كتب الكاتب الفاتح جبرا المتوفرة بمعرض الدوحة
|
Re: اغاني واغاني النسخة التاسعة 2013 (Re: حسبو عكاشة)
|
مداخلتي في الصفحة البيهناك اظن ما في زول لنتبه ليها .. ارجو سماع رايكم فيها :
Quote: حاجة تانية داير أقولا :
ارحموا طفولة أبناء محمود حاتم وحنين .. شنو يا خي في أي حفل تكريم او حلقة تلفزيونية جايبنهم وخاتينهم ديكور لاستدرار العطف ؟!
ارحموهم وأتركوهم لطفولتهم ولا تجعلوهم يعانون النقص مدى حياتهم بإصرار كل معدي برامج التلفزيون والمنتديات الثقافية على جلب واحضار حاتم وحنين فقط لأجلاسهم أمام الجمهور ليتفرج عليهم وهم في هذا السن مذهولين ذائقي الابصار وأكيد لم يعرفوا طعم الموت ويتدبروا في معانيه وعبره !!
دعوهم يعيشوا حياة طبيعية مثلهم وأقرانهم الذين فقدوا والدهم أو والدتهم في مثل هذا العمر بدلا من تركهم ديكورا وحائط مبكى للمشاهدين والعازفين يسترقون اليهم النظر ويشعرونهم بحوجتهم للشفقة والعطف ..!!
لا اريد أن اكون أكثر قسوة واقول لكم : أتركوا المتاجرة بهم ..!
ولكن أقول لكم ارحموهم يرحمكم الله .. |
| |
|
|
|
|
|
|
Re: اغاني واغاني النسخة التاسعة 2013 (Re: عبد اللطيف بكري أحمد)
|
برافو برافو برافو حلقة عشرة علي عشرة شغل جميل ومبدع
معتز نجض شغله الليلة ما شاء الله يبدو لي انو معتز برتاح يغني وهو واقف رجعت لمعظم اغانيه المتاحة في اليوتيوب لقيت انو بفضل يغني وهو واقف
نسرين مييييييية المية والله اداء جميل وفيهو عنصر المفاجأة المفتقدنو نحن ديا ... احمد المامون اتقطع عديل والله الليلة اتكيفت شديد جدا جدا من الحلقة دي
برافو والله يا شباب
| |
|
|
|
|
|
|
Re: اغاني واغاني النسخة التاسعة 2013 (Re: الخير محمد عوض)
|
علاقة الأستاذ كامل عبد الماجد بأحمد الجابري كانت أعمق من علاقة شاعر ومطرب أو هذا ما خيل لي وأنا ما زلت طفلا فقد كان الجابري عليه رحمة الله باستمرار في دارنا بصحبة خالي كامل عبد الماجد وكان علي الدوام بصحبة عوده ليسمعنا من صوته الشجي أعذب الألحان والتي ما زال صداها في أذني برغم مرور أكثر من 35 عاما علي ذلك الزمان ، ورغما عن رحيله المبكر فما زال الجابري هو الفنان المفضل للأستاذ كامل إضافة للراحلين الكبيرين خليل اسماعيل ومصطفي سيد احمد
| |
|
|
|
|
|
|
Re: اغاني واغاني النسخة التاسعة 2013 (Re: usama Babiker)
|
Quote: معتز صباحي لمن اغني زي الزول البياكل ليه في لحمة ولقاها حارة .... |
Quote: معتز صباحي لمن اغني زي الزول البياكل ليه في لحمة ولقاها حارة .... |
اسامة طبعا انت رباطابى والكلام دة من راسك وانت القيلوا انت ؟؟؟؟؟؟؟؟تصوم وتفطر على خير
| |
|
|
|
|
|
|
Re: اغاني واغاني النسخة التاسعة 2013 (Re: احمد التجانى احمد)
|
Quote: ارحموا طفولة أبناء محمود حاتم وحنين .. شنو يا خي في أي حفل تكريم او حلقة تلفزيونية جايبنهم وخاتينهم ديكور لاستدرار العطف ؟!
ارحموهم وأتركوهم لطفولتهم ولا تجعلوهم يعانون النقص مدى حياتهم بإصرار كل معدي برامج التلفزيون والمنتديات الثقافية على جلب واحضار حاتم وحنين فقط لأجلاسهم أمام الجمهور ليتفرج عليهم وهم في هذا السن مذهولين ذائقي الابصار وأكيد لم يعرفوا طعم الموت ويتدبروا في معانيه وعبره !!
دعوهم يعيشوا حياة طبيعية مثلهم وأقرانهم الذين فقدوا والدهم أو والدتهم في مثل هذا العمر بدلا من تركهم ديكورا وحائط مبكى للمشاهدين والعازفين يسترقون اليهم النظر ويشعرونهم بحوجتهم للشفقة والعطف ..!!
|
ياخي الناس دي حيرتنا صراحه اهم شي الاطفال تعيش عيشة طبيعية انا طبعا قريت كلامك من البدايه وكلام منطقي فعلا بس البقدر يتكلم مع الناس دي منو ويقول ليهم الكلام دا غلط
. . حلقة الجابري طبعا سمعتها باحساس اخر لان والدتي رحمة الله عليها كانت تملك صوت في قمة الجمال في اخر زياره لها للمملكة كانت تدندن بها وتحكي لنا عن اغاني زمان وحياة الجابري بحكم الجيره معهم ...
| |
|
|
|
|
|
|
Re: اغاني واغاني النسخة التاسعة 2013 (Re: يحي قباني)
|
أصحابي الحلوين ..
دون تفاصيل وإسهاب ، البيهمنا الأداء ومن خلال ما حضرتو من غنا حتى الآن فرفور، مأمون، ثم طه سليمان. البنات، فاطمة، زحل (ما عارف الإسم صاح واللا لا)..
(رأي شخصي) عن مصطفى السني، الضجة المُحدثة حوله أكبر منو كتير جداً يمكن يكون صوتو وإمكانياتو كويسة،،، ولكن ... آن له أن يخرج من جلباب أبوداؤود ، ويكون هو ... عشان نعرف نقول الزول ده ح يكون حاجة واللا لا ..
| |
|
|
|
|
|
|
Re: اغاني واغاني النسخة التاسعة 2013 (Re: Salah Abdulla)
|
حلقة متالقة ومتانقة وده فالس يامليجي ده .. تمام التمام
د. ياسر عبد القادر , طارق جبريل . Abuzar Omer , درديري كباشي . عبد اللطيف بكري أحمد وليد عبد اللطيف , ناذر والاستاذ الفحل , إبراهيم عبد الحليم واسامة , ودالعباسية , الخير , احمد واسامة بابكر وصالح حبابكم , وكلامكم شايفو غناء .. وما قصرتو تب , اغنية طيرت النوم من عيني , واول مرة اكتب صبح قبل البرازيلي الماهر الليندي ما يكتب شكلة الليلة موعودين بالعجب , ليندي , بت خيري والفاروق وبقية الاحباب المايك معاكم
شخص واحد يصنع فرق ضخم مافعلة وجود الشاعر كامل عبدالماجد!
واغنية واحدة تصنع طرب ضخم مافعلته هذه النسرين سوركتي برفقة اساطير الفرقة!
وسيد الاسم سيد الاسم وفى العيون ببنيليهو دارين من موده ومن منى ! ..
______________________________________________________ ليتهم يعلمون ان عمر اللحظـه في بعـدك يا خـرطـوم سنين طـوال د شهـاب الفاتح ـ كوالالمبـور
| |
|
|
|
|
|
|
Re: اغاني واغاني النسخة التاسعة 2013 (Re: شهاب الفاتح عثمان)
|
سلامامي للجميع في هذا البوست العامر
حقيقة لم أتمكن من مشاهدة البرنامج خلال الاربعة ايام الماضية بسبب انني مداوم في الفترة المسائية
اليوم شاهدت حلقة اغاني واغاني التي كان ضيفها الاستاذ الشاعر كامل عبدالماجد ..
حقيقة الحلقة جميلة ومتعة جدا .. من خلال السرد والانس الممتع مع صاحب سيد الاسم
صحيح هناك وجوه جديدة في البرنامج وتغييرات .. لكن ما أزعجني حقيقة الفنان معتز صباحي
الزول دا بعذب المايك عذاب شديد وبتسنج تشنج غريب جدا ما عارف الحاصل عليه شنو ومنو القال ليه غني بالطريقة دي
معتز صوتو كويس واي شي لكن تعامله مع المايك عامل مشكلة في الصوت وذي ما قالو الجماعة زي البكد ليه في عضم بقرة عجوز
بالاضافة لمظهره .. انا غايتو شايفوو لابس طرحة وأب تكة لونن أحمر .. :) ما خلا شي للبنات يلبسنو ..
مافي زول يقول لي اللبس حاجة شخصية لانو الفنان سخصية عامة ومظهره يقتدي به معجبينه .. خاصة ان نسبة مشاهدة البرنامج دا عالية جدا
مع ذلك فإن غياب عاصم البنا وشريف الفحيل اعاد الهدوء وهيبة البرنامج .. وفرفور ذاتو خلا العرض والسيوف ..
عموماً البرنامج برنامج جميل وسمح وافتكر انو للان محافظ على لونه وطعمه
لكم التحية جميعا ورمضان كريم
| |
|
|
|
|
|
|
Re: اغاني واغاني النسخة التاسعة 2013 (Re: حافظ انقابو)
|
كل الود وخالص التحايا للمشاركين والمتابعين للبوست حلقة اليوم كانت أجمل الحلقات وازددات بهاء باستضافة الشاعر ( كامل عبدالماجد ) الذى اعطى درساً في كيفية التوثيق والحديث عن الراحل ( الجابري ) ( كامل عبدالماجد ) من مواليد مدينة ( ودمدني ) في عام 1941 م وتخرج من جامعة الخرطوم 1965 م عرف كامل شاعراً وهو طالباً في جامعة الخرطوم لكنه لم يواصل كثيراً في كتابة الشعر نسبة لابتعاثة لبريطانيا التى مكث بها اربعة اعوام وانشغالة بالعمل ضابطاً أدراياً وعمل ايضاً مستشااراً لوزارة الشئون البلدية بالمملكة العربية السعودي وكامل عبدالماجد لو لم يكتب سوى ( سيد الاسم ) لكفاه ، كتب كامل أغنية ( سيد الاسم ) عام 1970 م وكتب أيضاً الأغنية المشكلة ( تائه الخصل ) التى لحنها وتغنى بها بها الموسيقار الراحل ( محمد وردي ) قبل أن يتم اعتقالة في يوليو 1971 م ليستولى عليها الفنان ( حمد الريح ) ويسجلها في الاذاعة اثناء وجود ( وردي بالمعتقل ) وكذلك كتب كامل اغنية ( الخضراء وزيتونة ) بعد أن كتب الشاعر ( اسحق الحلنقي ) أغنية ( لون المنقة ) التى لحنها ( بشير عباس ) وتغنوا بها ( البلابل ) وكانت أحتفاء باللون الاسمر أو الخضر كما نسميه ولحن هذه الأغنية وغناها الاستاذ ( ابوعركي البخيت )
| |
|
|
|
|
|
|
Re: اغاني واغاني النسخة التاسعة 2013 (Re: الليندي)
|
الأغنية الاولي في حلقة اليوم ( حبيبتي بستلطفا ) من كلمات ( عوض جبريل ) الذى تغني له الجابري بأكر من أغنية اشهرهم ( الشغل بالي انا بريدو - حبيبتي بستلطفا - اسمر يا اسمر - شغلني ما انشغل قلبو ) ادى ( مصطفى السني ) جزء منها ويبدو أنها فرضت عليه أو شارك بها من اجل المشاركة في الحلقة فقط فالأغنية لحنها راقص ودائرية وزمنها شوية يعني ما بخصم من الحلقة اكتر من دعاية ( ايمان النمري )
حبيبتي بستلطفا عود - الجابري بمشاركة العميري
،،،،،
| |
|
|
|
|
|
|
Re: اغاني واغاني النسخة التاسعة 2013 (Re: الليندي)
|
الأغنية الثانية ( بدون رسائل ) للشاعر ( سيف الدين الدسوقي ) الذى له الجبري بأغنية أخرى لم يرددها كثيراً ( كيف انساك ) ادي الأغنية الشاب ( احمد المأمون ) بشكل جميل واحمد يمتاك مساحات واسعة بين الحاد والغليظ وسيكون احد فرسان رهان البرنامج هذا العام
،،،
| |
|
|
|
|
|
|
Re: اغاني واغاني النسخة التاسعة 2013 (Re: حافظ انقابو)
|
معليش يا جماعة وقبل ما أدخل في الشتارة المعهودة عندي سؤال سغمبروتي طويلوني كده.. إنتو بتقولوا الحلقة دي كانت مبااالغة وخطييرة والحلقة دي كعبة والحلقة دي غايتو بناء على شنو ؟؟ هل بناء على الاداء حق الفنان؟؟ هل بناء على الاغنية المختارة؟؟ هل بناء على صوت المغني؟؟ هل بناء على موضوع الحلقة ؟؟ هل بناء على نوع الاغنيات؟؟ هل بناء على الاداء الموسيقي؟؟ طبعاً الاجابة النموذجية والكلنا بنحلم بيها لو إتلموا الحاجات ديل كلللهم في حلقة واحدة ..عااارف.. لكن الما بقدر أفهموا إنو مثلاً تقول في حلقة إنو معتز صباحي ما بيعرف يغني وفي الحلقة البعدها تقول إقتنعت بيهو .. أو مثلا مأمون صوتو خطيير وفي حلقة تانية تقول ما بطال .. قد نختلف في اداء مغني لي أغنية لكن ده ما بينفي تفرد وتمييز الفنان وعليه مفروض نكون دقيقين في تحليلنا للفنان هل النقد مبني على حلقة وأغنية ولا على الفنان ككل وبي طيلة فترته الغنائية .. انا قلت الكلام ده ليييي؟؟ لأنو شايف إحتفاء غير مبرر بي الحلقة دي ووصفها بأنها أكتر من رائعة !!! ولو جينا وجبنا التيرمومتر عشان نقيس بيهو الحلقة دي مقابل الحلقات الفاتت ما ح نلاقي إختلاف كبير بينهم .. في إعتقادي المتواضع والبسيط إنو الروعة كان عندها علاقة بي إستصحاب الناس لي أغنيات الجابري وفي نفس الوقت إستصحابهم للجابري في الحلقة دي ..مع إنو إختيار الاغاني ما كان موفق من جميع النواحي ف أغنية الرسائل أغنية مكررة ومعادة ..وأغنية سيد الإسم على روعتها إلا إنو تم غسناده لي صوت غير ملائم معاها تمااماً.. ومصطفى السني كلفتوهو وكلفت روحو وفرفور الدويتو معاها ما ظابط..وصباحي وفيييي البوست ده نزلوا ليكم أغنية البلوم ده في الصفحة التالتة ولا الرابعة ما عارف عشان يثبتوا ليكم بيها إنو زول فنان وكانت تسجيل في إسبارك سيتي وغناها صباحي افضل بي كتيير من التسجيل في الحلقة دي.. الأغرب والأعجب واللي بصراحة برضو يبدو إنو أكد شتارتي وخوفني من إنو أقول رأيي هو قصة إنو جمال ورونق الحلقة إزداد وربما كان السبب الرئيسي بإستضافة وتعليقات الشاعر كامل عبد الماجد!!! صراااحة وخصوووصا وتحديييدا في بداية الحلقة الأستاذ كامل عبد الماجد قال كلام مستهلك وكلام ما مرتب وما مفهوم وما واضح المعالم والفكرة ..كلام جاااايط انا ما طلعت منو بي شي.. وجا تماها بييي نفففس حركات السر قدور القالا عن كرومة وسرور في قصة الطالع والنازل لمن جا علّق على أغنية الرسائل.. صراااحة كده انا مرات بحس إنو الناس ديل بيدوهو كوز كوزين ويشطحوا في حاجات عادية جداً ويحملوها أكتر من ما تحتمل.. وقصة زي إنو الجابري يلحن ويبدا اغنياته في الهااادئ ولكن في اغنية الرسائل تحديييدا هاااج وغنا في العالي ولحنها بهذا الفهم لأنها مكتوبة لي زول بعيد ففي إعتقادي ده مجرد خيال وإجتهاد ما اظن عندو علاقة .. لأنو ببساااطة شدييييدة في كتييير من كوبليهات الأغنية دي الجابري كان بينزل في الواااطي وبيغني في الراااايق أكتر من أييي أغنية تانية غناها .. وفي أغاني تانية كتيييرة الجابري كورك فيها بيصوت أعلى ..وببساطة شدييدة وفييي الحلقة دي إتغنت أغنية البلوم في فرعو غنّى وهي في رأيي أغنية الجابري كان بيكورك فيها وبيرفع صوتو مع إنو بي فهم كامل عبد الماجد مفروض الاغنية بتخاطب برضو زول بعيد ولا يا ربي كمان ح يقولوا داك في كسلا والتاني في السعودية وعليه تجلّت عبقرية الجابري في إنو حدد المسافة بين البلدين ووضع اللحن المناسب لكل مناسبة !!!؟؟؟ صاح في الاخير بدت بعض القفشات اللطيفة من الاستاذ كامل عبد الماجد لكن ما خرجت من المألوف خصوووصا لي زول شاهد حلقات تمت فيها إستضافت الشاعر الاستاذ كامل عبد الماجد.. نجي للأغني ونبدا بي نظرية كش من ورا ..وأبدا بي نسرين .. نسرين ما غنت الاغنية دي بي صورة كويسة بالعكككس شوهتها تماااماً.. وإذا كان الليندي قد وقف لي معاذ في أححح رميني.. فخلوني انا أقيف ليكم منن البداية في طريقة نطق نسرين لي نهاية الاغنية في كلمات يبتسم .. وينقسم!!! سمعتوها بتقولا كييف؟؟ وبي ياتو طريقة ؟؟؟ ده شغل بتاع زول فاقد هوية صوت في الحتة بتاعت كيف يختم اللحن بتاع الشطرالاخير من الاغنية ..وبيتمها كوراكات أو نهرات ما معروف ليها راس من قعر.. الاغنية دي وما عشان عايز أقارن لكن أفضل من غناها بعد الجابري ولو ما ابالغ بي نفس اداء الجابري فهو الفنان منتهي الصلاحية الفنان مصطفى حمزة قبل أن ينهار صوته ويفقد هويته..أتمنى تسمعوها في تسجيل الشريط الماستر بتاع مصطفى حمزة وممكن يومها توافقوني .. نسرين صوتا فيهو رجفة ما بتصلح مع كل الأغنيات ..في حتت بيكون تطريبه عالي وفي حتت بتحسسك إنها مخنوووقة وبتغني .. معتز صباحي ما فرق كتييير من الاداء في الاغنية الأولى وما تغشو روحكم ساي ..لو عجبكم في دي فمفروض يعجبكم في الفاتت ..نفس الاداء ونفس حركة المايك ..عشان كده انا بشوف انو معتز ما كان سئ شديد في الاغنية الأولى لكن بس فرقت معاهو قصة الوقفة اللي قلتها ليكم في المداخلة الأولى في تقييمي لي معتز صباحي.. الولد مأمون صوتو ثابت بس ما طروب شديد ..صوت بتاع زول مؤدي ممتاز ..وإنت بتسمعو بتكون مرتاح لكن ما بتصل معاهو مرحلة الانتشاء الموسيقي.. هو فنان كويس لكن ما فنان مدهش.. يعني ما بتتوقع منو يدهشك بين مقطع ومقطع وما بتتوقع منو صوت خارج عن المألوف ..واللحظة اللي حاول يعمل الحركة دي وررط روحو وهو بيحاول يقول الر سااييووول دي .. الحلقة في مجملها ما مفروض تكون بي أي حال من الأحوال أفضل من الحلقة الأولى اللي إتغنت فيها يا طير يا طاير و اغنية عثمان حسين ..
| |
|
|
|
|
|
|
Re: اغاني واغاني النسخة التاسعة 2013 (Re: عمر الفاروق)
|
عمر الفاروق بالجد بتدهشني مشاركاتك في صدق وحس فني نافذ غايتو ثلاثة ارباع كلامك بتفق معاك فيهو لكن نمسك أنو كلام ( كامل عبدالماجد ) أنو هو ذاتو اتكلم وسكت عمن قدور دي براها اضافة صاح الحتة البتاعت العالي لانو الأغنية لزول بعيد تماها موية لكن حديثو عن عمر ( احمد ) وعن ( سيف الدين الدسوقي ) وعن الجابري كان حديث جيد ومرتب الحلقة دي في نظري احسن من القاتو لا،و كان فيها وحدة موضوعية ( الجابري ) زي بتاعت ( محجوب سراج ) بس دي كانت اكتر تنظيم وما غنت فيها ( فهيمة ) وبتفق معاك في اغاني كبيرة وغميسة يعني زي ( هوج الرياح ) دي علامة فارقة في الغناء السوداني وللاسف شاعرا ( مصطفى عبدالرحيم ) غير معروف لدى الكثيرين لكن شكلها في حلقة تانية عن الجابري لو لاحظت للبرومو معاذ بغني ( عليك النبي ) بالنسبة لأحمد المأمون ياخي ده من بدأ يغني ليهو ( ثلاثة سنوات ) ومعاذ ده انا قابلتو في منزل ( عمر القصاص ) سنة 1997 م وانا في ثانية جامعة معاهم الملحن ( ناجي القدسي ) وود الفيتوري الكان عامل فيها مدير فرقة ( اولاد اليت ) ومعاهم عربية جيب مكتوب فيها بوراء بخط شين ( اولاد البيت ) يعني فرق اكثر من عشر سنوات غناء وانا شايف أنو ( احمد المأمون ) امكانياتو اكبر من معاذ بكتير سيد الاسم بتفق معاك أن ( مصطفى حمزة ) غناها بشكل جيد هي ( ومشوار سيف الدسوقي ) لكن ده ما بمنع أنها أغنية كبيرة وفيها اكتر من قلبة ونص تون وأنو نسرين هندي تغنيها بالشكل الاكتر من جيد اضافة ليها غايتو انا اتطربت لطريقة اداها بعدين انت ما سمعت عمنا قدرور قال أنها بنتهى بالسكون غايتو عمنا قدور كلامو بنتهى بعلامة التعجب بالنسبة لمعتز صباحي انا علي قناعة كاملة بأن صوتو جميل لكن يطلع الخليجي البدخلو في أغنية ويثبت المايك عشان الناس تقدر تتبين ملامح صوتو وبحترم فيهو أنو حاول يكون شخصية فنية بغناهو
خليني اواصل
| |
|
|
|
|
|
|
Re: اغاني واغاني النسخة التاسعة 2013 (Re: عبير خيرى)
|
حلقة الأمس... كانت (مهضومة) بالنسبة لي... الجابري.... فنان صاحب إمكانيات لا يستهان بها.. يكفي أن أحد أصدقائي الفنانين ومنذ فترة بعيييييدة قال لي: (لو الواحد عايز يمرن صوته خصوصا في الأوكتاف العالي والأوكتاف الواطي... يغني للجابري... ياخ ده تمرين عجيب جدا)...
أحمد المأمون قام بأداء الأغنية بشكل جيد في نظري.. إلا أنني أتفق مع الأخت عبير خيري في أنه (قرررب يفرق في 3 مرات)... ولكن الأداء العام جيد جدا...
معتز صباحي... قال صديقي منذ أيام (أرفعوا أيديكم عن معتز صباحي)... وأنا أقولها مرة أخرى... أرفعوا أيديكم عن صباحي)... للفتى إمكانيات لا مثيل لها... قرأت تعليقان جميلان عن صباحي.. كتب الأول قائلا: أنا مستمع جيد للأغاني السودانية.. ولكن هذا لا يعطيني الحق في أن أشير بقبح أو بمدح عن أي فنان سوداني نسبة لأن هناك (تكانيك) لا أعرفها أنا.. وقال الثاني: معنز صباحي,, صوت يسير في نفس الطريق الذي سار فيها محمود عبد العزيز, صوت قوي ولكن يسر إلى الهلاك وبنفس الطريقة... (تقريبا تلك هي الكلمات التي قرأت أو فيما معناه)...
أنا بس عندي سؤال... إنتوا فرفور ده مالو السنة دي؟؟؟؟؟ أنا مااااا عارف ليه حاسي بيهو ماااااااااا ياهو كده... وتحسي بيهو بالو ما في البرنامج... الحاجة دي خلتو ينشٍذ مرات كتيرة... حتى لمن غنا أمبارح مع زحل... كلاهما نشذ قليلا.. ولكن الأداء العام جيد..
نسرين هندي... رائعة.. مع قلييييييل من الأنات. بس.
تحياتي,,,
| |
|
|
|
|
|
|
Re: اغاني واغاني النسخة التاسعة 2013 (Re: داليا حافظ)
|
السلام عليكم كل الحضور الأنيق..
أما عن الحلقة الخاصة بالراحل محمود العزيز...
وجخة نظري (الضعيفة) لا تختلف عن معظم التعليقات سواء كانت هنا أو في الفيسبوك أو غيرهما من مواقع التواصل الإجتماعي.... حلقة باهتة... لا ترقى بحجم محمود عبد العزيز... ولا ترقى بالفنان رقم واحد في العالم العربي إصدارا لألبومات غنائية.... ومن بعده عمرو دياب والآخرون...
أصدقكم القول؟ لم أحس بنفس صدق المشاعر والدموع الحقيقية) التي أحسست بها عند وفاة الراحل نادر خضر (إلا عند البعض فقط ممن عاشروه... ولكني قلت بيني وبين نفسي (يمكن عشان نادر كان في البرنامج ده أكتر من موسمين)... لكن أرجع وأقول أن محمود كان ي الحياة عموما أكثر من 20 سنة...!!! فأتعجب مرة أخرى...
السر قدور... ليس لديه ما يكفيه من الرصيد المعلوماتي عن الحوت... لم يجتمع معه كما إجتمع مع كرومة وسرور... أو مع أحمد المصطفى أو أو أو... ولكن مع محمود.. لا أعتقد... المهم.. لأنه... وكما يقول لي صديقي دائما (محمود مات بي سره).. لا أحد يحكي عن محمود ... غير محمود نفسه..
وأما عن الغناء.. فأعذروني.. فشهادتي في طه سليمان مجروحة.. بحكم الخوة والصداقة... ولكن ما أستطيع قوله أنه الوحيد الذي لم يكن في صوته (نشاذ) يعني بالعربي كدة ما فرق نوتة وغناها بصوت قوي... ومتمكن.. بعيدا عن عنصرية (الحواتة)...
البقية... لم ينجح أحد.. وأأكد هنا كلام أخي ناذر في إنو ما كل فنان ولده فنان.... وهناك عدة حالات وعدة أمثلة أثبتت لي بأن إن كان رب البيت للدف ضاربا.. فليس شرطا أن تكون شيمة أهل البيت كلهم الرقص..
تحياتي,,,
| |
|
|
|
|
|
|
Re: اغاني واغاني النسخة التاسعة 2013 (Re: هايل زين)
|
والله من أمبارح مستغرب في الناس البيشكروا أداء معتز صباحي لي أغنية البلوم ..!!
إنتو يا جماعة متأكدين شفتو وسمعتو الأغنية السمعناها وشفناها كلها في البرنامج ولا شفتو واحد غيرا ؟!
يا جماعة .. أعملوا مساحة فاصلة في أذهانكم بين معتز صباحي الزمان ومعتز صباحي الهسي ..! ما تخلوا الحنين للماضي يسيطر عليكم لمن تسمعوا معتز بيغني في الحاضر هسي ..
معتز زيو وزي التاج مكي الأنا اتمنييت انو يتوقف عن الغناء حفاظا على تاريخو الفني بعد ما صوتو ما طاوعوا وزيو وزي محمد وردي لمن تمبس انتقدوا في أخر اياماتو وطالبوا بالتوقف عن الغناء رغم العطاء المتواصل الذاخر ..!!
يا جماعة أحكموا على الفنان بي أداءوا الحالي مش بي تاريخو الزمان ..!!!
أقول قولي هذا وأنا في غاية الأسف ان الشاب معتز صباحي وهو في هذه السن الصغيرة صار تاريخاُ يروى !!
| |
|
|
|
|
|
|
Re: اغاني واغاني النسخة التاسعة 2013 (Re: بدرالدين بابكر مصطفى)
|
رمضان كريم يا عبير ...
Quote: عبير خيري كتبت: الأغنية الثانية كانت (بدون رسائل) للشاعر الكبير (سيف الدين الدسوقي) وغناها احمد مأمون جفون فأجاد رغم انه تلاته مرات كاد يطلع من الزمن ، بعدين انا ما عارفة حكاية الواو البتجي في نهاية الكلام اثناء الآداء دي بجيبوها من وين واشتهر بيها حسين الصادق وكم واحد من الشباب البغنوا ديل . |
طيب عندك الراحل محمود عبدالعزيز .. طول عمرو بيقرّب يفرق زمن !! التلاعب باللّحن وعمل الإضافات الخاصة توهم بأنّ الفنان قرّب يفرق زمن ...
| |
|
|
|
|
|
|
Re: اغاني واغاني النسخة التاسعة 2013 (Re: ناذر محمد الخليفة)
|
Quote: والله من أمبارح مستغرب في الناس البيشكروا أداء معتز صباحي لي أغنية البلوم ..!!
إنتو يا جماعة متأكدين شفتو وسمعتو الأغنية السمعناها وشفناها كلها في البرنامج ولا شفتو واحد غيرا ؟!
يا جماعة .. أعملوا مساحة فاصلة في أذهانكم بين معتز صباحي الزمان ومعتز صباحي الهسي ..! ما تخلوا الحنين للماضي يسيطر عليكم لمن تسمعوا معتز بيغني في الحاضر هسي ..
معتز زيو وزي التاج مكي الأنا اتمنييت انو يتوقف عن الغناء حفاظا على تاريخو الفني بعد ما صوتو ما طاوعوا وزيو وزي محمد وردي لمن تمبس انتقدوا في أخر اياماتو وطالبوا بالتوقف عن الغناء رغم العطاء المتواصل الذاخر ..!!
يا جماعة أحكموا على الفنان بي أداءوا الحالي مش بي تاريخو الزمان ..!!!
أقول قولي هذا وأنا في غاية الأسف ان الشاب معتز صباحي وهو في هذه السن الصغيرة صار تاريخاُ يروى !! |
ناذر كيفنك أخوي؟ رمضان كريم...
طبعا يا ناذر يا اخوي إنتوا أهل العلم. ونحن ما بنقدر نتكلم في حضرتكم وإنما هي إحساس آذان تستمع فقط...
كلامك صاح في إنو معتز كان زمان.... لا يختلف إثنان في هذا... ولكن هل تتفق معي في إمكانية معتز الصوتية؟ سواء حاليا أو زمان؟ بغض النظر عن (التدهور) الذي وصل إليه وإختفائه الغير مبرر بتاتا من الساحة الفنية....
للفتى تصوره الداخلي في الغناء... وهذا ما لا يوجد عند الكثيرين من أبناء جيلي....
| |
|
|
|
|
|
|
Re: اغاني واغاني النسخة التاسعة 2013 (Re: Salah Abdulla)
|
أخونا بدر الدين
Quote: مشاركة TariqAbdalla من الفيس بوك يا عمر الفاروق الزول دا كلامو صاح .. |
وعبرك تحية للأخ طارق عبد الله ..ورمضانكم كريم..
عارفين يا حبوب ..انا الحاجة الوحيييدة ما فكّرت أثبتها ولا عايز أثبتها هي قصة محبة محمود عبد العزيز رحمة الله تغشاه ..ولولا إتهامنا بالغيرة وإنو الواحد زعلان من هذا الكم الهائل من معجبي محمود واللي بيفرحنا نحن جمهور محمود كان قلت ليك إنو ظهر جمهور جديد كده لي محمود بعد وفاته عليه الرحمة والبركة ..جمهور كده خش مع النغمة بتاعت المشاهد اللي أثبتها جمهور محمود فحب يدخل الفورمة ..جمهور لا يعرف عن محمود أييي شي وحتتتى بعد ما قرر إنو من محبي جمهور ما بيكون كلف نفسو يسمع محمود بيقول شنو وبيغني كيف.. انا والحمد لله من معجبي محمود وما بنتمي لي أيي مسمى من مسميات مجموعات محمود اللي ظهرت في الاوانة الاخيرة وما بعرف منها أييي زول بي صورة شخصية وحتتى لفظة حواتي اللي بستخدمها في المادخلات كانت لي توضيح الحب لهذا الكائن الخرافي.. موقفين ما إتزحزحوا عندي بغض النظر عن حلقة اغاني واغاني عن محمود ربنا يرحمو.. المبدأ الأول حبي لي محمود ما بحتاج أثبته عبر الإنترنت وما عارف أصلاً أثبتو لي منو فحب الفنان ده مزاج شخصي بتستفيد منو إنت في المقام الأول وما لي أييي زول تاني فايدة معاك أو ضرر عشان تثبت أو تأثر فيهو.. المبدأ التاني إستغفال السر قدور للمشاهد السوداني في كتير من ما قدمه عبر البرنامج ده والكلام ده انا ما كتبتو السنة دي بكتب فيهو لي تلاتة سنوات..وده بالمناسبة ما عندو علاقة بي ما قدمه السر قدور من أشعار وروائع يكفي إنها خااالدة في وجدان أي سوداني .. ما عايز اتكلم عن حلقة محمود عبر البرنماج وانا متعمد لكن بس حاجة بسيطة أهو لفينا ولفينا وفي النهاية طلع كلامي صاااح حول الحلقة اللي ممكن يقدمها السر قدور عن محمود .. ياخ لو كلفت نفسك بحضور حلقة قدمتها قناة النيل الأزرق في سهرة إسمها أغنيات من البرنامج قدمها مصعب الصاوي كانت عبارة عن كوكتيل من أغنيات سجلها محمود في برامج مختلفة للقناة وقارنتها مع ما قدمه السر قدور ح تكتشف إنو الحلقة بتاعت أغنيات من البرامج كانت حلقة توثيقية أكتتر بي كتييير من حلقة السر قدور مع إنو مفروض أغنيات من البرامج هي ما حلقات توثيقية بقدر ما هي حلقات ترفيهية ..في حين إنو برنامج السر قدور في الأساس مهمته التوثييق وليس الترفيه .. ممكن اسألكم سؤال ؟ لو مثلاً بعد عشرين سنة واحد من أولادكم جا حضر حلقة محمود بتاعت السر قدور دي ..تفتكروا ح يعرف شنو عن محمود؟؟ وهل ح يلقا إجابة عن سؤال : من هو محمود؟؟ البرامج التوثيقية ما بيشترط فيها إنك تكون عايشت الفنان عشان تتكلم عنو ..لكن أقلاااه أبذل مجهود عشان تتحصل على معلومات وما شرط تسترجع ما تختزله في الذاكرة عشان توثق وإلا فلاااا!!! السر قدور لأنو ذاكرته مافيها عن محمود سوى لقاءات عابرة ما كلف نفسو يجتهد ويلقط عن محمود حاجة .. ياخ ده للدرجة اللي لمن جا يقدم أغنية ما بلومكم قال الاغنية من كلمات هيثم عباس.. ومن ألحان هيثم عباس أفتكر !! أفتكر؟؟؟؟ أفتكككر في برنامج توثيقي؟؟؟ لالا يا لاسر أصصصلو ما تفتكر .. ما تفتكر كللو كلللو .. بس كلف نفسك وجيب الملعومة صاح وتعال قولا ..ما تراكا في حاجات كتيييرة إنت ما عارفا من أساااسو وبتتكلم عنها كحقائق لييي ما بتقول أفتكر؟؟؟ حصيلة حلقة توثيقية عن فنان وكائن خرافي هي : كان مرهق في تسجيلاته .. وقف حائط صد للغزو اللي جايينا من الفضائيات الناس في الإستديو كلهم بيحبوهو وفرفور كان بيقلق عليهو .. تجربة فنية عمرها أكتر من ربع قرن يجي السر قدور يختزلا في النقاط دي !!! معقولة بس؟؟؟؟ ولسة محتفظ لي نفسي بي تقييمي للحلقة بي شكلها العام ..
وافر محبتي ليكم يا حبوب ..
| |
|
|
|
|
|
|
Re: اغاني واغاني النسخة التاسعة 2013 (Re: عمر الفاروق)
|
مع إحترامي لأصحاب البوست والمشاركين وإعجابي بمشاركاتهم جميعاً سؤال لو سمحتو ,,,, البوست دا مفتوح لما يدور في واغاني وأغاني 2013 عامة ؟؟؟ ولا مفتوح لي ( محمود ) إذا كان موضوع محمود دا حيطول ،،، يبقى غيرو الإسم مافي واحد يجي ناطي ويقول لي الكلام جاب الكلام الجد القصة مسخت
وعلى راي أخونا كانتونا ( العوج راي والعدل راي ) وسلامتكم
| |
|
|
|
|
|
|
Re: اغاني واغاني النسخة التاسعة 2013 (Re: ياسر منصور عثمان)
|
وكتب أيضاً الأغنية المشكلة ( تائه الخصل ) التى لحنها وتغنى بها بها الموسيقار الراحل ( محمد وردي ) قبل أن يتم اعتقالة في يوليو 1971 م ليستولى عليها الفنان ( حمد الريح ) ويسجلها في الاذاعة اثناء وجود ( وردي بالمعتقل )
سلام يا شباب ,
المعلومة دي اول مرة اسمع بيه ,,,, و دا كلام خطير جدا .... بس لا تستبعد!
| |
|
|
|
|
|
|
Re: اغاني واغاني النسخة التاسعة 2013 (Re: مازن فيصل هلال)
|
يا أحـباب ســلام.. والله في لحـظة قلت أكتفي بالمتابعـة والقراءة بدون مشاركة بالكتابة، لا بسبب ملاحظة الأخ أبوذر ولم أحس للحظة أني ممن عناهم، ولا بسبب ما كتبه آخـرون، لكـن بس شايف مافي جدوى من التعليقات العابرة وفي النهاية الموضوع زي ما بقولوا بعتبرو فرض كفاية وتعليقات كتير من الشباب وملاحظاتهم تغنيني.. لكـن ومنذ ما مكتبه الأخ ناذر بالأمس عن أن (محمود لا يحتاج لتوثيق لأنو وثق لنفسو عكس نادر)، وما كتبه الأخ العـزيز عمر الفاروق قبل شوية بنفس المعنى وأن كـلام الأستاذ قدور لا يوثق لمحمود رغـم طبيعة البرنامج التوثيقية.. دا كلو خلاني أرجع للملاحظة دي.. أولاً أنا ما شايف البرنامج من بدايتو وحتى الآن إنو هـو برنامـج توثيقي بأي شكـل وما هكذا يكـون التوثيق per definition ولم اسمع أن السـر قدور والقائمين الآخرين على البرنامـج قالوا في يوم إنو برنامجهم توثيقي وحتى لو قالوا فأي زول من البداية ح يقول ليهم إنو ما ممـكن توثق لفنان غنّى عشرات وربما مئات الألحان وأمتد عطاءهم لعشرات السنوات ومنهـم ملحنين عباقرة زي عثمان حسين والكاشف أو عبدالرحمن الريح ووردي وغيرهم وغيرهم، أو شعراء عظااام ممن كتب عشرات الأغاني الخوالد وتقول عايز توثق ليهو في أربعين دقيقة.. يعني خلاص الحلقة الأولى وثقت لعثمان حسين وإبراهيم عوض ورمضان زايد ووردي وووووو مجتمعين؟! ما عارف ليه فجأة الناس إكتشفت الحاجة فقط عند الحديث عن محمود عبدالعـزيز.. لأنو يا ناذر عثمان حسين ووردي وكثير من العباقرة برضـو ما محتاجين توثيق من السر قدور أو غيره لأنو أغانيهم موجودة ومحفوظة ويرردها الجميع آناء الليل وأطراف النهار.. ياخـوانا دا مجـرد برنامج ترفيهي زيو وزي أي برنامج آخر أو مسلسل، وعشان كدة عملوه في رمضان..وحتى البرنامج الذي إستشهد به الفاروق بتاع الشروق ما ممكن تقول عليه عندو علاقة بالتوثيق لكنه أشبه ببرامج من الأمس أو من الأرشيف الخ لأنه إعادة بث لمادة غنائية سجلها لهم الفنان المعني.. في رأي ان الحقلة عن محمود هـو نوع من (التكريم) المشابه لحفلات التأبين، لذلك كان وجود أبناءه.. ودا برجعني مرة تانية لتعليقات الأصدقاء هنا عن غناء مصعب محمود وأن الفن لا يورث الخ، ياخوانا رفقاً بهذا الشاب النضر، أنا برضـو ما سمعت إنو هـو طارح نفسو كفنان في الساحة أو وريث أو خليفة لأبوه الخ، ولا غرابة أن يشارك (مجرد مشاركة المغنيين الآخرين في الحلقة: طه ونادر) في الغناء.. وعلى فكرة: والله صوتو أجمل من اصوات كتيييييير من المغنيين الذين يملأون الإذاعات والتلفزيونات ضجيجا ونعيقا ونهيقاً.. في الدورة الماضية على ما أظن شارك أبناء إبراهيم عوض رغـم أصواتهم التعبانة لأنو الموضوع زي ما أسلفت هو شي من الذكرى والتكريم لعطاء والدهـم.. ولو قـرر مصعب أن يحترف الفن فلا أرى غضاضة في ذلك لو سلك الطريق الصحيح ووجد من يأخذ بيديه وليس إعتماداً على موروث محمود.. ملاحظة أخيرة يا الليندي: ذكرت أن كامل عبدالماجد كتب سيد الإسم العام 1970 وفي نفس الوقت قلت تخرج عام 65.. الشاعر ذكر في عدة مناسبات إنو كتبها وهو طالب بالجامعة وحتى أمبارح كررها وشبه نفسو وقتها من حيث العمر والشكل بود المأمـون.. عليه أظن المعلومة تحتاج لإعادة نظـر (والله يا الفاروق التوثيق الفي البوست دا أكتر من البرنامج زي ما ذكر عدد كبير من المشاركين والقراء عشان كدة نحرص على الملعومة!).. ودمتم..
| |
|
|
|
|
|
|
Re: اغاني واغاني النسخة التاسعة 2013 (Re: عمر الفاروق)
|
Quote: السر قدور لأنو ذاكرته مافيها عن محمود سوى لقاءات عابرة ما كلف نفسو يجتهد ويلقط عن محمود حاجة |
عمر الفاروق ياخ سلامات... وويييين الحي بيك؟ رمضان كريم..
شفت كلامك الفوق ده؟ أنا قلتو هو زاااااتو بنننففس المعنى في مشاركة سابقة... وهو ده مربط الفرس أنا شايف.. وده هو البسببو السر قدرو ما وقف كتير في حياة محمود ولا ذكر واحد من المواقف المرت عليهم مع بعض مثله مثل أي فنان من الفنانين الذين عاصرهم قدور..
النبي يا عمر طه كيف؟ :)
| |
|
|
|
|
|
|
Re: اغاني واغاني النسخة التاسعة 2013 (Re: هايل زين)
|
يا عيسى .. ياخ شكراً لي عودتك وكلامك الجميل..الغريبة انا زييك فكرت ما أمر من هنا تاني عشان إمكن بقا ما عندنا جديد نضييفو والواحد قد يكون بقا بيستهلك روحو وبيستهلك الناس بي كلام ح يبدا يتكرر.. بس لفت إنتباهي كلام مطابق تماااماً لي وجهة نظري متعلق بي الولد مصعب ..ياخ بالضببببط كده الكلام القلتو إنت ده تستاهل عليهو تشييل ليك كيس موز :) :) مصعب ما طرح نفسو فنان أبداً خصوصا وإنو في حياة محمود عبد العزيز كان ممكن يمد ليهو يد العون ويلمعوا ..الغريبة محمود عبد العزيز رحمة الله عليه حياته الشخصية الأسرية ما أستبيحت إلا بعد موته ..في حياته كان ضارب عليها نوع من الخصوصية عجيييب ..ودي درجة من درجات حساسية محمود العااالية .. مصعب أجبر على دخول الفييلد ده بالرجااالة كده إما من خلال الضغوطات الإعلامية بتسليط الضوء عليه سواء من حوارات أو حشو بتاع أمسك غنا أبوك و الشلة الحوالينو من محبين الحوت و حفظاً لي جمايل محمود.. برضو بتفق معاك إنو البرنامج بتاع أغاني واغاني برنامج ترويحي لكن للأسف السر قدور في كتير من المناسبات صرح وقال وصبغ عليهو صبغة البرنامج التوثيقي بل وذهب لي أبعد من كده وقال ده برنامج لتسليم الراية بتاعت الفن لي جيل الشباب عشان يتم الحفاظ على الإرث .. تسلم تاني يا حبوب..
| |
|
|
|
|
|
|
Re: اغاني واغاني النسخة التاسعة 2013 (Re: ياسر منصور عثمان)
|
حتى اسم البرنامج نفسه لا يدل على إنه توثيقي والناس العملوهو ذاتم ما قاصدين يعملوه توثيقي حتى لو قالها السر قدور دا ما بخليه يكون توثيقي، برنامج بتاع أغنيات وفي حلقة واحدة ممكن يجيبوا ليك غنية للكاشف وللشفيع ولي صالح الضي الفكرة بتاعة البرنامج مختلفة شوية لكن في الآخر هو برنامج غناء زيو وزي دعوة للاستماع
تحياتي مثنى وثلاث ورباع
| |
|
|
|
|
|
|
Re: اغاني واغاني النسخة التاسعة 2013 (Re: ياسر منصور عثمان)
|
Quote: حاجة تانية داير أقولا :
ارحموا طفولة أبناء محمود حاتم وحنين .. شنو يا خي في أي حفل تكريم او حلقة تلفزيونية جايبنهم وخاتينهم ديكور لاستدرار العطف ؟!
ارحموهم وأتركوهم لطفولتهم ولا تجعلوهم يعانون النقص مدى حياتهم بإصرار كل معدي برامج التلفزيون والمنتديات الثقافية على جلب واحضار حاتم وحنين فقط لأجلاسهم أمام الجمهور ليتفرج عليهم وهم في هذا السن مذهولين ذائقي الابصار وأكيد لم يعرفوا طعم الموت ويتدبروا في معانيه وعبره !!
دعوهم يعيشوا حياة طبيعية مثلهم وأقرانهم الذين فقدوا والدهم أو والدتهم في مثل هذا العمر بدلا من تركهم ديكورا وحائط مبكى للمشاهدين والعازفين يسترقون اليهم النظر ويشعرونهم بحوجتهم للشفقة والعطف ..!!
لا اريد أن اكون أكثر قسوة واقول لكم : أتركوا المتاجرة بهم ..!
ولكن أقول لكم ارحموهم يرحمكم الله .. |
اعجبني جداً يا ناذر وياريت .
.......................................................................................حجر.
| |
|
|
|
|
|
|
Re: اغاني واغاني النسخة التاسعة 2013 (Re: عمر الفاروق)
|
Quote: مصعب ما طرح نفسو فنان أبداً |
كيف الكلام ده؟؟؟ لو تابعتو الحلقة تاني حتلقوا إنو السر قدور سأله قال ليهو يا مصب إنت بتغني؟ قال ليهو أيوة.... قال ليهو داير تمسك درب الفن ده وتحترفه؟ قال ليهو أيوة....
ديل سؤالين مباشرين واضحين... وردود أوضح... الفتى ينوي السير على درب أبيه... خوفي عليه... لأنو أبوه هو محمود عبد العزيز...
| |
|
|
|
|
|
|
Re: اغاني واغاني النسخة التاسعة 2013 (Re: هايل زين)
|
سلام هايل ..
Quote: ولكن هل تتفق معي في إمكانية معتز الصوتية؟ سواء حاليا أو زمان؟ |
زمان كان عندو امكانيات صوتية وتطريبية عالية ..
حاليا : فقدهما الاثنين لاسباب يعلمها هو وبعضها ذكرها دكتور شهاب ..!!
المهم هو حاليا ما عندو امكانيات صوتية للغناء والتطريب والأحتفاء به هو بمثابة حنين للماضي من باب (يا حليل زمن الجهل) ..!
وما شابه ..!
معتز صباحي أصبح من الماضي ما في ذلك شك .. ومما يؤسف له أن الكثير من الفنانين الشباب والذين صوتهم لا يزال عذريا بكرا لا يجد الفرصة في مثل هذه البرامج للعطاء والظهور بينما اخرون يجدون الفرص بناء على مجاملات وبناء على علاقات عامة إستنادا على ماض كانوا يمتلكون نواصيه في يوم من الأيام ..!!
| |
|
|
|
|
|
|
Re: اغاني واغاني النسخة التاسعة 2013 (Re: ناذر محمد الخليفة)
|
Quote:
. ودا برجعني مرة تانية لتعليقات الأصدقاء هنا عن غناء مصعب محمود وأن الفن لا يورث الخ، ياخوانا رفقاً بهذا الشاب النضر، أنا برضـو ما سمعت إنو هـو طارح نفسو كفنان في الساحة أو وريث أو خليفة لأبوه الخ، ولا غرابة أن يشارك (مجرد مشاركة المغنيين الآخرين في الحلقة: طه ونادر) في الغناء.. وعلى فكرة: والله صوتو أجمل من اصوات كتيييييير من المغنيين الذين يملأون الإذاعات والتلفزيونات ضجيجا ونعيقا ونهيقاً
|
كلام في السليم
حتى لو طرح نفسو كفنان .. المافي شنو!؟
محمود نفسه هل كان طريقه مفروش بالورود وقابلته دوماً الجماهير بالمحبة .. بل حتى لقى القبول!؟
-------
ياخ ابوا يجيزوا صوتو .. وقالوا ليو امش اتدرب وتعال لينا بعد ستة شهور!!
| |
|
|
|
|
|
|
Re: اغاني واغاني النسخة التاسعة 2013 (Re: إبراهيم عبد الحليم)
|
اول مداخلة لى فى هذا البوست
Quote: بعد الفطور كدا لمن تجى تاخد ليك رقده وقدامك كبايه عصير ولا بتشرب ليك فى سجارة ولا سافى ومرخم ،، وبتسمع ليك فى منوعات من الاغانى بى اصوات شبابية مختلفة دا الاحساس بقى بى البرنامج دا
لانه مافيه اي نوع من التوثيق لانه كان فى المواسم الاولى من البرنامج ،،
|
وبعدين يا خوانا انتو حارقين جازكم ليه قدر دا ،،
الناس دي بتغنى على قدر استطاعتها وامكانياتها الصوتية ونحن بنستمع ليهم يعنى ما ح تغيرو شئ
ثم تانيا نحن هنا لينا كم سنة مع البرنامج دا فى شئ اتغير بعد النقه الكتيرة القلناها هنا ،،
وبعدين مافى زول من الناس ديل ح يغنى بنفس طريقة الفنان سيد الاغنية مهما حصل فى زول بجيد وبجود فى
الاداء ودا ممكن نثنى عليه وفى زول بكون ضارب ،، يعنى اعتبرو نفسكم مشغليم ليكم شريط منوعات وكان الله
يحب المحسنييين
| |
|
|
|
|
|
|
Re: اغاني واغاني النسخة التاسعة 2013 (Re: ودالعباسية)
|
" ألجامعي " هكذا كان يسميني احمد الجابري
اتيحت لي فرصة العزف مع هذا الهرم وكنت حينها طالبا بجامعة الخرطوم ..
احببته كثيرا وكنت وما زلت اعتقد بانه من اندر الاصوات التي جاد بها الله لشعب السودان ان لم يكن اجملها علي الاطلاق
كان عشقي ان انظر الي حنجرته وهو يغني واتعجب كيف تخرج هذه الاصوات او حركة حنكه المتردده والعجيبة معا ..
كان لنا جلسات عديده معه بصحبة صديقي المرحوم الشاعر الكبير ابو امنه حامد بالثوره وبحري ..
من الصعوبة بمكان ان نجد صوت يجيد تقليده
طرق سلالم والتزم النغمة السابعة في زمن لا يعرف المطربون هذه النغمات سوي الكاشف
الحانه متفرده كتفرد صوته وابدع عبد الرحمن الريح في اختياره كمؤدي للكثير من اعماله
لذا سوف لن اتحدث اليوم عمن قلدوه
| |
|
|
|
|
|
|
Re: اغاني واغاني النسخة التاسعة 2013 (Re: الليندي)
|
وتتواصل المشاترة بس المرة دي جيت قبل ما اسمع اراء الناس وعليه ما ح اسميها مشاترة .. طه الليلة بيق زييرو ..غايتو لو شكرتوهو تكونو اتلوووومتو.. لأول مرة منذ زمن بعييد أشوف طه بيغني ليهو أغنية غلبتو رسسسمي.. طه الليلة قام دفرة ..وذكرني الكورة السودانية اللي ما بيكون اللاعب فيها عارف خطة المدرب ولااا عارف هو لاعب شنو .. طه بدا ليهو بداية عجييبة غرييييبة ..والله لو ما انا عارف إنو الحلقة عن الجابري وإنو الاغنية الرياح الهوج كان قلت دي ح تكون الرياح الهووج حقت عقد الجلاد :).. كوبليه كااامل وطه غالبو يمسك في اللحن الصحيح .. كوبليه كااامل قبل القلبة وطه ما عارف ولااا متذكر لحن الاغنية المفروض يغنيها.. للدرجة اللي حسيت فيها إنو طه عايز يكلفت الاغنية ويصل لي الحتة بتاعت القلبة الموسيقية عشان يسترجع انفاسه ويلقى روحو في الحتة لاساهلة .. انا الليلة شوفت طه متجرس رسسسمي .. وفعلا الاغنية كانت كبيرة عليهو شديييد وانا بعتبرو امتحان رسب فيهو طه أو خلونا نقول دووبك جاب البااااص.. الاغنية دي إتجلّى فيها زمرواي و إتسلطن فيها بالرغم من كل كلوجاته وتليشاته في المايك.. الأغنية فيها حتات ساااهلة أي زول بيقدرا وفيها مطبات صعععبة وحااارة في أغلبا طه بططل خصوووصا المطب الأول.. مرات كتيييرة الموسيقى والإيقاع البطئ بيكسب الاغنية رونق وبيدي المشاهد إحساس إنو الفنان المؤدي قدم الاغنية بي صورة عجييبة ورهيييبة لكن لو باريت الفنان وحاولت تركز معاهو بتلقاهو كانت متورط في حتت كتيييرة بتقوم الموسيقى تنسيك كمستمع خرمجات الفنان وترجعك للتراااك الصحيح وتخليك تتعايش مع الاغنية ..وهنا تكمن عبقرية الألحان اللي بتخليك تتعايش مع الاغنية مرات حتتتى لو كان المؤدي مش ولا بد أو فشل في توصيل الاغنية بشكلها.. ما عايز أظلم طه وح اقول طه حاول يمشي في مدرسة محمود عبد العزيز بتاعت إنو يحاول يغني الاغنية بي طريقتو هو ومش يتقمص شخصية الجابري لكن ربما نسى طه إنو محمود بيغني بي طريقتو هو لكن كان عندو تكنييك عجييب ما بيخليك تحس إنو مرق من القالب الاصلي للاغنية .. اغنية زي دي بي طريقتا دي لو طه كان مشى بيها لجنة إجازة الصوت كان اترفض لأنو اللجنة ما كانت ح تصبر لحدي ما اداء طه يرتفع ..
إفتقدت كتييير وإتمنيت أغنية الجريف واللوبيا
| |
|
|
|
|
|
|
Re: اغاني واغاني النسخة التاسعة 2013 (Re: عمر الفاروق)
|
فعلا يا عمر الفاروق كلامك صحيح ميه في الميه
طه سليمان لاول مره اراه مبتعد كليا عن الاداء السليم لا ادري لماذا
هل لان الجابري كما ذكرت صعب التقليد
لكن كما ذكرت انت ايضا ان زمراوي اجاد في اداء الاغنيه اكثر من طه بكثير
اخقو يشوفوا ليهم زول تاني يقلدوهو غير الجابري
| |
|
|
|
|
|
|
Re: اغاني واغاني النسخة التاسعة 2013 (Re: عمر الفاروق)
|
Quote: طه الليلة بيق زييرو ..غايتو لو شكرتوهو تكونو اتلوووومتو.. لأول مرة منذ زمن بعييد أشوف طه بيغني ليهو أغنية غلبتو رسسسمي.. طه الليلة قام دفرة ..وذكرني الكورة السودانية اللي ما بيكون اللاعب فيها عارف خطة المدرب ولااا عارف هو لاعب شنو .. |
راح ليهو الدرب في الموية ، في لحظة كده حسيت انو الزول ده احتمال كبير يجدع المايك ويقوم جاري
| |
|
|
|
|
|
|
Re: اغاني واغاني النسخة التاسعة 2013 (Re: عمر الفاروق)
|
Quote: أو خلونا نقول دووبك جاب البااااص.. |
طه غناى يا عمر وافتكر ح يكون عنده شاو عظيم...والله شاو دى انا ذاتى اتكيفت منها ...واصلوا يا شباب ما تشتغلوا بكلامى ده انا ما شاطر شديد فى الموضوع ده ومستمتع بكلامكم ..رمضان كريم وكل سنه وانتو طيبين..
| |
|
|
|
|
|
|
Re: اغاني واغاني النسخة التاسعة 2013 (Re: الليندي)
|
اول من حببني في غناء الجابري الخال العزيزعبد الرحيم محمد الشيخ وانا يافع اضطرني ذلك الحب لحفظ معظم اغنياته وكمان الدندنة بها في الحمامات ومحلات العوم وعندما اعود ممتطيا حماري من المشروع واكون لوحدي. ظهر لي صديق أيضا يؤدي اغني الجابري ببراعة شديدة في التمانينات واختفى من الساحة ولا ادري عنه هو الأخ اشرف نصر الدين ابن عازف الكمان الحاج نصر الدين وابن عمة احمودي. علىالعوم , حبي لاغاني الجابري لم يمنعني من اشوف بعض الشواك بين الورود: اغنية انت ياقلبي المتيم احد ابياتها به كسرة واضحة تكاد تؤدي في بعض الأحيان لانهيار البنيان لولا براعة المهندس الجابري واعتقد ان الجابري منعه الحياء من حذف كلمة" ظنيتو" في " درب العشق ظنيتو ساهل" وكان يمكن تسليس(من سلاسة) الشطر بغناء البيت كالآتي: كنت قايل.... درب العشق ساهل وأشكر اشرف الشجاع الذي قام بحذفها في كل مرة اسمعه يغنيها و الله العظيم مسكتني الشفقة على البت فهيمة عندما قررربت من أداء البيت ولكن اهو طلعت سليمة تحية لكم جميعا
| |
|
|
|
|
|
|
Re: اغاني واغاني النسخة التاسعة 2013 (Re: طارق ميرغني)
|
الاخوان الكرام سلام ، لظروف عزومات خارجية وشغل صباحى طويل يتطلب نوم أطول قبل الافطار ، مع وقت ضييق بعد الافطار للإستعداد للتراويح لم أتكمن مع متابعة الحلقة الرابعة (تسجيلاً طبعاً ) ولكن أكتفيت بمطالعة التعليقات . البرنامج وهو (أغانى وأغانى ) يعادل فى كرة القدم الدورى الممتاز فى السودان يعنى قائم قائم (للمره الثامنة ) نجوم الفن الكروى والغنائى بينهم تشابة كبير !! كيف ؟ تجد نجم كره القدم فى مباراة فى القمة وفى أخرى أقل من ذلك ونفس الشىء تجده فى هذا البرنامج !! أجمع أكثر من معلق أن المطرب (معتز صباحى ) عندو مشكلة فى الحنجرة ربما يحتاج الى تدخل (جراحى ) تشبة إصابة الانكل التى (تتاور ) نجوم كرة القدم وتحرمهم من التألق فى الكثير من المباريات !!ورغم ذلك تجد (مازدا أو دفعتى صلاح محمد آدم عيسى ) أو المدربين الاجانب الذين تعاقبوا على الهلال والمريخ وأهلى شندى وغيرهم !!!يصر على إشراك هذا اللاعب ربما لجماهيرته أو ربما أستغل موهيته وخطف هدف الفوز أو التعادل مثلما يعمل الأستاذ السر أحمد قدور فى هذا البرنامج !! فمثلاً أنا شخصياً أفتقدت المطرب عاصم البنا . * قبل الختام نترحم على محمود عبدالعزيو ونقول لمعجبية من حقكم أن تكتبوا عنه دون توقف ولكن لا تجعلو منه إسطورة الغناء الاوحد فى السودان على مستوى الكبار والقدرو !! وتذكروا أن هناك أيضاً من فارقوا الحياه مثله وقدموا الكثير على سبيل المثال ، أحمد المصطفى ، حسن عطية ،عثمان حسين ، زيدان إبراهيم ، محمد عثمان وردى . وحتى فى جيله هناك المطرب نادر خضر له عليه رحمة الله شعبيته ، فأرحموا الفنان والمطرب محمود عبدالعزيز وأجعلوه بعد موته (متاح لكل الناس لكى يقفوا على ما قدمه ) فأنا شخصيا أستفدت من معلومات اللندى كثيراً عن الراحل محمود عبدالعزيز خاصه الجانب الانسانى منها ، كما أننى بحكم الانتماء الى بحرى أشعر بميول تجاه كل مبدع من بحرى ، نترحم عليه ونقول اللهم أغفر له وأرحمة . أما كون الاستاذ السر أحمد قدور لا يجد ما يقدمه لمحمود عبدالعزيز فهذا شىء طبيعى لعوامل السن وغيرها فالراحل محمود عبدالعزيز لاشك لديه من يعرفونه أكثر من الاستاذ السر أحمد قدور ، ورغم أنه رقم فى خارطة تقديم أهل الفن والطرب والتوثيق ولكن لفارق الاعمار دور هام فى القرب والبعد . ختاماً رغم أن مداخلاتنا ربما لا تتناسب مع حجم مداخلات الفطحاحة فى هذا البوست ولكن رأيت على الاقل أن أنقل لكم وجه نظر ( نظامى متقاعد من قبيلة الشرطة ومتواجد فى بريطانيا ربما هناك الكثيرون يحاولون المشاركة !! ولكن رأيت أن أمثلهم بعد الاذن الغير مكتوب مع تحياتى ومن بيرمنجهام سلام ) .
| |
|
|
|
|
|
|
Re: اغاني واغاني النسخة التاسعة 2013 (Re: ودالعباسية)
|
سلام يا شباب يا ناس هووووي حلقة الجابري دي صراحة الناس ديل كلللللهم (حنكونا) فيها و بالنسبة ليّ مافي إي زول غنى بشكل كويس السني غناء نموذج صغير من (حبيبتي بستلطفاء) الواحد ما بيقدر يقول فيهو حاجة . أحمد المامؤن صراحة طريقة غناها (الرسائل) في نظري كانت دون المستوي (آداني احساس انو اشتغله بسلم عالي جداً عليه ودا في وجهة نظري بستضح في لما ينزل للاماكن المنخفضة في صوته و وضح كتير قرب ختام الأغنية عندما ردد (صحت موعدنا الرسائل) الحته دي الزول لو بسمع مصطفي السني كويس بيتخيل البيغني مصطفي مش أحمد المامؤن برضو و (وحشة ما بتعرف) نفس القصة . (ملك الطيور) فرفور و زحل ... الديتو زي لما تخلط موية بزيت في و احد بيكون طافي بي فوق ... اصلو مافي توفيق في انهم الإتنين يغنوا الأغنية دي .. اظن لو غنتها زحل لوحدها كانت لتكون افضل ظهر هذا في الحته الصغيرة الغنتها لوحدها ... فرفور صراحة مفروض يغادر هذا البرنامج نهائي فقد اصبح ممل لكن طبعاً لو قدور ساب البرنامج فرفور حيسيبو. نجي للبلوم في فرعوا غناء ... معتز هو معتز ذات طريقته في الغناء و التطريب و التعامل مع الكلمات و المايك بس صراحة لاول مرة اشعر بانه متعب و ليس في كامل لياقته ... معتز فنان مجدد لا يشبه إي فنان سوداني اخر في استايله و طريقته و هو الأمر الذي يصعب أن تخطئيه اذن او عين . سيد الإسم ... نسرين هندي... صراحة نسرين ضعيفة في آدائيها للأغنية ... و واضح جداً عندها مشكلة مخارج عند اخر كلمة في الكوبليه ... يبتسم ... ينقسم ... يرتسم ... و أي اخر كلمة في كل بيوت الإغنية .. تزعلو ...ما بتحملو ... تبللو ... و همساتو تحنان القماري( نفسه قرب يكمل لحدي ما جرت نفس بقي ظااااهر) ... غايتو ال(الكسرة) بقت زي الزول (البتمتم) و اهو و اصلت عليها لنهاية الأغنية . بعدين ... (نانا) الهائلة دي كانت بتغني ووووين!!!؟ هسي صراحة كدا و ضع كلمة(نانا) في برنامج زي دا شنو ؟ و تتفهم شنو ؟ اللهم أني صايم .
يا هائل زين مشتااااقين يا مان .
| |
|
|
|
|
|
|
Re: اغاني واغاني النسخة التاسعة 2013 (Re: سفيان بشير نابرى)
|
سلام وتحية لكل المتابعين و صاحب البوست
ويا عمر الفاروق والله قبل ما اقرأ مداخلتك دا ردي في منتدى سودانيات بخصوص اداء طه لي هوج الريح ودا الرد
سمعت اداء طه سليمان لي هوج الرياح و لكن افتكر لو كان غناها احمد مامون كان ح ياديها احسن من طه مع اعجابي بي صوت طه و اداءه لي اغاني العمالقة
احمد مامون و هوج الرياح من حلقة نجوم الغد
| |
|
|
|
|
|
|
Re: اغاني واغاني النسخة التاسعة 2013 (Re: عبدالله وداعه الامين)
|
لو في حسنة في الحلقة دي وفي أغنية هوج الرياح فهي الحتة الصغيييرة جداً واللي انا ما عارفا كانت بي بروفة ولا بي اداء عفوي وليتها كانت عفوية عشان تزيد متعتي .. اللي هي الحتة بتاعت الليل ..الليل .. الليييل ..اللييييل.. في زول قاعد يشتغل بي تحت اداء كورالي كده راااقي وواصل فيهو بي طريقة احترافية ما قدرت افرزو ده صوت منو وفكرة منو ..غايتو عموما لو طلعوا مبرفين ليها ح تمسخ لي ولو طلعت خيال فنان فبالجججد ح احترموا شهرين لي قدام لي فكرتو أو فكرتا الخلاقة دي..
| |
|
|
|
|
|
|
Re: اغاني واغاني النسخة التاسعة 2013 (Re: عمر الفاروق)
|
حاجة أخيرة يا شباب ..والله ما بقصد قصة أجيب سيرة محمود عبد العزيز دي تعمداً ولااا بكون عايز أثبت حاجة .. ما حا أقول ليكم عذراً ومعليش لأنو سيرة محمود ما بيعتذروا منها ولو بي مرادي في كل مداخلة أجيب سييرتو .. بس لأنو حسيت الناس بتفتكر إني بقحم محمود إقحااماً بي مناسبة وبدون مناسبة ..وده ما صاح .. عموماً حبيت أوضح الفكرة دي عشان ما تفتكروا إني بعووس الابري بي الحلو مر..
| |
|
|
|
|
|
|
Re: اغاني واغاني النسخة التاسعة 2013 (Re: عبدالله وداعه الامين)
|
كلام سليم يا عمر الفاروق ..
وأنا جيت خصيصا أكتب عن الأداء الباهت لي أغنية هوج الرياح بصوت طه سليمان ..
طه سليمان كتل مود الأغنية دي زي ما كتل مود أغنية الفات زمان بتاعت محمود وبرضو مصر على الاداء بالطريقة الرتيبة الجنائزية الخالية من التعبير والتطريب ..
زي التقول مجبور عليها ..!
اما المتشنج معتز صباحي فرأي في ادائه لم يتغير .. صراحة هو الحلقة الضعيفة في البرنامج دا .. صوتو صار مؤذي جدا وغير مريح للاذن بي اصرارو على الأداء بهذه الطريقة العجيبة وتحريك المائك بعيدا عن فمه بسبب أو بدونه ..!
| |
|
|
|
|
|
|
Re: اغاني واغاني النسخة التاسعة 2013 (Re: ناذر محمد الخليفة)
|
Quote: اما المتشنج معتز صباحي فرأي في ادائه لم يتغير .. صراحة هو الحلقة الضعيفة في البرنامج دا .. صوتو صار مؤذي جدا وغير مريح للاذن بي اصرارو على الأداء بهذه الطريقة العجيبة وتحريك المائك بعيدا عن فمه بسبب أو بدونه ..! |
دا منتهي يا ناذر (نهاية الدالة الصغرى)
| |
|
|
|
|
|
|
Re: اغاني واغاني النسخة التاسعة 2013 (Re: سفيان بشير نابرى)
|
غايتو يا البت فهيمة فرفور ما ريحه نوووووهائي ... بدت الأغنية بشكل جيد بس فرفرة و الشلاقه فهيمة تعرف جيداً كيف تتعامل مع صوتها و آدت الأغنية بشكل طيب . يا جماعة زول يكلم (معاذ) انو القصة مش (صياح) زمن الصييحين دا كان زماااان بدون مكرفونات ! مِحـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــن. من طرف الحبيب ... صُباحي و استايله المميز و ال(حلي) التطريبية و الأغنية دي معتز متعود عليها و يا جماعة معتز أي نعم و اضح انو ما تمام لكن ليس سئ ابداً. زوزوو دا منو كمان يا قدور!!!!.
هوج الرياح ... طه... صراحة كدا الإغنية صعبه صعبه شديد و صراحة اكتر الأغنية دي أحمد المامؤن بيغنيها بشكل ممتاز (موجودة بصوته في اليوتيوب) - برضو ابو بكر سيد احمد احسن من تغنى بها بعد الجابري. صراحة اكتر اول مرة اسمع طه بهذا السوء ... ما قدر يعمل في الأغنية دي أي حاجة . يقال (و العهدة على الراوي) الأغنية دي تم تلحينه بشكل مشترك بين (خليل إسماعيل و الجابري) يقال أن خليل لحن الجزء الأول و الجابري لحن الجزء الأخير (العشرة بلدي) .
| |
|
|
|
|
|
|
Re: اغاني واغاني النسخة التاسعة 2013 (Re: عمر الفاروق)
|
غايتو معتز صباحي دا بذكرني العتالة اخر الدوام، مرة يخمش الغنوة من اليمين تغلبو يويديها شمال، ومرة ينط فيها دبل كلك، ومرة يغطس بيها، ومرة يقلع، يقيف ما تزبط، يقعد برة الخط، عرقان في جميع الاحوال، وخجلان، حضورو ضعيف، وصوتو خفيف، تصدقو وترني، الله لا تاجرو!
| |
|
|
|
|
|
|
Re: اغاني واغاني النسخة التاسعة 2013 (Re: سفيان بشير نابرى)
|
الشكر أجزله لأخوان الليندي و عمر الفاروق و بشير و الأخت عبير و كل الذين عطروا سموات هذا البوست بمشاركاتهم النيّرة و المفيدة و التي أغنتني و كثيرين غيرى من المشاركة و الاكتفاء بمساهمات المشاركين أعلاه و لكن ما حدث في حلقة اليوم صراحة يبعث على الأسى خلاصة إبداع الراحل المقيم الجابري التي سكبها لحناً و أداءاً في الملحمة الرائعة هوج الرياح و التي تعني له و لي و للكثيرين السلوى في فقدان الأم , اليوم طه سليمان أهان كل مشاعرنا بأدائه الضاحك المضحك البائس لهذه الملحمة و لو عذرناه في بؤس الصوت الذي أخفق فيه في مجاراة و لو القليل من روعة الجابري فلن أسامحه على الضحك في مقام الحزن و الابتسامات البلهاء أثناء الأداء و الإستهانة بمشاعري و مشاعر كل من فقد أماً . و عفواً إخوتي لو كانت كلماتي قاسية فاليوم شهدت موت أمي عليها الرحمة للمرة الثانية.
| |
|
|
|
|
|
|
Re: اغاني واغاني النسخة التاسعة 2013 (Re: طارق ميرغني)
|
يا طارق فهيمة كهربتا بقت زايدة الأيامات دي ..ما بتعرف بتين تعيش إحساس الأغنية وبتين تبقى رزينة وبتين تنطط وبتيين تبشر.. السر قدور كبّر ليها راسا شدييد فبقت خاشة ليها في دور ثقة أكبر منها.. فهيمة صوتا ما صوت بتاع تطريب غنائي.. وفيهو حاجة كده يا قول الدعاية وش البامية ماااا ياااهو ..
| |
|
|
|
|
|
|
Re: اغاني واغاني النسخة التاسعة 2013 (Re: عمر الفاروق)
|
لا يزال ... معتز الصباحي .. الحلقة الاضعف ... وانا ما عارف .. منو الاقنعو انو فنان ... يااخ دا بياكل الكلام بطريقه غريبه .. وبيقطع .. زي الكربريتر الشرقان ... و لبسته الكشميريه البايخه .. والتي يحاول ان يغطي بها صلعتووو ... لو كان لبس ليهو جلابية سودانية وعمامه كان افضل ....على شرط ما يغني كمان .... دا خرب لينا الاذن الوسطى ... الله يسامح السر قدور ... عوقنا .....
كمان شايف ... معاذ صلاح ابن البادية .. ضيف شرف سااكت ... وقعادوا زي قلتوو
| |
|
|
|
|
|
|
Re: اغاني واغاني النسخة التاسعة 2013 (Re: عمر الفاروق)
|
Quote: يا طارق فهيمة كهربتا بقت زايدة الأيامات دي ..ما بتعرف بتين تعيش إحساس الأغنية وبتين تبقى رزينة وبتين تنطط وبتيين تبشر.. السر قدور كبّر ليها راسا شدييد فبقت خاشة ليها في دور ثقة أكبر منها.. فهيمة صوتا ما صوت بتاع تطريب غنائي.. وفيهو حاجة كده يا قول الدعاية وش البامية ماااا ياااهو .. |
يعني مااااا براي البقول كده!!!!!!!!
البت دي فعلا مالها السنة دي؟ زي التقول ماسكاها أم فريحانة كده....
| |
|
|
|
|
|
|
Re: اغاني واغاني النسخة التاسعة 2013 (Re: طارق ميرغني)
|
أنا يخيل لي اليوم فقط اتضحت الفلسفة الجديدة التي قصدتها قناة النيل الازرق من تغيير استايل البرنامج المعهود في السنوات الماضية ..
كان البرنامج في السابق الغرض منه فعلا التوثيق لاعمال العمالقة الخالدة وتقديمها للاجيال الجديدة بمطربين شباب تعودوا على سماع اصواتهم ..
لكن كان البرنامج يستعين بفنانين ملتزمين جدا بتقديم الاصل كما هو وسكبه في اصواتهم .. وقد جسد هذا الفهم عصام محمد نور وقبله كانت سميرة دنيا واسرار بابكر .. والا حد ما عاصم البنا ..
عصام بالتزامه التام بالنصوص والالحان حفظا وتجويدا دون اي اضافات من عنده جعل الناس تحب سماعها منه ومن ينسى ادائه لاغنية المصير لابراهيم عوض والوصية لوردي وسرب الحسان لسيد خليفة ..
لكن يبدو ان الفلسسفة الجديدة هي تحويل البرنامج من توثيقي لتطريبي فقط لذلك تم الاستعانة بفنانين برعوا في هذا النوع من الاداء مثل مصطفى السني والذي اجاد في ذلك ومعتز الصباحي الذي حاول ولكن تاه وتوهنا ..
فاصبح البرنامج اشبه ببرنامج وناسة في قناة الام بي سي .. فقط ينقصه ( رقصات الرييايل الذين الذين لايستحون على ويوههم ) كما يقول الكويتيون .
في برنامج وناسة مجموعة فنانين وعاشقين للغناء يجتمعون في شكل ونسة يبدأوا يؤدون في اغاني عربية على طريقة التطريب والحليات والصولات الراقصة والتسلية وتنتهي الحلقة بانتهاء مراسم ال.... اي حاجة المهم لا احد يذكرها بعد ذلك ..
| |
|
|
|
|
|
|
Re: اغاني واغاني النسخة التاسعة 2013 (Re: درديري كباشي)
|
( نظامى متقاعد من قبيلة الشرطة ومتواجد فى بريطانيا ربما هناك الكثيرون يحاولون المشاركة !! ولكن رأيت أن أمثلهم بعد الاذن الغير مكتوب مع تحياتى ومن بيرمنجهام سلام ) .
بشرى مبارك ات زولنا بتاع بون يا صديق رضان كريم
التحيات العطرة ليك ولى اولاد نور عبدالله وابوالحسن محمد نور بمدينة هل.
يااخ اخوهم عبدالهادى محمد نور عامل شغل سمح خلاص على الساكسفون. بالاخص المقدمة
| |
|
|
|
|
|
|
Re: اغاني واغاني النسخة التاسعة 2013 (Re: سفيان بشير نابرى)
|
Quote: معتز هو معتز ذات طريقته في الغناء و التطريب و التعامل مع الكلمات و المايك بس صراحة لاول مرة اشعر بانه متعب و ليس في كامل لياقته ... معتز فنان مجدد لا يشبه إي فنان سوداني اخر في استايله و طريقته و هو الأمر الذي يصعب أن تخطئيه اذن او عين . |
بسسسسس دي ياها يا سفيان البفتش عنها.... جبت لي الجملة الرايحة مني من زماااااان... دي الجملة الأنا كنت بحاول أكتبها بس ما عرفت أركبها كويس في بعض... :)
Quote: يا هائل زين مشتااااقين يا مان . |
ياخ إنت لكن قالوا ساب البلد... وبكت الدموع.... بالأكتر يا صاحب..
| |
|
|
|
|
|
|
Re: اغاني واغاني النسخة التاسعة 2013 (Re: الليندي)
|
.
الحلقة عن الجابري واستضيف فيها الشاعر الجميل الصادق ألياس صاحب أجمل الأغاني في دفاتر الأجيال الحديثة للغناء السوداني، ولما نقول الأجيال الحديثة بنقصد أجيال ما بعد الحقيبة ، وأجمل ما غني من أغنيات للشاعر الصادق ألياس هو صلاح بن البادية وعلي ابراهيم اللحو والجابري الذي كان له الفضل في ظهور الصادق الياس كشاعر بعد ان تغنى له برائعته (الرسائل) في 1963 ، كما ذكر .
بدأت الحلقة فهيمة عبد الله بكارثة (إنت يا قلبي المتيم) كلمات الشاعر أبو قطاطي ، يا هي ضيعت نفسها يا الفرقة هي الضيعتها واختارت ليها سلم عالي ظهرت فيهو كأنها بتصرخ ما بتغني . الغريبة الفرقة فيها فطاحلة من الموسيقيين فليه كل سنة نحنا بنتكلم في الاختيارات ودرجات الاصوات.
الكارثة الثانية كانت (عليك النبي) ، أداها معاذ بن البادية وهذا النوع من الأغاني لا يصلح بصوت معاذ أبداً فكانت رتيبة وكانه يؤدي في نشيد في طابور الصباح.
الكارثة الثالثة كانت (رسائل) لخبطها وكوجنها وما غناها معتز صباحي ، في رأيي ان اي تعليق على آداء معتز جاء بعد الكلام الاتقال هنا، انا بعتبره فيهو تجني في حقه كفنان ، بتمنى قريباً جداً يجي التبرير المنطقي من محبي معتز صباحي والمقربين له. في فترة كنا رافضين ظهور محمود عبد العزيز لما حالته الصحية بدت تتدهور وبقى ما بقدر يغني بنفس الألق ، يبدو انه التاريخ يعيد نفسه ..
الكارثة الأخيرة والحقيقية هي (هوج الرياح) ، آآآآآآآآآآآآآآآآآخ وما عارفة بصراحة اقول شنو ، لما كنّا بنسمع الجابري في الحفلات العامة النهارية وبنشوف وبنسمع هوج الرياح دي وكأن غيمة ممطره تنزل علينا الندى والرزاز ويعيش كل منا الاغنية في زمن وعالم آخر مختلف. طه حاول يغني الأغنية بطريقته وللاسف كتير من الفنانين الشباب لا يعرفون ان هنالك نوع من الأغاني لا يقبل التحريف وهوج الرياح من ذلك النوع. جاءت الأغنية باهته وليس فيها اي نوع من الإحساس .
حلقة اليوم في رأيي (كمستمعة طبعاً) تعد أسوأ من حلقة تأبين محمود عبد العزيز .. وبرررررضو بكره أحلى ..
| |
|
|
|
|
|
|
Re: اغاني واغاني النسخة التاسعة 2013 (Re: عبير خيرى)
|
يا جماعة،،، لا يكلف الله نفساً إلا وسعها... الجماعة ديل ياها دي قدرتهم، فما تقسو عليهم وتطالبوهم يسلموكم الأغنية زي ما إنتو عايزين.. فهيمة صوتها ضعيف جداً وخبرتها قليلة.. النقلة الفجائية بتاعت نجوم الغد دي كتير بتعوق.. طه سليمان أنا شايفو أدى الأغنية بصورة طيبة، فرجاء ما تستصحبوا معاكم الجابري أثناء السمع ففي ذلك ظلم كبير لطه، وللجابري زااااااتو!!!! معتز صباحي ، الأفضل له أن يبحث عن مهنة أخرى، فالرجل ضاع وضيّع قدر العندو. أنا مستغرب في الناس المصرين إنو الزول ده لسه ممكن يعمل حاجة!!! مأمون لو لقى الزول البيوريهو ويمسكو الدرب، بيفتح صاح، الولد عندو إمكانيات كويسة وموهوب.. رأيي في زحل قلتو، وكذلك السني، وأقول للسني العمر ماشي، فحدد لينا موقفك سريع بالله..
باقي الجماهير قاعدين كومبارس ( إلا من سيرحم ربي في مقبل الحلقات) ..
| |
|
|
|
|
|
|
Re: اغاني واغاني النسخة التاسعة 2013 (Re: الليندي)
|
يا ود الفاروق انا الليلة معاك في الشتارة للآخر ياخي طهة الضرس ما جاب الباص ذاتو الطيش عديل كدة كتل الاغنية ضومة ضومة يمين رقدها كاويق رسمي اعتقد انه لو كان غناها احمد المامون كان بيكون افضل منه الف مرة فهيمة راحت ليها الاغنية في النص وفرفور جهجها زيادة الغريبة الليلة صباحي شوفته احسن كتير من البقية بعدين ما عارف ليه ما بيقدر يغني قاعد ذكرني الزول البواسيرو ملتهبة
| |
|
|
|
|
|
|
Re: اغاني واغاني النسخة التاسعة 2013 (Re: الليندي)
|
شاعرنا الجميل الصادق الياس كان نجم الحلقة...............
طه سليمان لم يوفق في اختيار الاغنية وما قدر اغنيها اطلاقا بصراحة جوبكة جوبيك مبالغة..........
فرفور مشاتر عديل كدة...............
باعتراف ناس كتار هنا البرنامج بقى ممل و لا يوثق و لا يقدم الجديد...........
يا قدور لازمك وقفة و مشاورة مع ناس جداد ممكن يدعمو مسيرة البرنامج.........اخد راي الشباب المهتمين و المتخصصين.........
شايف ناذر الخليفة عندو افكار جديدة لدعم مسيرة البرنامج............
| |
|
|
|
|
|
|
Re: اغاني واغاني النسخة التاسعة 2013 (Re: Abuzar Omer)
|
حلقة اليوم السادس كانت سيئة وعشان ما يكون الحديث انطباع شخصي حنمسك ثلاثة نقاط
- النقطة الاولى تمت استضافة الشاعر ( الصادق الياس ) والحديث عن الفنان ( الجابري ) فاذا سلمنا بانو الحلقة القبلها الكانت مع الاستاذ ( كامل عبدالماجد ) والذى له قصيدة يتيمة مع الجابري ( سيد الاسم ) لذلك قدمت أغنيات من نظم شعراء آخرين ولكن حلقة اليوم لم يتم تعريف المشاهدين بالأغنيات التى تغنى بها الفنانين والتى نظما الصادق الياس طلعنا من الحلقة بقصدتين فقط ( رسائل - الباقي باقي ) رغم أنو في أغنيات كبيرة من نظم الصادق الياس تغنى بيها الجابري دعنا من الفنانين الآخرين ، حقيقي تمنيت أن يتم تقديم اغنيتي ( الجريف واللوبيا - حكاية ملام ) مع الرسائل خاصة أغنية ( حكاية ملام ) لانو دي الأغنية الكانت سبب في عودة الجابري للغناء بعد أن اعتكف في منزلة بسب وفاة والدته أثناء اشتغالة بحفلة عرس ، لم يكن هناك تعريف بالصادق الياس واثروا في مسيرة الأغنية السودية . - النقطة الثانية نسف السر القدور تاريخه كشاعر وموثق وهو لايشير للخطأ التى وقعت فيه ( فهيمة ) رغم أنو اداؤها لأغنية ( درب المحبة ) كان لابأس بها ولكن كررت مرتين
كنت قايل والعشق ظنيو ساهل
ومافي اي اشارة للخطأ معانتو ده استخفاف بالمشاهدين يعنى لوفكرت في المعني كان لقتو ما لافق نهائياً والصحيح
كنت جاهل والعشق ظنيو ساهل
- النقطة الثالثة - أغنية ( هوج الرياح ) لم يشار لكاتبها ولم يذكر اسم شاعرها مع انها من الأغنيات التى تجرح وتداوي وشاعرها ( مصطفى عبدالرحيم ) له ثلاثة أغنيات قل أن تجد مثيلاتها في خارطة الغناء السوداني .
,,,,,,
| |
|
|
|
|
|
|
Re: اغاني واغاني النسخة التاسعة 2013 (Re: الليندي)
|
الأغنية اولى ( درب المحبة ) من كلمات ( محمد علي ابوقطاطي وألحان احمد زاهر ) والأغنية دي كان المفترض أن يتغنى بها الفنان الراحل ( خليل اسماعيل ) وقصتها أنو ابوقطاطي قابل خليل في الاذاعة وقال ليهو عندي قصيدة يتلقاها في الصالون امشي شيلا ولحنا وذهب خليل ولكنه لم يجده القصيدة فعاد لابوقطاطي فكتبها واخذها خليل وبدأ يلحن فيها وبعد اسبوع وقبل أن يسمعها لابوقاطي سمع المذيع يقدم من كلمات ابوقطاطي والحان ( احمد زاهر ) نستمع لاحمد الجابري في أغنية ( درب المحبة ) فغضب خليل وذهب لابوقطاطي معاتباً بأنه اتم لحن الأغنية وأذا كان انت اديتها للجابري فلماذا كتبتها لي فاوضح له ابوقطاطي بانه لايعطي القصيدة لاي احد سواه وبعد ذلك اكتشفوا انو الجابري واحمد زاهر ذهبوا لمنزل ابو قطاطي ولقوا الورقة مكتوبة فيها القصيدة فلحونها وغنوها وتعويضاً عن ذلك أخذ ( ابوقطاطي ) اللحن الذي وضعه ( خليل اسماعيل ) لأغنية ( درب المحبة ) وكتب علي نسقه أغنية ( الاماني العذبة ) كدي زي ما قال ( وليد عبدالطيف ) امسكوا لحن ( الاماني العذبة ) وحاولوا تغنوا بيهو ( درب المحبة ) لافق شديد والقصة دي حكاها لي الشاعر ( طلال دفع الله عبدالعزيز ) شاعر ( مصطفى سيد احمد ) وأبن أخ اشاعر ( سيد عبدالعزيز ) ، فكرة ( فرفور ) أن يدخل في أي أغنية دي فكرة شنو .
،،،،
| |
|
|
|
|
|
|
Re: اغاني واغاني النسخة التاسعة 2013 (Re: الليندي)
|
الأغنية التانية ( رسائل ) كلمات الصادق الياس الذى تغنى له ( الجابري ) بخمسة قصائد ( رسائل - الجريف واللوبيا - حكاية ملام - هاتو الياسمسن - شقاوة زول ) وتغنى له ابن البادية بخمسةأغنيات ( الباقي باقي - ليالي الصبر - تعال يا ليل - المقادير - هدي بي يا شوق وهدي ) وخلف الله حمد ( اللابسة الشريط ) واللحو ( التوب - الساعة ) وزكي عبدالكريم ( انت يا باسم ) والطيب عبدالله ( مسكين المحبة ) ، الرسائل تغنى بها في الحلقة ( معتز صباحي ) الذى فقد كثيرا من رصيده باشتراكه في هذا البرنامج ومازالت مشكلتة مع المايك قائمة .
| |
|
|
|
|
|
|
Re: اغاني واغاني النسخة التاسعة 2013 (Re: الليندي)
|
سلام يا شباب ومستمتعين بتعليقاتكم عن البرنامج
حلقة اليوم السادس كانت كلها اوف بوينت يعني مافي واحد اجاد اي اغنية .. الا فهيمة نوعا ما ..... صباحي ومعاذ وفرفور ديل حقو اودوهم الضل واخارجوهم .. شتارة منقطعة النظير
نشوف واحتمال بكرة اكون احلي تحياتي
| |
|
|
|
|
|
|
Re: اغاني واغاني النسخة التاسعة 2013 (Re: Ehab Eltayeb)
|
سلام يا شباب و تحايا للجميع ..
فكرةعدم التحضير للأغنية والتعب عليها قبل أدائها ده شيء واضح ..وثقافة الكلفتة ده شي ء رائج عندنا للأسف ..
أكتر أتنين نختلف اونتفق على صوتهم لكن بتحس بيهم أدوا الأغنية حقها وأتعاملوا معاها بمسئولية هم نسرين وفهيمة ..، الغرور مقبرة ..والشعور بانك لو أدوك أي حاجة بجضمها كذبة كبيرة ..الإجتهاد والإلتزام عامل مهم وأساسي يوازي الإبداع ..
و رغم أني في أول الأمر رميت كم تعليق عن معتز صباحي وأظنهم سلبيات ..بالجد الزول ده شيلني هم ..وخفت أننا نكون بنشوف تراجع صحته زي ما كنا بنشوف محمود قدامنا وهو بنزوي ..فبالله الحولوا والبعرفوهو ينصحو يهتم بي صحته ..الإستمرار بدون صحة جيدة عواقبه وخيمة ..الصحة قبل كل شيء..
| |
|
|
|
|
|
|
Re: اغاني واغاني النسخة التاسعة 2013 (Re: الليندي)
|
Quote: الأغنية الرابعة ( هوج الرياح ) للشاعر المظلوم دوماً حياً وميتاً ( مصطفى عبدالرحيم ابراهيم ) الكتب اجمل قصائد مغناة |
يا سلام عليك يا ناصر أظن هو شقيق الشاعر فؤاد عبدالرحيم
بخصوص الحلقة: مشكلتهم كلهم إنهم حاولوا يغنوا للجابري، صوت الجابري وطريقة أداءه مفروض يكونوا محل دراسة وبحث بطلع وبنزل زي ما عاوز وكضاب البباريهو
| |
|
|
|
|
|
|
Re: اغاني واغاني النسخة التاسعة 2013 (Re: بدرالدين بابكر مصطفى)
|
يا عيسى يا حبوب.. كمان ما للدرجة دي ياخ.. ما مكن انا اكون بي التفكير السطحي في تقييم فنان لمجرد إنو ما غناها زي ما محمود كان بيغني..ولااا دي كانت فكرتي ولااا قصدت كده وإن خانني التعبير.. وعن نفسي أبدا ما إستصحبت صوت واداء الجابري لتقييم اداء الباقيين بمن فيهم طه ..ولمن إستدليت بي زمراوي ما عشان غناها بي طريقة الجابري وتقليدو أبدا والله ..إستدليت بيهو لأنو إحساسو بيها كان عاااالي .. وحتتتى انا ما عندي مشكلة مع إنو يغنيها بي إسلوبو وطريقتو ..ياخ ده بيكون من دواااعي سرورنا والله..لكن المشكلة كانت في إنو لا غناها بي طريقتو لا غناها بي طريقة سييدا.. المشكلة كانت في إنو طه ضاااع في بداية الأغنية الضياع الواااحد ده ..ما كان قادر يعرف الاغنية لحنها عامل كيف وبتتقال كيف..ودي بتحصل لي كتييير من الناس بي سبب إنو الاغنية بتكون جديدة عليك في سمعها بالتالي ما بتكون قادر توزن الميلودي بتاعا..وده بيحصل لي وبيحصل ليك وبيحصل لي أيي زول بيحاول يدندن مع نفسو ..ما شرط الفنانين بس.. فرق بين لما تغني الاغنية بي طريقتك وبين تروح ليك الحاجة ..والدليل على كلامي ده إني انا ركزت بس في البدايات ما إتكلمت عن الباقي لأنو ببساااطة بعدها طه ركب في الموجة وبدا يغني بي نفففس طريقة اللحن الاصلي وده بيأكد إنو هو ما كان مقرر يغنيها بي طريقتو الخاصة ..لأنو ما ممكن تغني جزء بي طريقتك الخاصة وجزء بي الطريقة العادية مااا أظن في مدرسة زي دي..
| |
|
|
|
|
|
|
Re: اغاني واغاني النسخة التاسعة 2013 (Re: محمد عبد الماجد الصايم)
|
صباحي الوحيد الابدع في الحلقة الفاتت حركة يهز المايك دي بتوتر الواحد و بحس انو الزول ده شكله ما قادر يواصل لكن بعد تسمع التسجيل بتلقاه ابدع ايما ابداع كدي حاولو اسمعو التلات اغاني الغناها لي هسي من التسجيل, او بدون صورة ح تستمتعو بالفرق نفس محمود لمن كان بجي اغاني و اغاني و يبدأ يغني بتحس بانو ما ح يقدر يواصل بحركة رجوعه في الكرسي لي ورا لكن بعد تحضر اعادة الحلقة بتلقى الحوت كان متجلي و انت كانت شفقان عليه ساي
| |
|
|
|
|
|
|
Re: اغاني واغاني النسخة التاسعة 2013 (Re: حسبو عكاشة)
|
Quote: صباحي الوحيد الابدع في الحلقة الفاتت حركة يهز المايك دي بتوتر الواحد و بحس انو الزول ده شكله ما قادر يواصل لكن بعد تسمع التسجيل بتلقاه ابدع ايما ابداع كدي حاولو اسمعو التلات اغاني الغناها لي هسي من التسجيل, او بدون صورة ح تستمتعو بالفرق نفس محمود لمن كان بجي اغاني و اغاني و يبدأ يغني بتحس بانو ما ح يقدر يواصل بحركة رجوعه في الكرسي لي ورا لكن بعد تحضر اعادة الحلقة بتلقى الحوت كان متجلي و انت كانت شفقان عليه ساي |
BIG LIKE
| |
|
|
|
|
|
|
|