بالجد .. أطفال يحيروا ....
أكتب لكم اليوم لاحكي لكم عن طفلي معاذ ....والبالغ من العمر إثني عشر ربيعاً .... داخل على أولى متوسط ..... لاحظت فيهو أشياء غريبه بحق .... الزول ده فيهو روح بتاعة نكته عجيبه .... ورده تحت لسانو .... لو ما بخاف الكدب أقول رباطابي عديل .....مثلاً مره بعد أن رجعت من العمل حاولت استريح بعد صلاة العصر ...وهو عندو نيه أوديهو الحديقه ... جه يصحيني عملت رايح ..... بابا .... بابا .... ولا هببت ليهو..... وأخيراً يربت على خدي اليمين فالتفت يساراً .... ثم يميناً ..... وعندما تعب .مني قال ... شوف يا بوي ما تعمل لي زي الجوال الفي الصامت ..... فغلبني الصحك وصحيت .... ومره زريتو ليك زرة كلــــــب في طاحونه ..... ما عارف هو عمل شنو ... قلت ليهو .. شوف يا معاذ ... أنا الليله عايز النجيضه بس .... النيه ما بدورها ..... الجيضه بس بتاعة عمك ود الصايم ديك ..... أديني النجيضه بس .... فوقف برهة يتأملني في حيرة ثم قال .... شنو ياحاج شبكتني النجيضه والنيّه ... أصلك بتشوي ليك في شيّه ..... فانفجرت ضاحكاً ...ونسيت موضوع العقاب ..... كأمثاله من الصغار أجده يفوقني كثيراً في عالم الالكترونيات .... والهواتف الحديثه .... والكمبيوتر وما إلى ذلك ..... ودائماً ما ألجاً إليه إذا ما واجهتني مشكلة ما فأجده يسارع في حلها .... مغرم حتى الثمالة في ألعــــــــــــاب ال play station وما إلى ذلك ..... وبالطبع هذا عادي جداً لمن هم في مثل سنه .....أصر على أن أعلمه السواقه ففعلت ... وهذا كله أراه عادياً .... ولكن ما استوقفني فيه حقيقة ... قبل كم يوم ماشين جمب محل بيع الكاسيت قال لي أنا عايزك تشتري ي شريط لي طه سليمان ... وآخر للنور الجيلاني ... ففعلت .... قال لي أنا اشتريت طه سليمان عشان في أغنيه عاجبــــاني بيقول فيها (لمه الدنيا تقسى علي ...بشيل صورتك وأناجيها) .... استمعت للأغنية فوجدتها غاية في الرصانة وكلمات في منتهى الجمال ولحن وأداء أكثر من رائع .... فأكبرت ذلك ف هذا الصغير ... ومضيت معه في النقاش ... قلت ليهو تاني بتحب منو من الفنانين يا معاذ .... قال لي محمد وردي وأكتر حاجه بتكيف ليها ... يا بلدي يا حبوب .... والاغنيه البيقول فيها ...بالله يا طير قبل ما تشرب تمر على بيت صغير .... بالجد ذهلت ... طيب وتاني منو يا حبيبي ... قال لي نانسي عجاج وأختها نهى ...نانسي دي حاجه ما تخلص .... خاصة في بلدا هيلي أنا ...ويا زمن .... هي ذاتها زوله جميله يا بابا .... وشكلها مريح .... قلت ليهو جميل ...طيب النور الجيلاني .... فأجابني ... أولاً خواطر فيل .... قلت طبيعي فهي أغنية للصغار وقد عشقها كل الصغار .... طيب وتاني يا بابا ... قال لي الغنيه البيقول فيها : الغنيه حزينه ...حزينه ....مليانه محنه بغنيها .... القالها في صحبو المات في الحادث .... وكنت قد ذكرت له القصة منذ أمد ليس بالقريب .... والله يابا أنا لم أسمعها لامن أدمع .... بحس بيها هنا ...وأشار إلي صدره ..... فقلت له ما شاء الله عليك يا ولدي ... الله يحفظك ويرعاك ..... أكيد أحبائي .. في أغلب بيوتنا نماذج لاطفال مثل معاذ هذا .... يستحقون منا القليل من الاهتمام والرعاية ... عسى أن يكونوا في المستقبل شيئاً ما .... فعلى ما أظن أن الرعاية الحقيقية يجب أن تبدأ من المنزل ...وعلينا أن ننمي في صغارنا الملكات الجميلة ونمدهم بكل ما من شأنه تطوير هذه الملكات سواء بالكتب أو الشرائط فكم من الصغار كان يمكن أن يكون شيئاً ما ضاع نتيجة الاهمال وعدم الرعاية .... بالنسبة لمعاذ لن أبالغ وأقول أنه من الأفذاذ في المستوى الدراسي .. أبداً مستواه عادي جداً ... أي فوق المتوسط .... ولكن لدي رجاء لكل من يمر من هنا أن يقول ما شاء الله ويدعو لصغيري هذا بأن يحفظه الله ويرعاه ..... حفظ الله فلذات أكبادنا جميعاً .... وجعلهم منارات للمستقبل الواعد الجميل .... وفي انتظار مساهماتكم بسرد الكثير من هذه النماذج المبشره .... وأرجو ألا يبخل المختصين علينا بالنصح اللازم في مثل هذه الحالات .... مع خالص حبي الذي تعرفون ؛؛؛؛؛

[رد على الموضوع] صفحة 1 „‰ 1: << 1 >>

احدث عناوين سودانيز اون لاين الان

اراء حرة و مقالات	Latest Posts in English Forum
Articles and Views	اخر المواضيع فى المنبر العام
News and Press Releases	اخبار و بيانات

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة

About Us
Contact Us
About Sudanese Online

اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين

News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums

If you're looking to submit News,Video,a Press Release or or Article please feel free to send it to [email protected]