08-02-2013 02:19 AM نالت الفنانة الصاعدة فاطمة عمر شهرة واسعة بترديدها لكلمات الاغاني المصاحبة للاعلانات وسجلت حضورا انيقا عبر برنامج اغاني واغاني بقناة النيل الازرق ولنجاحها الكبير اختارها الملحن أحمد المك لتشارك معه في برنامج «عش العصفور» الذي يبث اول ايام عيد الفطر المبارك بالتلفزيون القومي وهو من اخراج شكر الله خلف الله، وبرعت فاطة عمر في تقديم اغنية «يا حنين زي عش العصفور » التي كتب كلماتها اسحق الحلنقي وقدمتها بطريقة جميلة الفنانة عافية حسن قبل اعتزالها الغناء، واكدت الحلقة التلفزيونية ان «فطومة» سيتم اهداؤها عش العصفور بمباركة الشاعر الحلنقي والملحن المك . ومن ناحية اخري بعد غياب طويل تعود المطربة هاجر كباشي للظهور في تلفزيون السودان وتشارك ثالث ايام العيد في برنامج «جلسة عود» الى جانب الفنانة سميرة دنيا .
فاطمة عمر نجمة (أغاني وأغاني).. وصاحبة (فرحانة بيك أنا يا جناي)
فاطمة عمر (35) ثانية كانت بمثابة النقلة الكبيرة لي وهي قدمت صوتي للناس 07-25-2013 05:03 PM (35) ثانية فقط كانت كافية لأن تثبت موهبتها العالية.. (35) ثانية فقط كانت كافية لأن تحمل المطربة الشابة "فاطمة عمر" صوتها عبر بوابة الإعلان الخلفية إلى كل بيوت السودان.. (35) ثانية فقط نقلت فيها "فاطمة" بصوت يضوع شجناً و(حنية) أمنيات أم لولدها عبر الشعار الإعلاني (فرحانة بيك أنا يا جناي) الذي تفوق على عدد كبير من الأعمال الغنائية التي بذل فيها كثير من الجهد.. (35) ثانية فقط نقلت "فاطمة" من حيز مطربة لا يعرفها أحد إلى مطربة تبكي كل أمهات السودان مع شجنها حين تقول: (والليلة يا سيد الرجال فرحت أمك وحلتك). انضمت "فاطمة عمر" إلى مجموعة (أغاني وأغاني) لهذا الموسم ضمن (جوقة) مطربيه، ورددت في اليوم الأول أغنية (من أجل حبي)، ووقتها قدمت نفسها للناس (صوت وصورة) بعد أن كان يصلهم منها (صوتها فقط).. (رياحين) التقت بـ"فاطمة" وأدارت معها حواراً صغيراً. { في البداية (رمضان كريم).. ومن هي "فاطمة عمر"؟ - الله أكرم، وتصوموا وتفطروا على خير.. أنا من مواليد أم درمان يوليو 1988 (أكتوبر)، ودرست جامعة الخرطوم قسم الإعلام.. أعمل الآن في شركة إعلانات. { ظهرتِ من وين؟ - ظهرت من خلال إعلان (فرحانة بيك) الذي قدم صوتي للناس، وقبل مشاركتي في (أغاني وأغاني) شاركت في مهرجان (أتنينا) ببورتسودان. { الشعار الإعلاني (35) ثانية غيّرت مسار حياتك؟ - فعلاً (35) ثانية كانت بمثابة النقلة الكبيرة لي وهي قدمت صوتي للناس. وبعض أقربائي وأصدقائي مذهولون من أنني صاحبة إعلان (فرحانة بيك) ولا يعرفون أنني من نفذته، والإعلان أحدث لي (خلعة) على مستوى تقبله من الناس. { في أول ظهور لك في (أغاني وأغاني) قدمت أغنية الفنان "عثمان حسين" بصورة جيدة؟ - أصلاً أنا بحب استمع إلى الأغاني القديمة.. بحب (قصتنا) وكثير من الأغاني القديمة وأغنية (من أجل حبي) أحببتها منذ أيام الثانوي بس ما كنت حافظة منها ولا كلمة، وكنت أستمع لها في (حافلة الترحيل)، وفي السنة الثانية انتقلت إلى مدرسة أخرى وبحثت عنها مجدداً وبديت بعد كده أفهم الكلمات.. وفي بعض الجمل في الأغنية كنت بحس إنو أنا الكاتباها زي (اصلي بعدك ما هويت). { ألم تتخوفي من الغناء لـ"عثمان حسين"؟ - لا.. لأني كنت بحب الأغنية وبحسها، ولو فرضت عليّ أغنية غيرها لم أكن سأجيدها. { هل (الشعار الإعلاني) أم (أغاني وأغاني) هو ما ساهم في تقديمك للناس؟ - والله الشعار الإعلانى هو اللي قدمني للناس.. وقصة الإعلان ده، أنا كنت قاعدة مع مديري في الشركة الإعلانية وطلبت منو شعر إعلاني بمقاييس محددة، إنو يكون بداية أغنية ويظهر في كل التلفزيونات السودانية وتكون كلماتو سودانية وتخاطب الأمهات.. وتفاجأت بعد ذلك بالنجاح الساحق للشعار الإعلاني.. حتى أن أحد أصدقائي المقيمين في القاهرة اتصل بي ذات ليلة وكان موجوداً في حفل زفاف لعروسين مصريين وأخبرني أن الأسرة المصرية زفت عرسانها بـ(فرحانة بيك أنا يا جناي). { الدخول من بوابة الإعلانات ألا يمثل مشكلة؟ - لا ليست مشكلة، هو نوع من الظهور.. في ناس بيظهروا في (نجوم الغد) أو مشاركة في مسرح.. وهو جزء من وظيفتي. { كيف تعاملت مع الشهرة التي أتت لك فجأة؟ - حتى الآن ليست بالأمر المخيف، وفي ناس في الشارع بينادوني (دي هي.. لا ما هي).. وحتى الآن الفئة التي تستمع لي هي فئة كبار السن. { مشاريعك الفنية؟ - لسة ما في حاجة واضحة.. وربنا يوفق. { بتعملي شنو في رمضان؟ - بروفات أغاني جديدة.. وعايزة أطلع أشياء جميلة لأنو الناس ما بتتوقع أظهر في شكل جديد أقل من (فرحانة بيك).. الوصول للقمة ساهل لكن المحافظة عليه صعبة. { أصابك الغرور؟ - لا، لأنو أعظم الناس كانوا بسيطين.
ياحنين زي عش العصفور معروش بالنور كلو محبة ياالشلته حلاة كل الحلوين مآآآآ سبته وراك زول يتحبه يا يآآآآآآآآآآ حنين
يا حنين قلبي متين يرتاح من بحر الريدة وامواجه والدمعة معاك تصبح شمعة والزهرة كمان تلبس تاجها لو سبته العين تتامل فيك مابتاخد من حسنك حاجة وعينك للريد فيني مبين يا يآآآآآآآآآآ حنين
ياحنين بيك الليل ضوا رقة واحساس طيبة وخوة ولو تعرف اصل الريد هو لا سلطة بتحكمو لا قوة وآه منو الريد لما يصيبك يتغلغل في الاعماق جوة يا يآآآآآآآآآآ حنين
يا حنين لما تسيبني تروح تروح الدنيا معاك تصبح آهة تبقي الايام غير الايام والبهجة بتفقد معناها انا ليك بتقطر حنية بتمني بسيمتك القاها القاها متين انا عارفة! يآآآآآآآآآ يا حنينا
08-08-2013, 08:26 PM
Maawya Hussein Maawya Hussein
تاريخ التسجيل: 12-27-2007
مجموع المشاركات: 10136
والله يا عمدة يا حبيب ألبي خايف نطلع اكيش ناقدين ... ما فنيين انا وانتا دا!! شكلو الجماعة مسكونا ضنب ككو!!
لكن رب ضارتن نافعة .. المافي شنو!؟ ربك رب الخير عوض صبري على (الفاضلة) المتوضية .. خير بسهرة محمود عبد العزيز عديل كدا في عيد اجمل من كدا؟
------
حولااااا .. كنت نسيت الكيزان ديل دجالين قدر شنو .. ياخي (المتوضية) دي انا محاربا عدييييل كدا عمر البشير يهني المسلمين .. ويكلمنا عن العبادة ومراجعة النفس المسئول الفرتكاني يزور متأثري الفيضانات في سقط لقط! الدستوري الفرتكاني يعمل شنو ما عارف .. الدفاع الشعبي يرسل القيادة لمناطق العمليات وعاك عيك !!
كلو كضب في كضب .. لا مسلمين لا مسئولين .. ولا دستوريين .. ولا شي شعبي قطع شك فيما يهرفون!!
Quote: بالعكس يا عمدة،، فاطمة دي من أجمل تلاتة أصوات نسائية ظهرت في الفترة الاخيرة مع اسرار بابكر وعافية حسن، لكن وجهة نظري بتتمثل في إنو عافية حسن ما خلّت فرَقة لإضافة أيّ شي لأغنية يا حنين. اداء الأغنيات زي عملية التشييد، في فنانين بخلو أراميص بيجي غيرهم يملاها وبكون شكّل إضافة للبناء، لكن عافية دي في أغنية يا حنين شطّبتها وما خلت فيها ولا أرموص فاضي، أيّ زول داير يأدِّي الأغنية دي، حيأديها بنفس المواد الأولية الختتها عافية. اعتماداً علي الكلام دا، أنا لاحظت أمس إنو بالرغم من اجتهاد زحل في إضفاء خصوصية صوتها، ومن بعدها فاطمة عمر واجتهادها في الغنا بطريقتها الخاصة، لكن عافية كانت باينة في كل جملة لحنية، كل كلمة وكل ايقاع، ودا طبعاً ما خصماً من مجهودات فاطمة الكبيرة في الحركة دي، لكن لأنو عافية أدّت الأغنية دي بشكل مميّز وأداء فخم جدّاً روّج ليها كتير، والاهمّ إنو روّجت الاغنية بالأداء إياهو. عموماً: فاطمة عمر صوت مجيّه بالحنين والأداء التقمُّصي الفريد، هي ما بتتقمّص غير روحها براها، عشان كدا حتمشي لقدّام لو ربّنا أبعد عنها العوارض المعروفين في الوسط الفني، وأبعد عنها غرور البداية القوية البدّيك وهم إنك وصلتَ.
يا قيقا: أنا قارنت بين أداء فاطمة في (من أجل حبّي) وبين (ياحنين)، في رأيي إنو الاضافة العملتها في الاغنية الأولي أكبر من التانية، في احساس جديد في (من أجل حبي) وصل لي مردّه للفرق بين الأداء الأنثوي لفاطمة والغليظ بالنسبة لعثمان حسين، إضافة لاختلاف الظرف الزماني بالنسبة للمؤدي، ودا بالضرورة بيأدي لاختلاف في احساس كل واحد. عافية وفاطمة الاتنين اتميزن بأداء عالي واحساس عميق وثقة في الغنا، عشان كدا من الصعب إنو تلحظ لفرق بين هنا وهناك (علي الاقل بالنسبة لي).
إتمنيت فاطمة تبدا مشوارها الفني بأغنية لم يروّج لها عن طريق أيّ فنان آخر، تماماً زي ما عملت عافية التي روّجت نفسها عن طريق يا حنين صحيح، لكن الاهم إنو الاغنية رسخت عن طريقها وبطريقتها الخاصة، والحركة دي في متناول فاطمة عشان تعملها، لامتلاكها القدرة والموهبة والصوت الجميل.
عمّك الملك والحلنقي ما بقدرو يعيشوا بعيداً عن الاضواء، عشان كدا بتلقاهم في بحث مستمر عن مشروع أيّ ضوء فني يلوح، عشان كدا زي فطومة دي ما بقدرو يفوتوها أبداً.
بالنسبة لي، أكتر تلاتة اغنيات ناجحة في الألفية دي، يا حنيّن (عافية حسن)، الفات زمان (محمود) واشتقت ليك (صفوت الجيلي) اعتماداً علي تفاعل المستمع وتمدد الاغنية في الوسط الفني والاجتماعي بشكل وبائي كدا. لذلك من الصعب لأيّ فنان إنو يغيّر من احساس المستمع تجاه أيّ عمل فني متمدِّد وراسخ بصوت فنان تاني.
عيدك سعيد يا عمدة، مداخلتي الفاتت واحدة من أهدافها إنو تمرق الكاتمين الاعجاب بزولتنا دي، والحمد لله المرقتك، غايتو نحن ما داسِّنها
08-09-2013, 01:35 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
غايتو البضمنو ليك يا فتح الرحمن إنو الزول الإسمو الرشيد اللي جبت مداخلته من سودانيات لي هنا الزول ده زول فاااهم فهم ما طبيعي في قصة الاستماع ..وياريت يكون زول بيعتمد على أضانو زيينا كده وما زول بتاع علم موسيقى عشان أضمو لي النادي بتاعنا نحن زمرة العنقالة اللي في كل يوم بيأكدوا نظريتي إنهم ربما أفضل من ناس العلم الموسيقي .. الزول ده مداخلته زاااتا ما خلى لينا فيها أرموص زي ما هو قال عن عافية عشان الواحد يجي يعقب عليهو .. الزول ده بالجد كتب مداخلة دسمة مختصرة وصفت تماااما فاطمة عمر وعافية .. عن نفسي أجد عافية حسن هي تاني أفضل صوت نسائي بعد صوت ملاك الأمين المعتزلة مبكرا للغناء ومن بعدها ظهرت عافية وبرضو إعتزلت مبكراً.. عافية مستحيييل يجي زول بعدها يضييف في الاغنية دي مهما حاااول لااازم يلاقي روحو في لحظة اتقمص صوت وشخصية عافية .. الشي الملفت وبالفطرة كده في تشابه شديييد بين إحساس وتوصيف عافية وفاطمة .. ياخ لي درجة تصليح الطرحة عندهم بيتشابه ..إضافة لي حركة قلبة اليد وهي قريبة من الكتف دي .. والأغرب برضو استخدام لغة العيون عندهم الاتنين في توصيف الاغنية والابتسامة .. الحاجة دي مااا فيها أييي تقليد من فاطمة لي عافية .. انا مصر جدا انو فاطمة قبل ما تكون فنانة هي مستمعة عااادية بتحب تسمع غنا كتير من الفنانين وبتتأثر بيهم شديد حتتتى الفنانين الشباب وده ظاهر في طريقة كتير من إنفعالاتها وترديدها لي بعض ابيات الاغنيات بي طريقة شبابية مرحة.. لفتت نظري الليلة وهي بتغني يا ربيع الدنيا وفي حتت معينة بقت تقول يا لذااذة الدنيا .. ودي واحدة من الحاجات المشهور بيها سامي المغربي و وبتخلي روح الاغنية جميلة .. وواضح إنو فاطمة عمر سمعتا من هناك في تسجيلات لي سامي.. فاطمة بتندمج حتتتى مع العزف بتاع الموسيقى وبتعييشو كمستمعة عااادية .. وبرررضو لاحظت ليها قبيل في حفلة النيل الأزرق لمن بتاع الصفارة طلع ليهو صولة كده أو تقريبا طلعة ففاطمة دي قالت يا سلاااام .. عافة كانت عندها نفففس الحاجات دي ونفففس الاحساس ده لكن للأسف ما إستمرت .. احمد المك انا بعتبرو إنسان للأسف نفعي و إنتهازي وعايز الحاجات الجاااهزة .. حاااول احمد المك أن يصنع من افراح عصام شخصية عافية ولحححن ليها كل الاعمال بي نفس وريحة ونكهة عافية لكن ديييك خزلتو بي صوووتا البيضرس داك وما قدرت تمرر ليهو ألحانه الح توصلوا للشهرة ..فقام تماها ليها ألحان من وع مجنونة وميونة وشنو ديلك من الاغنيات المحبشنة ديك.. الان يبدو إنو المك وجد ضالته في فاطمة عمر وكمييية الالحان الكان مفصلها لي عافية حسن ح يحولها لي فاطمة عمر والله يستر بعد شوية نبقا في عايز يتزوجها ولقا في تطابق واحساس مشترك وما ادراك من الزوبعة المصطنعة والتمثيلية البااهتة الكانوا قادننا بيها هو وافراح عصام عبر مسريحية روميو وجولييت الحاموا بيها اصطناعا في قنوات التلفزيون السودانية كلللها وتمخضت عن إنفصال مبكر وتصريحات مزعجة عبر الصحف واللتفزيون لاحقاً.. فاطمة أعملي حسابك .. ظهور مرتين في اول يوم عيد في قنوات كبيرة أوووعا يوهمك إنك وصلتي .. الحلنقي والمك ما يخلعوك وتقولي بقيت بتعامل مع شاعر وملحن كبيرين.. في المرحلة دي صدقيني إنتي الكبيرة وهم المحتاجيين ليك وليس العكس..
تخريمة : تسجيل يا حنيين في قناة النيل الأزرق لي عافية أجمل من تسجيله الماستر بتاعت تلفزيون السودان .. تقريبا داك تسجيل كانوا معاها بابكر صديق وحرم النور وامال النور و و ..دام الفعلا اتسلطنت فيهو عافية ..
08-09-2013, 01:44 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
حفي جداً بمشاركتك هنا .. وخليني في الاول ابصم على المداخلة دي من اغاني واغاني
Quote: بالنسبة لي فاطمة فلازلت أكرر هذا البت فلتة ..فلللتة .. وانا من هنا أعلن كااامل حبي لهذا الصوت وهذه البت على المستوى الغنائي.. وح تلاقي مني الدعم الكااامل وزي ما كنت قد تنبأت لي عافية حسن في أووول ظهور ليها الان أعييد نفس التنبوء وأقول ليكم فاطمة صوت قادم بقوة من خلال حضورها البسيييط ولطيييف والبت ظاااهر إنها تملك مقومات القبول وممكن تدخل قلوب المشاهدين والمستمعين بي سهووولة .. عليها أن تبعد من المنظراتية وتجار الغنا الرخيص من من يدعون إنهم مشاهير .. فاطمة ياخ إنتي بت غناااية ما تخلي الجماعة إياااهم يغشوك ويشبكوك نحن ح نتبناك وتقووومي تسقطي في مستنقع النادي العائلي والمنتديات إياها وبعد كم يوم تظهري لينا محننة ومكبرتة ومكشكشة ويتحول غناك لي شكلك بدل صوتك ونبقا في التياب وفي السليكون وما أدراك ما نفخ الكروتيزون وتفتيح البشرة .. إنتي بت غنااااية شدييد .. وطلتك مريييحة وفيك بسااااطة كده ساااحرة ..أوعاااك تفقديها يا بت .. أوعاااك .. انا كلللمتك.. ونحن جمهور الناس سااااي ده ح نرعاك انا ومعاي الخير أخوي ده وسفيان وناس تانيين كتااار مؤمنين بي إنو عندك موهبة وممكن يجي منك.. أسمعي كلام زول قيييل إنو شناااف وأهو الله مرقك من شنااافي وانا الزول المااا بشنفو ده معناها فعععلا ما لقيت لي فيهو فرصة ..:):):):)
نتقدم بطلب انضمام للنادي ..
وفي مسألة [هذه البت] الحب لا تحده اي مستوى .. مفتوووووح المافي شنو ... اصلو سمعتنا بايظة
-------
حلقة تلفزيون السودان، وحفلة اسبارك سيتي .. طمنوني على كمممم (مستوى) .. وخوفوني على (المستوى) الخايفين منو دا ذاتو خلاس لموا فيها احمد المك والحلنقي .. بلحقوها عافية .. او بالميت بغتسوا حجرا زي افراح!!
يا ريت تسمع كلام الرشيد في حتة تبدأ بداية تخصها تماماً. .. وكلامك في حتة الرهان على الجماهير .. لا الهوامير!
رهان الجماهير رهان سعيد دوماً
امس الحوت -في سهرة السودان- كان بغني "ناسي الزمان اتغبروا“ ك"ناسي الزمان ما اتغيروا“ .. ويشير لجماهيرو
يا ابوعمير في ملاحقة التقارب والاختلاف بين عافية وفاطمة .. في كلام جميل كتبو عبد الغني كرم الله:
Quote: أعجبت بحلقة اليوم، بعد أن أنكرت عيناي، وأذناي الشاشة العام الماضي، أحب مصطفى السني، ونسرين، حتى الفاطمة، التي تغنت بعثمان حسين، فرضت على مزاجي طربا، وتعجبت من قدرة أساريرها، بين الحزن العظيم، ونضارة البهجة، كان وجهها، وبالأدق أسارير أعصابها قادرة، في ومض سريع، الانتقال بين حزن كربلائي عميق، وبهجة أنيسة، تجري على وجهها حالات الأغانية، وكأنها ظل غصن، تلاعبت به الريح، رياح اللحن والأداء، أيد سبأ، للجسد لغة تعبيرية غريبة، أظنه يترفق باللغة، واللحن، والغناء، كي تعينه على لغته الغامضة، وقدراته العجيبة.
في حفلة اسبارك سيتي فاطمة بينت قدرة اداء مسرحي وتواصل مع الجمهور بامتياااااز دي واحدة من نقاط قلقي كانت .. ان تبدع في (اعلان) مسجل بختلف من انك تواجه جمهور .. وبالحجم دا جمهور زويقة .. واضانو نضيفة
عندها مشكلة في اللبس -واعتقد انو خير الكلام دا- مع ذلك وبرغمه طلتا باهية جداً كتير مهضومة ..
ؤ دي الحتة الاتكلم عنها اديبنا كرم الله .. في صوتها عمق صوفي عالي بحلق بيك في ذرى رفيعة جداً وفي حركاتها تجسيد واستغراق عميق ..
آهات يا حنين عند فاطمة صوفية .. وعند عافية موسيقية السمانية عندهم ورد الانفاس .. بدون كلمات!!
08-09-2013, 01:43 PM
معاوية الزبير معاوية الزبير
تاريخ التسجيل: 02-07-2003
مجموع المشاركات: 7893
قيقا كل سنة وانت طيب فطومه يا قيقا فطومه لو سمحته متعه منقطعة النظير ياخ .. لكن يا حنين بتاعة تلفزيون السودان دي الكمنجات والعود فقعو مرارتي ازعاج غير محتمل وفي حفلة اسبارك الموسيقى برضو ازعجتني كتير وفطومة كم مره مرضتني حسيت بيها بتعمل في حركات حقت نانسي عجاج .. غايتو فطومة دي لو لقت ليها فرقه موسيقيه شحمانه ومكتمله وفتشت ليها غنا جديد وسمح او غنا سمح قديم بس lما مسموع كتير وبرفت كتير بتعمل شغل عجيب وما بتنسي لكن لو واصلت كدا حتبقى فنانة قعدات زي الست سميره دنيا
عمر الفاروق الناقد كل سنة وانت طيب عافيه دي لمن تغني في الحتات العاليه بتستحمل تسمعه كيف !! بالنسبه لي بتنا ملاك اللمين مافي ولا كلمه ايوه الاولى
عافية دي ما بتطلع العالي كتير ولمن تطلع قاعدة تطلع براحة براحة لانها مجججرمة وعارفة طلوع عالي ده بيرميها.. ملاك الامين دي غايتو اتلووموا فينا اخوانا ناس الكندي الامين وصلاح الامين ولو اننا بنحترم وجهة النظر بس السودان اتحرم من جوهزة الغنا تخريمة : يا فتح الرحمن انت قايلني بفهم ليك جنس نضم ناس كرم الله ده :):)
[يا قيقا قول للفاروق دا والله الزول دا عنقالي أباً عن جد، معتمدين علي سمع الاضان دا بس، وبالله خلينا نشرع في تكوين رابطة الناقدين الفنيين العنقالة. أكيد بكرة دي حنسمع عن كيانات مختلفة للعنقالة، رابطة الرياضيين العنقالة، قدامي اللاعبين، الادباء، الشعراء.. إلخ. أصلو السودانيين يحبُّو الكوبي آند بيست زي عيونهم.:D طبعاً لا يفوت عليكم إنو رابطة الناقدين الفنيين العنقالة دي ما حتكون الأولي من نوعها، لأنو قبليها في السياسيين العنقالة، الفرق إضافة لعدم الاعلان عنها، إنو السياسيين عنقالة ولا يدرون أنهم عنقالة.
شكراً يا فاروق علي المؤازرة والاشادة الليها قيمتها كونها من زول أُشتُهر بالشناف.
Quote: عن نفسي أجد عافية حسن هي تاني أفضل صوت نسائي بعد صوت ملاك الأمين المعتزلة مبكرا للغناء ومن بعدها ظهرت عافية وبرضو إعتزلت مبكراً
Quote: !! بالنسبه لي بتنا ملاك اللمين مافي ولا كلمه ايوه الاولى
ياخى نحنا دائماً مفجوعين فى اصواتنا النسائيه الجميله ، قبلهن فجعنا فى حنان النيل عبقريه الغناء السودانى بالاضافه لملاك الامين كانت فى بت مذهله ومن نفس دفعه ناس ملاك الامين اسمها رجاء عوض الكريم من ولايه نهر النيل ياخى دى فقد لا يعوض ، اتمنى انو يكون فى زول متذكرها
----- ما زلت شايف بوتنشيال جميلة في فاطمة .. ينقصها فقط شوية تدريب .. هي صوت واحساس عميق لن يتكرر والافضل انها تسعى لتحقيق اصالتها .. بالرهان على الجماهير .. لا الارتهان للهوامير وتكون نفسها فقط .. لا غير
يا ( حفي) كان صبرته كنت بجيك من غير نديهة للضمان الرشيد بتاع سودانيات دا زولنا تب زي ما قال الفاروق و للضمان اكتر فاطمة عمر بدت خطاوي الدقسه طالما حتمشي وراء المك و الحلنقي .
----------------- ( التخليل) النقدي صراحة بطلع الزول من ( شهوة الكتابة) لشهوات المشاركة الواسعة و انت زول ( شفيف و باذخ) و اهو بسم الله ما شاء الله.
القصة البهناك و الله كل يوم بديها طلة و متاكد انو صاحبنا لابد لي بالطوالة هههههه
08-22-2013, 00:22 AM
Imad Khalifa Imad Khalifa
تاريخ التسجيل: 11-26-2004
مجموع المشاركات: 4394
يا نابري.. عارف مش الناس انشدهت مع يا حنين زي عش العصفور وبقت تقارن؟ اسمع البت المجرمة عافية دي وهي بتغني بحسب ليك في الايام عشان ترجع تعود قواام حبيبي الدنيا دار فرقة وما معروفة لي قدام.. ياخ الكارثة دي بتشتغل فيها بي رقبتا وعيونا واصابعا شغل اجمممل من صوتا زاتو.. اما الاهااات البتمرقا فدي قصة تانية.. عافية علي اخر عهدي بي متابعة اخبارا زمان انو كان خطبا زول من جماعة التمكين وقال ليها الغنا حرام..والله اعلم..
08-24-2013, 11:16 AM
طلحة عبدالله طلحة عبدالله
تاريخ التسجيل: 09-14-2007
مجموع المشاركات: 18023
ههههههههههههه أطرف ما في البوست دا انو ( الناقد لو كره الكارهون ) عمر الفاروق شغال اعجاب ومديح في حركات فاطمة وعافية حسن أصابع وإحساس وتفاعل مع الجمهور ...الخ الخ .. وهو بالضبط ما كان وما زال يستنكره ويبدي امتعاضه بسببه من الأميرة نانسي عجاج .. فاطمة غنايا غنايا ما في شك وهي أيضا معجبة بالأميرة نانسي عجاج والدليل أنها قلدتها في عدد من حركاتها زي ( نسمع ) القالتها للجمهور أثناء إحدي أغنياتها كما سمعتها يوم العيد .. التحية لفاطمة وعافية وقبلهما أميرة الغناء الستاتي (دون منازعة) نانسي عجاج .
Quote: خطبا زول من جماعة التمكين وقال ليها الغنا حرام..والله اعلم..
وبعد ما كتبت لي مداخلة أسود ما يكون من النوع اللي بقولوا بعدو العفو والعافية.... في الزول بتاع التمكين دا...إستغفرت ربي ثلاث..وتؤضأت ونقعت رأسي بماء بارد وإتهرمنت بصوتي النشاذ بعافية ومعها.... فــالحمد لله الذي لا يحمّد على مكروه سواه عدّت الحالة بسلام وسلام لعافية حتى مطلّع الفجر. أزهري محمد على زي اللي فصل الكلام القالو تحت دا علي عافية :- بينا الاغانى الهابطة والصوت النشاذ مفطومة من لبن النغم وبينا انجذاب الغنية للحن الخلود وانفتاح الذات على الذات والشهود وجع المسافة الواقعه بين نون والقلم والبينا ياصاحب نعم احراش وغابات من حريق بينا المتاهات تنفتح وتنصره ذى شهقة غريق بيناتنا شبق الروده لركة فراش يمتصه من روحها الرحيق القاك وافيق وانده عليك يارفيق الخطوة لو عزا الرفيق يابشوش العشرة والحس الرشيق ضيق المتاهات اتسع ماخلا لا عدو لا صديق وشوف كل حاجه مشت معاك ودخلنا ياداب فى الغريق ـــــ و...سلام زيّ بتاع عافية دا ليكم .
ليه ما عارف عندي زي احساس كدا انكم ما ح تصدقوني؟ :) لكن انصحكم .. صدقوا او لا تصدقوا الحكوة الجاية دي .. عهدتي فيما سأنسبه لنفسي (فغط) لا غير .. وباقي العهدة على الراوي همسلف
سراج والشيخ الرفاعي زملاء عمل سودانيين .. محمود من اريتريا الشقيقة.. لقيت الشيخ بملي في سراج (لو عايز تسيبنا .. ) والاخير بكتب انا جيت بالضبط في دي ("يا عايش في دنيا من اوهام خيالك") وكان محمود استخدما مع زميلنا الهندي .. الفاكيها في روحو .. وبعدين جا سؤالو للشيخ عنها .. الاستعان بسراج
انا -كزول مصاب بالبرانوايا- كنت مفتكرم بتchـمـchرو فيني بالبوست دا .. (جوز اللوز دا متابع لصيق لسودانين على خط الشناف دط كوم تراب دا) سمعتها لسراج من جوالي مباشرة .. وبصوت فاطمة -نفس حفلة سبارك سيتي- وهو بدورو ختفا واداها لمحمود (الاريتري) في ي ي ي يدو ..
انقروا سبب القصة دي كووولها شنو!؟
انو محمود سمع الاغنية دي -ولفاطمة تحديداً- في تلفزيون اريتريا امس .. وسره ما راى .. وسمع
[انتيييييييييييي مبدعة .. يا سمع وشوف] او كما قال الحوت
----------
الجبشي سألوهو فنانك المفضل منو؟ قال : إبراهيم وردي قالو ليو: اسمو محمد وردي دون ان يرف له جفن: بالله هو غير اسمو!؟
مراحب يا عمدة وعمر وامير الظلام .. يا سوفي ناب كدي افرد البروفة بتاعة عافة واحمد المك .. وشوف ليك جنس جليط من عافية!
يعني إنت والمك والحلنقي شغالين في ترحيل أغنية (ياحنين) من عافية حسن لفاطمة السمحة؟! ياخي كان أفضل تعلموا فاطمة أن تحترم حق عافية حسن في تقديم هذه الأغنية ومساهمتها الواضحة في تشذيب لحن (المك) والله عافية دي ترجع بكرة للغناء، تخلي واقعكم أكتر من واقفكم! اللهم قد بلغت فاشهد
بعدين الناس في شنو والحسانية في شنو! .
08-25-2013, 01:34 PM
saidahmed shami saidahmed shami
تاريخ التسجيل: 01-08-2013
مجموع المشاركات: 2348
Quote: ودي برضك تكسب عافية وعلى جميع المشاركين. أها جيب البعدو!!!
بعدو شنو يا عمك؟ ليس بعد الكفر ذنب .. السويتو فوق دا تجديف عدييييل كدي!! استصحب عزيزي القارئ انو من ضمن [المشاركين] ديل سميرة دنيا هارسلف .. على سن ورمح سميرة دنيا دي ما في زول بكسب عليها الا الماستر همسلف .. حسن عطية واقفل الباب والله صحي
زمن كان شايلنا الشباب، ومتاوقين الكتاب .. كنا ساكنين* الديم، تلاتة .. وطالب ذات امسية علاء شنكل سألني: عندك ألف؟ افتكرتو مارق يجيب عشاء .. ناولتو الالف حيلتي وقعدت اباطي والنجم .. وبقيت راجي فتة دااااافية تدفينا في البرد العلينا دا .. بعد مساااافة .. صاحبك جاي تنقش تنقش .. يد ورا ويد قدام .. واليمن مطبوق على شي -حسب جوعتي ديك- قايلو بسكويت (بسكويت بي الف عديييل كدا .. TDK دا بسكويت وين في الاهل دا!؟).. وبقوة عين عجيبة سألني المسجل وين؟ - مسجل شنو يا زول .. اسي شريطك الجايبو دا نحشي سندوتشات ول ناكلو فتة!؟ - يا زول انا ما مرقت اجيب عشاء .. دا شريط سميرة دنيا ياخي! ؤ ورجغ كتيرررررررررة ما فرزت منها اي ي ي شي بالجوعة العلي ديك!!
تيبكال!!
الشيوعيين ديل يقعدوا يرطنوا ليك ثقافة وفلسفة غميسة .. وانت بطنك تفوفي!! وما مثقفين في البايلوجي كلو كلو .. ما عارفين الجعان -خصوصاً الحاري، وقديماً قيل الحاري ولا المتعشي- ما عارفين بطنو دي بتقعد تفرز انزيمات بتخلي زيو وزي الخروف واااحد .. ما بقدر يفهم ليكم درابكم دا لاكين هو؟
المهم يا سيد الامانتي ليك .. بعد اتعشيت لقيت ليك كلامو صاح في سميرة دنيا .. ومن ديك ما لاقاني البلحقا والله صحي
-----------
ابو السيوف مرحب بيك في ساحة سبق الحمير دي .. الواقع -جوة البورد وبرة- بذيئ جداً .. مفلس .. ممكن تعتبرو احتجاج دا المافي شنو!؟
سمش الدين يا شامي نور الله عليك ياخي
* صراحة ما عارف الكان مسكني مع العرب ديل شنو وانا تربية المدن .. دي مجازفة بتاريخي الحضاري كانت
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
BALLAH EL BAKRY
Maawya Hussein
Imad Khalifa
عمر الفاروق
معاوية الزبير
مرتضى احمد عبد القادر
Haydar Badawi Sadig
سامى عبد المطلب
سفيان بشير نابرى
طلحة عبدالله
saidahmed shami
فيس بوك
تويتر
انستقرام
يوتيوب
بنتيريست