|
|
|
 Re: حـكـايـة الـلـصــــــــــــــــــــــــــــــــــــــلـة ... (Re: معاوية المدير)
|
صيف 1987...
في إجازة عيد الفطر سافرت مع مجموعة من الزملاء لمدينة حلفا الجديدة
لحضور مرآسم زواج زميل لنا في مصلحة المخازن والمهمات، وكان أحد
الزملاء قد وجّه لنا دعوة لزيارته في مدينة كسلا. توجهنا من حلفا الجديدة إلي
كسلا في عِزّ الصيف عبر البُطانة حيث نزل بنا الباظ في وادٍ جاف صحراوي
يبدو كضفتي النهر. سألت الراكب بجانبي، عن الوادي، فأجابني هذا مجرى
نهر اللتبراوي، عندها قفذت إلي ذهني صورة المقرن. ليس مُقرن الخرتوم بل
مقرن عطبرة حيث يعانق اللتبراوي النيل عناق حآر في الجزء الجنوبي الغربي
من مدينتي الحبيبة اتبرا. إسترسلتُ في الذكريات مع هذا النهر المجنون والنيل
الذي ترعرعت علي ضفتيه.
الذي يميّذ عطبرة عن بقية مُدُن السودان الترآبط الإجتماعي، لكنها إرتبطت
في ذِهن البعض بالكتاتيح والهبايب. أذكُر عندما تجي كتآحة مقلّعة من الجهة
الجنوبية الشرقية حيث يقع حي الطِليّح آخر أحياء عطبرة من تلك الجهة، أهلنا
يقولوا، الليلة اللتبراوي وقع ، يعني نهر اللتبراوي جا مندفع من أعلى مرتفعات
الحبشة، فهو لا يأتي في صمت ولا يهدأ حتي ينتهي موسم الفيضان.
اللتبراوي في طريقه لملآقاة النيل يجرف ايّ شئ يصادفه في مجراه من أخشاب
وحيوانات وهوام، وزوآحف، إضافة إلي كلّ مخزونات ذلك الوادي الجاف الذي
قطعته في الطريق إلي أرض القاش.
| |
 
|
|
|
|
|
|
|
|
Re: حـكـايـة الـلـصــــــــــــــــــــــــــــــــــــــلـة ... (Re: معاوية المدير)
|
عطبرة أعشقها حدّ الثمالة، تلك المدينة المترآبطة الأحياء كما الجسد الوآحد إذا
إشتكت الحصايا تداعت لها الدآخلة وبقية أحياء عطبرة بالسهر والألم حتي
تتعافى.
وُلدت وترعرعت علي شاطئ النيل في قرية السيالة حيث كان إرتباطنا بالنيل
إرتباط مباشر، فقد كان مسرح لهونا علي مدآر السنة، عندما ينحسر نتخذ رماله
ميادين للعب كرة القدم، وعندما يهيج ويمتلئ مجراه في موسم التساب يحلو لنا
صراع أمواجه، نتسابق نحو الأخشاب التي يقذف بها اللتبراوي في جوف النيل.
عندما يهيج النيل في زمن التساب مدفوعاً باللتبراوي دائماً ما يصاحب هيجانه
إشاعة بأنه قد جلب من جنوب الوادي تمساح عُشاري ليسكن شُدر السُنُط الكابي
فوق الخبوب، أو إنه قذف بأصلة إلي البر لتختبئ في غابات السُنُط والطلح مترصدة
بهايم الفريق.
| |
|
|
|
|
|
|
|
|
|
Re: حـكـايـة الـلـصــــــــــــــــــــــــــــــــــــــلـة ... (Re: معاوية المدير)
|
الظلآم دآمس وأشجار النخيل علي ضفة النيل الشرقية تبدو وكأنها عمالقة من قوم
عاد وثمود. النيل يفوّر ويموّر ويزمجر في جوف الظلآم كأنه مارد أُسطوري حبيس
كهف في جوف الجبال، وقد بدأت الجزيرة بالضفة الغربية سابحة في خط متعرّج
بين أمواج النيل الهادرة وظلمة الليل البهيم كأنها سفينة عملاقة حطمتها ريحٌ عقيم.
سرت الإشاعة كسريان الرعشة في الجسد المحموم بأنّ النيل قد قذف بأصلة إلي
بر الأمان. أصبح الناس في حالة ترقُب وحذر، مِن الوآطة تبقى المِغيّرِب يضايروا
الشُفّع والغنيمات، فتظل القرية تسبح في ظلآم دآمس يتسكع في فضاءها الصمت
فلا تسمع غير بعض الأصوات المتقطعة التي تخترق جدار الصمت بين الفينة والأُخرى
صادرة من هوام الأرض والحيوانات المتوحشة، وكـلآب الحِلّة. إنقطعت تماماً
أصوات الأطفال وما عادوا يلعبون شدّت وشليل في زقاقات الحِلّة.
طلقت إشاعة بأنّ اللصلة إفترست عتود ود المنصوري عندما كان يرعى أغنامه
في غابات الطلح شرق القرية بالقرب من حرازة ناس الملك.
| |
|
|
|
|
|
|
|
|
|
Re: حـكـايـة الـلـصــــــــــــــــــــــــــــــــــــــلـة ... (Re: معاوية المدير)
|
مجالس القرية أصبح الحديث فيها عن اللصلة، حيث ترك الناس الحديث في السياسة
والرياضة وأصبح همهم الأوّل والأخيّر اللصلة وكيفية القضاء عليها.
النعمان: النصيح، آ زول علي الحرام إشتهيت نبيح منصور اللبرق.
النصيح: بارك الله في اللصلة، خلتو من المِغيرب يلزم اهلو، أوّل من ضنب الكديس
يتغتا يمشي يترُسا عيش ويجي ينبح في الشوارع، أنا اللبرق أنا الشافو خلو، أرقد
يا عيش أنا جرابك. هلآ، هلآ الليلة رقد وآطا !!!.
النعمان: قالوا النصيبة دي بلعتلها عتوداً هِيّل المناصير !!!.
ود العوض: آ زول علي اليمين في ناس شافوها، قالوا فتحت خشُما هن قدُر، والخشُم
شيّن وملآن لغاويس، وقالت كدي جب زلقتو في بطُنا !!!.
النعمان: الخرآآآآآآبة، بلآ ياخُدا !!!.
النصيح: والله حجرتنا المرقة، ترانا بقينا من الوآطة تمغرب نلزم اهلنا. يعلم الله صلآة
العِشا دي خليناها.
ود العوض: المخيّر الله !!!؟؟؟.
| |
|
|
|
|
|
|
|
|
|
Re: حـكـايـة الـلـصــــــــــــــــــــــــــــــــــــــلـة ... (Re: معاوية المدير)
|
مُنتصف النهار، النيل يفوّر ويموّر مهدداً الحِلة التحتانية. الناس والحيوانات والطيور،
وهوآم الأرض، الكُل في ثبات عميق عدى بت الصعيد وقد بدات تتصبب عرقاً وهي
متجهة نحو منزل الرحمة بت خير السيّد.
بت الصعيد: سلآم هوي يا الجُوّة، الرحمة كيفِنكُن ؟؟؟
الرحمة: حباب بت الصعيد، أدُخلي لا جُوّة.
بت الصعيد: احييييييا من دي القلآية !!!، الحقني بمِهية مويّة.
الرحمة: نحن عآد من يقع اللتبراوي دا بلآ يولّع فوقنا الوآطة ويلملم فوقنا اللصل،
والتماسيح ماني خابرالو جيّهة.
بت الصعيد: يا دِي، قالوا، بلعتلها وِليداً للمناصير!!!.
الرحمة: هووووي يا بت الصعيد، جيهي خباراتك، الشي عتود.
بت الصعيد: العتود بتبلعو والجنا بتبلعو، وإنت برآك اكان لمّت فيك، بعتنيبتك
البتضفري فيها دي بتبلعك.
الرحمة: يا يُمّا مِتنافضاها . يا بركة سيدي، تبلعك إنت يا الماعندك طعم.
بت الصعيد: وكت ما عندي طعم بالعاني لشنو ؟؟؟ ما تبلعك إنت الطاعمة.
كدي سوّن لي غدا، اللزم اهلي قبال تمغرب.
| |
|
|
|
|
|
|
|
|
|
Re: حـكـايـة الـلـصــــــــــــــــــــــــــــــــــــــلـة ... (Re: معاوية المدير)
|
الحِلة تسبح في ظلآم دآمِس، والسكون مُخيّم علي الوجود حتي يخيل إليك أنّك
تتحسسه وتلمسه بجوارحك، والأرض تنفُث من داخلها بخار ممزوج برُطوبة
يتخلل الملآبس مصحوباً برائحة البرسيم والخدار. مجموعة من رِجال الحِلّة
يتسامرون فوق عتبة دُكان عثمان الترزي.
الزين: يا جماعة اللصلة خبرا شنو ؟؟؟.
السِميد: آ زول امسينا بالله، هسّع الشي دي طاريها مالك ؟؟؟.
خير الله: قالوا شافوها مِنبطحة في جدول المشروع.
الحِويج: آ زول ود الصِعيل حلف قال، شاف أترا في شارع الدومة زي لِستِك
المجروس.
السِميد: البلآ الياخُدا ... سجم أُم البتلم فيهو، وحات الله.
ود العوض: هسّع البتودينا اهلنا شِنِي ؟؟؟. إن شاء الله تلِم فيك يا السِميد تنطويلك
في رقبتك البلا رقبة السُقدة دي.
السِميد: إن شاء الله تلِم فيك إنت يا المقبوح تعدِمك نفاخة النار. القبحة فوقك.
في هذه اللحظة بدأ شبح إتنين من شباب القرية يلوح في الضلآم.
الحاج: ديل مِنُنُ ديل، البتبنوا في الضُلُمة دي ؟؟؟. يا جنوّن اللصلة دي ما سمِعتوبا ؟؟؟.
ود العوض: التاج !!! يا جنوّن ماشين وين ؟؟؟.
إقترب التاج من ود العوض وهمس في أُذنه.
ود العوض: والله دي عوجة كبيرة خلآس !!!.
السِميد: في شنو ؟؟؟.
ود العوض: قالوا اللصلة في تُكُل ناس ود الخليفة .
السِميد: هلآ، هلآ يا ود العوض، جاتك في بطُن بيتك. إسركن تب.
| |
|
|
|
|
|
|
|
|
|
Re: حـكـايـة الـلـصــــــــــــــــــــــــــــــــــــــلـة ... (Re: Asim Fageary)
|
إنسرب الخبر عبر الظلآم الدامس في حيشان القرية ليطرق اسماع الكبار والصغار.
بدأ ناس الحِلة التوجه نحو بيت ود الخليفة تحت ستار الحيطة والحذر من جميع الزُقاقات،
وهُم مدججين بالعكاكيز والأسلحة البيضاء.
النصيح، هامساً: حاج جبريل، سمعت الخبر ؟؟؟
حاج جبريل: ايوا، سِمِناهو .
النصيح: الله يستُر .
حاج جبريل: اسلة دا أنِي نارِف نأدبوا كويس .
النصيح: كيفِن يا حاج جبريل ؟؟؟!!!.
حاج جبريل: ايوا،،، دا نِزام بتااُوا إندي أنا.
النصيح: يا زوووول !!!؟؟؟.
حاج جبريل: تشوف، انِي أخُت كُراااي دا للسلة في خشمو، ولما يبلأ نُس الكراع بسكيني
دا بأرِف كيف نودبوا.
| |
|
|
|
|
|
|
|
|
|
Re: حـكـايـة الـلـصــــــــــــــــــــــــــــــــــــــلـة ... (Re: معاوية المدير)
|
وصل النصيح وحاج جبريل إلي بيت ود الخليفة الذي كان مستّف بجمع غفير من
ناس القرية. الظلآم دآمس، واللصلة تتحرك بجسمها الكبير في داخل التُكُل، والكُل
في إنتظار ود الزبير الذي عُرِف في الحِلة بالتصدى للمرافعين والتماسيح واللصل،
وجميع الحيوانات المتوحشة والـكِـلآب السعرانة التي تهدد أمن الحِلة، فهو الوحيد
الذي يملك بندقية خرطوش ويجيد النيشان.
النصيح: يا جماعة كدي فِجوا لحاج جبرين دا اليدخل عليها.
حاج جبرين: قلت شنو يا النسيه ؟؟؟
النصيح: ما قلت بتوضبا !!!؟؟؟.
حاج جبرين: يا النسيه اخوي اسلة دا بتأ بهر مُش في إختِساسي، اني نأرِف نودِب
اسلة بتأ خلا. اي والله. أهو ود الزبير وسل، خليهو يشوف شُقلوا مأها.
الظلآم يكاد يبتلع الحِلة، والخوف أصبح مزروع في كل مكان، والكُل صوّب بصره
نحو ود الزبير وهو قد عمّر بندقيته وإنكبّ عليها منشناً نحو اللصلة التي كانت تبدو
وكأنها ملتوية في خُمارة العجين. نسمة رقيقة هبت في المكان و ود الزبير قد أحكم
تنشينه علي اللصلة وأُصبعه قد لآمس الزناد، وقلوب الجميع كادت تبلغ الحناجر
في هذه اللحظة الحاسمة، فجأة وسط دهشة الجميع عدل ود الزبير عن تنشينه وهبّ
واقفاً بهامته الفارهة، وتقدم نحو التُكُل. الكُل في حالة ذهول تام، والدماء كادت أن
تتجمد في العروق عندما بدأ ود الزبير يتقدم نحو التُكُل.
| |
|
|
|
|
|
|
|
|
|
Re: حـكـايـة الـلـصــــــــــــــــــــــــــــــــــــــلـة ... (Re: بله محمد الفاضل)
|
ود المدير شوف عينى وانا صغير صغراً بلا كتير
اللصلة بلعت العتود فى سام سيدى وهى غمرانه والعتود يفرفر
بين الحياة والموت اتلموا فوقااا الجنون كتلوها ومو خابرين لها جيهه حرقوها
انا بعد كبرتا عرفتا انو جلداااا يصُلح للاستعمال
بالعكاكيز والبربنديات شوف عين ما قول قالوا يا الحبيب
سردك رايع يا جنا وحاج جبريل وضبتوا وضيبت اللصله
:
:
:
:
:
:
مع التحيات لله الزاكيات
| |
|
|
|
|
|
|
|
|
 Re: حـكـايـة الـلـصــــــــــــــــــــــــــــــــــــــلـة ... (Re: معاوية المدير)
|
| Quote: الفي التكل دا نطع ما تقروقة يا ود المدير |
ديقول من الحِلة التِحتانية،
ألفين سلآم يا قريبي.
المعلق في حيطة التُكُل دا نطُع زي ما قلت يا الحبيب، وهو غير النطع في لغة
العرب، فالذي في لغة العرب يستعمل لقطع الرقاب، والمعلق
في تُكُلنا دا يستعمل لقطع الرحط، وقديماً يُستعمل لطهارة المشارط،
يعني برضو قطع !!!.
المخير الله.
أشواقي الكتيرة...
| |
|
|
|
|
|
|
|
|
|
Re: حـكـايـة الـلـصــــــــــــــــــــــــــــــــــــــلـة ... (Re: بله محمد الفاضل)
|
رائع يا ود المدير
ودايماً لمان تجيب سيرة تلك الجيهات بتلقاني جنبك والسيالة تشابه قرانا في كثير من التفاصيل
في سيرة الأتبراوي والنيل هناك الكثير من القصص
تعرف كانت عندنا غابات كثيفة قطعت كلها لإقامة (المتر) على ضفتي النهر شرقاً وغرباً
لا حافظنا على غاباتنا لا نجحنا في زراعة مترنا
هذه الغابات والله مما قطعوها انقطعت مننا المطر وما عادت تزورنا إلا لماماً
كانت حياة برية كاملة متكاملة، تصادف في هذه الغابات ما لا يخطر ببالك
الأصلة، الصبرة (الثعلب)، الحلوف، الورل بطلع من الموية ويرضع البهايم (الله لا كسبو)
ويمصُرهن مصر، ويعوضك الله في عشا وليداتك
جزء كبير من الحيوانات المذكورات ديل ديل شفناهن شوف العين إلا الحلوف والمرفعين كانوا يحكولنا بيهن
الأروع في كل هذه الحياة هو صوت الطيور وهي تغرد صباحاً وترسل ألحانها العذبة من أعالي أشجار الهشاب والطلح والسدر والقرض
وتجيك كشحة من ريحة الخدار وأزهار الأشجار ، مع زمجرة الأتبراوي الـ (جاب زبدو وسوام وبعشّم)
فتخيل إنك صباحاً كاشي بهايمك جيهة التحتانية، وتنغمس في هذه الحياة الرائعة
كثيراً ما أقول إن أي زول ما نشأ في الريف فهو ناقص شربة
فقد فاتته تفاصيل كثيرة من الحياة الحقيقية
تحياتي مثنى وثلاث ورباع
| |
|
|
|
|
|
|
|
|
 Re: حـكـايـة الـلـصــــــــــــــــــــــــــــــــــــــلـة ... (Re: بدرالدين بابكر مصطفى)
|
Quote:
ود المدير شوف عينى وانا صغير صغراً بلا كتير
اللصلة بلعت العتود فى سام سيدى وهى غمرانه والعتود يفرفر
بين الحياة والموت اتلموا فوقااا الجنون كتلوها ومو خابرين لها جيهه حرقوها
انا بعد كبرتا عرفتا انو جلداااا يصُلح للاستعمال
بالعكاكيز والبربنديات شوف عين ما قول قالوا يا الحبيب
سردك رايع يا جنا وحاج جبريل وضبتوا وضيبت اللصله |
يسعلك الله يا محمد حمزة إنت كنت سغير ؟؟؟، وحات خوتي
ليك أنا قايلك من يومك وزمانك بي هيعتك دي. شي عجيب !!!.
اكِنكم مسويلكم عملة نفر دي يا جنون الباوقة ؟؟؟، أصبروا
ساااااكت أكان ما حدسلكم حساس محمد حساس.
يا زول ليك الشوق بحر...
| |
|
|
|
|
|
|
|
|
 Re: حـكـايـة الـلـصــــــــــــــــــــــــــــــــــــــلـة ... (Re: معاوية المدير)
|
Quote: يخرب بيت شيطانك يا ود المدير ..
بوستاتك ليها نكهة ومذاق خاص .. كتابة طاعمة ..
وسرد موغل في الإمتاع .. وشخوص واقعية نكاد نراها امامنا والله يا معاوية ..
جد متعة ما بعدها متعة .. قلت ليّ بت الصعيد قالت للرحمة شنو ؟!! هههههههههههه
ياخ انت زول فقري ومجنون كتابة .. تحياتي الزاكيات يا حبوب . |
سلآمات يا بسام.
يا أخي أخجلت تواضعنا. والله صحي.
عاجزين عن الشكر يا بسام، وعن الرد أعجز.
هسّع أجيبلك كلآم عشان أوفيك حقك من وين ؟؟؟.
غايتو كتّر خيرك وبارك الله فيك، وإن شاء أكون
قدر المقام.
بت الصعيد، شخصية لا تخلو منها القرية.
عظيم مودتي لك يا رائع...
| |
|
|
|
|
|
|
|
|
|
Re: حـكـايـة الـلـصــــــــــــــــــــــــــــــــــــــلـة ... (Re: معاوية المدير)
|
Quote:
لكن ما متعة و معاها سياحة .. تاريه الصلعة دي مو هينة ... و بالنسبة لي تقروقة الصلاة
نحنا ناس الشمال الشمالي بنقول تبروقة اها تقروقتك دي صاح وللا خطأ كتابي و .. تسلم يا رايع
رد · أعجبني · متابعة المنشور ·
حروف من التراث السوداني و مُسميات ( التبروقة ) مثالاً - |
جلال يا عزيز،
متعك الله بالصحة والعافية.
زمان حبوبتي قاعدة تقول لي، صلعتك دي اللت بخت يا ولدي.
اولاً الفيها العناقريب الهبابات دي ما راكوبة،
دي كرِّقة.
التِحت العنقريب دي يا جلال عندكم تبروقة، وعندنا نقول تقروقة،
وكلو صحيح لكن المحيرني !!! الكلمة دي جات من وين، ومصدرا
شنو ؟؟؟. يقولون مصلاية، والتسمية مُشتقة من الصلآة، وكلمة
تقروقة أو تبروقة ليس لها علآقة بكلمة صلآة، اللهُمّ إلا إذا كانت
الكلمة نوبية لها صلة بالعبادة !!!؟؟؟.
بعض الناس يقولوا، برش الصلآة، والتبروقة تصنع في الشكل المستطيل
الذي يظهر في الصورة، واحياناً تكون مدورة وليها رقبة، وأطرافها قايمة
لفوق منعاً للدوابي من الوصول للمتعبد. تضفر التقروقة من سعف الدوم
وتُوشى أطرافها بالصوف الأسود وهذا ايضاً يحيل بين الدوابي والمُصلي.
قد تكون المصلآية مصنوعة من جلد الغزال أو جلد اب عُرُف، ويقال
أنّ جلد اب عُرُف طارد للهوام السامة كالثعابين والعقارب. (أمسينا بالله).
أهلنا في الشمال ناس سعية، عشان كدا التقروقة بيدقولآ مسمار أو عُوّد
ويعلقوها في الحيطة عشان البهم والجداد ما يخرا فوقا، ههههه.
تعظيم سلآم ليك يا جلال،
ومودتي الأكيّدة...
| |
|
|
|
|
|
|
|
|
|
Re: حـكـايـة الـلـصــــــــــــــــــــــــــــــــــــــلـة ... (Re: معاوية المدير)
|
Quote:
يعني يا ود المدير بعد البري اللذيذ دا كلو
ولفلفتنا الحلة دائر ما يدور
ومشيتبنا في رحلاتك جت
لا خليت ترعة لا غبار لا مصرف
لا أنداية
لا .......................
وينتهي دا كلو في تقروقة
يا اخي ميتيشك ظاتو ههههههههههههههه
حقيقة متعة مرفوعة بالقوة تلعتاشرين
الله يجازي محنك |
إنت يا بله تِتعلى ما تِدلى يا بركة مِن جعل محمد نبي.
يا زول الشُكُر ليك الآف، الآف،
وميتيشي ظاتو ...
| |
|
|
|
|
|
|
|
|
|
Re: حـكـايـة الـلـصــــــــــــــــــــــــــــــــــــــلـة ... (Re: معاوية المدير)
|
Quote: ياسلام ياود المدير ياخ
طبعا لازم الطيب صالح يكون من تلك البقاع التي تمنح لساكنيها الألق والطعم
ومفردات زاهيه وحكاوي باهية
النيل زاتو مع منحه الحياة يمنح الحنية والتلقائية
يازول واصل في المجال ده شويتين نلقاكم أنت ورفيقك ود جبرين ملء السمع وكتبكم مدورة |
سلآمات،
أخي حسن علي ابو قرون.
رحم الله العلم السوداني الطيّب صالح، وعاطر التحايا عبرك
لأخي الحبيب طارق جبرين سائلاً الله لك وله التوفيق.
كما أسلفت أخي حسن النيل هو منبع الإبداع وقاطني النيل
الذين رضعوا من ثديه يظهر إبداعهم جلياً في روايات الطيّب
صالح، وإبداعات ود جبرين، وما محاولاتي إلا غيض من
فيضهم.
التحية لك، ولود جبرين والرحمة والمغفرة لأديبنا الطيّب صالح...
| |
|
|
|
|
|
|
|
|
|
Re: حـكـايـة الـلـصــــــــــــــــــــــــــــــــــــــلـة ... (Re: معاوية المدير)
|
Quote: تسلم يا ود المدير .. وانتا بالعافية التخصك في المصارين و تبقالك هدم و كمان نعلين
و .. صباحاتك بيض يا باشا
و اها من غبر عتب
كركتك ناقصي
الزبر القناوي .. او .. الجر والكوز المقدود
القربة والقرعة
اللدايات و البراد المليان سكن
الطقاطيق
حارج النص مع الاعتذار
عليك الله من الزمن داكا الكيزان مقددين |
نسيت قِحف الجداد يا جلال.
عليك الله في كرقة فيها طقاطيق ؟؟؟...
| |
|
|
|
|
|
|
|
|
|
Re: حـكـايـة الـلـصــــــــــــــــــــــــــــــــــــــلـة ... (Re: معاوية المدير)
|
Quote: رائع يا ود المدير
ودايماً لمان تجيب سيرة تلك الجيهات بتلقاني جنبك والسيالة تشابه قرانا في كثير من التفاصيل
في سيرة الأتبراوي والنيل هناك الكثير من القصص
تعرف كانت عندنا غابات كثيفة قطعت كلها لإقامة (المتر) على ضفتي النهر شرقاً وغرباً
لا حافظنا على غاباتنا لا نجحنا في زراعة مترنا
هذه الغابات والله مما قطعوها انقطعت مننا المطر وما عادت تزورنا إلا لماماً
كانت حياة برية كاملة متكاملة، تصادف في هذه الغابات ما لا يخطر ببالك
الأصلة، الصبرة (الثعلب)، الحلوف، الورل بطلع من الموية ويرضع البهايم (الله لا كسبو)
ويمصُرهن مصر، ويعوضك الله في عشا وليداتك
جزء كبير من الحيوانات المذكورات ديل ديل شفناهن شوف العين إلا الحلوف والمرفعين كانوا يحكولنا بيهن
الأروع في كل هذه الحياة هو صوت الطيور وهي تغرد صباحاً وترسل ألحانها العذبة من أعالي أشجار الهشاب والطلح والسدر والقرض
وتجيك كشحة من ريحة الخدار وأزهار الأشجار ، مع زمجرة الأتبراوي الـ (جاب زبدو وسوام وبعشّم)
فتخيل إنك صباحاً كاشي بهايمك جيهة التحتانية، وتنغمس في هذه الحياة الرائعة
كثيراً ما أقول إن أي زول ما نشأ في الريف فهو ناقص شربة
فقد فاتته تفاصيل كثيرة من الحياة الحقيقية |
الأخ الحبيب بدر الدين،
ناس اللتبراوي.
حبابك ألف.
شكراً للمداخلة التي تحتاج إلي بوست كامل للرد عليها، وإن شاء الله يكون.
والله يا بدر الدين بعد مشيت الخرتوم للقراية والشُغُل، وإحتكيت بناس البندر
كنت دائماً أقولهم، والله الما عاش في القرية الفايتو كتير بالحيل.
نستطيع أن نكتسب من البندر، لكن زول البندر يصعب عليه أن يكتسب
من الريف. هذا ظني والله أعلم.
لك كامل مودتي...
| |
|
|
|
|
|
|
| |
معاوية المدير
Asim Fageary
سامى عبد المطلب
هشام كمال عبادي
بله محمد الفاضل
محمد حمزة الحسين
usama Babiker
بدرالدين بابكر مصطفى
فيس بوك
تويتر
انستقرام
يوتيوب
بنتيريست