|
|
 بورادبي تـــــافه..كضاب..مبهـــدل..دمّو تقيل..!!!
|
الملاحظ إنو معظم البورداب تنقلوا من مدن لي مدن ومن بلاد لي بلاد وفي معظمها يلتقي البوردابي الزائر ببورداب المنطقة المعنية ..أو يلتقي بورداب المنطقة الواحدة مع بعضهم البعض ..
أها بعد الملاقاة دي بيجو الناس يكتبو إنطباعتهم عن الضيف البوردابي ده ..
مااا حصل بالغلط كده جو بورداب كتبو عن زول إنو هذا الشخص زول كرور ..زول ضااارب.. زول غير محترم .. زول ما أرباب .. زول وهم ..
كل وكككل الملتقيات اللي بتتم بعدها بتجي تتكتب عبارات ملائكية وأوصاف ساحرة وكلامات جميييلة تروي وتتحدث عن كرم فلان وذوق فلان ورقي هذا الفلان ..إضافة لي العبارة الشهيرة :
والله ياخ الزول ده برة المنبر أصصصلو ما زي جوة المنبر..إنت يا هناي مالك طييب في المنبر شكّااال وبايخ كده ؟؟
طيب يا جماعة معناها نحن عايشين في المدينة الفاضلة بس..ومعناها نحن وبما إنو وصلت بنا الفكّة أن نقول سودانيز يمثل المجتمع السوداني معناها الشعب السوداني ده كلللو راائع وذوق و راقي ...
طيب ليي بنبز بعض إنو ما بنعرف نلبس؟؟
ليي بنقول لي بعض في الغربة أوووعك تسكن جمب سوداني؟؟
ليي بنقول للزول أووعك تتعامل مع ميكانيكي سوداني ؟؟ وأووعك تشتري من سوداني؟؟
يعني انا مثلاً أقر وأعترف إنو اخونا اساسي في الطبيعة أسوأ بكتيير من اساسي بتاع سودانيز ..
نفس الحال بينطبق على حميدة ..
والغريبة نفس الإحساس ده جاهم لمن قابلوني أول مرة .قالوا لي إنت في النت أحسن كتيير من الحقيقة .. وإني زول ضااارب ..
وصراحة عجبني رأيهم ورييحني في كنكوجي لأنو كان رأي ما فيهو غتغتة
وعن نفسي ناس من القابلتهم في الطبيعة من بورداب سودانيز أسوأ من الصورة اللي راسمنها عنهم في البورد ورغماً عن كده بلاقي الناس بتجي تكتب عنهم درر لمممن الزول سيد الشي زاااتو يتهجم ..
..
الأخوة الأعزاء هي دعوة مفتوحة لقول الحقيقة وترك إنطباعك السلبي عن كل بوردابي إلتقيته بعيداً عن الرياء الإجتماعي ..حتى ينصلح حال المجتمع السوداني فسودانيز أون لاين هي المجتمع السوداني المصغر أو هكذا إنتشرت وسرت الوهمة في نفوس الاعضاء..
تخريمة :
النصيييحة حسين ملاسي من البورداب اللو لاقيتو برة أحسن من ملاسي عضو المنبر.. لكن أساسي وحميدة ووليد ؟؟؟ بري منكم يا يمة :):):)
|
|
  
|
|
|
|
|
|
|
|
Re: بورادبي تـــــافه..كضاب..مبهـــدل..دمّو تقيل..!!! (Re: عمر الفاروق)
|
Quote: يعني انا مثلاً أقر وأعترف إنو اخونا اساسي في الطبيعة أسوأ بكتيير من اساسي بتاع سودانيز ..
نفس الحال بينطبق على حميدة ..
والغريبة نفس الإحساس ده جاهم لمن قابلوني أول مرة .قالوا لي إنت في النت أحسن كتيير من الحقيقة .. وإني زول ضااارب ..
وصراحة عجبني رأيهم ورييحني في كنكوجي لأنو كان رأي ما فيهو غتغتة
وعن نفسي ناس من القابلتهم في الطبيعة من بورداب سودانيز أسوأ من الصورة اللي راسمنها عنهم في البورد ورغماً عن كده بلاقي الناس بتجي تكتب عنهم درر لمممن الزول سيد الشي زاااتو يتهجم .. |
.
| |
|
|
|
|
|
|
|
|
|
Re: بورادبي تـــــافه..كضاب..مبهـــدل..دمّو تقيل..!!! (Re: طه جعفر)
|
كل سنة وانت طيب يا صاحب صحبي وليد المبارك
المشكلة ما في انو الزول دا عندو شخصيتين .. المشكلة اننا ما بنعرف نتحاور من أجل معرفة
بنعتبر منتديات الحوار ساحة حرب لا بد من الانتصار فيها بأي طريقة لانو السوداني بطبعوا عارف كل شئ واي شئ
يعني اعمل مسح بسيط وارجع خمس سنوات وشوف منو القال للتاني ياخي في النقطة دي انا كنت غلطان ووجهة نظرك هي الصحيحة
عند السوداني عيب انو يطلع ما عارف ودا قد يكون راجع لمنهج كامل ومتكامل اتربينا عليهو او درسونا ليهو وما قادرين نتخلص منو
ياخي نحن بنعتبر الدكتور بليد وما بعرف حاجة لو قدر الله فتح المرجع قدامي عشان بس يتأكد من توصيف دواء للمريض..
ولانو راس الدكتور دا ما كمبيوتر النتيجة انو يمكن يكتب لي اسم دواء غلط عشان هو برضو خايف يقولوا ليهو بليد
و هنا مجرد دخولنا المنبر بنعتبر انو القلم (الكي بورد) عبارة عن سيف لجندلة الاعداء وهزيمتهم وبي كدا اصلوا ما بديك فرصة تقنعني وهاك يا شتائم
والشتيمة بتبدا من حتة صغيرة مثلا الطرف الاخر اورد معلومة خاطئة علي طول يكون ردي باختياركلمة انت كضاب بدل (معلومتك غير صحيحة) وبي كدا باب الحوار اتفقل من قولة تيت .. والباقي تمو خيال يا عمر
| |
|
|
|
|
|
|
|
|
|
Re: بورادبي تـــــافه..كضاب..مبهـــدل..دمّو تقيل..!!! (Re: اساسي)
|
وانا قبل ما ابدا (الخوض) في البوست دا , بقترح لو في ود حلال وبيعزني يجي يثبتني عما هو آت , فلو بديت اكتب رؤاي وانطباعاتي عن البورداب القابلتهم بكل تجرد وصراحة , غالبا حافسد علاقات اجتماعية وانسانية لاكثر من عشرة اعوام خلون .
ود حلال يا اخوانا يتحرك
خد مثلا يا عمر
يا خدر الشين تعال هاك الشمار دا
Quote: واخيرا التقيت (دكين) جزافا ؟؟
اتصدق انه ( طلع زول ساكت )
وان ( الهيلمانة) التي وجدها مني ومنك لم يكن ليجدها طيلة عمره الفاني
ان الاسماء الحركية في هذه المنتديات تفعل بالشخصيات الافاعيل..؟
الان عرفت لماذا لم يستجب لتلك الندآءات كلها ... فالرجل خامل السيرة والذكر
ولا اظن ان احدا يعيره انتباها لو وجده سوانا ( ما اسذجنا من مغفلين) ..!!
دكين ... رجل يترسل الي الدكان ( عادي) و ( يحلف ) الضيوف وليته يقسم عليهم طلاقا ..؟
يتحدث وصوته يعلو ويهدأ وفيه (غنه) كما اسلفت في احد البوستات تجعل منه مقرئا لو شاء
من كان يظن ان دكين الذي شغل المنبر ردحا من الزمان تستغرقه الان مجاملات الدناقلة ..
والتي ما ظننت انها ستخلص يوما ( ولله الحمد) فاستغراقه فيها يجعله ينال وضعه الطبيعي
والطليعي في تلك المجاملات وتلك المراسيل ... سوي انه كتب لي بالفحم علي باب غرفة
الفندق ... حضرت ولم اجدك ..دكين ..وسواها لم يشابه دكينا ابدا ولو لم يفعلها لانكرته
|
| |
|
|
|
|
|
|
|
|
|
Re: بورادبي تـــــافه..كضاب..مبهـــدل..دمّو تقيل..!!! (Re: عمر الفاروق)
|
سلامات فاروقنا وعيدك مبارك
أعاده الله عليكم بالخير والبركات
لا حولااااا
ياخي دا اتساق مع النفس لمن غلط
تصوير حقيقي ودقيق لواقعنا
أعجبني مثل هذا الاتساق عند صديقي العزيز ( أ )
( أ ) هذا رجل فيه صفة الصدق مع النفس ومع الآخر
ولأن الكمال لله فهو رجل لم يستطع أن يُلجم أمّارته بالسوء عن احتساء الخمر
والشهادة لله فهو يكون أبدع ما يمكن وهو ( منعنش ) ..... ولا تقترب منه الثقالة وهو صاحياً
قال ذات يوم أن ما يحيره في أمر المقابلات التي تجرى في تلفزيونات السودان أن كل المستضافين يأتون للبرامج ليقولوا أنهم قد نشأوا في بيوت صوفية وأن القرآن الكريم والمدائح النبوية الشريفة هي قد كانت غذائهم الروحي منذ نشأتهم الأولى وأنه ( يطرشه ويعميه ) أن يكون قد رأى أو سمع أن أحدهم قد جاء ليقول أنه قد وجد خمراً في بيته
لذلك فإن ما يحيّر صديقنا هو أن أين تذهب تلك ( القدور ) المشدودة ( عرقي بلح ) أو أين تذهب تلك ( المرايس ) التي تذخر بها ( الأنادي ) التي تكاد تكون موجودة في كل مدن وقرى السودان ؟
وشك في أمر نفسه أصحيح أنه وحده من ( يطفح ) كل تلك القدور؟
________________________________
ياخي مش ممكن الجماعة ( الكضابين والمبهدلين والدمهم تقيل ) ما قاعدين يلاقوا بقية البورداب ؟
| |
|
|
|
|
|
|
|
|
|
Re: بورادبي تـــــافه..كضاب..مبهـــدل..دمّو تقيل..!!! (Re: عاطف عمر)
|
والغريبة الواحد هنا يعمل السبعه وزمتها
ولما الناس تلومو يقولو ليييك ياخى انت ما شفتو بره وما لاقيتو - فيس تو فيس
طيب نعرف الحقيقه كيف ؟
العارفو انا ..... الزول مع الناس ممكن يتجمل ... لكن خلف الكيبورد صعب يتجمل ... وخصوصا وقت - الكعه والغبار القايم
بظهر على حقيقتو تماما ... اما المجاملات فى اللقاءات .. فما بتعكس الحقيقه
| |
|
|
|
|
|
|
|
|
|
Re: بورادبي تـــــافه..كضاب..مبهـــدل..دمّو تقيل..!!! (Re: وضاح عبدالرحمن جابر)
|
صراحة يا عمر الفاروغ انت رجل شرير وبتاع مشاكل جد ولا اخفيك سرا ان قلت انا معجب بهذا يعني لايك كبير طبعا في بالي منبر الشكلة الذي افتعلته في رمضان من العدم مع الفنان حمزة سليمان ..
بسبب انك تحاول ان تضع لافتعال المشاكل في المنبر منهجا جديدا لتخرج بها من طور حقارين زمان من نوع ( بتعاين لي مالك ؟؟ بعاين ليك .. بجي بقدد ليك عيونك ديل .. تعال كان راجل ) هكذا بما انه المنبر لا يتيح مثل تلك المعاينات .. فها انت بديت تخط المنهج الذي يتناسب مع المعطيات المتاحة ..
لكن قبل ما الشكلة تسخن خت لينا منهج في الاول للحجازين وللشهود ايضا يتناسب مع هذه المعطيات المتاحة ..
يمكن العملية تتطور وتعمل حزب الشكلة السوداني القومي
ونكون فيه اعضاء بدل ما نكون رماديين ولافين ساكت في الدنيا دي
| |
|
|
|
|
|
|
|
|
|
Re: بورادبي تـــــافه..كضاب..مبهـــدل..دمّو تقيل..!!! (Re: وضاح عبدالرحمن جابر)
|
عيد سعيد
والله يا عمر الفاروق أنا مرة فاتح البورد في البوست الطويل بتاع حمزة دا فجأة لقيت واحد واقف في رأسي ولحظتها صورتك كانت ظاهرة
قال لي سلااام ياخ بتعرف عمر دا؟
قلت ليهو معرفة الهواء دا بس
قال لي ياخ عمر الفاروق دا زول لطييف جدا ياخ ومجامل للحد البعيد
غايتو أنا النصيحة بين مصدق ومكذب
مكذب دي جابتا حكاية مجامل جدا دي لما أقارن بالمنبر
| |
|
|
|
|
|
|
|
|
|
Re: بورادبي تـــــافه..كضاب..مبهـــدل..دمّو تقيل..!!! (Re: Balla Musa)
|
سلام يا عمر
انا شفتك مره واحد فى اجتماع لما يسمى بورضاب الرياض
والطمم بطني اني شفتا ود البوقه فى نفس الاجتماع المشئوم داك
ما كان عندي انطباع كعب المهم زول والسلام
ذي لما تشوف ليك واحد فى زحمة المولد
| Quote: بعدين ما مشيت بعيد من كلام خضر القال عنا ( خروف مشك ) |
لا يا اساسي ملاسي مشى بعيد جداً , حيث الفرق واضح بين الحمل وخروف المشك طال عمرك
دا حمل ملاسي على حسب وصفو
ودا خروف المشك
مافي علاقه ... مش ؟
ملاسى اداك بالحته المافيها حديده ... لكن شديده
| |
|
|
|
|
|
|
|
|
|
Re: بورادبي تـــــافه..كضاب..مبهـــدل..دمّو تقيل..!!! (Re: خضر الطيب)
|
بسم الله الرحمن الرحيم
عمر الفاروق
والله دا بوست بى عجاجتو من بدايتو
الله يستر ..
غايتو من البورد دا انا قابلت شخصين العام 2004
احدهم اساسى .. واقوم اقول ليك زول ما فيهو كلام
واخو اخوان ووديع تقوم ترشنى .. لكن الصراحة طالما البوست
بوست صراحة حرررم اساسى ما فيهو قول حسب
تقيمى ليهو فى الواقع ..
التانى عمنا قرشو الله يديهو الصحة والعافية وبرضو
خاتيهو القول والله ...
احوال البوست غداً :
سماء ملبده بالغيوم .. وسحب رعديه ممطره
ارتيقا
| |
|
|
|
|
|
|
|
|
|
Re: بورادبي تـــــافه..كضاب..مبهـــدل..دمّو تقيل..!!! (Re: Artiga Gilani)
|
شمس الدين يا صاحب مباشرة..
المشكلة ما في الشخصتين المشكلة في التقييمات الحقت سويعات دي وتقوم تغلف بيها شخصية بني ادم كاااملة عمرها عشرات السنوات تحت غطاء ده الانطباع المرقت بيهو..
ملاقاة البورداب في مراحلها الاولي زييي مراحل الخطوبة.. الناس كلللها عاملة حلوة..
الغريبة في بورداب مننن قولة تيييت ومن اووول ملاقاة انطباعك بيكون عنو ظااااهر انو زول بتاع لولوة او مشاكل ورغما عن كده بتجي توصفو بالرائع الاستثنائي..
| |
|
|
|
|
|
|
|
|
|
Re: لماذا تكتب في سودانيز ? (Re: عمر الفاروق)
|
سلام اساسي وضيوفه
انا قاعد اقرا ليك بشكل راتب لأنو فيك قطامة محببة ,, والنصيحة عندك دبر معزاية
حمل وديع وصف معنوي زول طيبان
حمل مشك وصف جسدي يعني سمين , المشك هو نخاله المريسة من العيش
وكل سمين طيبان وظزيف ,, ده راي غايتو
هل الملاقاة خارج الاسافير يتسع لها الزمن ليفارق احدنا نفاقه الاجتماعي ,, لا اظن ,, لذا كل بوردابي لطيف ظريف لأنو داخل في الدور ده لترك انطباع جيد
كامل الود
| |
|
|
|
|
|
|
|
|
|
Re: لماذا تكتب في سودانيز ? (Re: عمر الفاروق)
|
عاطف يا عمر..
عيدك مبارك ياخ وربنا يجعلك من البورداب الممتازين المهذبين الرائعين قااادر يا كريم ..:)
| Quote: ياخي مش ممكن الجماعة ( الكضابين والمبهدلين والدمهم تقيل ) ما قاعدين يلاقوا بقية البورداب ؟ |
يا عاطف المشكلة في إنو هم بيلاقوووهم لكن للأسف البيطلعوا كضابين هم البورداب البيجو يقولوا الخبر بتاع الملاقاة واللي بيجو يوصفو ..
بعدين الغريب في الموضوع وصف ملاقاة البنات بيختلف عن وصف ملاقاة الأولاد ..
البوردابي لمن يلاقي بوردابية أصصصصلو ما بيجي يكتب ليك لاقيت ليكم الزولة الأجواد بت الكرام أخت الأخوان سمحة الأخلاق .. لالالالا بيجي يكتب ليك الليلة شوفت ليكم هناااي ..ياخ طلعت سمممحة سماحة موبااالغة ..
ويبدا يوصف فيها وفي سماحتا..
لكن لمن يلاقي ولد فطوالي بتتحول طريقة التوصيف لي الجوانب السلوكية ..
وعليه فملاقاة البت تنقل هنا بوصف الشكل ..ملاقاة الولد تنقل هنا بوصف السلوكيات ..
| |
|
|
|
|
|
|
|
|
|
Re: بورادبي تـــــافه..كضاب..مبهـــدل..دمّو تقيل..!!! (Re: عمر الفاروق)
|
صاحب البوست سلام
لا ادري هل مقابلة واحدة مع شخص تعطينا الحق في اصدار الحكم عليه سلبا او ايجابا؟؟؟
تحضرني قصة عمر بن الخطاب رضي الله عنه لما جاهو واحد وشكر (بتشديد الكاف) ليهو زول تاني فسيدنا عمر سأله هل سافرت معه ؟؟اكلت معاهو؟؟ اتعاملت معاهو بالدرهم والدينار (بيزنس)؟؟؟
المهم الزول كل مرة يقول لا مع كل سؤال
فسيدنا عمر قال ليهو انت ما بتعرفه ( معني الكلام)
يعني الشغلانة ما مقابلة واحدة و انطباع
فعندنا زملاء دراسة لسنين اول ما دخلنا معاهم في البيزنس ظهروا على حقيقتهم
بالمناسبة انا لي في السعودية 8سنين واتنقلت بين عدة مناطق وكل عمارة اسكن فيها كل السكان سودانيين وما شتكيت من واحد ولا واحد اشتكى مني ..والى الان عمارتنا اربعة شقق كلهم سودانييين وزي العسل ...الموضوع كنترول
| |
|
|
|
|
|
|
|
|
|
Re: بورادبي تـــــافه..كضاب..مبهـــدل..دمّو تقيل..!!! (Re: نوفل عبد الرحيم حسن)
|
واحد من الاخوة الاكارم لاقيتو اخيراً بالصدفة، وهو من دفعة الفين واتنين في الموقع، حكى لي قصة اجتهد فيها غاية الاجتهاد فيما يبدو لكي يثبت لي أنه من مبتدعي فكرة "لقاء البورداب"! الأخ لم يكن يعلم أن العبدلله هو من أشد مناهضي بدعة "لقاء البورداب" من الأساس، والتي يجد بعضنا نفسه في خضمها طوعاً أو كرهاً في أحيان كثيرة! ليس لأنها ذات جو نفاقي فقط، ولكن لأسباب تتعلق ربما بفصيلة الزواحف التي انتمي لها!
رغم ذلك لولا لقاء "البورضاب" لما تكشفت لنا الكثير من الحقائق! صحيح أن الابتعاد يحفظ الصورة الجميلة (أو القميئة كما تشتهي) الا أن الإدعاء والتعاظم والتعملق الذي تسهله الأسافير ذا البعد الواحد الذي يوجد ترجمة ذاتية لا وجود لها خارجياً، فيحتاج الأمر في بعض الأحايين لفحص سريري وعن قرب حتى تضع الأشاخيص (جمع أشخاص : ) ) في ماعونهم وحللهم وفناجينهم. ولو تركنا مسألة الصداقات التي تكونت، نقول لولا أننا شعب يحب الشخصنة فنلجئ الى الانطباعات والاحتكاكات والتقييمات*! لولا ذلك لكنا أصحاب منتديات تتعامل مع بعضها بالفكر والأفكار عوضاً عن البحث عن ما نبحث عنه!
بمعنى آخر: زي نوع عمر الفاروق وأساسي ديل (اصدقاء فيس بوك) اخير ما تلاقيهم! 
| |
|
|
|
|
|
|
|
|
|
Re: بورادبي تـــــافه..كضاب..مبهـــدل..دمّو تقيل..!!! (Re: محمد يوسف الزين)
|
يا درديري ..ياااخ لااا حووولا لااا قولة ..:)
عملتو منهج عديييل ؟؟؟ ياخ هن كلللهن شجرتين يا قول النكتة بتاعت الراجل القالوا ليهو مرتك بالليل بتمشي الغابة مع راجل تاني :):)
أما فيما يخص شكلة حمزة ..( والله بقت زي قميص عثمان وشعرة معاوية :)..) فياخ الموضوع كان بسييط بس في ناس صدرها غير رحب:)..
بس زي ما قلت البورد حدراته كترت والحوجة للمطالعة خلف ذاك الوادي مرات بتكون وااجبة ..
تخريمة :
هاني يا عربي.. الفيديو ما شوفتو ..ما اشتغل معاي
| |
|
|
|
|
|
|
|
|
|
Re: بورادبي تـــــافه..كضاب..مبهـــدل..دمّو تقيل..!!! (Re: عمر الفاروق)
|
حمد لبد ..
| Quote: قال لي ياخ عمر الفاروق دا زول لطييف جدا ياخ ومجامل للحد البعيد |
أها أسة دي عليك الله ما بتنفع أضييفها في ال CV..؟
خصووصا قصة مجامل دي ..وهي إشارة واااضحة لي إني زول بطلع حفلات وما بشييل العداد ..
أما فيما يخص تصديقك وتكذيبك فليس تواضعاً لكن كذب كذب ساااي يا زول ..
مع إنو العلاقات الإنسانية دي انا مقتنع إنها حاجات نسبية وصعبة القياس وإن كان هنالك بعض الشخصيات للي بيكون عليها إجماع سواء بالسلب أو الإيجاب ..
لكن ما كل ما ينفع معاي بينفع معاك وما كل طيب عندك طيب عندي وما كل كريم معاك كريم معاي وهكذا ...
لكن نحن للأسف في البورد هنا عايزين نعمم التجربة ونجبر المتلقي لرسم شخصية لكل من نقابله من بورداب على أن يكون الشخص المؤدب الرايق العسل الظريف الأرباب ..
| |
|
|
|
|
|
|
|
|
|
Re: بورادبي تـــــافه..كضاب..مبهـــدل..دمّو تقيل..!!! (Re: Hussein Mallasi)
|
مثال بسيط تاني ..
انا من أنصار القلم بيزيل بلم ومن أنصار إنو التعليم ليهو أثر في تكوين الزول و عدم التعليم خصوصاً في المنتديات عندو أثار سلبية ..
أها أكاد أجزم إنو هنا في ناس من البورداب فاقد تربوي وأعني تمااماً الكلمة بمعناها التعليمي وليس بمعناها بتاع التربية والواحد فيهم حدو الإبتدائي ولو بالغ المتوسط لكن يتعايش مع وضع المنتدى على أساس إنو من جهابزة العلماء وممكن عااادي يحكي ليك عن تجربته في أركان النقاش ..
ومع إنو في ناس كتاااار بيكونو عارفنو الزول ده مااا قاري لكن لصحوبيتهم الإسفيرية ليهو بيجو يطبلو زيادة لأ وكمان ممكن عااادي يجو يحكو ليك عنو ذكريات وماضي لمن هو زاااتو يتخلع ..
| |
|
|
|
|
|
|
|
|
|
Re: بورادبي تـــــافه..كضاب..مبهـــدل..دمّو تقيل..!!! (Re: عمر الفاروق)
|
Quote: يا درديري ..ياااخ لااا حووولا لااا قولة ..:)
عملتو منهج عديييل ؟؟؟ ياخ هن كلللهن شجرتين يا قول النكتة بتاعت الراجل القالوا ليهو مرتك بالليل بتمشي الغابة مع راجل تاني :):)
أما فيما يخص شكلة حمزة ..( والله بقت زي قميص عثمان وشعرة معاوية :)..) فياخ الموضوع كان بسييط بس في ناس صدرها غير رحب:)..
بس زي ما قلت البورد حدراته كترت والحوجة للمطالعة خلف ذاك الوادي مرات بتكون وااجبة ..
تخريمة :
هاني يا عربي.. الفيديو ما شوفتو ..ما اشتغل معاي |
والله ما قايلك رديت علي لدرجة انه شكيت وعملت مراجعات قلت ما يكون الزول دا قاصدني عديييييل بالبوست دا .. وقعدت اتذكر في فطور بورداب الرياض هل انا قابلتك فعلا .. انا الحقيقة اتفاجأت بصورتك تئم المصلين في المنبر لكن ما شفتك في القاعة ...
انا قدصدي من المداخلة انك انسان استطاع ان يجعل من المشاكل شئ ممتع نوعا ما .. يعني زي جلد البطان في اعراس الجعليين ...
وعندك جرأه وصراحة تحير وتخوف .. ياخي في حاجة اسمها دوبلماسية ..
عايز تقول للاعور اعور في عينه قول لكن بطريقة دوبلماسية شوية ....كيف ؟ ما عارف لكن بتلقى ليها طريقة وانت زول صاحب حنك ..
| |
|
|
|
|
|
|
| |
عمر الفاروق
طه جعفر
Shams eldin Alsanosi
اساسي
Hussein Mallasi
عاطف عمر
ABUHUSSEIN
وضاح عبدالرحمن جابر
Hani Arabi Mohamed
حمد عبد الغفار عمر
Balla Musa
خضر الطيب
Artiga Gilani
عبدالحفيظ ابوسن
الخير محمد عوض
saidahmed shami
عفاف الصادق بابكر
أيمن محمود
حامد بدري
Mohamed Mekki
نوفل عبد الرحيم حسن
محمد يوسف الزين
فيس بوك
تويتر
انستقرام
يوتيوب
بنتيريست