دفتر احوال ضابط الشرطة المناوب{2011}

Quote: من المواطن للحكومة الفاتح جـــبرا | ساخر سبيل العزيزة أمنا الحكومة، السلام عليك ورحمة الله تعالى وبركاته وبعد. ما دعانى لكتابة هذه الرسالة أليك هو خوفى على البلد .. خوفى على الوطن .. والكل قد شاهد ويشاهد ما يحدث فى بلدان عربية قريبة مننا من قتل وتخريب وعدم إستقرار ، بلدان تتشابه معنا فى كل شئ .. كل شئ .. مما يجعل مستقبل بلادنا مشابه لها ولو بعد حين ! أكتب لك هذه الرسالة رغم أنني أعرف أنك لا تستمعين إليّ (والفى راسك بتسويهو) وهذه واحدة من أوجه مأساة العلاقة بيني وبينك، إذ إنك قد دأبت على أن (تطنشى) كل ما أقوله لك بل وتعتقدين بأنه هجوم منى عليك فى ذات الوقت الذى (تدى فيهو أضانك) لمن حولك من المقربين و(المطبلاتية) الذين يصورون لك أننى أعيش فى دعة من العيش وأرفل فى النعيم مع إنو حياتى أضحت حارقة كالجحيم ! لكنني بالرغم من ذلك كله يا (أمنا الحكومة) لم أقطع العشم في أن تستمعى لى مرة واحدة خاصة وأخواتك (الحكومات العربية) قد أصابتها (أنفلونزا التغيير) وقضت عليها ! العزيزة أمنا الحكومة : لو في مواطن واحد في الدنيا وقف مع (أمو الحكومة) أكون أنا.. 22 سنة وأي حاجة إنتي بتطلبيها مني وأنا على طول بعملها.. يللا نحارب مشينا نحارب.. يللا نسالم جينا نسالم.. وشوية شوية اتخليت عن أي حاجة بتقدميها ليا (وفكيتيني عكس الهواء).. عشان أتعالج بقت مشكلة.. وعشان أتعلم بقت مشكلة.. عشان آكل (ذاتو) بقت مشكلة.. لأنو كل يوم والتاني الأسعار بتاعة الحاجات الضرورية ماشة في ارتفاع وطلعت السماء.. ومع أنك يا (أمنا العزيزة) نفضت إيدك من الحاجات المهمة والأساسية دي كلها، لكنك بعد ده ما خليتيني في (حالي) وعينك بقت بس على (جيبي) الفاضى ده.. وكل يوم والتاني جاياني بي (ضريبة) شكل.. و(رسوم) شكل تاني.. وعوائد ودمغات و(جبايات) و(غرامات) وشنو ما بعرف داك!!. قلت استحمل والحرب تنتهي ونوفر قروش الحرب الكل يوم كم مليون دولار دي وشوية الأمور تنتعش.. الحرب وقفت والسلام جا لكن مصاريف السلام كانت أكتر من مصاريف الحرب.. قلنا خلاص نشوف (حكاية البترول) ويطلع ونصدروا ويجينا قرش قرشين وشوية أشم نفس.. لكن عليك أمان الله يا (أمنا الحكومة) غير ما (الوقود) أسعارو زادت مرتين ما شفنا ليهو تأثير!!. (وما عاوز أتكلم ليكى عن حكاية الإنفصال عشان ده ما وكتو) ! والله يا أمنا الحكومة وما طالباني حليفة أنا ما عندي أي طموحات -زي ما عارفة- طموحاتى ومتطلباتي (هينة ولينة) يعني بس عاوزك تشوفي ليا شغلانة وتوظفيني حسب مؤهلاتي عشان يكون عندي دخل أعيش منو و(قفة الملاح) دي تكون في متناول إيدي... وكان مرضت تعالجيني.. وتصرفي ليا على التعليم والشوارع وصحة البيئة وتعيدي النظر في حكاية الضرائب والجبايات البقت كتيرة ومسيخة دي.....وتوقفي ليا الصرف الما في محلو .. وتشوفى ليكى طريقة لمحاربة الفقر الما عاوز يخلينا ده .. وتحاربى كمان الفساد البقى وااااضح وظاااهر ده ... هو فى فساد أكتر من إنو (الحتة الفلانية) ترفض للمراجع العام يراجع حساباتا؟ .. وعاوزك كمان الناس الفاسدين وقاعدين (يلهطو) فى قروشنا تحاسبيهم وتوقفيهم فى حدهم وترجعي لينا قروشنا منهم .. وبرضو تعالجى كل الأخطاء (العملتيها) وأول حاجة تعوضى الناس (الشلتيهم) لصالحك العام .. وبعدين قصة (قطع الشطرنج) دى تخليها .. معقولة بس كم وعشرين سنة واولادك ياهم ذاااتم ... الزول يشيلوهو من هنا يودوهو هناك وبعد شوية يشيلوهو من هناك ويجيبوهو هنا ! لازم يا أمنا الحكومة أولادك التانين يشاركوا .. غايتو شوفى ليكى حل (للكنكشة دى) والمناصب والوظائف تكون بالكفاءة وبس .. وما تنسى يا امنا الحكومة مسألة (حرية الرأي) لازم تتيحى لأى زول يقول الرأى بتاعو عشان البلد دى ما بتاعت زول دى بتاعتنا كوووولنا ولازم تراعى لسيادة القانون و(حقوق الإنسان) مش عشان إنتى الحكومة تكونى أول زول يكسر القانون ! وآخر حاجه عاوز أقولا ليكى إنو لازم يكون فى (تداول للسلطة) .معليش دى أنا عارفا (حارة) عليكى لكن هو أصلو (حكم) وللا (تأبيده) ما كمان لازم ناس تانين (تحكم) ويكون عندها خطط وبرامج مختلفة للنهوض بالبلد . العزيزة أمنا الحكومة : أها لو سمعتى كلامى ده يا أمنا الحكومة صدقينى ح نطلع من الحالة النحنا فيها دى .. وكمان كان راسك قوى وما بتسمعى الكلام دى تكون كارثه .. وأهو أنا العليا عملتو ! كسرة : ما بتوقع منك رد عشان عارفك مشغولة وكده !! ابنك: المواطن