"الدّرب إنْشحط "مراجعة من بوادي الكبابيش عبيد الطيب

Quote: (9) وهذه الدُّرة ايضا المناحة الثانية لبعيره ود"إبل الملوك" وقلَّ ان تجد لها مثيل في شعرنا "يا شيخ العرب ما جانا خبراً شُوم خبر تيسى المَعا أُم بَشّار بِهيج ؤبْزُوم غرّاره ام قِدود غَشّاشه ما بِتْدوم شالت الدّومْتُو هتّاف شَنِّــى فى الجَرْقُوم ؤشالت البِلْحَق الصّيد الوقف رَهَدُوم شالت الحُر مأصّل من نَعم دَلْدُوم هلا ودوبا ود ناقة (النّمير) (سلُّوم) وصف بعيره بأنه "يهيج" مع ظهور سحابة "أُم بشَّار"وهذا يدل علي أصالته وعلي ان صاحبه مهتما به ، ويصف " خريردوماته" عندما تسيل علي حُلقومه كأنها قربه قديمه"شنّه" ويصف بعيره بالسرعة حتي كان يصطاد به الصّيد وقديما كان العرب يسمون النّاقة التي يصطاد عليها نعاج الوحش بالنَّاعجة ولا يكون ذلك إلاّ بالإبل المهرية . "أصلك من عَنانِيف شيخنا ود التّوم عليك غَنيت وسَوَّيت نَبْحَة المَجْحُوم خطّام الضَّعَنْهِن كجّرَن بى هدوم وهجِام الرِّقابهِن كيف قزاز الرُّوم مراّ بى اللِّغاَم مراً عليك مَزمُوم يومو الينوى فى الزّنقه المعاها سَموم رينجر وبكره ميعاد سيدها فى الخرطوم قطّاع الفجاج سيدك رقد مَهموم عقّار السقا النَقْنَاق ؤواقِف زُوم فقدنك بنات الفَدْعِى وأُم قَدّوم وببكنَّك بنات دورنا وحوالى عِموم ببكوك الرِّجال فى ام سنطه والحَرُّوم ببكيك ود مهلَّف وصالح الصَّمْصُوم ببكيك ود قريد ببكوكا ناس مَشروم وناس ودجودة جمعة آ الفى الجِمال معدوم عَزَّايْتَك مِحَاربه الضُّل وما بِتنُوم قَدر مولاى حُكم الواحد القيُّوم ود إبل الملوك من ما رقد مابقوم وأني إن فرّشتْ عليك ما اظِن اكون مَلْيوم *أظنني إن شرحتها سوف افسدها لذا سأشرح بعض المفردات وأترك الخريدة "زوم" طريّة كما قالها صاحبها "زوم" اي متشابك-النَّقناق أي هطول المطر الذي لا يتوقف ولكنه لا يكون غزيرا –الفدعي وأم قدوم اسماء نياق" (10) ولأن شيخنا من الذين ترايمهم الرُّوح حين يطول ليل الغربة "الخازي" ويتملكني الشَّرف تجدني كثيرا أطفئ الأنوار وأغلق كلّ منافذ الأصوات حتّي الرِّياح ، لأستمع وأستمتع بكاسيته الجميل ويدخل صوته الرخيم في مسامات روحي ويدغدني من حلمة أذني " أيَــا م وإنتهت عُقب مِي جاية وبناية الطّين أَخير من ما نَقُعْدُوا فَضَاية رِكُوب التَّيس ؤسوق أُم قُجّة بي المَحَلاية أحلي من شراب الببسي بي الكُباية *************************** "البيت المسوَّر كلُّو قلبي اباهو قاشرت الرِّقاد فوق ضلُّو بي اللِّنقيبها من نومت الدّغش بتقلُّو كم لله ما قضيت زمناً حلُّو ********************** هسّاعة وين بَزْرَاية النّورَاب ناس سالم حِلْيهُن ناس علي الهَاقْنَاب هسَّاع حَزَّموه الشّول أبو دَعَكَاب؟ ؤ بي قيزان بليل وإتْنَايُو لي أبو جعاب والله إتياسَرو فوق شَقْ جِراب دَوْ ناس أُم سَرير والإنْدَرِاب ألطف ياكريم ياربي يا وهّاب بعد ها الزّحف يجينا السَّاري ابو جَبْجَاب يقوم الصّيليان ويبقي الخِشين دَبَّاب ؤنرجع تاني نمشي جِزونا أبو هبَّاب نشِد السَّرج علي تيس الخَلا الخبَّاب ويبقي غذانا لبن الحوّي مُو ويكَاب نخُط التاية جاي أبو قرين ؤجا كوكاب ؤنبقي رَبَاعة لي مِرحَات أبو حَرَّاب وأُم بَاعِجْ يلمُّوا أسيادها شيب ؤشباب ناس بَنقاَل ؤسيد اُم دَامع أبْ بَشْناب نقعد فوق ضرا التّاية ؤنشك الطَّاب نشوف أتو البِقُود ؤيسقي الحِمار الغَاب" (11) متَّعك ربي بالصحة وراحة البال عمنا وحبيبنا شيخ جامع علي التوم ونسأل الباري بعد ها الزحف السياسي المُمحِل والمُجدب ان تتنزل سواري الحرية "أُم جبجاب" أو حتي "نقناقة" ويعم السودان السلام والمحبة وينتهي زمن "القيمان" وتهطل أشابيب الضحوي العويرتنمية ورخاء علي ريفنا الحبيب لأننا نحبك يا بلدي ونردِّد مع قماريك في كل دَغشٍ جديد " أبوك يا الدُّخري ما بْطُّرْدْ البِتَجْفِل شارْدَة ؤأمَّك أُم نَفَل توب العِروض لي زَارْدَة ؤحوض الضَّايحة أخوك مٌشْرَع شراب الوَارْدَة ؤأُخْتَك زَغْرُودتا تِسِنْ القلوب مِي بَارْدَة البلد السَّمِح ؤعن طيبتو الخلايق سارْدَة طَرَدْها طيورو لي جنحيها كل يوم فارْدَه قسمو وطاتو عُقبان مترو بي الياردة ناساً فسلة حتي لدغة حديثهن طاردة" . عبيد الطيب (ودالمقدم) -بوادي الكبابيش 25-مارس-2013 المراجع 1- "فرسان كنجرت " عبدالله علي إبراهيم 2- ديوان طرفة بن العبد 3- ديوان عنترة بن شدّاد