|
|
|
 Re: نحن الاعضاء الجدد (Re: عبدالحفيظ ابوسن)
|
أوغلنا في هذا المنتدي برفق ,, وولجنا وطابين المثل السودان
الانسان طبيب نفسو
و
الشقي يشوف في نفسو
والسعيد يشوف في اخوهو
فبعدنا عن كل البؤر المشتعلة ونارا فوق ,, تشم ريحة الشية علي مسافة بوستين
مشينا جمب الحيطة ,, ورقدنا طرف
كفاية علينا شكل ودواس الدنيا دي ,, كمان نجيب لينا دواس اسفيري
ياخ افرض المرة سألتني قافلة معاك مالها.,, وقلت ليها مشاكل زول ,, وقلت ليها في النت
تقول يا راجل اما والله مسخره رجال ,, وقلت شغله ,, ما كفتك مشاكلك الما عارف تمرق منها دي ,, وبقيت زي الجهلة ناس الفيس بوك ,, بدل تشوف هم اولادك تمشي تتمسخر ,, وشكل النت ده فيهو عكاكيز ولا زي شكل العوين منابيذ و ردحي
| |
 
|
|
|
|
|
|
|
|
Re: نحن الاعضاء الجدد (Re: عبدالحفيظ ابوسن)
|
اها يا سيد اللمنتي ليك
خشينا وبقينا نكشف ساي ,, ورمينا البياض ,, عضو جديد هل من مرحب ,, والناس اتردمو فينا ,, مبروك ,, مبروك ,, وناس اسألو ياربي بكري ده بخم الناس دي من وين ويجيبها يردما لينا ,, ويضيق علينا البيت وهو اصلو ضيق ,,وناس يعرفوك وقد يكلمو الما بعرفك ,, ياخ ده ما فلان ود ناس فلان ,, زول كويس
اها من زول كويس دي ببدي التصنيف ,, حسب الزول المكوسك ! لأنو الزول المكوس ده في ناس مكوسينو وناس مكعبنو ,, والقصة وراها تارات وحروب قديمه
| |
|
|
|
|
|
|
|
|
|
Re: نحن الاعضاء الجدد (Re: عبدالحفيظ ابوسن)
|
اها في بوستات شرك
ونحن خالين ذهن
والجديد شديد ,, جننا مكابسة ,, عاد ما جديد وداير أظهر ,, داير اتجاوز النكره دي واتحول لمعرف بأل
نقوم نخش ونقول كلامنا ,, بي اللاه الناس تفوتك حوفا ,, واستكنك ما نضمت ,, وتبقي عليك حكاية ونسة الفقران في لمة الناس
| |
|
|
|
|
|
|
|
|
|
Re: نحن الاعضاء الجدد (Re: عبدالحفيظ ابوسن)
|
| Quote: نقوم نخش ونقول كلامنا ,, بي اللاه الناس تفوتك حوفا ,, واستكنك ما نضمت ,, وتبقي عليك حكاية ونسة الفقران في لمة الناس |
يا حبيبنا
الله يعلم إنك من كتابي المفضلين في هذا المكان
ما تقول لي برلوم وجديد والحركات دي
أنا ذاتي لاحقك وفايتك بي غادي وكل ما ذكرته ينطبق علي: برلوم ومهمش
الحاجة الواضحة في المنبر دا: لو في زول بعرفك برد عليك ويناقشك
لو ما بعرفك ما بتورط معاك، يمكن تكون مناضل أو مثقف أو كوز ما معروفة الظروف
في الأول يحددوا اتجاهك، إشارتك رامية لي وين
يسار ، يمين ، مافي أي إشارة (يعني ماشي عدل) في الحالة غالباً بتتصنف رمادي
أها يا (سيد اللمنتي ليك) بعد دا بتتخت أوتوماتيكلي في كوم
والكوم دا يا صاحبي ليه محاسنو وليهو مساوئه
أول شي بتجيك هجمات مرتدة خطيرة، أها الكوم ما بخلي زول ينفرد بيك
في ناس متلقية حجج ساكت، إنت تبدأ الشكلة ويجوا هم يتولوها عنك بكل طيب خاطر، بل ويأتوك محملين بما لا قبل لخصمك به
قاعدين من سنة دو في المكان دا، أي زول دقس هنا صارّينها ليه
دي من فوائد الكوم
من عيوبو إنو الشر بعم والخير بخص
يعني يجي واحد في كومك يخرمج ويصوط ويكب، إنت معني تماماً بهذه الخرمجة
يا إما تقيف مع أخوك دا ظالماً أو مظلوماً
يا إما تكون مبدئي وتقول ليه ياخي إنت غلطان
وفي الحالة دي احتمال كبير تتحول لي كوم الرماديين، لأنو بصرّها ليك ويجي يوم يختها ليك في حنانك
بل ويسعى إلى فك ارتباط الكوم بك يعني احتمال كبير كومك ذاتو يتخلى عنك حسب مكانة الزول دا
تحياتي مثنى وثلاث ورباع
| |
|
|
|
|
|
|
|
|
|
Re: نحن الاعضاء الجدد (Re: بدرالدين بابكر مصطفى)
|
اوووو بدر يا فرده
كيفك ياخ
كلنا برالمة في هذا المنبر ,, ولكننا لسنا برالمة في عالم النت , بل كهولا مسنين
وبعدينك سرقت كل كلامي الداير اقولو ,, وابدعت فيهو ابداع ما ليهو نظير
آي ما عندك ضهر تتجلد في بطنك
لاحظت كده , وانا جديد ,, الناس بتكون ساكاك دايره تشوف انت رامي علي وين ,, المشاهدات ميه ولا مشاركة واحدة ,, وكم خشينا في بوستات وكتبنا وحاتك ولا هببو لينا ,, وديل راصدهم ,, تاني لو رعف ما اخش ليهو في بوست ولو عنونو بي اسمي
لكن للحق في ناس بقرو بذهن مفتوح دون النظر للاسماء , بالجد في ناس بعجبوك ,, ناس بخلو الزول يكتب هنا
اها الناس الرمو الساس مع بكري ديل براهم ,, ناس الكباشر والارشفة ,, تتدقس يلحسوك ويصروها ليك
ان شاء الله البعرفونا ما يحضرونا
وبكري عمل الارشيف تعديل مافي تاكلها بي ضبانتها
هههههه ضحكتني في ام الكيمان ديل
لكن لامن تخش لي جوه بتلقي انو رمادي دي كلمة ما بتعني اي مفهووم يمكنك الاعتماد عليهو ,, وهي مقتبسة من مسرحية شاهد ما شافش حاجه
يا ابيض ,, يا اسود ,, اللون الرمادي ده انا بحبهوش
ياخ الحياة زاتا رمادية
| |
|
|
|
|
|
|
|
|
|
Re: نحن الاعضاء الجدد (Re: عبدالحفيظ ابوسن)
|
بدر لقد رمتك سودانيز بلفذات اكبادها وناس الشي زاتو
حبابك محمد البشري
انت واحد من الذين احسنوا وفادتي وأزالو عني وحشة البورد ,, كدي النسألك انت ياتو في الاهل , بكون كده من كومك ( بمزح ياخ )
تعود الايام بالصحة والسلامة
والله يا ود البشري دي مشكلة حقيقية كناس جوداد ,, وناس البورد ديل لو علقو فيك بي حاجة تاني إلا حمار الوادي يهنق حتي يعتقوك ,, فمراتن كده الكلام بعشرق لي وادور امرقو ,, لكن بلاوز الشكلة مدورة ,, يا معانا يا مع الخيانه ,, وكلام اولاد المدارس ده ما بنفع معانا ,, يا جيب عكازك يا اتخارج ,, الجو ما جو منطق ,, ألبعني وألبعك ,, والملابعة ماعندنا مانع منها لو فيها فايدة ,, لكن شكل العوين ده ما بنعرف ليهو ,, صفتك ونعتك ,, وانت وانت ,, اها بعمل حميل
اها يوم داك بوست مني عمسيب كان هادي ,, خشيت نضمت ومرقت وقالو كده اخوان البنات واخوات الاولاد اتردمو ,, صقع جد ,,وحاتك ما عرفت ردي طش وين ,,
اها جنس ده بخلينا نلاوز
سودانيز بوابة للوعي ,, واعلام حديث يحرره مثقفي السودان
| |
|
|
|
|
|
|
|
|
|
Re: نحن الاعضاء الجدد (Re: عبدالحفيظ ابوسن)
|
| Quote: كلنا برالمة في هذا المنبر ,, ولكننا لسنا برالمة في عالم النت , بل كهولا مسنين |
ابو سن .. والمتداخلين ... سلام .. وكل عام وانتم بخير ...
للاسف بقت المواضيع في الغالب متشابهه ..
وضعيفه وتمتاز بالمهاترات .. والمناكفات ..
(والغريب يوجد من القراء من يهوي هذا النوع من المواضيع )
وبالاحرى .. لا توجد مواضيع هادفه تشدك .. او تستفيد منها ...
الا من رحم ربي ....
المهم ....
نحنا قاعدين ... وبنكشف ....
وزي ما بيقولوا ... الجواب باين من عنوانو ...
وكل كاتب موضوع ... معروف طريقة كتابتو .. واي المواضيع يتناولها ...
وفي النهاية الحكم للقراء ..
| |
|
|
|
|
|
|
|
|
 Re: نحن الاعضاء الجدد (Re: عبدالحفيظ ابوسن)
|
ناس كوستي البنضحوا سكر ... سلام الله الواحد ده عليكم
ياخ انت هسه برلوم لكن؟ .... احسب عندك 1200 مداخلة و كسر في 4 اربع شهور فقط
يعني حوالي 10 مداخلة في اليوم، يعني إسمك ده ما غاب نهائياً من الصفحة الاولى.
مداخلاتك و بوستاتك دي بسموه متواليّة تراجيّة (نسبةً لصديقتنا تراجي)
ياخ في ناس في 4 سنة ما بعملو العملتو انت في 4 شهور.
المهم...الكلام الممطوط و ضلو ممدود و البشبه الظوووط (ظوووط دي اسأل منو ود البشرى) عشان اقول شغلك جميل و واصل في رعاية الله و كده.
| |
|
|
|
|
|
|
|
|
|
Re: نحن الاعضاء الجدد (Re: Sameer Kuku)
|
سمير كوكو
وعليكم السلام ورحمة الله وتعالي وبركاتو
والفي جيبك هاتو
ياخ ما قلنا الجديد شديد ,, والجديد في الكرو سمح
ما عارفين عددهم كم لكن ماهن شوية ,, ما شفت الشافع الصغير هباش كيف ,, يمسكو من الكانون حق النار يمسك المبخر ,, يفكو من المبخر يمشي كوبس الكهربا لامن يوعي
| |
|
|
|
|
|
|
|
|
|
Re: نحن الاعضاء الجدد (Re: عبدالحفيظ ابوسن)
|
مرحبا مجيدو
وينك يارجل
صعب اصنف البوستات بأنها هايفة , ولا ينبغي لي ذلك
هي كتابات لها معجبيها وقارئيها والرادين عليها ,
وبالجد حتي بوستات الشكل والمهاترات بتلقي فيها طرافة احيانا وكلام جيد
والبحيرك الزول البخش البوست ويرد ويقول حاربو البوست ,,يحاربو كيف يعني
اها البوست ما حق شكل , كاتبو عضو كوم علي قول بدر ,, معناتو ناس الكوم التاني يردمو وها عاك عيك وتطلع صفر معاك الواحد
| |
|
|
|
|
|
|
|
|
|
Re: نحن الاعضاء الجدد (Re: عبدالحفيظ ابوسن)
|
اها
الما بعرفك في ابوك ما بعزيك
الجديد بخلي الناس يتوجسو منك ,, ودايرين يشوفو مويتك ,, ورامي علي وين
لأنو مرات الكلام يبطن خلاف ما يظهر , والناس متعودة علي الضربات الخفية ,, والشريك
والامر مفهوم بالنسبة لي ,, كومك بنفعك في البوست الاسود ,,
| |
|
|
|
|
|
|
|
|
|
Re: نحن الاعضاء الجدد (Re: Sameer Kuku)
|
| Quote: ياخ انت هسه برلوم لكن؟ .... احسب عندك 1200 مداخلة و كسر في 4 اربع شهور فقط |
صاحب البوست سلام ...
ويا سمير كوكو عدد المداخلات لو كانت كثيرة ما معناها الزول خطير جدا
لانو مرات فى كلام مليان وفى كلام فارغ والحاجة المفروض تعرفها هى
الكلام المليان مرات بــ يكون مليان كلام فارغ !!
تحياتى !!
| |
|
|
|
|
|
|
|
|
|
Re: نحن الاعضاء الجدد (Re: محمد كابيلا)
|
مرحبا كابيلا
وحبابك
ارجو ان أكون من الذين لا يهرفون ولا يتحدثون فارغا ,, عني نفسي ملتزم بعدم اللجوء لفارغ القول وغثه , ولكن الرأي رأي القراء
ولك الشكر
| |
|
|
|
|
|
|
|
|
|
Re: نحن الاعضاء الجدد (Re: عبدالحفيظ ابوسن)
|
عبد الحفيظ ابوسن
تحياتى ،،،
| Quote: ارجو ان أكون من الذين لا يهرفون ولا يتحدثون فارغا ,, عني نفسي ملتزم بعدم اللجوء لفارغ القول وغثه , ولكن الرأي رأي القراء |
للأمانة حقيقة أتابع بوستاتكــ بإهتمام وإستمرار كمان للإستفادة
من بعض المعلومات التى أجدها رغم أننى أحيانا لا أتداخل
معكــ !!
--------
تقديرى
| |
|
|
|
|
|
|
|
|
|
Re: نحن الاعضاء الجدد (Re: عبدالحفيظ ابوسن)
|
| Quote: وشكل النت ده فيهو عكاكيز ولا زي شكل العوين منابيذ و ردحي |
أحلى حاجة في المنبر دا إنو الناس ديل مصدقين إنو دا شكل
بكرة بعد بكرة يعملوا لقاء بورداب تلقى المتشاكلين ديل ذااااااتم متصورين جنب بعض
ومبتسمين ابتسامات واسعة وخاتين ليهم بيبسي قدامهم
نصيحة ليك يا أب سن: والبوست دا شتت ليك فيهو سكر أسعى ليك كوم، وزي ما قلت ينفعك في البوست الأسود
ومن هنا تبدأ الكيمان
تخريمة: مشيت قت شنو في بوست منى عمسيب يا الشقي ؟؟؟؟
| |
|
|
|
|
|
|
|
|
|
Re: نحن الاعضاء الجدد (Re: عبدالحفيظ ابوسن)
|
مرحبا بدر
ياخ نحن اولاد حجة واحدة
وهسعتي البشتت فوقو ده ما سكر ! قايلو شنو ! ملح ?
غايتو ما بولع لي نارا ناس كومي يقع فيها , وناري براي بدفيها
حميد قال
واصلو كتالك ياهو كتالك
وكتالي واحد ,, ولو لقيت عليه اعوانا لما قلت ابيت
هههههه
بوست مني كان بوست عادي ,, وكويس ,, خشيت كتبت راي , امكن بعد داك معظم الناس كتبو نفس الفكرة ,, كتبت واتخارجت ,, وحاتك جيت خاشيهو لامن مرقت وخشيت تاني ,, قلت امكن ركبت لي دبابة ,, مرقت عاينت لقيتو ياهو نفس البوست ,, قدامو شدره نيم وجمبو زير !
قت القلتو ياخ ,, ما تجيب لي الدوشكا هنا ( وش منطط عيونو ومنخلع
| |
|
|
|
|
|
|
|
|
|
Re: نحن الاعضاء الجدد (Re: عبدالحفيظ ابوسن)
|
صاحب الرساله القويه والواثقه ..
بيكتبها على القلوب اللينه بمداد معطر
فتسكن طوعا قلوب الأصدقاء
ويكتبها كمنحوته غائره على القلوب المتحجره
بإزميل من نور
فتسكن كُرهاً فى كل قلوب كارهى ذواتهم ..أعداء الحياة
ملهم كردفان
تحياتى واحترامى ياحفيظ
| |
|
|
|
|
|
|
|
|
|
Re: نحن الاعضاء الجدد (Re: ملهم كردفان)
|
| Quote: وخاتين ليهم بيبسي قدامهم |
الحمد لله البقى بيبسي .. ما هو شيتاً آخر
صاحب الخيط والضيوف .. كل عام وأنتم بألف خير
امسكوا في كلام حرسم القالو زماااااااان
الشغيل
| |
|
|
|
|
|
|
|
|
|
Re: نحن الاعضاء الجدد (Re: عبد العزيز محمد عمر)
|
سلامات
الحبيب
عبدالحفيظ ابوسن
نقوم نخش ونقول كلامنا ,, بي اللاه الناس تفوتك حوفا ,, واستكنك ما نضمت ,, وتبقي عليك حكاية ونسة الفقران في لمة الناس
ـولا يهمك يا راجل يا عزيز
أكتب حتي إذا لم يرد عليك أحد
كما قال الأخ العزيز
حرسم
تحياتي
| |
|
|
|
|
|
|
|
|
|
Re: نحن الاعضاء الجدد (Re: عبد العزيز محمد عمر)
|
مرحبا ملهم
طوقتني والله بما انا دونه فراسخا وبلود ,, واخجلتني بالمعني الحقيقي لذلك الاطراء والذي نبع من محبتك ,, ولك من الود والتقدير اطنانا
ياخي بيناتنا شارع زلط بس ,, ولا يفصلنا عن كردفان سوي رمالا وجب ان تكون ارضا خضراء لولا ظلم الحكام
تحية لك ولكردفان الغرة ام خيرا جوة وبرة
| |
|
|
|
|
|
|
|
|
|
Re: نحن الاعضاء الجدد (Re: عبدالحفيظ ابوسن)
|
مرحبا عبدالعزيز
مرحبا محمد نور
حبابكم حرم
ترانا ماسكين في قول حرسم
ولساني يقول
أقول كلمتي واذهب
والكلمة شرف الرب علي قول هاشم صديق
بعدينك
البستي كولا دي عندنا مربوطة بالحمي اكان سهراجه ولا هسهاسه ما محسوبة ,, الحمي الجد جد ديك ,, شوف عيني قزازة البستي كولا ينزلوها ليك من الرف , ويدوها ليك مسحه بي فوطة ,, وانت فرحانو !
تجغم جغمه تطلع بي نخرتك , مش زي حق الزمن ده ,, تقرطعها في جغمه واحده وتتدشا غصب ساي
كتر خيركم
لا
بل قل
كتر خيركما
مثني مرفوع بشنو كده ما بعرف
| |
|
|
|
|
|
|
|
|
|
Re: نحن الاعضاء الجدد (Re: عبدالحفيظ ابوسن)
|
من الفيس
حبابك جلال عمر
ما تخاف ياخ , خليك زي نكتة الزول الراكب عربية سايقاها مره , وجو في منحدر , الزول خاف ,, قالت ليهو , ماتخاف خليك زي
واعمل زي ما انا بعمل
بغمض عيوني
شكرا ليك ياخ
| |
|
|
|
|
|
|
|
|
|
Re: نحن الاعضاء الجدد (Re: عبدالحفيظ ابوسن)
|
من الفيس
سلمي الشيخ سلامة
بختي ,,, بختي
مثلك يتدلي ليكتب لمن هو مثلي !
عز والله
عزيتني جد جد
مرة رسلت ليك رسالة في الفيس زمااااااان ,, وقلت ليك اتمني ان يكون لي صديقا مثلك يذكرني ,, وصغرت من ان اطلب صداقتك
ولك الفضل في فتح عيني علي عوالم العميري الانسانية والباذخة
قولك وساما في صدري
لاكي مكرية ولا مدهنسة
ارجعي
تعالي
علي قول حميد
تعال قص الدرب
وارجع
تعال ادي الغبش
طله
بره البوست
و
تهاني عبدالحفيظ
بنيتي وباكورة مساهمتي في تربية جيل يحمل من سماتنا اجملها
| |
|
|
|
|
|
|
|
|
|
Re: نحن الاعضاء الجدد (Re: عبدالحفيظ ابوسن)
|
| Quote: البستي كولا دي عندنا مربوطة بالحمي اكان سهراجه ولا هسهاسه ما محسوبة ,, الحمي الجد جد ديك ,, شوف عيني قزازة البستي كولا ينزلوها ليك من الرف , ويدوها ليك مسحه بي فوطة ,, وانت فرحانو ! |
بالله شوف ؟؟
تعرف يا أب سن، أهلنا في الأرياف أول الواحد ما يورد (تجيهو الحمى) بشوفو أغرب حاجة
وأكتر حاجة جديدة وحديثة ويلخوهو بيها
يعني عادي ممكن تلقى ناس عندهُن زول مورود
يجي واحد يقول ليهم: دحين جربتولو الشعيرية ؟ (وهذه حقيقية) .. أي والله
يعني الشعيرية بما إنها اختراع عظيم فلابد إنها تعالج الوردة
أو تلقى واحد لدغان يجي واحد جايبلو جوافة معاهو من السوق
يدوهو جوافة لعلاج اللدغة
الأخطر من ذلك تلقى فلان جاتو وردة قبل كده وجابولو دواياً عالجو علاج نهائي وقطع دابر تلك الوردة
يحفظ الدواء ويختو في خريتة ويدسوا في قعر السحارة
بعد سنة جارو يجيهو يرقان يمرقولو دواء الوردة الأول داك ويعالجوهو بيهو
وغايتو
الناس دي بي هناك ماشة بي عناية الله
تحياتي مثنى وثلاث ورباع
| |
|
|
|
|
|
|
|
|
|
Re: نحن الاعضاء الجدد (Re: عبدالحفيظ ابوسن)
|
بوست انصرافي (طبعن لازمن نجرب كلمة انصرافي دي) _بهظر ياخ)
المهم ده بكون رد الزول الداير يختها ليك.
.......................................
ونسة الفقير دي ذكرتني
عليّ الجزيمة مرة وداني القدر لناس كدي العمم بتاعتهم تتداقش وشغالين يصححوا في الموبايلات بتاعتم شفت العلم اتطور كيف
شختك شختك شختك
اها سلمت تكني ماجيت زول هببني ماف قويت عيني وصنقرت حداهم
علي الايمان العمم دي منظر ساي وحكمة ربك اي كلمة يقولوها مشاترة الا في تقدير
الحضور الغير كريم موزونة .. نفيستي دخلت في الونسة قلت انضم وما لقيت حاجة
اسوقهم بيها غير الزراعة اها بديت بترحم على الفردي وووو قبل ما اتم نضمي
طارو لي في حلقي وماعارف داك وداك قربت اقتنع اني مازرعت في يوم من الايام
طبقت طاقيتي ومرقت منهم اصلو قالو كبر العمة بتكبر اللمة
...............................
العزيزـ سمير كوكو تحياتي ياخ انا حصلت لي وعكة بوردية كدي لقيت العداد مصفر يعني ضربت علينا البرلمة عديل
العزيز ود ابسن دمت سالم
| |
|
|
|
|
|
|
|
|
|
Re: نحن الاعضاء الجدد (Re: الجنيد حمد)
|
تعرف يا بدر ,حكي لي عادل ابسن اخوي ,, وهو زولا حكاي ووناس
معاهم واحد عامل فيها دكتور ,, عندو سفوفة لاميها ومصرصر منها صريرات بديها للناس ,, علاج لي امبريفي واللهو ابوعديلات حق الشفع داك ,, وبمسك الكبار برضو ,, بصيب الغدد ,, المهم يجيهو زول يشكي
اها عندك حمي
يقول ليهو لا
آي بس ياهو امبريفي
ولو قال آي برضو
اياهو امبريفي
المهم ماك مارق من سفوفتو دي
وهي الكمدة بي الرمدة
الوالدة رحمها الله مرضت سنوات عددا حتي توفاها الله
كل يوم انا خاشي فلم جديد
فلانة جات وقالت ناس فلان امهم مرضها زي مرضي ده وجابو ليها داك ,, وانا اجيب ,, كايس رضاها والمرض نفسيات ,, علي الجزيمة اتكحلت بالفكس والشطة وشربت الحنضل ,, ووديتها البحر غسلت كرعينها ,, والطريق وعر وهي امرأة مقعده
ياخ الناس البجو يكفرو ليك ديل مرات بيأذوك
وبمناسبة الخرتاية دي ,, امي كان عندها كيس ,, جراب حاوي بس ,, ادوية الدكاتره والبلدية وخاتاهو تحت راسها ,, وهو كائن حي يكبر كل يوم
| |
|
|
|
|
|
|
|
|
|
Re: نحن الاعضاء الجدد (Re: عبدالحفيظ ابوسن)
|
مرحبا الجنيد حمد
ياخ موصيني اتعرف بيك صحبي الصغير الباشمهندس عاصم الشيخ
هههه
انصرافي دي سمعتها مرتين ,, مرة بذوق من عضو هنا منبها , ومرة من نافذة الفيس تعريضا
وده رايهم ويلقي مني الاحترام
واتا البوديك تتحشر شنو ,, بدل تكبر العمة كبر اللفة ,, واختاهم زي اخوك
ياخ ديل بصيبوك بالبلاده والدلاهه وقلة الشعور
الواحد عبارة عن عمه بيضا مكويه
عدادك شايفو مصفر داير تبيع ولا شنو ,, براند نيو
| |
|
|
|
|
|
|
|
|
|
Re: نحن الاعضاء الجدد (Re: عبدالحفيظ ابوسن)
|
تحديداً انت يا اب سن مستحيل تصنف مع الجُدد اعني من جديد وليس جداد (هههههه)
انت كان تكتب عبالحفيظ او سنون وليس اب سن ذلك انك اتيتنا بي سنونك كامل النضج
حقيقي لو مثل اساسي اكتب كاتبي المفضل لهذا الشهر لصرحت بها وقلت انني الان اقرأ
لك هنا واتابع كافة حروفك ولو همس وانت كاتبي المفضل لكل المواسم من يوم جيت.
تسلم والله انت كافي للدهشة .
..................................................................حجر.
| |
|
|
|
|
|
|
|
|
Re: نحن الاعضاء الجدد (Re: عبدالحفيظ ابوسن)
|
البرلوم ود أبسن حبابك..
ياخ ...كشفت نفسك وبرلمتك !!
وقد ظننتك أقدم من الكِـسرة، وممن عاسوا الكسرة في حوش بكري !!
اولئك الذين أسسوا البورد قبل أكثر من عقد من الزمان..
وكتبوا مطولاتهم بماء الذهب وعلقوها على أستار المنبر..
...
وأعتقدتك أسبق من المخضرمة (سلمى)
ومن شقيقها (كعب) ومن أبيها (زهير ابن أبي سلمى)
وحسبتك أعتق من شعراء المعلقات وأصحاب المسادير،
وأعرق من (ود شوراني) و (ود ضحوية) و (الصادق ود آمنة)!
أتاريك لسه درفون ما ختيت مخلوفتك كويس؟
ولا مسكت رسنك وانطلقت؟
...
ولا مسك فجاً عميق ..
والبيداء ليك إدانت؟؟؟
...
..
.
| |
|
|
|
|
|
|
|
|
|
Re: نحن الاعضاء الجدد (Re: الصادق عبدالله الحسن)
|
الأخ/عبدالحفيظ أبوسن لك التحية..ومن معك من الاعضاء الجدد..
بكل أمانة بوست غاية فى الروعة وأنيق ومرتب.
زمن لم أتابع بوست بمثل هذا الجمال..
| Quote: يا إما تكون مبدئي وتقول ليه ياخي إنت غلطان |
المبادى قيم يجب أن لا نحول عنها....
ما شاء الله مجموعة طيبة من الأعضاء الجدد تفاعلت معك..أتمنى أن تواصل فى هذا البوست بنفس هذه القيادة..أنت ألإفضل من كثير هنا. غير المناكفة لايجيدون شيئأ...
تقديرى وإحترامى..
| |
|
|
|
|
|
|
|
|
|
Re: نحن الاعضاء الجدد (Re: ismeil abbas)
|
حبابك حجر
وقلدتني ما انا دونه
كتر خيرك والله لعظيم دعمك وتشجيعك ,,
بعدينك ناس الشي الزيكم ديل نحن الجدد بنعتبر اطراءكم بمثابة اجتياز لحق العضوية ,, فأنتم السابقون السابقون ,, حافظتم علي هذا المنبر رغم انواء الصراع الاشتر وعديل
يسعدني جدا وايم الله ان يقرأ لي من قامتكم داخل المنبر
هسه اطير ولا شنو يعني
شوكران ياخ
| |
|
|
|
|
|
|
|
|
 Re: نحن الاعضاء الجدد (Re: الجنيد حمد)
|
يا ود ابوسن هيلك الزعامة ماك خاطئ القول بشوفك عايز تعمل كوم جديد والله شنووو ؟
بالمناسبة انتو حرسم دا وييين الحي بيهو ؟
أنا طبعاً مسميهو ابوذر البورد
يكتب وحدو
ويرد وحدو لامن البوست يصل صفحتين وتلاته
وينقطع ويجي لوحدو هههههههههههههه
العيد يتبارك عليك
:
:
:
:
:
:
:
مع التحيات لله الزاكيات
| |
|
|
|
|
|
|
|
|
|
Re: نحن الاعضاء الجدد (Re: محمد حمزة الحسين)
|
الصادق ود حسن
طلق حبابك
رفاعة الربة
قافاها البليب طربان
ناصح المنو ميزان قلبي
مو خربان
اولئك رجال جنب زلقي الدروب ,, وما بتناكعو تب
وحتي اضحي قلبي متبول وهو متعذرا عاملا بنصيحة والده زهير
أذهب له فأنه رجل كريم
بعد ان ابيح دمه
لكن
الخلفة ما بتشبه القندول
| |
|
|
|
|
|
|
|
|
|
Re: نحن الاعضاء الجدد (Re: محمد حمزة الحسين)
|
سلام عليكم
بصراحة بوست ممتع لحد الثمالة
وبوست مفيد فيه نقد موضوعى
هذا اروع بوست اتابعه فى سودانيز اونلاين هذه الايام
بعد الانحدار الشديد للبوستات التى تتحدث عن العنصرية والسب العلنى
سيروا وعين الله ترعاكم
| |
|
|
|
|
|
|
|
|
|
Re: نحن الاعضاء الجدد (Re: Mudather Kunna)
|
الأخ/عبدالحفيظ أبوسن لك التحية..ومن معك من الاصدقاء البورداب الجدد
أنتو أصل تجديد الحياة في المنبر هذه الايام وأنت كمان ياود أبوسن زول كاتب مطبوع كل كتاباتك جميله وهنالك كوكبة من الاخوة أصحاب الالتحاق بالمنبر هذا العام أيضا
يجدون الكتابة هنا يا سيدي الجليل سوق هنا ومحبينك وكم القراء بقلمك قصة قديم وجديد ما ذات موضوع
وهنا ينطبق علينا جمعيا القول الذي يقال مطرب الحي لايطرب أهلها
ولكن تطربيك أنت فريد ولا عليك تصنيف جدد وقدماء
كلنا جدد في تجارب الكتابة وأنت كانت يومية وعليها أخي و وأخوتي لقد أصبحنا قبيلة واحدة تعالوا نسقط كل تصنيف
ونقول كما نحن هنا في الخرتوم (بورداب سودانيز أخوة وأصدقاء) زي جماعة أخوان الصفا كدا
لك كل التقدير أيها الصديق
فانت أصل الحراك هنا بحق /B]
| |
|
|
|
|
|
|
|
|
|
Re: نحن الاعضاء الجدد (Re: زهير عثمان حمد)
|
اووووو ود المدير يا امير
هههههه
ياخي قالو المصايب تجمع المصابينا ,, تراهم اولاد حجتي ديل كلهم ممكونين وصابرين ,, ما لقو ليهم فرقة وقالو كده وقرحو
والله يا المدير بقينا زي الايتام في بوستات الاساطين ,, الواحد ولا يشوفك زاتو
وبعدينك الدواس ده عندو ميدان براهو ,, لكن حكاية طالعني الخلا الاسفيري دي ما ادونا ليها ,, السلاح قلم وحرف والهدف الحقيقة ما الانتصار للذات , اها البجيب الدواس شنو
ونحن لسه مكتوبين بقلم الرصاص ,, ننابذ لينا سنير يقول ليك جداده الخلا الدايره تطرد جداده البيت ,, ما اخير نقعد في علبنا
أكرر دوما يسعدني مرور قدامي المؤسسين لهذا الصرح ,,
| |
|
|
|
|
|
|
|
|
|
Re: نحن الاعضاء الجدد (Re: عبدالحفيظ ابوسن)
|
عارف يا ابو سن
الفكرة ما في قديم وجديد ولا برلوم وسنير
في ناس بعرفوا وفي ناس ما بعرفوش
دي المفارقة هنا بس
وانت من البيعرفو يا عبحفيظ
ياخ في ناس ليهم تمانية سنين وسبعة سنين الواحد اول مرة يشوفهم بعدكم مع انهم كاتبين كم الف بوست
| |
|
|
|
|
|
|
|
|
|
Re: نحن الاعضاء الجدد (Re: قسم الفضيل مضوي محمد)
|
مرحبا اسماعيل عباس
وحبابك
شاكرا لك حسن ظنك بي ,, وارجو ان أكون عند حسن الظن دوما
اولاد حجتي ديل كانو مضايقين وصابرين ,, ما صدقوا وانطلقوا
وهي فضفضه لازمه لإصلاح المسير واستعدال الصف ,, والبورد ليس كغرف الشات وحديث اتنين والتالت بره ,, تنتهي حريتك حين تدلق ذاتك للناس هنا ,
اقول دوما
الكتابة تعري فأختر لمن تتعري امامهم
شاكرا لك تشجيعك وطيب قولك
| |
|
|
|
|
|
|
|
|
|
Re: نحن الاعضاء الجدد (Re: عبدالحفيظ ابوسن)
|
سلام زميلي وأخي عبد الحفيظ...
في نقطة إحتمال تكون غايبة عليك..
المنبر فيه خاصية إنه منبر إجتماعي..
وفيه الرغبة كبيرة بين الأعضاء للإنتماء والتقارب..
لذلك فيه أيضا العشم..
يعني لو عضو في المنبر عنده زول مات الشيء الطبيعي عند معظم الأغلبية تقديم العزاء له..
ونفس الشيء في الفرح ..كثير من الأعضاء الجدد لا يتفاعلون مع باقي الأعضاء..
وبالتالي من لا يقدر أو يغيب عنه أهمية ذلك فإن الآخرين بالتدريج يبتعدون..
كذلك التداخل في البوستات إن إكتفي العضو بالكتابة فقط ولم يتفاعل مع بعض الكتابات الخاصة بالأخرين فإن الآخرين لا يتفاعلون معه..
يقرأوا له إن أعجبهم الموضوع ولا يتداخلوا عنده..
ولا يعني هذا علي الإطلاق الشللية..بل يعني التفاعل..
كل سنة وإنت طيب..
...........
| |
|
|
|
|
|
|
|
|
|
Re: نحن الاعضاء الجدد (Re: عبدالحفيظ ابوسن)
|
بسم الله الرحمن الرحيم
البرلوم / عبدالحفيظ
تحية وود
غايتو محن البورد دى كان باريتها
حكايتك حا تكون طويلة ..
طبعاً اخوك اتبرلم هنا مرتين .. الاولى 2003
والتانية دفعتك ..
الاولى كانت الطف وارحم من برلمة المرة التانية
واما التانية الا لا وراك ..
من قولة تيت طلعة كوز
والتيت البعدها طلعت كوز وحرامى اسفيرى وكانت
حا تلفق لولا ان نصرنى الله بما يثبت عدم حرمنتى
غايتو بعدها اتوكلت على الواحد الاحد ودرعت سفروقى
( سلاح بجاوى ) فوق كتفى وبقيت ادافر مع المدافرين مع
بقائى عشرة على ( سفروقى ) لزوم الدفاع وقت الحوجة ..
عارف زمان المنبر ده كان فيهو ناس بتكتب كتابة ترد الروح
وقدر ما تكون مدبرس تجى خاشى تفكها فى دقائق معدودة ...
بس الشغلة الان بقت زووووط وعووووك وما شاكلها .. ودى
فى ذاتها ما مشكلة .. المشكلة انك تجى خاشى بوست وتقول رأى
مخالف .. وقتها عينك ما تشوف الا النور حتى لو كان رأيك ده
لا ياتيه الباطل من اى جانب ..
بالاضافة لى انو بقى زى الجزيرة والعربية .. الكذبة ممكن تكون
حقيقة فيهو بكل بساطة .. وان جيت لى الغلاط يغالطوك فى اسمك
غايتو كلامى ده لو رديت عليهو بالتفصيل الله قال بى قولك من قبل
المعسكرات التلاتة .. وان طنشتو كلو بصنفك برلوم رابط مكنة سناير
نسيت اقول ليك انت زول فنان
ارتيقا
| |
|
|
|
|
|
|
|
|
|
Re: نحن الاعضاء الجدد (Re: ملهم كردفان)
|
يا ود ابسن بطل تواضع ،،،،،،،،،،،،
انت كوم براك ومرجح وبقية الاعضاء الجدد كوم
يسلم قلمك وفكرك وفهمك وترتيبك واناقة حرفك
-----------------------
بالجد كتير احترامي وتقديري يا صديق
| |
|
|
|
|
|
|
|
|
|
Re: نحن الاعضاء الجدد (Re: علي دفع الله)
|
تحية طيبة
الباشمهندس عاصم الشيخ حبيبنا وخيرو سابق علينا
التحية ليه ولاسرته الكريمة
كان كدي طلعنا اهل تب
.....................................
مع سوق البيع الشغال ده لو لقينا خلو بورد كويس ممكن نتفاوض
باسويرد على الزيرو ...اها
دمت سالم
| |
|
|
|
|
|
|
|
|
|
Re: نحن الاعضاء الجدد (Re: الجنيد حمد)
|
| Quote: ياخ افرض المرة سألتني قافلة معاك مالها.,, وقلت ليها مشاكل زول ,, وقلت ليها في النت |
ود ابوسن يا لذيذ كل سنة وانت طيب ياخ.
وفى الجانب الاخر برضو هناك علاقات جميلة قاعدة تنشاء بين الناس عبر الانترنت وبتمشى لى قدام.
فى ناس قاعدين يندهشوا لما تقول ليهم ماشى اعزى ولا ماشي مناسبة زواج باعت واحد صديق معرفة انترنت .
الانترنت عالم عجيب.
| |
|
|
|
|
|
|
|
|
|
Re: نحن الاعضاء الجدد (Re: عبدالحفيظ ابوسن)
|
مرحبا مني خوجلي
وحبابك
اتفق معك ورغم انو المخاطب غير مقصود , لكني اجتهد رأي ولا آلو في المشاركه الاجتماعيه , واتصل بالتلفون لو توفر الرقم
المشاركات الاجتماعيه تزيل الحواجز , وتذيب الجليد
واشارك حتي فطوني في الردود , وآخر تجربة اليوم في بوست سلفا والبشير
لكن معاك في الفهم
الزول ما يبقي زي المؤجر اوضه هنا ,, يخشها هي بس ويتخارج
| |
|
|
|
|
|
|
|
|
|
Re: نحن الاعضاء الجدد (Re: عبدالحفيظ ابوسن)
|
كأعضاء جدد ,, بنجي ملخومين لخمة شديدة ,, اسماء فخمة و ضخمة ولها مساهمتها في الحراك الاجتماعي والسياسي والادبي ,, ومساهمة مش شوية كمان ,
وبرضو بنكون شهدنا معارك اسفيرية ضارية استعملت فيها الاسلحة المحظورة عالميا
وتهديدات عينك عينك
وبنسمع
ومليانة هكر
ومليانة ناس امن
فبالتأكيد انت جيت شان تكتب , لكنك واقع تحت ضغط كل ما سبق ,, فيا امتن تتوكل وتكون فاعل ,, او تكون خامل إلا من مشاركات الصفيق الآمن
| |
|
|
|
|
|
|
|
|
|
Re: نحن الاعضاء الجدد (Re: عبدالحفيظ ابوسن)
|
مرحبا ارتيقا
وحبابك
اها جنس غلاطك ده من قولت تيت ,, مسجل تحت اسمك 2013 وتقول 2003 ,, وش باسم
اها والكوزنة سويت فوقها شنو ? هههه
غايتو شغالين عكس القانون يتهموك ويطالبوك ويغالطوك ,, اهلنا بقولو
الكلام لو داير تكملو هملو
والعارف عزو مستريح
ما يقوم واحد ناطي لي ويقول
العود الما فيهو شق ما بقول طق
اعمل اضان الحامل طرشا
بعدينك السفروق بعرفو ,, عود معقوف من شدر اللالوب ,, ببربحو العود ويبقي سلاح يمشي ويجيك راجع لو كنت حريف ,, بنفع للارانب والصبرات
وفعلا دي مشكلة انك تقول راي مختلف ,, ويقومو يكبوك مع كوم ,, اها من تفتح خشمك اكان داير تقرا سوره يقول ليك غلط وجيب مرجعك
ياخوي مكنة شنو ,, نحن فرد بستم ,, موتر بس
| |
|
|
|
|
|
|
|
|
|
Re: نحن الاعضاء الجدد (Re: عبدالحفيظ ابوسن)
|
مساهره بي عقرب !
اها نحن ديل لامن نشوف دبيسيبة , وفيها كباشر واقتباسات قديمة وجرد حساب طوالي بنركب الدقداق ونعمل زغبير
لأنو الفيلة أكان اداسو البتخسر النجيلة ,, والشديرات المخصره دوبا
| |
|
|
|
|
|
|
|
|
|
Re: نحن الاعضاء الجدد (Re: عبدالحفيظ ابوسن)
|
من الفيس
سلمي بت الشيخ سلامه يا خيه
عقبان بجيك صاد
ونحكي عن اهلي ,, عني
السودان ماهو الخرتوم ,
اهلنا بفرحو بالرغيفه ,, بفرحو بكل شي بجي من البنادر ,, ويفرحو زي الجهله
علا زهجت ,, تداعيت هناك وانا بكتب ليك ,, عن جماعه مسرح الشارع وعن طعم الليالي الشعريه , ومعارض الكتاب بنادي ناصر ,, ومكتبه شهدي عطيه وتخريج طلاب المعهد واسابيعم
ياخ كتبت لامن فترت , وكنت فرحان ومنتشي
بكون اديت كتابتي عين قامت طشت
وللاسف بكتب مباشر
بوعدك اصد
لاكن جنس كتابتي ديك بتغلبني
| |
|
|
|
|
|
|
|
|
|
Re: نحن الاعضاء الجدد (Re: عبدالحفيظ ابوسن)
|
الجميل عب حفيظ ابو سن انت من الاقلام الجميلة فى هذا المكان اقرأ بوستاتك وردودك كما اقرأ روايات الطيب صالح انت رجل اديب وتملك قدرة كبيرة على السرد اتمنى ان تستمر كما عرفناك
| |
|
|
|
|
|
|
|
|
|
Re: نحن الاعضاء الجدد (Re: سامى عبد المطلب)
|
مرحبا سامي
وحبابك
لا ياخ ,,,! لا لا كتير ! وضعتني مكانا عليا وحات الله ,, وانا لو كنت في سفح تقيمك لسعدت , سعادة طاؤوس عريس كما يقول استاذي بشري الفاضل
الطيب صالح لا يكتب قصصا بل يكتب شعرا ,, وكم جلست يوما كاملا اتأمل صفحة واحدة حتي كدت احفظه
الطيب صالح ومصطفي سند ,, نقلونا نقلة لغوية وحلقوا بنا في عوالم حسبنا انها غير موجودة ,, حولو تلك اللغة ,, اللغة اليومية لي لغة جميلة باذخة ,, حولو كلمات عادية لكلمات شاعرية
الطيب صالح كتب عنا واوضح لنا جمالنا الذي لا نراه نحن ,, اكتشف لنا كم نحن خارجين من عوالم ترتقي نحو السماء
شوكران كتير ياخ
| |
|
|
|
|
|
|
|
|
|
Re: نحن الاعضاء الجدد (Re: عبد العزيز محمد عمر)
|
| Quote: امسكوا في كلام حرسم القالو زماااااااان |
عبد العزيز محمد عمر
ياخ اول شىء كل سنة وانت طيب ياخ
وكتر خيرك على حسن ظنك دا
نعم لدينا رسالة دعنا نكتب ولا نلتفت للمنغصات
كان ردو كان ماردو
عليك الله دايما عاين عدد القراء
الجميل عبد الفيظ
امض فيما تعتقد واكتب
انا اؤمن بان البرلوم هم المتفرجون لا الذين قدموا حديثا
امض فى ما تريد
| |
|
|
|
|
|
|
|
|
|
Re: نحن الاعضاء الجدد (Re: عبدالحفيظ ابوسن)
|
العزيز أبوسن
مرحبا بك في الحوش والبيت بيتك
.......................................................
ونتمني لك إقامة طيبه وقضا وقت ولحظات سعيد
ونحن في انتظار انتفاضة قلمك وحركات اناملك علي البورد
| Quote: كفاية علينا شكل ودواس الدنيا دي ,, كمان نجيب لينا دواس اسفيري |
.................................................................
وتحياتي الي كل زوار البوست
| |
|
|
|
|
|
|
|
|
|
Re: نحن الاعضاء الجدد (Re: عبدالحفيظ ابوسن)
|
هذا ليست بوستا لتكوين كوم جديد
ولا هو تقريع لقدامي الاعضاء والذين أكن لهم بشكل شخصي احترام وتقدير ,, فهو من جعلوا هذا المنبر قائما حتي الآن , وجعلوه جاذبا
البوست يتحدث بشكل مرح لإزالة الجفوه والوحشة التي تكتنف العضو الجديد , فتجعله حذرا شكاكا
وهي محاولة لفتح كوة للأعضاء الجدد لسماع صوتهم
| |
|
|
|
|
|
|
|
|
|
Re: نحن الاعضاء الجدد (Re: عبدالحفيظ ابوسن)
|
Quote: هذا ليست بوستا لتكوين كوم جديد
ولا هو تقريع لقدامي الاعضاء والذين أكن لهم بشكل شخصي احترام وتقدير ,, فهو من جعلوا هذا المنبر قائما حتي الآن , وجعلوه جاذبا
البوست يتحدث بشكل مرح لإزالة الجفوه والوحشة التي تكتنف العضو الجديد , فتجعله حذرا شكاكا
وهي محاولة لفتح كوة للأعضاء الجدد لسماع صوتهم |
الجميل في بوستك دا إنو نحن معشر البرالمة (الذين رموا لديك بداهية)
بناخد راحتنا فيه، دون أن نخشى مخاشنة أو عنف
وزي ما قلت نقدم رجل ونؤخر أخرى قبل الولوج في بوستات الآخرين
(زي العتود الدغور)
ومن هنا اقترح تكوين رابطة للدفعة الجديدة (دفعة 2013)
والعين بالعين والسن بالسن والجروح قصاص
الما برد علينا ، ما نرد عليه، البقادحنا نقادحو
البقابلنا بي وش ككو، نقابلو بي وش سلحفاة
البركب لينا وش حديد نركبلو وش شنو كدي ما عارف، أي وش كعب
تحياتي مثنى وثلاث ورباع
| |
|
|
|
|
|
|
|
|
|
Re: نحن الاعضاء الجدد (Re: بدرالدين بابكر مصطفى)
|
بدر يا ود حجتي
آي معاك نكون جسم اسفيري ,, هلامي ! ونسميهو شنو ,, نسميهو شنو
الدفعة 13 تصحيح
ماهو التصحيح بقا موضة
ياخوي مخاشنة شنو ,, نحن جلدنا رهيف اقل حاجة تقدو
بعدينك تراكا ماك هين وزول خلا ساكت البتعرف العتوت الدغور
كامل الود
| |
|
|
|
|
|
|
|
|
|
Re: نحن الاعضاء الجدد (Re: عبدالحفيظ ابوسن)
|
بل الأجمل
حرسم يا دفعة
جيد القول هو قولك , إذا كان ما دايرين نكتب مسجلين ليه , ما نقرا من بره ساي
وعملا بنصيحتك سنكتب قولنا ثم نمضي , قد نلاقي بعض الصعوبات ,, الرفض ,, السخرية ,, الحرس القديم الذي لا يعجبه الجديد ,, ولكننا سنكتب ذاتنا لا رأي غيرنا
وسنحارب في الميدان الذي نعرفه
ميدان الموضوعية وقبول الآخر والاعتراف به , وتقبل النقد والتجاوز عن الاسفاف والمهاترات
لك تحية وانت تقف وحدك منافحا عن قناعاتك
| |
|
|
|
|
|
|
|
|
|
Re: نحن الاعضاء الجدد (Re: عبدالحفيظ ابوسن)
|
رغما عن انصرافية الكلام ده , لكن موجعني وجع شديد واكان ما طرشتو بتجيني قرحة
أي واحد يناقش زول ما يلقي غير
إنتو ما عارف بكري ده بخمكم من وين ويجي يكبكم هنا
ده استهلال بجيهو راجع
| |
|
|
|
|
|
|
|
|
|
Re: نحن الاعضاء الجدد (Re: عبدالحفيظ ابوسن)
|
حبابك آب سن
ما تنشغل بي زول، ودي أزمة عميقة نعيشها نحن كسودانيين
ما في منبر بكري بس، حتى في الحياة العامة
أي زول يقول ليك أنا بعرف أي شي، وتلقاهو ما بعرف أي شي
وأي زول تناقشو وتختلف معاه ياخد الموضوع شخصي (ويا كتلتني يا كتلتك)
ؤما تنشغل بالهم وكت يكتر عليك
سلمى سلامة: تحياتي مثنى وثلاث ورباع
| |
|
|
|
|
|
|
|
|
|
Re: نحن الاعضاء الجدد (Re: بدرالدين بابكر مصطفى)
|
مرحبا بدر
وحبابك
يا
دفعة
وتثنية لقولك
الموجعني مش لينا نحن , الموجعني عقلية التفكير ,, وكأنو الرد مفحم للمخاطب ودون ان يقدم شيئا ذو بال , وده تحديدا بعبر عن فقر فكري وضعف في مقارعة الحجة بالحجة ,
وحقيقة نحن محتاجين للجديد ,, جديد في الفهم والفكر والتناول ,, القديم ان لم يواكب فيستم نفيه نفيا جدليا بحكم التطور
خذ من القول احسنه واعرض عن الجاهلين
وأكبر منك بي يوم اعرف منك بي سنة ده قول مخستك ساي
فبعض الناس توقف نموهم وصاروا يكررون ذواتهم والناس تسير قدما للامام
| |
|
|
|
|
|
|
| |
عبدالحفيظ ابوسن
بدرالدين بابكر مصطفى
محمد البشرى الخضر
محمد مجيدو
محمد كابيلا
ملهم كردفان
محمد نور عودو
الجنيد حمد
الرفاعي عبدالعاطي حجر
الصادق عبدالله الحسن
معاوية المدير
ismeil abbas
محمد حمزة الحسين
Mudather Kunna
زهير عثمان حمد
اساسي
Tona Awad
قسم الفضيل مضوي محمد
Muna Khugali
Artiga Gilani
علي دفع الله
بدرالدين الطائف
سامى عبد المطلب
محمد عبد الله حرسم
حامد الغبشاوي
فيس بوك
تويتر
انستقرام
يوتيوب
بنتيريست