داير ارسمِك واتخيلِك تبقى الجنة وتجرى من تحتك الأنهار وتبقى الغنوة وتسرى من حولك الأشعار الأنغام وطرب الدنيا دوزنة النشوة الفى الأوتار واتخيلك تبقى الشمس من بدرى تطلعى جايه للعصافير والشدر والناس موكب أنوار زفة ايناس واتخيلك تبقى رتينة بتغرى افواج الفراش بالنار تبقى حقيقة وتبقى حديقة ملفحه بى توب بالأريج مأهولة بالأزهار داير ارسمك بى كل تفاصيل السحر السكن فيكى يا بهية وكل الوان الحكايات الندية
داير ارسمك لا فتر لون التمنى ولا هجس فينى التجنى الريشة روح روحى العليك منكربه ماشه وجايه ليك الريشه روح روحى المعاك مغموسه فى بحر التعب حردانة ليل الفرقة ده مشتاقه لى موعد لقاك خايفه من شوك الطريق من عتمة الخوف الكعب داير ارسمك بستان مبهرج بالألق ومن بهاك دانيات قطوفك داير اكتب اسمك فى دماى وانسج حروفك شال ملون فى اناشيد المنى فى عمق احساس المعزة وفى رؤاى طعم ابتسامك والعبق وانحت ملامحك فى غناى جية الصباحات الندية فرح النهارات البهية ضى المغارب والشفق
داير ارسمك واقعد براى اتمعنك الدنيا تفرح وتبقى عيد داير ارسمك ابداكى تانى من جديد من سماح عينيكى اشرب قهوة الريد الأكيد ومن منابع ابتسامك اعبى لونك فى مسامى اخت الريده فى اعماق مسامك تبقى اللوحة احتويك وابقى الإطار وابداكى تانى من جديد ضحكة عيونك تبقى دار ابداكى تانى من جديد واكتب تفاصيلك نشيد
06-07-2013, 10:46 AM
ibrahim fadlalla ibrahim fadlalla
تاريخ التسجيل: 06-09-2007
مجموع المشاركات: 2585
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
أبوذر بابكر
ibrahim fadlalla
فيس بوك
تويتر
انستقرام
يوتيوب
بنتيريست