|
|
|
 Re: IOS7 ... تحديث الآيفون .. امكانياتك رهيبة لكن شكلك بايخ !! (Re: يحي قباني)
|
سلامات يا مستر قباني. و كل تحديث و انت بخير.
انا عكسك تمام في انطباعي عن الشكل جديد. الشكل جديد بيديك ( او اداني انا علي الأقل) شعور بانه نظيف و مرتب و مدرن.
اجمل حاجة هي الراديو الجديد من ابل. قدرتا عملتا لي محطة بالعربي و الان بسمع في ام كلثوم، انت عمري. :)
النغمات الجديدة ظريفة جداً. و التطبيق بتاع الصور فيه اضافة لفلاتر جديدة.
التنقل من تطبيق لتطبيق بقي اسهل و أمتع. تطبيق البوصلة بقي فيه ميزان موية :)
تطبيق الكلندر بقي أحسن كتير.
الوصول للبلوتوث و الواي فأي بقي ساهل جداً. بمسحة بس لأسفل الشاشة.
تطبيق الطقس بقي من ياهو، و هو تطبيق جميل جداً كنتا بستعمله من زمن.
حتي تطبيق الفيسبوك الجديد شكله مرتب اكتر. كل الحجات دي في تلفوني iPhone 4S . لسه بفكر بكرة امشي اقيف في الصف و أجيب تلفون جديد ام استني شوية. عندي حوالي 22 ساعة عشان أقرر. :)
| |
 
|
|
|
|
|
|
|
|
Re: IOS7 ... تحديث الآيفون .. امكانياتك رهيبة لكن شكلك بايخ !! (Re: يحي قباني)
|
سلام قباني سلام سمارت
بنزل في ال IOS7 الان
سوال وطلب نصيحة
انا ساكي ال Iphone من زمن ال 3G الى ال 4S سنويا وقلت انتظر ال 6
عندي فرصة الان للاختيار بين ال Iphone 5 و Samsung 4S مجانا مع العلم لم استعمل ال saqmsung ابدا
الرجداء المساعدة في الاختيار
يا معاوية حسين وكمال فراكلي وفيصل نوبي خليكم قريبين
وشكرا
| |
|
|
|
|
|
|
|
|
|
Re: IOS7 ... تحديث الآيفون .. امكانياتك رهيبة لكن شكلك بايخ !! (Re: يحي قباني)
|
ما شفتا اللى حصل على يا مستر قبانى!!!!
صحيت الصبااااح بدرى. 6 صباحا. حمام سريع. و على الhighway للمول. من غير فطور او شاى. قلتا اقيف فى استار بكس فى المول. فى السكة طلع فى حادث فى الهايوى. بوليس و مطافى و هيلمانة. المهم بعد حوالى نص ساعة وصلتا المول. اتخيل الساعة 7 و ربع صباحا و الباركين بتاع المول امام الابل استور مليان . و عدد 2 عربية بوليس. استار بكس فااااتح, لكن ما فى زمن اقيف. جرى على الابل استور. يا لطيف الالطاف. الصف طووووويل. بطول المول. الصف من ابل استور مرورا ب جى سى بنى. مرورا ب نوردستورم, و كمية من ملاحت الهتش و الكرور و الجزم لحدة نهاية ميسيز. مكانى فى لصف كان فى نهاية ميسيز. المهم... موظفين ابل حايمين بالموية والعصير و ال .energy bars . ناس التلفزيون بيصوروا و بيعملوا فى لقاءات (ابيت اتكلم معاهم). ناس جامبا جوس بيوزعوا فى عصاير. الناس بتتونس و تضحك و مبسوطين. الساعة 8 جات. محل ابل فتح, الناس قعدت تصفق و تصفر. اجواء فرايحية. بدوا يوزعوا فى كروت فى الصف. بيدوك كرت فيه سعة, لون, و نوع التلفون اللى انت عاوزه. عشان ما تفيق فى الصف 4 ساعات وتصل المحل يقولوا ليك التلفون ده خلص.بدوا بتلفون 5C. الملون الظريف. ناس قليلة جدا طلعت عاوزاه. كل الناس اللى فى الصف جاية عشان ال5S. بعد 10 دقائق بداو توزيع كروت ال 5S. بداءت الاشاعات فى الصف. "الدهبى خلص", " الاسود فى منه قليل جدا". لما وصلتنى علبة الكروت كان اللون اللى عاوزاه خلص. ضربتا لزوجى تلفون, كان قريب من بست باى, وقف سالهم, برضوا ما عندهم اللون. سبتا الصف مشيت استاربكس, شلتا شاى بلبن. انا فى انتظار الشاى, سامعة الناس بتصفق و تصفر لانه فى ناس طالعة من المحل شايلة تلفوناتهم الجديدة اللى باتوا فى الصف عشانها. شلت الشاى و مرقتا للمكتب. الساعة كانت 9 و شوية لما وقفتا فى المكتب. لقيت زوجى العزيز طلب لى تلفون بالبريد. ح يصل بعد 21 يوم.
| |
|
|
|
|
|
|
|
|
|
Re: IOS7 ... تحديث الآيفون .. امكانياتك رهيبة لكن شكلك بايخ !! (Re: smart_ana2001)
|
| Quote: و شوية لما وقفتا فى المكتب. لقيت زوجى العزيز طلب لى تلفون بالبريد. ح يصل بعد 21 يوم. |
والله ما بعرف مِن ( غيرنا ) كنتو حتعملو شنو !!!
________________________________________________________________________
عارفة يا مسز اسمارت ...
انا ما اشتغلت بموضوع الصفوف ده نهائياً ...
انا تلفوني لسه عليهو اساساً ... و عندى الـ 5
بستني لغاية ما يرقد في المحلات و اشيل بي راحتي بعد داك ...
غايتو لما تستلمي ال 5S تعالي ورينا الحاصل ...
__________________________________________________________
اها دايرين ديمو بالله للابديت الجديد ده عشان الناس تستفيد من كل الامكانيات الفيهو ...
| |
|
|
|
|
|
|
|
|
Re: IOS7 ... تحديث الآيفون .. امكانياتك رهيبة لكن شكلك بايخ !! (Re: smart_ana2001)
|
تحياتي للجميع
ورد. بالأخبار. اليوم. بان. احدهم. بجزر. كناري اخترق. كلمة. السر بعد. إدخاله للنظام. الجديد. مما. يعني. سهولة. اختراق. الأجهزة ( إياي فوت. وأي فون)
وفق. النظام. الجديد. واعترفت الشركة. بسهولة اختراق كلمة السر وسهولة الاطلاع علي الملفات الشخصية
الأخبار غير. جيدة للشركة. خاصة. في. وجود منافس. يترقب. الأخطاء مثل. سامسونج وعليكم بسامسونج ويحيا. ديم. كوريا
| |
|
|
|
|
|
|
|
|
|
Re: IOS7 ... تحديث الآيفون .. امكانياتك رهيبة لكن شكلك بايخ !! (Re: الفاضل يسن عثمان)
|
Quote: تحياتي للجميع
ورد. بالأخبار. اليوم. بان. احدهم. بجزر. كناري اخترق. كلمة. السر بعد. إدخاله للنظام. الجديد. مما. يعني. سهولة. اختراق. الأجهزة ( إياي فوت. وأي فون)
وفق. النظام. الجديد. واعترفت الشركة. بسهولة اختراق كلمة السر وسهولة الاطلاع علي الملفات الشخصية
الأخبار غير. جيدة للشركة. خاصة. في. وجود منافس. يترقب. الأخطاء مثل. سامسونج وعليكم بسامسونج ويحيا. ديم. كوريا |
تحياتي الفاضل ...
الخبر صحيح ... بس علاجه ساهل ...
حتي الطريقة الوجدها العسكري الفي جزر الكناري ماهي سهلة ...
ده الفيديو حقها ... بعيدين السامسونج ياخي زى الشايل ليك لوح اردواز من ايام الخلوة ...
| |
|
|
|
|
|
|
|
|
|
Re: IOS7 ... تحديث الآيفون .. امكانياتك رهيبة لكن شكلك بايخ !! (Re: يحي قباني)
|
الليلة اكتشفت الحتة حقة ال VIP للإيميل
زمان كنت نمر تلفونات فقط ...
الان ممكن تعمل لستة للفي أي بي ايميلات
وعندك ليها short cut زى ال Folder بتشفوف ايملاتهم براها ...
بدل ما تفتش كل الايميل في الــ Inbox
__________________________________
لي ناس الــ 5 فما فوق ...
الــ Air Drop اعجاز ...
مبالغة و بس ...
وكمان يا اسمارت الأبل تي في جاهز في الابديت ...
تايم تو جت ون .. يا مدام ...
| |
|
|
|
|
|
|
|
|
 Re: IOS7 ... تحديث الآيفون .. امكانياتك رهيبة لكن شكلك بايخ !! (Re: HAYDER GASIM)
|
سلامات يا شباب
أبل بالغت معانا في الـ IOS7
بصراحة كده ماف ( WOW ) يعني مافي دهشة !
أبل عودتنا في البدايات علي إدهاش العالم
عندي تلفون 5 و فيهو مشكلة شبكة أساسية أتمني أن تكون قد تمت معالجتها في 5S
قصة البصمة دي ما حركة قوية ولا كبيرة و دي كمان تحسب إنتهاك خصوصية و علي قدر كبير ممكن تكون تجميع معلومات و بيعها لجهات يهمها أمرها
أبل قالت إنه البصمة بتفضل في التلفون يعني هم ما بيجمعوها و ده كلام عملياً علي قدر ضعيف من الصحة - خصوصاً مع شركة زي أبل لديها القدرة و الإمكانية علي شغل الهاردوير و السوفتير الكبير ده
_
مع إني ما مبسوط من الآيفون بتاعي لكن لم أستطع التعامل مع السامسونغ و تلفون دون المستوي
و بيديني إحساس إنك ماشي في الشارع عريان 
_
إسمارت - نوبية قالت دايرة واحد أجيب ليها ياتو ! عليك الله أقنعيها إنه كعب ياخ - مش أنا أخوكـ !
| |
|
|
|
|
|
|
|
|
|
Re: IOS7 ... تحديث الآيفون .. امكانياتك رهيبة لكن شكلك بايخ !! (Re: فيصل نوبي)
|
حدثت للنظام الجديد رغم التحذيرات بوجود الثغرة الأمنية
بس على الرغم من جمال الحركة بتاعت الفلاش في فتح وغلق التطبيقات
إلا أنني ألاحظ أن الأيقونات صارت باهتة وشكلها غير جميل أبدا
والأيقونات القديمة أجمل ولونها وتصميمها أقوى
ده انطباع أولي
طبعا تلفوني 4 عشان كده أعتقد قصة الراديو وكتير من الميزات ما حتكون متاحة
بس هل هو راديو انترنت وللا راديو فيزيائي عادي؟
أشك أن أبل ستقوم بعمل راديو عادي كباقي الشركات لأنه فكرتها قائمة على ربط هاتفها بالنت
على العموم أنا كرهت الآيفون وقنعت من خيرا فيهو
بس راجي الظروف تتحسن وأجيب جلاكسي بإذن الله :)
| |
|
|
|
|
|
|
|
|
|
Re: IOS7 ... تحديث الآيفون .. امكانياتك رهيبة لكن شكلك بايخ !! (Re: نادر)
|
يحي واسمارت ومعشر الايفوناب
ســلامات
طبعا اخوكم مع ارهاصات رفع الدعم والهوت دوغ والبيتزا وما الي ذلك ماسمعت ب IOS7 الا الان ومن البوست دا فقط
والاغرب التلفون مامدينى إشعار بالتحديث قمت هسا عملت سيرش ل النيو سوفتوير قام ظهر المدعو IOS7 بس امكانية التنزيل غير موجودة
يعنى عشان اضغط على download and install ما فعالة ومابتنضغط
تلفوني 4s
افيدوني افادكم الله وعجل لكم بال 5 اس وسي وكلو :)
| |
|
|
|
|
|
|
|
|
|
Re: IOS7 ... تحديث الآيفون .. امكانياتك رهيبة لكن شكلك بايخ !! (Re: نادر)
|
Quote: أما {لوح الأردواز}
......فما يخلص
متابعين ... ولحدي قريييب ده, كنت
فاكر شكل متابعة زي دي {سلوك برجوازي}
..... تصدقوا ؟؟؟؟؟
يحي ... كده بسحروك |
حيدرنا ...
ده كان زمان يا حيبنا ...
الموبايل بقي من ضروريات الحياة ...
و متابعة امكانياته اساسية ...
تخيل انو انا اشتغلت بعد التخرج ... وما كان في حاجة اسمها موبايلات ...
و الحياة كانت ماشة زي الورد ..!!!
اتذكر يا حيدر من كم سنة كده ... مرة مفروض اغطي حساب ( مكشوف ) من حساب تاني ...
و بنكي المعاملات يتتحرك فيهو الساعة 9 مساء ...
يعني اي زول عنده سحب تلقائي ... ما قبل الساعة 9 مساء قريشاته بتتحول ليهو ...
قلت امشي البيت اعملها من الكمبيوتر ...
و نسيت !!!
و اتذكر كنت ماشي احضر مباراة باسكت بول في أيركندا سنتر ...
و في الاستراحة اتذكرت اني ما عملت التحويل ...!!!
و حياتك من ( الآب ) حق (تي دي بانك ) ... في دقيقتين انتهت العملية !!!
______________________________________________________________________________________
زمان المرحوم شدو رسل خطاب استرحام للنائب العام عشان يخففوا حكم ( إعدام ) من سجين في منطقة من مناطق الجزيرة لي تحت شوية ...
السجين مستني الحكم 6 شهور ... ما بنوم قبل الفجر لانو ما عارف حيسوقوهو ولا لا ...
الخطاب مشي بالتلغراف !!!
لما شدو وصل الخرطوم بعد 3 اسابيع ... لقي التلغراف وصل قبلو باسبوع
والسجين نفذوا فيهو الاعدام قبلها بأسبوع كمان !!!
_____________________________________________
التكنلوجيا واجبه في زمنا ده يا حيدر ...
| |
|
|
|
|
|
|
|
|
|
Re: IOS7 ... تحديث الآيفون .. امكانياتك رهيبة لكن شكلك بايخ !! (Re: يحي قباني)
|
Quote: في تقديري حتى الآن أن التحديث ليس بحجم الدعاية والهيلمانة السبقتو (ولو إنو الوقت مبكر على هذا الحكم) خاصة مع وجود بعض السلبيات التي ظهرت حتى الآن مثل:
- الجهاز بحصل ليهو freeze والحاجة دي حصلت لي contacts أكتر من مرة، بس احتمال يكون السبب راجع لقدم نسخة الجهاز (جهازي 4 الذي يعد نسبياً الآن نسخة قديمة). |
نادر يا جميل ...
( حسي استفدته شنو ) ... ما جاوبت نفسك بي نفسك ... هههههه
اسمعني يا حبيبنا مشكلتك هي الآي فون 4
ما حتحس بجمال و رونق الاضافات العبقرية الجابوها الناس ديل ...
___________________________________________
مشتاقين يا رجل ... وتحياتنا لنصفك الأفضل ...
| |
|
|
|
|
|
|
|
|
|
Re: IOS7 ... تحديث الآيفون .. امكانياتك رهيبة لكن شكلك بايخ !! (Re: يحي قباني)
|
Quote: Quote: عملت ابديت وال search طفش ممكن مساعدة
ادي الاسكرين ( مسحة ) لي تحت ... بيظهر معاك السيرش اعلي الشاشة يا دكتور ... |
سلام باشمهندس يحيى حقيقة ان io7 شهد عدداً كبيراً من الاضافات ومعظم هذه الاضافات افكارها
مستوحاة من السيديا واعتقد ان ابل ابدت مرونة كبيرة فى تقبل احتياجات الشركاء فى هذه النسخة
واتوقع تعديلات اكثر فى النسخ القادمة وذلك لشدة المنافسة مع سامسونغ ولتقليل الحاجة الى الجلبريك
قمت بتحميل التحديث لكن لم اقم بتثبيته حتى الان لحاجتى لبعض برامج الجلبريك الان ...
بالنسبة لاختفاء السيرش فابل قامت بتطوير متصفحها سفارى ليماثل قوقل كروم وقامت بدمج العنوان والسيرش كما ان الشريط يختفى تلقائياً لاتاحة مساحة اكبر للقراءة
| |
|
|
|
|
|
|
|
|
|
Re: IOS7 ... تحديث الآيفون .. امكانياتك رهيبة لكن شكلك بايخ !! (Re: سامى عبد المطلب)
|
Quote: يحي واسمارت ومعشر الايفوناب
ســلامات
طبعا اخوكم مع ارهاصات رفع الدعم والهوت دوغ والبيتزا وما الي ذلك ماسمعت ب IOS7 الا الان ومن البوست دا فقط
والاغرب التلفون مامدينى إشعار بالتحديث قمت هسا عملت سيرش ل النيو سوفتوير قام ظهر المدعو IOS7 بس امكانية التنزيل غير موجودة
يعنى عشان اضغط على download and install ما فعالة ومابتنضغط
تلفوني 4s
افيدوني افادكم الله وعجل لكم بال 5 اس وسي وكلو :) |
سلامات أحمد الأمين ادريس ...
غالباً تلفونك ما فيهو مساحة كفاية للأبديت ...لأانو حجمه كبير ...
بس كان لازم يديك رسالة مكتوبة بالمفهوم ده ...
4إس ما مفروض عندو مشكلة في الابديت ...
فقط ما كل الأوشنز حتشتغل عندك ...كمثال ( الأير دروب ) ...
| |
|
|
|
|
|
|
|
|
|
Re: IOS7 ... تحديث الآيفون .. امكانياتك رهيبة لكن شكلك بايخ !! (Re: يحي قباني)
|
أخونا أحمد الامين
مشكلتك إنه وقت حاولت تعمل التحديث تلفونكـ كان البطارية فيهو اقل من 50% أو المساحة الموجودة زي ما قال ليك أفونا يحي قباني
أخونا يحي قباني
Quote: اديها كم يوم كده يا حبيبنا ...
وتعال صاد .. |
Am an apple developer and am using the software since last three month's with 6 types of beta before releasing it
and still am telling you
no WOW on the new IOS7
| |
|
|
|
|
|
|
|
|
|
|
Re: IOS7 ... تحديث الآيفون .. امكانياتك رهيبة لكن شكلك بايخ !! (Re: عادل سمير)
|
لعمل داونقريد من ال ios7 الى ios 6.1.x
أوصل جهازك الايفون أو الايباد مع اللابتوب
افتح برنامج iTools وستحصل على عدّة خيارات جانبية، قم بالذهاب لها وتصفحها وقم بحفظ نسخة Backup يدويًا من جميع فئات الملفات كالصور وجهات الإتصال… هذا لأنك لن تتمكن من استخدام النسخة الاحتياطية الخاصة ببرنامج iTunes.
ارجع إلى جهازك وقم بالضغط على زرّي الباور العلوي والهوم المتواجد اسفل الشاشة حتّى تظهر لك تفاحة Apple، بعد ظهور الشعار شيل أصبعك عن زر الباور العلوي فقط.
سيظهر لك برنامج iTunes (إن لم يظهر لوحده قم بفتحه أنت)، سيخبرك بأن جهازك يتطلّب ريستور.
اضغط على زر Restore، وبنفس الوقت كن ضاغطًا على زر Shift على الكيبورد، ستظهر لك نافذة لتختار ملف.
قم باختيار ملف نظام iOS 6.1.x الذي قمت بتحميله سابقًا.
انتظر قليلًا حتّى يكتمل الريستور والداونجريد.
عند عودة الجهاز إلى نظام iOS 6 ارجع إلى برنامج iTools وابدأ استرجاع النسخ الاحتياطيّة التي خزّنتها يدويًا في الخطوة الثانية.
| |
|
|
|
|
|
|
|
|
|
Re: IOS7 ... تحديث الآيفون .. امكانياتك رهيبة لكن شكلك بايخ !! (Re: سامى عبد المطلب)
|
Quote: الاخ يحى قباني
انا لقييت ال airdrop
بس ما عارف دا شنو
ممكن تشرح لي
مع الشكر
عادل |
مولانا عادل سمير
مشتاقين كتير ...
بانسبة للاير دروب...
اول حاجة اتأكد انك خليتو ( أون )
وبعداك حدد الناس الممكن تستقبل منك ( بالأيردروب ) ... غالبا اللستة حقت التلفونات الموجودة ...
او ممكن تحدد بالاسم ... بس اعمل حسابك لانو في اوبشن بتيح للناس كلها تستقبل ...
الاير دروب ما بتقدر تستعمله الا يكون جنبك في زول تاني عندو ايردروب ...
بتنقل بيهو من تلفونك لي تلفونو اي فايلات مزيكا صور مرفقات بدون ما تحتاج ارسالها بايميل او غيره ...
و من غير الحوجة حتي لبلوتووث ... او واي فاي ...
تحياتي للاسرة ...
| |
|
|
|
|
|
|
|
|
|
Re: IOS7 ... تحديث الآيفون .. امكانياتك رهيبة لكن شكلك بايخ !! (Re: يحي قباني)
|
| Quote: افتح برنامج iTools وستحصل على عدّة خيارات جانبية، قم بالذهاب لها وتصفحها وقم بحفظ نسخة Backup يدويًا من جميع فئات الملفات كالصور وجهات الإتصال… هذا لأنك لن تتمكن من استخدام النسخة الاحتياطية الخاصة ببرنامج iTunes. |
مهم شديد عملية المانيوال باك اب ...
خصوصا لو الناس طولت من استخدام الايتيونز ... و بتستخدم الآي كلاود للباك اب ...
النسخة حتكون قديمة ...
| |
|
|
|
|
|
|
|
| |
يحي قباني
smart_ana2001
الفاضل يسن عثمان
HAYDER GASIM
فيصل نوبي
محمد جلال عبدالله
احمد الأمين على إدريس
عادل سمير
سامى عبد المطلب
فيس بوك
تويتر
انستقرام
يوتيوب
بنتيريست