقريت الفاتحة علي روحا وكمان عملت زي المثقفاتية قريت نص جميل عشان أمي ما تشعر بوحشة القبر أماه قلبي يحترق أماه عمري قد سُرق فالبعد أماه أشعل نيراني أشتاق أن أرتمي في أعماق حضنكِ أشتاق أن أشتم رائحة عطركِ أماه إن فقدكِ قد أشقاني أماه بَعدَكِ ليس لي قريبٌ أماه بَعدَكِ ليس لي حبيبٌ يؤنس وحدتي ويهتم لشاني تحشرجت أنفاس الشوق بمهجتي وأعتلت مشاعر الحزن كياني ليس بعد فقدكِ من مصيبةٍ قد ظلمني بها الزمان وبلاني تهاطل الدمع مني متسابقاً يتسارع نحو النزول من فوق إنحدارات الخدِ ينتزع الآه من قلب وجداني رسم بناره جرحاً جسد هول مصيبتي وأوضح للعالمين كم أنا أعاني أواه يا أماه فقلبي يحترق أواه يا أماه قلبي قد سُرق والشوق نارٌ تأججت داخل صدري بعنفوانِ إلهي لا تحرمها أجر دعواي وأرزقها إلهى فردوس الجنانِ إلهي إن إمي من أربابِ الفجر كم زين جبينها أرض السجودِ فزين إلهي قبرها بنور الرضوانِ
بس لكين روحي ماتت وما لقيت علاج و ما أظن يكون في علاج لحالتي دي يا ربي لطفك بس ما أجن !!!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
زهير عثمان حمد
فيس بوك
تويتر
انستقرام
يوتيوب
بنتيريست